1. Nk’oku biyerekinwe omu Mateyo 24:9, bulya gurhi erhi igulu lyakarhushomba rhurhashinganini rhusomerwe?

YEHOVA arhulemire n’obuhashe bw’okuzigira n’okusima rhuzigirwe. Co cirhuma erhi muntu mulebe akarhushomba, rhunaciyumve kubi bwenene na ciru rhunayobohe. Kwa lwiganyo, mwali wirhu Georgina olama e Bulaya, adesire ntya: “Erhi ngwerhe 14, nyama anshomba bwenene mpu bulya naba mukozi wa Yehova. Naciyumva ndekerirwe bwenene nanarhondera okuciyumva nka ntaba muntu mwinja.” * Mwene wirhu ohamagalwa Danylo ayandisire ntya: “Erhi abasoda banshurhà, erhi banjacira n’okunkalihira bulya ndi Muhamirizi wa Yehova, nayoboha bwenene nanacibona wabusha.” Eyo nshombo ya mwene eyo enarhuvune omurhima bwenene, cikone erharhusomeza. Yezu al’ilebire oku rhwakashombirwe.​—Osome Mateyo 24:9.

2-3. Bulya gurhi abanafunzi ba Yezu bashombwa?

² Igulu linakashomba abanafunzi ba Yezu. Bulya gurhi? Bulya aka Yezu, “rhurhaba cigabi c’er’igulu.” (Yn. 15:17-19, NWT) Na ntyo, rhunakenge amarhegesi ga bene bantu cikone rhurhagaharamya erhi kuharamya ebimanyiso by’oburhegesi bwabo. Yehova yene rhuharamya. Rhunakahalira akantu kashinganine Nnamahanga yene, kantu Shetani nʼ “iburha” lyage bakahagalika: Ehaki ya Nnamahanga y’okurhambula. (Murh. 3:1-5, 15) Rhunayalize oku Obwami bwa Nnamahanga bone bwayishimâla amazibu g’abantu n’oku hano hafi-hofi bwashereza balya boshi bakalahira okuja eluhande lwabo. (Dan. 2:44; Maf. 19:19-21) Ogo guli mwanzi mwinja oku bantu batûdu cikone guli mubi oku bantu babi.​—Enna. 37:10, 11.

³ Kandi rhuba rhushombirwe bulya rhunalame nk’oku amakanuni ga Nnamahanga gadesire. Ago makanuni gaba lubero bwenene  n’olugenzi lubi lw’er’igulu. Kwa lwiganyo, ene bantu banji bakola bayemera n’obwalagale olugenzi lubi lushushine na lulya lwarhumaga Nnamahanga ashereza olugo lw’e Sodoma n’e Gomora! (Yd. 7) Bulya rhuba rhukenzire ebi Ebibliya eb’edesire okubiyerekire ebijiro bya mwene ebyo, abantu banaje barhushekera n’okurhubwira oku rhuba ntabo!​—1 Pt. 4:3, 4.

4. Morhere gahi gakarhuzibuhya amango abantu barhushombire?

⁴ Bici byakarhurhabala rhulembere amango abantu barhushombire n’okurhujacira? Rhushinganine rhube n’obuyemere busezire n’okulangalira oku Yehova arhurhabala. Aka empenzi, obuyemere bwirhu bwanarhurhabala ‘rhuhaze emyampi-kamole y’omubi.’ (Ef. 6:16) Cikone kuli kwa bulagirire okuba n’abintu binji kulusha obuyemere. Kuli kwa bulagirire rhube n’obuzigire. Bulya gurhi? Bulya obuzigire “burhabâ burhe.” Bunaheke n’okulembera ngasi bintu byoshi by’okuvuna omurhima. (1 Kr. 13:4-7, 13) Rhulabage gurhi obuzigire bwirhu kuli Yehova, kuli bene wirhu, na ciru kuli abashombanyi birhu bwakarhurhabala rhulembere okushombwa.

5. Gurhi obuzigire Yezu agwerhe kuli Ishe bwamuzibuhizemwo?

⁵ Embere z’obudufu Yezu afâga, abwira abanafunzi bage bishwekerezi ntya: “Nzigira Larha [co cirhumire] ebi Larha antegesire byo njira.” (Yn. 14:31) Obuzigire bwa Yezu kuli Yehova bwamuzibuhya alembera amalibuko gali embere zage. Nirhu, obuzigire bwirhu kuli Yehova bwanarhurhabala amango rhuli omu kanga kazibu.

6. Nk’oku biyerekinwe omu lwandiko lwa Abaroma 5:3-5, gurhi abakozi ba Nnamahanga baciyumva okubiyerekire okushombwa n’igulu?

⁶ Obuzigire kuli Nnamahanga bunakarhabala abakozi ba Yehova balembere amalibuko. Kwa lwiganyo, erhi akagombe kakulu k’Abayahudi kahanza entumwa oku zirhacijaga zahubiri, obuzigire bwabo kuli Yehova bwabashumya “okuyumva Nyamuzinda kulusha abantu.” (Ebj. 5:29; 1 Yn. 5:3) Ene nalyo, obuzigire bwa mwene obo bugendekire bwazibuhya bene wirhu, banji ba muli bo bagendekire babêra bishwekerezi ciru akaba balamire omu marhegesi g’emisi n’ag’abaminya. Co cirhumire erhi igulu lyakarhushomba, rhurhavunika omurhima cikone rhunagendekere rhwaba n’omwishingo.​—Ebj. 5:41; osome Abaroma 5:3-5.

7. Gurhi rhushinganine rhujire erhi abantu b’omu mulala gwirhu bakarhuhagalika?

⁷ Nkaba amazibu girhu madarhi ganalerhwe n’abantu b’omu mulala gwirhu. Erhi rhurhondera rhwayiga Ebibliya, bantu baguma baguma b’omu mulala gwirhu banarhondere baderha mpu rhwahabusire. N’abandi banarhanye mpu rhwasirahire. (Oshushanye na Marko 3:21.) Ciru hali amango bahikira aha barhuhagalika bwenene. Oko koshi barhujirira kurhakarhusomera. Yezu adesire ntya: “Abashombanyi b’omuntu baba b’omu mwage.” (Mt. 10:36, Mashi Bible) Ciru bene wirhu b’omulala bakarhubwira gurhi erhi kurhujirira cici, rhwehe rhurhababona nka bashombanyi birhu. Lubero n’oko, erhi obuzigire bwirhu kuli Yehova buyushuka, n’obuzigire rhujira oku bandi bantu nabo bunayushuke. (Mt. 22:37-39) Cikone, rhurhakabula kurhumikira amarhegeko n’amakanuni g’Ebibliya mpu lyo rhushagalula muntu mulebe.

8-9. Bici byarhabire mwali wirhu muguma agendekere abêra mwishwekerezi ciru akaba akagihagalikwa bwenene?

⁸ Georgina rhwaganiriraga embere agendekire abêra mwishwekerezi ciru akaba akag’ihagalikwa na nnina. Ahugwîre ntya: “Kuguma nie na nyama rhwarhondereraga okuyiga Ebibliya n’Abahamirizi ba Yehova. Cikone enyuma  za myezi ndarhu erhi nderha oku nkola narhondera okuja omu ntimanano zabo, entanya za nyama zashanja. Nayishihugûkwa oku ali aganira n’abagoma bulya nderho zabo akag’ikolesa erhi akanganiza. Akaginjacira, akagimbulula emviri, akagimbulisa omurhula n’okukabulira ebitabu byani. Erhi nyeneza myaka 15, nabatizibwa. Nyama ajira okwage koshi ly’ampanza okukolera Yehova, ampeka omu nyumpa yalimo eyindi misole yagwerhe enkômedu y’okunywa amamvu bwenene n’okujira ebindi bijiro bibi bwenene. Erhi wakahagalikwa n’omuntu walishinganine akuzigire anakushibirire, kwanaba kuzibu okulembera.”

⁹ Bici byarhabire Georgina alembere ago mazibu? Adesire ntya: “Olusiku nyama arhonderaga okumpagalika lo nayusagya nasoma Ebibliya yoshi. Nalikola nyemire n’obwalagale oku nabwine okuli, nanakagiciyumva ndi hofi-hofi na Yehova. Nakagimushenga, naye akaginyumvirhiza. Erhi ndi mw’eyo nyumpa bampekagamo, mwali wirhu muguma ampamagala emwage rhwarhondera okuyiga haguma naye Ebibliya. Muli ako kasanzi koshi, ngasi kuja oku ntimanano bene wirhu na bali birhu bakampa omurhima. Banjira muguma w’omu mulala gwabo. Nacibwinire niene n’aga masu gani oku Yehova aba ntwali ciru abarhulibuza bakaba bo bandi barhakamuhima.”

10. Bulangalire buhi rhwakaba nabo muli Yehova Nnamahanga wirhu?

¹⁰ Entumwa Paolo yayandisire oku nta kantu koshi-koshi ‘kakarhunanûla oku buzigire bwa Nyamuzinda buli muli Nnâhamwirhu Yezu Kristu.’ (Rm. 8:38, 39) Ciru akaba hali akasanzi rhwakahikira aha rhwalibuzibwa, ensiku zoshi Yehova agendekera aba aha burhambi bwirhu ly’arhurhuliriza n’okurhuzibuhya. Na nk’oku olwiganyo lwa Georgina luyerekine, Yehova anarhurhabale kugerera bene wirhu na bali birhu.

11. Gurhi obuzigire Yezu aganiriraga omu Yowane 15:12, 13, bwarhabiremo abanafunzi bage? Ohâne olwiganyo.

¹¹ Embere z’obudufu Yezu afâga, akengeza abanafunzi bage oku bakazigirana bone na nnene. (Osome Yowane 15:12, 13.) Alimanyire oku obuzigire b’okucihâna bwakabarhabire balame omu cinyabuguma na kandi balembere enshombo y’igulu. Rhuganirire olwiganyo lw’ecigamba c’e Tesalonika. Erhi eco cigamba cinarhondezibwa ntya, abantu bamo banarhondera balibuzibwa. Ciru akaba ntyo, bene wirhu na bali birhu bagendekera bayerekana olwiganyo lwinja omu buzigire n’obwishwekerezi.  (1 Ts. 1:3, 6, 7) Paolo abaha omurhima oku ‘bayushûle okuja embere’ omu buzigire. (1 Ts. 4:9, 10) Obuzigire bwakabashumize bazibuhye engonyi n’okulembera abazamba. (1 Ts. 5:14) Bakulikîre ago mahano Paolo abahâga, bulya enyuma za mwaka muguma erhi abayandikira amaruba ga kabirhi, ababwira ntya: “Obuzigire bwa ngasi muguma muli mwe oku babo buli bunene.” (2 Ts. 1:3-5) Obuzigire bwabarhabala balembere amazibu n’okulibuzibwa.

12. Amango g’ivita, gurhi bene wirhu na bali birhu bw’omu cihugo ciguma bayerekinemwo obuzigire?

¹² Rhuganirire olwiganyo lwa Danylo rhwaganiriraga embere na mukage. Erhi ivita lija omu vile yabo, bagenderera okuja oku ntimanano, banakajira okwabo koshi lyo baja omu mahubiri, n’okushangîra ebiryo bagwerhe haguma na bene wabo na bali babo. Lusiku luguma abasoda bayishigwarha Danylo aha mwage. Adesire ntya: “Bambwira oku ndahire obuyemere bwani. Erhi ndahira ntyo, banshurhagula, bampugunya eyi n’eyi, baba nk’abakola bandasha. Embere bagende, baderha oku bagaluka babake mukaniè. Cikone bene wirhu bayisha ho n’aho, barhuhira omu train, barhuhamikiza omu yindi vile. Nta lusiku nanayibagire obuzigire abo bene wirhu bazigirwa banyeresagya. N’erhi rhuhika mw’eyo yindi vile mpyahya, bene wirhu b’eyo munda bakarhuhâ ebiryo, na kandi bantabala okulonza akazi n’enyumpa! Na nirhu rhwayishibâ n’obuhashe bw’okuyegereza bene wirhu bajaga bayaka emwabo enyanya z’ivita.” Enyiganyo za ntyo ziyerekîne oku obuzigire bw’Ecikristu bwanarhurhabala rhulembere okushombwa.

13. Gurhi iroho litagatifu lirhurhabalamwo rhugendekere rhwakolera Yehova ciru akaba abantu barhushombire?

¹³ Yezu abwizire abanafunzi bage oku bakaz’izigira abashombanyi babo. (Mt. 5:44, 45) Ka kuba kulembu okujira ntyo? Nanga! Cikone kwanahashikana kugerera oburhabale bw’iroho litagatifu. Nka kula okulembera, obwinja, olukogo n’okucihasha biba bigabi b’ilehe l’iroho litagatifu, obuzigire nabo ciba cigabi c’ilehe l’iroho litagatifu. (Gl. 5:22, 23) Ago morhere ganarhurhabale okulembera enshombo. Banji b’omu bakagirhulibuza bahikire aha bashanja erhi babona b’iba, bakabo, abana babo erhi abalungu babo bali bayerekana ago morhere. Ciru banji ba muli bo bakola babà bene wirhu na bali birhu bazigirwa.  Co cirhumire erhi akaba onabone oku kuli kuzibu okuzigira omuntu okushomba bulya oli wakolera Yehova, wanahûna Yehova iroho litagatifu. (Lk. 11:13) Oyemere n’obwalagale oku okurhumikira Nnamahanga kuba kwinja ensiku zoshi.​—Mig. 3:5-7.

14-15. Gurhi olwandiko lwa Abaroma 12:17-21 lwarhabiremwo Yasmeen ly’azigira iba ciru akaba akagimuhagalika bwenene?

¹⁴ Rhuganirire olwiganyo lwa Yasmeen, olama e Moyen-Orient. Erhi aba Muhamirizi wa Yehova, iba arhanya mpu nkaba bamurhebire, arhondera ajira okwage koshi ly’amuhanza okukolera Nnamahanga. Akamujacira buzinda anahamagala bene wabo, omukulu w’idîni n’omulozi mpu lyo bamuha oloho, anamushobeka mpu yerhumire omulala gwabo gurhabamo ecinyabuguma. Mango maguma iba ayisha aha Nyumpa y’Entimanano arhondera okujacira bene wirhu erhi bali omu ntimanano! Kanji-kanji Yasmeen akagilaka enyanya z’ebyo byoshi.

¹⁵ Aha Nyumpa y’Entimanano, bene wirhu na bali birhu bakarhuliriza Yasmeen n’okumuha omurhima. Abagula bamubwira oku akolese amahano gali omu Abaroma 12:17-21. (Osome.) Yasmeen adesire ntya: “Kwali kuzibu okujira ntyo. Cikone nabwira Yehova oku antabale, nanajira okwani koshi lyo njira ebi Ebibliya edesire. Erhi omulume wani akakabulire obucafu omu masiga, ho n’aho nanji bukulamo. Erhi akanjacire, nakagimushuza n’obwirhohye. N’erhi akalwazire, nakagimushibirira.”

16-17. Bici olwiganyo lwa Yasmeen lukuyigirizize?

¹⁶ Yasmeen ahembirwe enyanya z’okuyereka iba obuzigire. Adesire ntya: “Ibaniè arhondera andangalira bulya alimanyire oku nakagimubwira okuli ngasi mango. Ahikira aha akanyumvirhiza erhi rhwakaganirire ebiyerekire idîni analonza gurhi akahira omurhula omu mwirhu. Kuhika buno, akola ansengeruka nka nkola naja oku ntimanano. Omu mulala gwirhu mukola muba obumvikane n’omurhula. Ndangalire oku okuli kw’Ebibliya kwanacihume oku murhima gw’ibaniè na ntyo ayishe rhukolere Yehova haguma naye.”

¹⁷ Olwiganyo lwa Yasmeen luyerekine oku obuzigire “bubabalira byoshi, . . . bulangalira byoshi, bunalembera byoshi.” (1 Kr. 13:4, 7) Okushombwa kwanaba kuzibu okulembera na kandi kwanavuna omurhima, cikone obuzigire bujira emisi kulusha. Obuzigire bunahindule emirhima y’abantu barhulibuza na kandi bunashagalule Yehova. Cikone, byanahashikana okuba n’obushagaluke, ciru abashombanyi birhu bakaba bali barhulibuza. Gurhi oko kwakahashikanamwo?

18. Bulya gurhi rhushinganine rhushagaluke amango rhushombirwe?

¹⁸ Yezu aderha ntya: “Muli ba bushagaluke erhi abantu bakamushomba.” (Lk. 6:22, NWT) Ntaye muli rhwe wakasima bamushombe. Rhurhanasima mpu rhufê enyanya z’obuyemere bwirhu ly’abandi bakarhukengera. Bulya gurhi rhwakaba n’obushagaluke amango rhushombirwe? Rhuganirire birhumire bisharhu. Burhangiriza, erhi rhulembera okushombwa, rhunashagaluse Nnamahanga. (1 Pt. 4:13, 14) Bwa kabirhi, erhi rhulembera okushombwa, obuyemere bwirhu bunazibuhe, n’okuba bwa ngulo ndarhi. (1 Pt. 1:7) Na bwa kasharhu, erhi rhwakalembera okushombwa, rhwanay’ishâbwa oluhembo lwinja bwenene, kw’okuderha, obuzine bw’ensiku n’amango.​—Rm. 2:6, 7.

19. Bulya gurhi entumwa zacishingaga enyuma z’okushurhwa?

¹⁹ Kasanzi kasungunu enyuma z’okufûka kwa Yezu, entumwa zaba n’obushagaluke Yezu aganiriraga. Erhi bayusa bazishurha emikoba n’okubabwira oku baleke okuyigiriza, bacishinga bwenene. Bulya gurhi? “Bulya bâli bagwerhe iragi ly’okukozwa enshonyi izino lya Yezu lirhumire.” (Ebj. 5:40-42) Balizigîre Nnawabo Yezu bwenene, co carhumaga barhadirhimana enyanya z’enshombo y’abashombanyi babo. N’omu kuyerekana obuzigire bwabo “barhahusagya” okuyigiriza omwanzi mwinja. Bene wirhu banji ene bagendekire bakolera Yehova n’obwishwekerezi ciru akaba bali balwisa amazibu. Babà bayemire oku nta lusiku Yehova anayibagire omukolo gwabo n’obuzigire bayerekine okw’izino lyage.​—Hb. 6:10.

20. Bici rhwayishiganirira omu cigabi cikulikire?

²⁰ Rhwagendekera rhwashombwa kuhika er’igulu lihikire ebuzinda bwalyo. (Yn. 15:19) Cikone rhurhashinganini rhuyobohe bwenene. Nk’oku rhwayishiganirira omu cigabi cikulikire, Yehova ‘azibuhya n’okucinga’ abishwekerezi bage. (2 Ts. 3:3) Co cirhumire rhugendekere rhwazigira Yehova, bene wirhu na bali birhu, ciru n’abashombanyi birhu. Okujira ntyo kwanarhurhabala rhugendekere rhwaba n’ecinyabuguma n’okuzibuha kiroho, na kandi oko kwanalerhera Yehova irenge n’okuyerekana oku obuzigire bujira emisi kulusha enshombo.