1-2. Indi wakarhabala omwanafunzi w’Ebibliya ahikire aha abatizibwa?

AMY olama e Fiji adesire ntya: “Nalisimire ebi nakagiyiga omw’ifunzo lyani ly’Ebibliya. Nalimanyire oku ebi nakagiyiga byali by’okuli. Cikone, erhi ntondera okucilunga haguma na bene wirhu na bali birhu bw’omu cigamba lyo nahikire aha najira empindûlo zishinganine n’okuhikira okubatizibwa.” Ebyo Amy acibwinire birhuyigirizize aka kantu k’obulagirire: Omwanafunzi w’Ebibliya anajira amajambere kuhika abatizibwe, erhi akaba abandi bali omu cigamba bali bamuha oburhabale.

² Ngasi muhubiri anarhabala ecigamba ciyololoke. (Ef. 4:16) Leilani, painiya muguma olama e Vanuatu, anakengire ntya: “Banakaderha oku lugo loshi lukuza omwana. Ntanyize nti nkaba ntyo kobinayorha lugenda okujira abanafunzi; cigamba coshi cirhabala omuntu aje omu okuli.” Abantu b’omu mulala, abîra n’abalimu bw’omwana boshi banamurhabale lyahikira aha akula. Banajire ntyo omu kumuha omurhima n’okumuyigiriza ebintu by’obulagirire. Ko n’oko, kugerera olwiganyo lwinja lw’abahubiri, amahano gabo n’okuha abanafunzi omurhima byanabarhabala bahikire obubatizo.​—Mig. 15:22.

3. Bici ebi Ana, Dorin, na Leilani badesire byakakuyigiriza?

³ Bulya gurhi omuhubiri oli walongoza ifunzo ly’Ebibliya ashinganine ashagalukire oburhabale abandi bahubiri bakaha omwanafunzi wage? Orhanye kw’ebi Ana, painiya wa pekee olama e Moldavie adesire: “Kuba kuzibu muntu muguma ahikirize ye nnene amalagirire goshi gw’omwanafunzi w’Ebibliya wamarhondera ajira amajambere.” Dorin, wundi painiya wa pekee okolera mw’eco cihugo, adesire ntya: “Hali amango abandi bahubiri  baderha akantu kahûma oku murhima gw’omwanafunzi, n’obu ciru niehe ntalikarhanyizeko.” Leilani naye ayushwire akandi kantu, adesire ntya: “Okuzigira omwanafunzi n’okumushagalukira kwanamurhabala ahugûkwe bwinja olubaga lwa Yehova.”​—Yn. 13:35.

4. Bici rhwaganirira mw’eci cigabi?

⁴ Cikone nkaba wanakacidosa ntya: ‘Gurhi nakarhabalamwo omwanafunzi w’Ebibliya ly’ajira amajambere n’obu arhali niè mwalimu wage?’ Rhuganirire ebi rhushinganine okujira erhi muhubiri mulebe akarhulalika oku rhumuluse okw’ifunzo lyage ly’Ebibliya n’ebi rhwakajira amango omwanafunzi w’Ebibliya amarhondera okuja oku ntimanano. Na kandi rhwabona oburhabale abagula bashinganine bahe omwanafunzi w’Ebibliya ly’ajire amajambere kuhika abatizibwe.

5. Omukolo gwawe guli guhi amango olusize omwalimu okw’ifunzo lyage ly’Ebibliya?

⁵ Amango g’ifunzo ly’Ebibliya, omwalimu ye gwerhe omukolo murhangiriza gw’okurhabala omwanafunzi ahugûkwe Akanwa ka Nnamahanga bwinja. Erhi omwalimu akakubwira oku omuluse emunda aj’ilongoza ifunzo ly’Ebibliya, oshinganine omanye oku oli murhabazi wage. Kw’okuderha oku omukolo gwawe kuli kumurhabala. (Muh. 4:9, 10) Muli ntyo, burhabale bucigi wakalerha amango olusize omwalimu okw’ifunzo lyage ly’Ebibliya?

6. Amango olusinye okw’ifunzo ly’Ebibliya, gurhi wakakolesa akanuni kali omu Emigani 20:18?

⁶ Orheganye ifunzo ly’Ebibliya. Burhangiriza, ohûne mwalimu w’ifunzo akumanyise bintu bilebe okubiyerekire omwanafunzi. (Osome Emigani 20:18.) Wanamudosa ntya: “Ka wananganirira okubiyerekire akalamo k’omwanafunzi wawe? Mwanzi guhi mwaganirira haguma naye ene? Bici olonzize oyo mwanafunzi aciyigirize muli ogo mwanzi? K’obwine nka hali akantu nakaganirira erhi ntakaganirira haguma n’omwanafunzi amango g’ifunzo? Gurhi nakarhabala omwanafunzi wawe ajire amajambere?” Kobinali, omwalimu arhashinganini abwire omulusize okw’ifunzo emyanzi eyekire omwanafunzi wage enabonekine nk’ihwe, cikoki okuganira haguma n’okulusize kwanarhabala omwanafunzi. Misionere muguma ohamagalwa Joy anacihangane okujira ntyo omu mango olusibwe n’owundi muhubiri. Adesire ntya: “Okuganira n’ondusize embere z’akasanzi kunamurhabale ashagalukire omwanafunzi n’okumanya burhabale buci akamuhâ.”

7. Bulya gurhi okwanine ocirheganye amango walusa owundi muhubiri okw’ifunzo lyage ly’Ebibliya?

⁷ Erhi bakakubwira oku olusanye okw’ifunzo ly’Ebibliya, kuli kwa bulagirire orheganye omwanzi gwayishiganirirwa kw’er’ifunzo. (Ezr. 7:10) Dorin, olya mwene wirhu rhwaganiriraga, adesire ntya: “Nnanyumve nshagalusire bwenene erhi mbona oku owandusa okujilongoza ifunzo anacirheganyize bwinja. Nk’anacirheganyize, anahâne oburhable bushinganine.”  Rhuhugûkwe oku erhi omwanafunzi akabona oku mwè n’oyu okulusize mwacirheganyize bwinja, aho mwanamuyeresa olwiganyo lwinja. Cikoki erhi akaba orhahashiri okurheganya omwanzi goshi bwinja-bwinja, ocihe hisanzi hisungunu ly’omanya entanya z’obulagirire z’ogo mwanzi.

8. Bici wakajira ly’isala lyawe lilerhera omwanafunzi w’Ebibliya obunguke?

⁸ Isala kaba kantu ka bulagirire amango gw’okulongoza ifunzo ly’Ebibliya, co cirhumire kuli kwa bulagirire orheganye ebi wakayishigwasa omw’isala erhi mwalimu akakuhûna ojire isala. Erhi wakajira ntyo, isala lyawe lyanaba linja bwenene. (Enna. 141:2) Hanae, olama e Japon, acikengire amasala ga mwali wirhu muguma wakagilusa omwalimu wage w’Ebibliya. Adesire ntya: “Kugerera amasala g’oyo mwali wirhu, nahugûkwa obwîra buzibu agwerhe haguma na Yehova, nani nalonza mbe akage. Ci kandi, erhi akagwasa izino lyani omu masala gage nahugûkwa oku anzigire bwenene.”

9. Nk’oku binayerekinwe omu Yakobo 1:19, bici oshinganine ojire ly’orhabala amango olusinye okw’ifunzo?

⁹ Orhabale omwalimu amango g’ifunzo. Omamuyovbi, painiya wa pekee olama omu cihugo c’e Nigeria adesire ntya: “Omurhabazi mwinja kuyumvirhiza ayumvirhiza amango g’ifunzo. Naye analerhe entanya zage, cikone arhaba wakuderha binja, bulya amanyire oku guli mukolo gwa mwalimu okulongoza ifunzo.” Gurhi wakamanyamwo mangaci wakaderha na gurhi wakaderha ly’orhabala omwanafunzi? (Mig. 25:11) Oyumvirhize bwinja amango omwalimu n’omwanafunzi bali baganira. (Osome Yakobo 1:19.) Erhi wakajira ntyo lyo wakamanya mangaci okwanine okulerha oburhabale bwawe. Kobinali oshinganine orhanye embere oderhe. Kwa lwiganyo, orhashinganini obe wakuderha binji, orhashinganini otwe mwalimu akalimi amango ali aderha, orhanashinganini okulerha ogundi mwanzi gurhashushini n’omwanzi muli mwaganirira. Cikoki, kugerera ebinwa bisungunu wakayushula, enfoto, lwiganyo lulebe erh’idoso, wanarhabala omu kuhugûla akantu k’obulagirire kali mw’eco cigabi muli mwaganirira. Haligi amango wakaciyumva nka ntaco wakayushulira omwanafunzi kw’ebi muli mwaganirira. Cikoki okumuvuga omunkwa n’okumuyereka oku omushagalukire bwanaba burhabale bunji wajijire ly’oyo mwanafunzi ajira amajambere.

10. Gurhi ebi wacibwinîre byakarhabala omwanafunzi w’Ebibliya?

¹⁰ Oganirire ebi wacibwinîre. Erhi wakabona oku kuli kwa bulagirire, wanaganirira oyo mwanafunzi kwa bofofi gurhi wamanyagamwo okuli, amazibu warhimanine nago n’oku wagahimiremwo, erhi wanamubwira gurhi Yehova akurhabire omu kalamo kawe. (Enna. 78:4, 7) Nkaba omwanafunzi anaba n’obulagirire bw’okuyumva ebi wacibwinîre omu kalamo kawe. Byanazibuhya obuyemere bwage na kandi byanamushumya ajire amajambere kuhika abatizibwe. Na kandi, byanamurhabala amanye oku akakalwisamwo amazibu ali arhimanana nago.  (1 Pt. 5:9) Mwene wirhu Gabriel, painiya olama e Brésil, akengire obunguke abire nabo erhi ali ayiga Ebibliya. Adesire ntya: “Erhi nkayumva ebi bene wirhu bacibwinîre, nahugûkwa oku kumbe Yehova aba amanyire amazibu rhulwisa. N’erhi akaba abwo bene wirhu bahimire ago mazibu, kw’okuderha oku nani nanagahima.”

11-12. Bulya gurhi kuli kwa bulagirire okuyegereza n’obushagaluke omwanafunzi wayishire oku ntimanano?

¹¹ Ly’omwanafunzi w’Ebibliya ajira amajambere kuhika abatizibwe, ashinganine akaja oku ntimanano z’ecigamba ngasi mango n’okuyunguka nazo. (Hb. 10:24, 25) Kanji-kanji, entimanano ntanzi omwanafunzi ajako mwalimu wage omulalika kuli yo. Erhi ayisha oku ntimanano, ngasi muguma wirhu anamuha omurhima ly’agendekera ayisha aha Nyumpa y’Entimanano. Gurhi ngasi muguma wirhu akajiramwo ntyo?

¹² Oyegereze omwanafunzi n’obushagaluke. (Rm. 15:7) Erhi omwanafunzi akayegerezibwa n’obushagaluke oku ntimanano, anaba n’irala ly’okucib’iyisha aha Nyumpa y’Entimanano agandi mango. Buzira kugayisa omwanafunzi, omulamuse n’obushagaluke n’okumuyeresa abandi bene wirhu b’omu cigamba. Orhakagirhanya mpu ali mwanafunzi wa lebé yene, bulya byanahashikana mwalimu wage acerwe erhi abe agwerhe emikolo ajira aha cigamba. Oyumvirhize bwinja ebi omwanafunzi ali aderha, onayerekane oku kobinali omushibirire. Gurhi oko kuyegereza omwanafunzi n’obushagaluke kwakamurhabala? Mwene wirhu Dmitrii, wabatizibagwa my’eyi myaka misungunu egezire anali akola ene nka murhabazi w’abagula, akengire ebi abonaga aha Nyumpa y’Entimanano erhi ahaja oburhanzi. Adesire ntya: “Mwene wirhu muguma erhi abona ndi narhindira okuja omu Nyumpa y’Entimanano enyanya z’oboba ayisha anyegereza rhwaja rhwenaye omu ndani. Bantu banji bayishikandamusa. Nasomerwa bwenene. Nasima bwenene, nayumva nka ciru rhukajira entimanano ngasi lusiku. Oko nabonaga nta handi nalisagikubona.”

13. Gurhi olugenzi lwawe lwakarhabala omwanafunzi w’Ebibliya?

¹³ Oyerekane olwiganyo lwinja. Olugenzi lwawe lwinja lwanarhabala omwanafunzi ayemere n’obwalagale oku anabwine okuli. (Mt. 5:16) Vitalii, oli wakola nka painiya omu cihugo c’e Moldavie, adesire intya: “Naciyigirizize gurhi abandi bantu bw’omu cigamba balama, okubarhanya, n’olugenzi bajira. Oko kwanyemeza n’obwalagale oku Abahamirizi ba Yehova bo babà omu okuli.”

14. Gurhi olwiganyo lwawe lwakarhabala muntu mulebe ly’ajira amajambere?

¹⁴ Ly’omwanafunzi ashinganana okubatizibwa, kuli kwa bulagirire akakolesa ebi ali ayiga. Ensiku zoshi birhalugiba bilembu okujira ntyo. Cikone erhi omwanafunzi akabona kunganaci wayungusire omu kukolesa amakanuni g’Ebibliya, oko kwanamushumya ayige olwiganyo lwawe. (1 Kr. 11:1) Rhucibiganirira olwiganyo  lwa Hanae rhwaganiriraga eyo nyanya. Adesire ntya: “Bene wirhu na bali birhu bakagilama nk’oku ebi nakagiyiga byanalidesire. Nakabona gurhi nakaba wakuha abandi omurhima, wakubabalira na wakuyerekana obuzigire. Ngasi mango bakagiderha abandi bwinja. Nalonza nti mbayige.”

15. Gurhi olwandiko lwa Emigani 27:17 lurhurhabiremwo rhubone obulagirire bw’okujira obwîra haguma n’omwanafunzi amango ali aja oku ntimanano?

¹⁵ Ojire obwîra haguma n’omwanafunzi. Ngasi mango nk’omwanafunzi ayishire oku ntimanano, omuyereke oku omushibirire. (Fl. 2:4) Ka wanakolesa ako kasanzi ly’omuganiza? Buzira kuderhera ebintu bimuyerekire ye nnene, wanamuvuga omunkwa oku mpindulo akola ali ayerekana, omudose lugenda ifunzo lyage, omulala gwage n’omukolo ajira. Enshambalo za ntyo zanarhuma mwaba bîra. Okuba mwîra w’omwanafunzi w’Ebibliya kwanamurhabala ahikire obubatizo. (Osome Emigani 27:17.) Ene Hanae ali akola nka painiya w’akasanzi koshi. Omu kukengera amango ajaga oku ntimanano oburhanzi, adesire ntya: “Erhi ncijirira abîra omu cigamba, nakayumva ndi nalindirira n’irala linji okuja oku ntimanano, na kandi nakaja oku ntimanano ciru n’amango ntamire. Nashagalukira abo bîra bani bahyahya, n’oko kwantabala ndeke okukomerana n’abîra barhakagikolera Yehova. Nal’ilonzize nyegerere Yehova na bene wirhu na bali birhu. Na ntyo nahiga okubatizibwa.”

16. Kundi gurhi wakajira ly’orhabala omwafunzi w’Ebibliya akaciyumva oku naye ali muguma w’omu cigamba?

¹⁶ Erhi omwanafunzi akagendekera ajira amajambere n’empindulo zishinganini, wanamurhabala akaciyumva oku naye akola ali muguma w’omu cigamba. Wanajira ntyo omu kuba wa kuyankirira ebigolo. (Hb. 13:2) Mwene wirhu Denis, oli wakolera omu cihugo c’e Moldavie, akengire amango acikag’iyiga Ebibliya, adesire ntya: “Kanji-kanji bene wirhu bakagirhuhamagala niè na mukaniè oku rhubalambagirire. Bakarhuganirira gurhi babwine oburhabale bwa Yehova omu kalamo kabo. Oko kwakarhuha omurhima. Orho rhusanzi rhwakagigeza haguma nabo rhwakayushula irala lirhu ly’okulonza okukolera Yehova n’okurhurhabala rhuyemere n’obwalagale oku rhwayishiba n’akalamo k’omwishingo.” Erhi omwanafunzi w’Ebibliya akayemererwa okuba muhubiri orhac’ibatizibwa, wanamuhûna akuluse omu mukolo gw’amahubiri. Diego, mwene wirhu olama e Brésil, adesire ntya: “Bene wirhu banji bakagimbwira oku mbaluse omu mahubiri. Eyo yàli njira nyinja yantabîre mbamanye bwinja. Okujira ntyo kwanyigirizize binji, na kandi nakaciyumva ndi hofi-hofi na Yehova na Yezu.”

17. Gurhi abagula bakarhabalamwo abanafunzi b’Ebibliya?

¹⁷ Mukacilongeza akasanzi kw’okugeza haguma n’omwanafunzi w’Ebibliya. Mwe bagula, okuzigira n’okushibirira abanafunzi kwanabarhabala bajire amajambere kuhika babatizibwe. K’onacihangane okuganiza abanafunzi bayishire oku ntimanano? Banabona oku kobinali  obashibirire erhi wakakakengera izino lyabo, bwenene amango bamarhondera okuhâna amashuzo omu ntimanano. Ka wanashanja eprograme eyerekire akasanzi kawe ly’olusa muhubiri mulebe emw’omwanafunzi wage w’Ebibliya? Okuja emw’oyo mwanafunzi kwanamurhabala omu njira orhali rhanyize. Jackie, painiya muguma olama e Nigeria, adesire ntya: “Banafunzi banji banasomerwe okuyumva oku mwene wirhu rhwâli rhwenaye omu mahubiri ali mugula. Mwanafunzi muguma w’Ebibliya aderha ntya: ‘Ntamango pasteri wani akajira ebiri nk’ebi. Analambagirire abagale bone erhi akaba bamuhire ensaranga!’” Oyo mwanafunzi akola ali aja oku ntimanano.

18. Nk’oku biyerekinwe omu Ebijiro by’Entumwa 20:28, gurhi abagula bakahikirizamwo omukolo bahâbirwe?

¹⁸ Mukomereze n’okuha abalimu b’Ebibliya omurhima. Mwe bagula, mugwerhe omukolo gw’okurhabala abahubiri lyo bajira omukolo gwabo gw’amahubiri bwinja, ciru n’okulongoza amafunzo g’Ebibliya. (Osome Ebijiro by’Entumwa 20:28.) Erhi omuhubiri okayoboha okulongoza ifunzo ly’Ebibliya bulya oli aho, wanamurhabala okulilongoza. Olya Jackie rhwaganiriraga adesire ntya: “Ngasi mango abagula banandôse gurhi abanafunzi bani bayosire. Erhi ntimanana n’amazibu omukulongoza ifunzo ly’Ebibliya, abagula banampe amahano gakantabala.” Abagula banarhabala n’okuha abalimu omurhima lyo babà bakulembera. (1 Ts. 5:11) Jackie ayushwire ntya: “Nnanshagaluke bwenene erhi abagula bampa omurhima n’okumbwira oku banashagalukire omukolo njira. Ezo nderho za ntyo zinantulirize nka kula amishi maholo gahira ehibohololo oku murhima amango g’ecidurhu. Oko kumvuga omunkwa kunanzibuhye n’okuyushula omwishingo gwani okubiyerekire omukolo gw’okulongoza ifunzo ly’Ebibliya.”​—Mig. 25:25.

19. Mwishingo guhi rhweshi rhwakaba nago?

¹⁹ Rhwanarhabala muntu mulebe akule kiroho, ciru akaba muli kano kasanzi nt’ifunzo ly’Ebibliya rhugwêrhe. Buzira kuderha binji, ebi rhwayushula birheganye bwinja byanarhabala amango rhulusinye okw’ifunzo. Rhwanaba bîra bw’okunali b’abanafunzi amango bamayisha aha Nyumpa y’Entimanano, na kandi rhwanabayereka olwiganyo lwinja lw’okuyiga. N’abagula banaha abanafunzi omurhima omu kulonza akasanzi kw’okubaganiza na kandi banaha abalimu omurhima omukubakomereza n’omu kubavuga omunkwa. Kobinali, rhwanakaba n’omwishingo munji amango rhwamahugûkwa oku nirhu rhwajijire ehirhu higabi omu kurhabala muntu mulebe ahikire aha azigira n’okukolera Larha wirhu, Yehova.