1. Omuhigo gwa Nnamahanga kuli bene bantu guba guhi?

NNAMAHANGA agwerhe omuhigo mwinja kuli bene bantu. (olole amahugûlo nomero ya 6 gali oku bukurasa bwa 208) Alemîre omulume n’omukazi murhanzi, Adamu na Eva, mpu balame omu busani bwinja bwe Edeni. Âl’ilonzize baburhe abana, bahindule igulu lyoshi libe paradizo, barhegeke n’ensimba.​—Omurhondêro 1:28; 2:8, 9, 15.

2. (a) Gurhi rhumanyiremwo oku Yehova ajira nk’oku âl’irheganyize? (b) Bahi bayish’ilama emyaka n’emyaka omw’igulu?

² K’orhanyize oku hali olusiku rhwanacilame omu paradizo? Yehova adêrha: “Nadesire [. . .], na nabijira.” (Izaya 46:9-11; 55:11) Ajira nk’oku âl’irheganyize, na ntabyo byakamuhanza. Arhuhugûlire oku “arhali busha” bwarhumaga alêma igulu. (Izaya 45:18) Alonzize liyubakwemwo. Na bahi? Na myaka inga bayish’ilamamwo? Ebibliya edesire: “Abashinganyanya [abakenga Nnamahanga] bayishi yima omw’igulu, banalame mwo emyaka n’emyaka.”​—Ennanga 37:29, NWT; Amafulûlo 21:3, 4.

3. Erhi rhubona abantu balwala n’okufâ, gurhi rhucidosa?

³ Ene, abantu bali balwala n’okufâ. Omu bihugo binji muli ivita n’okunigana. Cikwone arhali ntyo kwo Nnamahanga âl’ilonzize. Bici byadwirhe ntyo? Ebibliya yon’ehûgwire.

4, 5. (a) Ndi wakolesâgya enjoka ly’aganiza Eva? (b) Gurhi omuntu mwinja akahindukamwo cishambo?

⁴ Ebibliya edesire oku Nnamahanga ajira omushombanyi. Aba malahika oderhwa “Shetani” na kandi ye  “Ibilisi.” (olole amahugûlo nomero 7 gali oku bukurasa bwa 208) Erhi Shetani aganira na Eva, njoka akolesâgya. (Amafulûlo 12:9; Omurhondêro 3:1) Amuyemeza amanye mpu njoka enali ya muganiza.

⁵ Ndi walemaga Shetani Ibilisi? Ka Nnamahanga? Nanga! Erhi Yehova alêma igulu mpu Adamu na Eva balamemwo, âli erhi alemîre ba malahika banji empingu. (olole amahugûlo nomero ya 8 gali oku bukurasa bwa 210) Malahika muguma ahinduka, acijira Ibilisi. (Ayubu 38:4, 7) Ka byanahashikana ntyo? Rhurhole olwiganyo: Gurhi omuntu mwinja akahinduka cishambo? Erhi aburhwâ cirhâli cishambo. Cikwone lusiku luguma anarhondera acifînja ebirhali byage. Anagendekera abirhanya kwo, na ntyo entanya mbi zanarhangira zaba nyinji muli ye. Erhi abona obulyo b’okuzimba ako kantu acifînjaga, anakazimba. Aho amahinduka: cishambo.​—Osome Yakobo 1:13-15.

6. Gurhi malahika muguma ahindusiremwo mushombanyi wa Nnamahanga?

⁶ Ko byaberîre oyo malahika. Erhi Yehova alêma Adamu na Eva, ababwira oku baburhe “babumbe igulu.” (Omurhondêro 1:27, 28) Oyo malahika arhanya nkaba ntya: “Aba bantu boshi bakaharamya Yehova, bulya gurhi niehe barhakakamparamya?” Oku agendekîre arhanya ntyo, anali agendekera acifînja ebintu Yehova yene ashinganine. Alônza abantu bakamuharamya. Ho n’aho agend’irheba Eva. (Osome Omurhondêro 3:1-5) Ntyo k’oyo malahika ahindusiremwo Shetani Ibilisi, mushombanyi wa Nnamahanga.

7. (a) Bulya gurhi Adamu na Eva bafîre? (b) Bulya gurhi rhukafâ n’okushosihala?

⁷ Adamu na Eva barhacikengaga Yehova, balya oku ilehe âl’ibahanzize mpu barhalyaga. (Omurhondêro 2:17;  3:6) Bajira ecaha. (olole amahugûlo nomero 9 gali oku bukurasa bwa 210) Bafâ nk’oku Yehova âl’idesire. (Omurhondêro 3:17-19) Bulya abana ba Adamu babîre banyabyaha, barhangira okufâ. (Osome Abaroma 5:12) Lyo rhuhugûkwa bulya gurhi abana ba Adamu na Eva babire banyabyaha, rhurhole olwiganyo: Erhi wakaforhomolera emigati omu nforhomo ehumbarhire, eyo migati yoshi yaja mw’eyo nforhomo yaba eri kw’ecimanyiso c’oko kuhumbarhala. Erhi Adamu na Eva babula bukenga Nnamahanga, bâba banyabyaha. Bulya Adamu ali shakulwè wirhu, rhwabire banyabyaha. Rhuli “mw’ecimanyiso” c’ecaha ca Adamu. Bulya rhuli banyabyaha, rhunashosihale n’okufâ.​—Abaroma 3:23.

8, 9. (a) Bici Shetani âl’ilonzize ayemeze Adamu na Eva? (b) Bulya gurhi Yehova arhanigâga abo bagoma ho n’aho?

⁸ Shetani arhangizâgya obugoma bwage erhi ashumika Adamu na Eva mpu baleke okukenga Yehova. Âl’ilonzize abayemeze oku Yehova anywêsire, n’oku ali murhambo/murhegesi mubi, n’oku arhal’ibalongîze bushagaluke. Shetani adêrha n’obwalagale oku bene bantu banacirhegeka bone buzira Nnamahanga. Ashib’iderha oku Adamu na Eva bakacirholîre bone emihigo y’okumanya aminja n’amabi. Gurhi Yehova akajijîre muli akwo kanga? Akanizîre abo bagoma ly’ayusa obo bugoma. Cikwone, erhi akabanizire, ka kwali kwa yusa obo bugoma, n’okuyerekana oku Shetani ali munywesi? Nanga!

⁹ Yehova arhanigâga abo bagoma ho n’aho. Alekêra bene bantu akasanzi mpu bone bacirhambule. Oko kwarhabîre Yehova ayerekâne oku yene omanyire ebyakaba binja lugenda bene bantu n’oku Shetani ali munywesi. Ecigabi ca 11 caganirira ogo mwanzi kwa buliri. Cikwone nawe, gurhi obwine omuhigo gwa Adamu na Eva? Ka  bajijîre bwinja okuyemera Shetani n’okugomera Yehova? Yehova âl’ibahire byoshi: akalamo kimana, ahantu hinja h’okulama n’omukolo mwinja. Shetani yehe ntabyo al’ibahire. Nk’âli we, gurhi wakajijîre?

10. Gurhi rhwakacihebamwo eluhande lwa Nnamahanga?

¹⁰ Ene, rhweshi rhwanacishoga nk’oku Adamu âl’ilemirwe  n’oluhuma l’okucishoga. Kuli kucishoga obuzîne erhi lufû. Rhwanacishoga Yehova nka murhegesi wirhu n’okuyerekana oku Shetani ali munywesi, erhi rhwanacishoga Shetani abe Nnâwirhu. (Ennanga 73:28; Osome Emigani 27:11) Bantu banyi bone bali bakenga Nnamahanga. Arhali Nnamahanga yeri warhambula igulu. Ndigi oli warhambula igulu erhi akaba arhali Nnamahanga?

11, 12. (a) Bici Shetani alaganyîze Yezu? Na bici oko kurhuyigirizize? (b) Mandiko gahi gayerekine oku Shetani ye murhegesi w’er’igulu?

¹¹ Yezu ali manyire ndi oli warhambula igulu. Lusiku luguma Shetani “amuyerêka amami goshi g’en’igulu n’irenge lyago.” Anamulaganya ntya: “Nakuha ebyo byoshi okafukama wamparamya.” (Mateyo 4:8, 9; Luka 4:5, 6) Erhi akaba ago mami garhali ga Shetani, ka kagalanyize Yezu? Nanga. Amarhegesi goshi ga hanw’igulu gaba ga Shetani.

¹² Haligi amango wakaderha mpu: “Mashi arhali Shetani ye murhegesi w’er’igulu! Mashi Yehova ye murhambo walyo, Nnamahanga Ogala Byoshi, ye walemâga byoshi biri omw’igulu n’omumpingu!” (Amafulûlo 4:11) Kwo binali Yehova ye wabilemaga. Cikwone Yezu adesire n’obwalagale: oku Shetani ye ‘murhambo w’er’igulu.’ (Yowane 12:31; 14:30; 16:11) Entumwa Paolo yahamagâla Shetani ‘nnamahanga w’er’igulu.’ (2 Abakorinti 4:3, 4) N’entumwa Yowane yayandika oku “igulu lyoshi liri omu buhashe bw’omubi.”​—1 Yowane 5:19.

13. Bulya gurhi rhulagirire okw’igulu lihyahya?

¹³ Igulu liri lyagendekera lyaba libi bwenene. Ngasi hoshi oli wayumva ivita, obunizi, ebituliro, obulyalya.  Bene bantu banaciseze okuja kwalwisa lwisa ebyo byoshi, cikwone bayabirwe. Hano hofi-hofi, okw’ivita lya Armagedoni, Nnamahanga ashereza er’igulu libi. Er’igulu Yehova alihindula libe lihyahya linabe lishinganyanya.​—Amafulûlo 16:14-16; Olole amahugûlo nomero 10 gali oku bukurasa bwa 210.

14. (a) Ndi Yehova acishozîre mpu abe Mwami w’Obwami bwage? (b) Bici Ebibliya yâli erhi yalebîre okubiyekire Yezu?

¹⁴ Yehova acishozîre Yezu abe Mwami w’Obwami bwage, obo bwami, bw’oburhegesi bwage bw’empingu. (olole amahugûlo nomero 11 gali oku bukurasa bwa 210) Hakola hali myaka minji, Ebibliya elebire oku Yezu akabîre “Mwami w’omurhula” n’oburhegesi bwage buli bw’emyaka n’emyaka. (Izaya 9:6, 7, NWT) Okubiyerekire obo bwami, Yezu abwizîre abaganda bage mpu bakashenga ntya: “Obwami bwawe buyishe, Obulonza bwawe bube en’igulu nk’empingu.” (Mateyo 6:10) Nk’oku rhwayish’ibona omu cigabi ca 8, Obwami bwa Nnamahanga bwa shereza amami g’igulu goshi n’obo Bwami bwanarhangira bwarhambula. (Osome Daniyeli 2:44) Ahabuzinda anahindula igulu libe Paradizo.

15. Igulu lihyahya byo bici?

¹⁵ Ebibliya elaganyize: “Rhuli rhwalindirira [. . .] empingu mpyahya n’igulu lihyahya, omwo mwayish’iba obushinganyanya.” (2 Petro 3:13; Izaya 65:17, NWT) Hali amango Ebibliya ekolesa oluderho “igulu” omukulonza oku ganirira abantu balamire omw’igulu. (Omurhondêro 11:1) “Igulu lihyahya” kuli kuderha, bene bantu boshi bagendekire bakenga Nnamahanga, anali abagisha.

16. (a) Luhembo luhi Nnamahanga ayish’iha abayish’ilama omw’igulu lihyahya? (b) Bici rhwakajira lyo rhuyish’ihabwa kw’olo luhembo?

 ¹⁶ Yezu alaganyîze bene bantu bayish’ilama omw’igulu lihyahya oku bayish’ihabwa “obuzîne bw’ensiku n’amango.” (Marko 10:30) Bici rhwakajira lyo rhuyish’ihabwa olo luhembo? Ly’obihugûkwa, Osome Yowane 3:16; 17:3. Rhulolage ebi Ebibliya eganirire okubiyerekire akalamo ka hanw’igulu omu paradizo.

17, 18. Gurhi rhumanyiremwo oku bene bantu bayish’ilama omu murhula ah’igulu?

¹⁷ Harhakaciba bubi, ivita, obushumusi, obunizi. Ah’igulu harhakaciba muntu mubi yeshi yeshi. (Ennanga 37:10, 11) Nnamahanga “ayish’iyusa ivita.” (Ennanga 46:9; Izaya 2:4) Igulu lyoshi lyayish’iyunjula bene bantu basimîre Nnamahanga banamukenzire. Hayish’iba omurhula emyaka n’emyaka.​—Ennanga 72:7.

¹⁸ Bene bantu bayish’ilama omu murhula. Erhi abana ba Israheli bakakenzîre Nnamahanga, Nnamahanga akâg’ibalanga banakalama omu murhula. (Bene-Levi 25:18, 19) Omu Paradizo ntabyo byoshi byoshi byash’ikarhuyobohya. Rhwayish’ilama omu murhula emyaka n’emyaka.​—Osome Izaya 32:18; Mikeyo 4:4.

19. Bulya gurhi rhwakayemera oku hanâbè biryo binji?

¹⁹ Ebiryo byayish’iba binji. “Idaho lyayera engano” “n’okuntondo kwayish’iyera.” (Ennanga 72:16) Yehova, “Nnamahanga wirhu, ayish’irhugisha” n’obudaka bwayera emburho.​—Ennanga 67:6.

20. Gurhi rhumanyiremwo okw’igulu lyash’ihinduka paradizo?

²⁰ Igulu lyoshi lyayish’ihinduka paradizo. Bene bantu bayish’iyubaka enyumpa nyinja, bayish’iba n’amashwa minja. (Osome Izaya 65:21-24; Amafulûlo 11:18) Igulu lyoshi lyayish’iba linja kulusha ishwa ly’Edeni. Yehova  ash’ikarhuha ebintu byoshi rhulagirirekwo. Ebibliya edesire ntya: “Onalambule okuboko kwawe oyiguse ngasi cibamw’omûka.”​—Ennanga 145:16.

21. Gurhi rhumanyiremwo oku hayish’iba omurhula ekarhi k’ensimba n’abantu?

²¹ Hayish’iba omurhula egarhi k’abantu n’ensimba. Abantu barhakaciyoboha ensimba. Abana bakashârha n’ensimba nkali buzira kuziyoboha.​—Osome Izaya 11:6-9; 65:25.

22. Gurhi Yezu anajirîre balya boshi balwazire?

²² Nta muntu yeshi yeshi wanacibè mulwala. Amango Yezu âli hanw’igulu, afûmize bantu banji. (Mateyo 9:35; Marko 1:40-42; Yowane 5:5-9) Cikwone, ye nka Mwami w’Obwami bwa Nnamahanga, Yezu anafûmyè bene bantu boshi. Nta muntu yeshi yeshi wanac’iderhe, erhi: “Ndwazire.”​—Izaya 33:24; 35:5, 6.

23. Bici Nnamahanga anajirîre abafîre?

²³ Abafîre banafûke bacib’ilama. Nnamahanga alaganyize oku afûla emiliyoni y’abantu. “Haba obufûke bw’abashinganyanya n’abarhali bashinganyanya.”​—Osome Yowane 5:28, 29; Ebijiro by’Entumwa 24:15, NWT.

24. Ka wanasima nawe olame omu Paradizo? Bulya gurhi?

²⁴ Rhweshi rhushiganine okucishoga. Rhwanarhangira okuciyigiriza kuli Yehova n’ebi alonzize rhujire, erhi kandi rhwanajira ebi rhusimire. Erhi rhwakacishoga okujira ebi Yehova asima, rhwaba n’obulangalire bwinja bw’akasanzi kayisha. Lusiku luguma, mulume muguma abwîra Yezu mpu ayish’imukengera ahafûla abafîre. Yezu amulagânya: “wanâbè haguma nani omu Paradizo.” (Luka 23:43, NWT) Omu cigabi cikulikire, rhwayiga binji kuli Yezu, n’omwo rhwabona gurhi Yezu ahikiriza ebiragane binja bya Nnamahanga.