1. Ndi wakarhubwira enjira nyinja y’okuharamya Nnamahanga?

MADÎNI manji ganaderhe mpu ganayigirîze okuli okubiyerekire Nnamahanga. Cikoki, birhakahashikana ntyo bulya ganayigirize ebir’ilubero kuli Nnamahanga na kuli enjira nyinja y’okumuharamya. Gurhi wakamanyamwo enjira nyinja y’okuharamya Nnamahanga? Yehova yene wakarhubwira eyo njira nyinja.

2. Gurhi wakamanyamwo enjira nyinja y’okuharamya Nnamahanga?

² Yehova arhuhîre Ebibliya. Kugerera Ebibliya rhwanamanya enjira nyinja y’okumuharamya. Ociseze oyiyige. Bulya Yehova akuzigîre, akurhabala oyunguke n’enyigirizo z’Ebibliya.​—Izaya 48:17.

3. Bici Nnamahanga alonzize rhujire?

³ Bantu banji banaderhe oku Nnamahanga aba ayemîre amadîni goshi. Cikoki arhali ntyo kwo Yezu ayigirizîze. Adesîre ntya: “Arhali ngasi ombwira, Yagirwa, Yagirwa, ye waje omu Bwami bw’empingu, ci olya ojira oku Larha oli omu mpingu alonza, y’oyo ye wahike omu Bwami bw’empingu.” Rhushinganine rhumanye obulonza bwa Nnamahanga, rhunabujire. Kuli kwa bulagirire bulya Yezu ashushânyize abantu barharhumikira Nnamahanga n’abanizi, “bantu bakola amaligo.”​—Mateyo 7:21-23.

4. Bici Yezu adesîre okubiyerekire enjira y’okuharamya Nnamahanga?

⁴ Yezu abwizîre abaganda bage, oku kurhakabîre kulembu okujira obulonza bwa Nnamahanga. Adêrha ntya: “Mugere omu luso lufundîre, buly’oluso lugali n’olushanjusire  eri njira ehêka ebwa kuheza, na banji bayigeramwo. Ci oluso lufunda n’enjira efundîre yo ehêka ebwabuzîne, na banyi bayibona.” (Mateyo 7:13, 14) Enjira efundîre, kw’okuderha njira nyinja y’okuharamya Nnamahanga, eyo njira ehesîre ebwa buzîne bw’ensiku n’amango. Enjira eshanjusire kw’okuderha njira mbi y’okuharamya Nnamahanga, eyo njira ehesîre ebwa lufû. Yehova arhakasima ciru omuntu yeshi yeshi afê. Co cirhumire ahire abantu boshi obulyo bw’okumumanya.​—2 Petro 3:9.

5. Gurhi wakamanyamwo abaharamya Nnamahanga omu njira nyinja?

⁵ Yezu adesîre oku byanahashikana okumanya abantu bali baharamya Nnamahanga omu njira nyinja, erhi rhwakalolereza ebijiro byabo n’obuyemere bwabo. Adêrha ntya: “Mwabamanyire oku bijiro byabo.” Ashub’iyushula ntya: “Ngasi murhi mwinja guyanakwo amalehe minja.” (Mateyo 7:16, 17) Okwo kurhali kuderha oku abakristu b’okuli baba bimana. Cikoki banakacihangana okujira aminja. Rhulolage gurhi rhwakamanya abakristu b’okuli.

6, 7. (a) Bulya gurhi enyigirizo z’okuli ziba ziyimangire omu Bibliya? (b) Bici olwiganyo lwa Yezu lurhuyigirizize?

⁶ Enyigirizo zirhu zishinganine ziyimangire omu Bibliya. Ebibliya edesire ntya: “Amandiko goshi galongozibagwa na Nnamahanga, gaba gabulagirire omukuyigiriza, omu kukalihira, omu kukubul’ebintu, omu kukomereza omu bushinganyanya; na ntyo omuntu wa Nyamuzinda abe n’ebikolanwa byoshi, anashinganane okujira ngasi cijiro cinja.” (2 Timoteyo 3:16, 17, NWT) Entumwa Paolo yayandikîre abakristu ntya: ‘Erhi muba mwamayumva Oluderho lwa Nnamahanga rhwammumanyisâgya, murhaluyankirirâga nka kanwa ka muntu, ci, nk’oku  lunali, mwaluyankirira nka Luderho lwa Nnamahanga.’ (1 Abatesalonika 2:13) Enyigirizo z’okuli ziba ziyimangîre oku luderho lwa Nnamahanga, Bibliya. Ezo nyigirizo zirhayimangira okuntanya za bene bantu, erhi oku ndîbi, erhi kandi kantu koshi koshi.

⁷ Enyigirizo za Yezu zoshi zâl’iyimangîre omu luderho lwa Nnamahanga, Bibliya. (Osome Yowane 17:17) Ngasi mango akâg’ikolesa amandiko nk’ashuza abandi. (Mateyo 4:4, 7, 10) Abakozi ba Nnamahanga banakakulikira olwiganyo lwa Yezu: enyigirizo zabo zoshi ziba ziyimangire omu Bibliya.

8. Ndi Yezu adesîre rhukwanine okuharamya?

⁸ Yehova yene rhukwanine okuharamya. Olwandiko lw’Ennanga 83:18, NWT ludesire ntya: “W’oyo, izino lyawe we Yehova, wene oba enyanya z’igulu lyoshi!” Yezu âl’ilonzize abantu bamanye bwinja Nnamahanga w’okuli ye ndi anabamanyisa izino lyage. (Osome Yowane 17:6) Adêrha ntya: “Yehova yene okwanine okuharamya na yene okwanine okuha omukolo mutagatifu.” (Mateyo 4:10, NWT) Abakristu b’okuli banakakulikira olwiganyo lwa Yezu. Banakaharamya Yehova yene. Banakolese izino lyage n’okulimanyisa abandi n’okubabwira ebi Yehova anajirîre bene bantu.

9, 10. Gurhi rhuyerekanamwo oku rhuzigîre abandi?

⁹ Rhukwanine okuba n’obuzigire b’okuli ekarhi kirhu. Yezu ayigirîza abaganda bage oku bakwanine okuzigirana bone nanene. (Osome Yowane 13:35) Ciru rhwakaba bagale, erhi bakenyi, rhube rhulamire ngahi, rhube bamasomo erhi rhube rhurhasomâga, rhukwanine rhweshi rhuzigirane. Obuzigire bwirhu bukwanine burhuhumanye, bunarhujire rhube nka bana ba mulala muguma. (Abakolosi 3:14) Co cirhuma rhurhaja omw’ivita rhurhanayirha bantu. Ebibliya edesire oku rhwakamanyire “abana ba Nyamuzinda n’aba Shetani” ntya: “ngasi yeshi orhajira  obushinganyanya arhaba wa Nyamuzinda, n’orhazigira mwene wabo kwo na kuguma.” Eyushwire oku “rhukwanine rhuzigirane; rhurhabaga aka Kayini wali mwene-omubi, aniga omulumuna.”​—1 Yowane 3:10-12; 4:20, 21.

¹⁰ Rhunakolese akasanzi kirhu, emisi yirhu n’ebirugu birhu lyo rhurhabala abandi n’okubaha omurhima. (Abahabraniya 10:24, 25) “Rhunakajirira abantu boshi aminja.”​—Abagalasiya 6:10.

11. Bulya gurhi rhukwanine okuyemera oku kugerera Yezu yene lyo rhwakacungulwa?

¹¹ Rhukwanine okurhumikira Yezu bulya yene ye njira y’okurhucungula. Ebibliya edesire ntya: “Na nta wundi obucire bwankarhengakwo; bulya en’igulu erhaba lindi izino ciru n’eliguma lyahirwe abantu lyankarhuciza.” (Ebijiro by’Entumwa 4:12) Omu cigabi ca 5 rhwayizîre oku Yehova arhumîre Yezu ah’igulu lyo aba ngombôlo kuli bene bantu barhumikira Nnamahanga. (Mateyo 20:28) Yehova acishozîre Yezu abe Mwami w’igulu. Co cirhuma Ebibliya eba erhubwizire oku akaba rhulonzize okuyish’ilama ensiku n’amango, rhukwanine rhurhumikire Yezu.​—Osome Yowane 3:36.

12. Bulya gurhi rhurhaja omu politike?

¹² Rhurhashinganini okuja omu politike. Yezu arhajirâga politike. Erhi aba ali omu k’emmanja embere za Pilato, adêrha ntya: “Obwami bwani burhali bw’en’igulu.” (Osome Yowane 18:36) Nirhu rhunayige Yezu omu kubera bishwekerezi oku Bwami bwa Nnamahanga. Co cirhuma rhuli bakristu bw’okuli omw’igulu lyoshi, rhurhaja omu politike. Ciru akaba ntyo, Ebibliya erhubwizire oku rhukarhumikira ‘abarhegesi barhukulire,’ kw’okuderha abakulu b’amarhegesi. (Abaroma 13:1) Rhunakakenga amarhegeko g’ecihugo rhulamiremwo. Cikoki erhi irhegeko liguma muli ago marhegeko gabo lyakarhuma rhwagomer’amarhegeko ga Nnamahanga, rhunayige entumwa  zashuzâgya erhi: “Rhukwanine okuyumva Nyamuzinda kulusha abantu.​—Ebijiro by’Entumwa 5:29; Marko 12:17.

13. Bici rhukayigiriza okubiyerekire Obwami bwa Nnamahanga?

¹³ Rhukwanine okuyemera oku Obwami bwa Nnamahanga bone bwayish’iyusa amazibu g’igulu. Yezu adesîre oku “Emyanzi minja y’Obwami” yayalagazibwa omw’igulu lyoshi. (Osome Mateyo 24:14) Nta burhegesi bwa bene bantu bugwerhe obuhashe bw’okujira ebi Obwami bwa Nnamahanga bwayish’ijirira abantu. (Ennanga 146:3) Yezu arhuyigirizîze gurhi rhwakashenga okubiyerekire Obwami bwa Nnamahanga. Adêrha ntya: “Obwami bwawe buyishe, Obulonza bwawe bube en’igulu nk’empingu.” (Mateyo 6:10) Ebibliya edesire oku Obwami bwa Nnamahanga bwayish’ishereza amarhegesi goshi ga bene bantu n’okubwarhambula emyaka n’emyaka.​—Daniyeli 2:44.

14. Orhanyize oku bandi bwo bali baharamya Nnamahanga omu njira nyinja?

¹⁴ Ocidosagye ntya: “Bandi enyigirizo zabo ziba ziyimangire omu Bibliya? Bandi bakamanyisa abandi izino lya Nnamahanga? Bashimbulizi b’idîni lihi bazigirana bwenene? Bandi bo baba bayemire oku Nnamahanga arhumaga Yezu lyo acungula bene bantu? Bashimbulizi b’idîni lihi barhaja omu politike? Bashimbulizi b’idîni lihi bayalagaza oku Obwami bwa Nnamahanga bwone bwakayusa amalibûko ga bene bantu?” Wanashuza n’obwalagale oku banali Bahamirizi ba Yehova bone.​—Izaya 43:10-12, NWT.

15. Bici rhukwanine okujira lyo Nnamahanga ayemera enterekêro yirhu?

¹⁵ Orhayemeraga kone oku ho Nnamahanga aba, bulya n’abazimu bayishi oku hwaba cikoki barhamurhumikira. (Yakobo 2:19) Lyo Nnamahanga ayemera enterekêro yirhu, rhukwanine okujira byoshi arhuhunyire rhujire.

16. Bulya gurhi rhukwanine rhurhenge omw’idîni ly’obunywesi?

 ¹⁶ Lyo Nnamahanga ayemera enterekêro yirhu, rhushinganine rhurhenge omw’idîni ly’obunywesi. Omulebi Izaya ayandisîre ntya: “Huluki omwôla, muciyôbôle.” (Izaya 52:11; 2 Abakorinti 6:17) Rhukwanine rhuleke ngasi kantu koshi koshi kagwerhe olushangi n’idîni ly’obunywesi.

17, 18. (a) ‘Babiloni Mukulu’ kw’okuderha gurhi? (b) Bulya gurhi kuli kwa bulagirire okurhenga omw’idîni ly’obunywesi?

¹⁷ Idîni ly’obunywesi byo bici? Ciri cinyabuguma c’amadîni goshi gakayigiriza n’okuharamya Nnamahanga lubero n’ebi Ebibliya eyigirizize. Ebibliya ehamagire eco cinyabuguma c’amadîni g’obunywesi: ‘Babiloni Mukulu.’ (Amafulûlo 17:5) Bulya gurhi egahamagire ntyo? Bulya enyuma ly’enkuba y’ecihonzi y’oku lwa Nuhu, omu lugo lw’Ebabiloni mw’enyigirizo z’obunywesi zarhondererâga. Ezo nyigirizo zayîsha zalandira kuhika zalumîra omw’igulu lyoshi. Kwa lwiganyo, abantu b’Ebabiloni bakag’iharamya ecigusho ca banyamuzinda basharhu. Ene nalyo madîni manji ganakayigiriza oku Nnamahanga abamwo bantu basharhu. Cikoki Ebibliya edesire n’obwalagale ntya: haba Nnamahanga muguma yene w’okuli Yehova, n’omugala Yezu Kristu. (Yowane 17:3) Abantu b’Ebabiloni bâl’iyemîre oku erhi omuntu akâfîre, hali akantu kamurhengamwo kagend’ilama handi-handi. Cikoki buba bunywesi.​—Olole amahugûlo nomero 14, 17 na 18 gali oku bukurasa bwa 213, 214 na 215

¹⁸ Nnamahanga adesire n’obwalagale, oku hano hofi-hofi ashereza idîni ly’obunywesi. (Amafulûlo 18:8) Kw’oyumvirhe bulya gurhi kuli kwa bulagirire bwenene okurhenga omw’idîni ly’obunywesi? Yehova akubwizire mpu orhenge omwo duba-duba.​—Amafulûlo 18:4.

19. Erhi wakahiga okukolera Yehova, gurhi ayerekanamwo oku akushibirire?

 ¹⁹ Abira bawe n’abantu b’omu mulala gwawe hali amango bakabula buhugûkwa bulya gurhi wamahiga okukolera Yehova n’okurhenga omw’idîni ly’obunywesi. Hali akasanzi bakakubulisa omurhula. Cikoki Yehova yehe, arhakulekerere. Waja omu mulala gw’emiliyoni y’abantu bazigirana bwenene. Waba n’obulangalire bw’okuyish’ilama ensiku n’amango, omw’igulu lihyahya. (Marko 10:28-30) Erhi wakalembera, byanayish’ihashikana abira bawe n’abantu b’omulala gwawe bakâg’ikuhagalika nabo bayige Ebibliya.

20. Bulya gurhi kuli kwabulagirire okuharamya Nnamahanga omunjira eshinganine?

²⁰ Hano hofi-hofi, Obwami bwa Nnamahanga bwarhondera bwarhambula igulu lyoshi, bunayuse obubi boshi. (2 Petro 3:9, 13) Byay’ishiba binja bwenene! Abantu boshi bayish’ikaharamya Yehova nk’oku aba alonzize. Ojirage empindûlo zikwanine ly’oharamya Nnamahanga omunjira nyinja.