1, 2. Bantu baguma bahi na bahi babîre bira ba Yehova?

NDI wakalonza abe mwira wawe? Olya ozigira n’oyu muyumvikine mwenaye. Olya ogwerhe amorhere gakusimisize n’olugenzi lwinja.

² Yehova acishozîre bantu baguma na baguma mpu bâbè bira bage. Kwa lwiganyo, Abrahamu âli mwira wa Yehova. (Izaya 41:8; Yakobo 2:23) Daudi naye alisimîrwe na Yehova. Adêrha oku Daudi âli “muntu w’omurhima gwage.” (Ebijiro by’Entumwa 13:22) Omulebi Daniyeli âli “murhonyi bwenene” omu masu ga Yehova.​—Daniyeli 9:23.

3. Bulya gurhi Abrahamu, Daudi na Daniyeli bâli bira ba Yehova?

³ Gurhi Abrahamu, Daudi na Daniyeli babiremwo bira ba Yehova? Yehova abwîra Abrahamu ntya: “Wayumvirhîze izu lyani.” (Omurhondêro 22:18, NWT) Yehova aba Mwira w’abirhohye n’abamurhumikira. Ciru anaba Mwira w’ishanja lyoshi. Abwîra ishanja lya Israheli ntya: “Mukaziyumva izu lyani, lyo mba Nyamuzinda winyu ninyu mube lubaga lwani.” (Yeremiya 7:23) Erhi wakalonza okuba mwira wa Yehova, oshinganine omurhumikire.

4, 5. Gurhi Yehova arhabalamwo abira bage?

⁴ Ebibliya edesire oku Yehova anakalongereza omu njira zoshi gurhi akarhabala balya bamuzigira n’omurhima goshi. (2 Enganîro 16:9) Omu lwandiko lw’Ennanga 32:8, Yehova alaganyize abira bage ntya: “Nkolaga nakuyigiriza nkulangûle enjira wakaz’igeramwo, Nkolaga nakubwiriza nankuje ebulâbi.”

 ⁵ Rhugwerhe rhweshi omushombanyi w’emisi olonza arhuhegêze obwira bwirhu haguma na Yehova. Cikoki Yehova anarhulange. (Osome Ennanga 55:22) Bulya rhuba bira bage, rhunamukolere n’omurhima gwirhu goshi. Ciru amazibu gakaba manji, rhunabere bishwekerezi kuli ye. Rhuyemire n’obwalagale oku arhurhabala, nk’oku Daudi ayandikâga oku bimuyerekire: “Bulya kuba andi ebulyo, ntakahuligana.” (Ennanga 16:8; 63:8) Bici Shetani agendekire ajira lyo rhuheza obwira bwirhu haguma na Nnamahanga?

6. Bici Shetani ashobeka bene bantu?

⁶ Rhwayizîre omu cigabi ca 11, oku Shetani ashobesîre Yehova oku aba munywesi. Shetani adêrha oku Yehova arhaba mushinganyanya, mpu bulya Yehova arhayemererâga Adamu na Eva bacishôga ebinja n’ebibi. Ecitabu ca Ayubu cirhuyigirizize oku ciru Shetani anashobeke bene bantu balonza okuba bira ba Nnamahanga. Shetani anadêrhe oku bene bantu banakakolera Nnamahanga bulya abahîre ecituliro, cikoki arhali mpu bulya babà bamuzigire. Adesîre ciru oku anashumya ngasi yeshi agomere Nnamahanga. Rhulolage gurhi Yehova alanzîremwo Ayubu na bici rhwakaciyigiriza okubiyerekire ebyamuhikîre.

7, 8. (a) Gurhi Yehova akâg’ibona Ayubu? (b) Bici Shetani adesîre okubiyerekire obwishwekerezi bwa Ayubu kuli Nnamahanga?

⁷ Ayubu ye wâli ndi? Ayubu âli mulume mwinja walamâga hamagera myaka 3 600. Akwo kasanzi Yehova adêrha oku nta muntu yeshi yeshi wâli aka Ayubu ah’igulu. Ayubu âl’ikenzîre Yehova bwenene, akag’igayisibwa n’obubi. (Ayubu 1:8) Kobinali âli mwira wa Yehova.

⁸ Cikoki Shetani aderha oku Ayubu akâg’ikolera Nnamahanga bulya amuhyulîre. Shetani abwîra Yehova ntya: ‘Ka wamanya mpu orhamuhalira bulà, wacizongolosa n’oku  ishwa lyage? Wagisha emikolo yage yoshi, n’amaso g’ebintu byage gàyololosire omu cihugo. Ci, orhang’ilîka okuboko kwawe, ohume kuli bila ajira byoshi, okuli we ndahîre, ôrhabwîni oku àkulogorhera!’​—Ayubu 1:10, 11.

9. Bici Yehova alekîre Shetani ajirîre Ayubu?

⁹ Shetani adêrha oku Ayubu anakolere Nnamahanga bulya akag’imugisha. Shetani ashib’iderha oku ajira okwage koshi ly’amulekesa obwira bwage haguma na Nnamahanga. Yehova arhayemeraga obo bunywesi bwa Shetani. Cikwone amuleka arhangule Ayubu. N’okwo kwakayerekine oku Ayubu âl’izigîre Yehova erhi nanga.

10. (a) Gurhi Shetani ahizîremwo Ayubu omu marhangulo? (b) Gurhi Ayubu ajijîre?

¹⁰ Burhangiriza, Shetani azimbîsa anayirhîsa ebishwekwa bya Ayubu. Akulikîza, ayirhîsa baguma na baguma ba bakozi bage. Ayubu ahêza byoshi. Buzinda bw’aho, Shetani ayirhîsa bana bage 10 kugerera empusi ndarhi. Ciru akaba ntyo, Ayubu agendekêra abera mwishwekerezi kuli Yehova. Ciru akaba ahezize ebyo byoshi, arhalogorherâga omu masu ga Nyamuzinda.​—Ayubu 1:12-19, 22.

11. (a) Marhangulo gahi Shetani ashubir’ihebakwo Ayubu? (b) Gurhi Ayubu ahizîre?

¹¹ Shetani arhalekeraga aho. Asholoshônza Nnamahanga amubwîra ntya lugenda Ayubu: “Omuhume oku mubiri n’oku kavuha; we ndahîre! Orhabwîni alogorhera omu masu gawe!” (Ayubu 2:5, 7) Ho n’aho Shetani arhulîrakwo Ayubu endwala y’olushomyo. Cikoki ciru akaba eyo ndwala ndarhi, Ayubu agendekera abera mwishwekerezi kuli Yehova. Adêrha oku abera mwishwekerezi kuli Yehova kuhika afê.​—Ayubu 27:5.

12. Gurhi Ayubu ayerekînemwo oku Shetani ali munywesi?

¹² Ayubu arhâl’imanyire ngahi amazibu gage gakag’irhenga, arhanamanyaga bulya gurhi akag’ilibûka ntyo. Akarhânya  oku ago malibûko gage gadwirhwe na Yehova. (Ayubu 6:4; 16:11-14) Cikoki, agendekera abera mwishwekerezi kuli ye ciru akaba ntyo. Kurhangira ago mango, byabonekâna bwinja oku Ayubu arh’âl’izigîre Yehova mpu bulya âl’imuguzîre. Âli mwira wa Nnamahanga bulya âl’imuzigîre. Byoshi Shetani akâg’ishobeka Ayubu, byâli bya bunywesi!

13. Migisho mici Ayubu ahabîrwe okubona agendekîre abêra mwishwekerezi?

¹³ Ciru akaba Ayubu arhamanyaga ebyajirikanaga empingu, agendekêra abêra mwishwekerezi kuli Nnamahanga, n’oko kubera mwishwekerezi kuli Nnamahanga, kwayerekâna oku Shetani âli mubi bwenene. Kugerera obo bwishwekerezi bwage, Yehova amuhemba bwenene.​—Ayubu 42:12-17.

14, 15. Bici Shetani ashobeka bene bantu boshi?

¹⁴ Eby’ahikîre Ayubu birhuyigirizize bintu binji bya bulagirire. Ene, Shetani ali arhushobeka emunda Yehova ali, mpu arhuhyulîre lyorhumukolera. Omu mango ga Ayubu, Shetani adêrha ntya: “Ebi omuntu agwerhe byoshi anabijahike mpu ly’afûngira amagala!” (Ayubu 2:4) Shetani arhashobekaga Ayubu yene: ashobesire bene bantu boshi mpu banakakolera Nnamahanga bulya abaguzîre. Myaka minji enyuma z’olufû lwa Ayubu, Shetani agendekire asholoshonza Yehova n’okushobeka abakozi bage. Emigani 27:11, NWT edesire ntya: “Mwana wâni, hinduka murhimanya ly’oshagalula omurhima gwâni, lyo mmanya oku nashuza okansholoshonza.”

¹⁵ Wanahiga okuba mwira wa Yehova n’okubera mwishwekerezi kuli ye. Omukujira ntyo, wanayerekana oku Shetani aba munywesi. Nka hali empindûlo wakajira ly’oba mwira wa Yehova, ozijire, bulya nta gundi muhigo mwinja  guli nkw’ogo! Ogo muhigo guli gwabulagirire bwenene. Shetani anaderhe oku, erhi wakaba oli omu malibûko, orhakabera mwishwekerezi kuli Nnamahanga. Na kandi, anakalonza okurhurheba ly’aheza obwishwekerezi bwirhu kuli Nnamahanga. Gurhi ajiramwo ntyo?

16. (a) Njira zihi na zihi Shetani akolesa ly’avuna abantu omurhima mpu lyo barhakoleraga Yehova? (b) Gurhi Shetani akakuhanzamwo oleke okukolera Yehova?

¹⁶ Shetani ali akolesa njira nyinji ly’arhusheregeza obwira bwirhu haguma na Nnamahanga. Ali arhuhiva “nka ntale yaluluma,” mpu alonze oyu amira. (1 Petro 5:8) Orhasomeragwa bulya: abîra bawe, abantu bw’omulala gwawe erhi abandi bantu banalonza okukuhanza okuciyigiriza Ebibliya n’okujira ebiri binja. Mw’ako kasanzi wanaciyumva nkw’ôli “muhive.” * (Yowane 15:19, 20) Na kandi, Shetani anakacihindula “malahika wa bumoleke” agendekire arhurheba ly’arhushumya rhugomere Yehova. (2 Abakorinti 11:14) Ly’arhuvuna omurhima rhurhacikoleraga Yehova, anakaderha oku rhurhakasimisa Nnamahanga ciru n’olusiku luguma.​—Emigani 24:10.

17. Bici birhuma rhurhumikira Yehova?

¹⁷ Erhi rhwakarhumikira Yehova, rhwanayerekana n’obwalagale oku Shetani ali munywesi. Bici byakarhurhabala rhube bakurhumikira? Ebibliya edesire ntya: “Ozigire Yehova Nyamuzinda wawe n’omurhima gwawe goshi, n’obugumaguma bwawe bwoshi, n’emisi yawe yoshi.” (Olushika 6:5, NWT) Rhurhumikira Yehova bulya  rhuba rhumuzigîre. Erhi rhwakamuzigira, rhwanaba n’irala ly’okujira ngasi kantu arhuhunyire rhujire. Entumwa Yowane yayandisîre ntya: “Bulya okuzigira Nyamuzinda kuba omu kushimba amarhegeko gage. N’amarhegeko gage garhaba mazirho.”​—1 Yowane 5:3.

18, 19. (a) Bijiro bihi biguma na biguma bishologorha Yehova? (b) Gurhi rhumanyiremwo oku Yehova arhakarhuhûna ciru n’ehitya okujira ebi rhurhakahasha?

¹⁸ Yehova adesire oku hali ebijiro birhamusimisa, biba bibi. Bijiro bihi ebyo? Ecisanduku: “ Shologorhwa n’ebishologorha Yehova” cidesire biguma muli byo. Omukubisoma ntya kwone, wanabona nk’ebyo bijiro birhali bibi bwenene. Cikoki, osome amandiko gali marheganye kuli ngasi cijiro, onacihe akasanzi kw’okurhanya kuli go. Omukujira ntyo, wahugûkwa oku kuli kwinja bwenene okurhumikira amarhegeko ga Yehova. N’aho ho wayish’ibonera oku kuli kwabulagirire okujira empindûlo omu kalamo kawe. N’erhi  wakajira ezo mpindûlo, waba n’omurhula n’obushagaluke abira ba Yehova baba nabo. (Izaya 48:17, 18) Ciru akaba kurhali kulembu, wanahasha okuba mwira wa Yehova. Gurhi rhwakayemera ntyo n’obwalagale?

¹⁹ Nta lusiku Yehova anarhuhûne rhujire ebi rhurhakahasha. (Olushika 30:11-14) Aba Mwira wirhu anarhumanyire kulusha oku rhuba rhucimanyire. Amanyire amorhere girhu minja n’obuzamba bwirhu. (Ennanga 103:14) Entumwa Paolo erhuhire omurhima kugerera ezi nderho: “Nta mango muzig’igwarhwa n’amashumi galushire emisi y’omuntu. Nnamahanga aba mwishwekerezi, arhakayemera mwashumikwa okulushire emisi yinyu. Ci haguma n’amashumi, ammuhâ okumwagafuma n’emisi mwagagalamwo.” (1 Abakorinti 10:13, NWT) Rhwanayemera n’obwalagale oku Yehova arhuha emisi rhulagirirekwo lyo rhujira aminja. Yehova anaguha “obuhashe bulushire olugero,” kw’okuderha oku akuha obuhashe bulushire  obwawe, bunene, ly’akurhabala olembere ago mazibu. (2 Abakorinti 4:7) Paolo acibwinîre gurhi Yehova amurhabîre omu mazibu. Co carhumâga adêrha erhi: “Nanahasha byoshi n’oburhabale bw’olya onzibuhya.”​—Abafilipi 4:13.

20. Morhere gahi rhuhunyirwe rhube nago? Na bulya gurhi?

²⁰ Lyo rhuba bira ba Yehova, bihunyire okuleka ngasi kantu kamushologorha. Cikoki, okwo kurhabaga kwa bulyalya. (Abaroma 12:9) Abira ba Yehova banakazigira ebi naye azigira. Osome Ennanga 15:1-5 ly’obona ebi Yehova adesire biri biganirire omo. Abira ba Yehova banakamuyiga omukuba n’ilehe l’iroho lyage litagatifu nka: “buzigire, bushagaluke, murhula, kulembera, lukogo, bwinja, buyemere, butudu n’okucihasha.”​—Abagalasiya 5:22, 23, NWT.

21. Bici byakurhabala ogendekere wayerekana amorhere gasimisa Nnamahanga?

²¹ Bici byakurhabala ogendekere wayerekana ago morhere omu kalamo kawe? Ohunyirwe oyige ebi Yehova azigira omu kusoma n’okuyiga Ebibliya lusiku oku lundi. (Izaya 30:20, 21) Erhi wakajira ntyo, wazigira Yehova bwenene. N’okuwagendekera wamuzigira, kwo wanayushula irala lyawe ly’okumurhumikira.

22. Migisho mici wakaba nayo erhi wakarhumikira Yehova?

²² Okujira empindûlo omu kalamo kirhu, kuli nka kula wakahogola omushangi gw’amira n’okuyambala omuhyahya. Ebibliya edesire oku rhushinganine ‘okuhogola omuntu wa mîra’ ‘n’okuyambala omuntu muhyahya.’ (Abakolosi 3:9, 10) Ciru akaba birhali bilembu, erhi rhwakajira ezo mpindûlo n’erhi rhwakarhumikira Yehova, arhuha “oluhembo lunene.” (Ennanga 19:11, NWT) Ntyo kw’alaganyize. Ohigage okurhumikira Yehova ly’oyerekana oku Shetani ali munywesi! Orhakoleraga Yehova mpu bulya ayish’iguha oluhembo, cikwone bulya omuzigîre. Omukujira ntyo lyone waba mwira wa Nnamahanga!