BICI emyanzi eyandikwa ngasi lusiku erhi ngasi mugobe oku rhuradasi rhw’emyanzi eganirira? Bici oyumva biri byaganirirwa oku televizyo erhi oku radiyo? Eby’obunizi, eb’ivita n’eby’obushumusi. Nkabaga ciru wene oli walibûka bulya oli mulwala erhi bulya omuntu ozigira afîre.

Orhanye kw’aga madoso:

• K’ebyo byo Nnamahanga âl’ilonzinze bimpikire haguma n’omulala gwani?

• Ngahi rhwakakula oburhabale bw’okulwisa amazibu girhu?

• Kw’omw’igulu mwanacibè omurhula?

Ebibliya ehanyire amashuzo g’okunali kw’ago madoso.

• Abantu barhakac’ilibûka, barhakac’ishosihala barhakanacifâ.​—Amafulûlo 21:4

• “Abakunagizi bakâz’ihama nka kashafu.”​—Izaya 35:6

• “Amasu g’emihurha gahurhûka.”​—Izaya 35:5

•  Abafîre bafûka.​—Yowane 5:28, 29

• Nta mulungu wanacilwale.​—Izaya 33:24

• Abantu boshi banâbe n’ebiryo binji.​—Ennanga 72:16

Wanarhanya mpu ebiragane bya Nnamahanga biri oku bukurasa bwa 4 n’obwa 5 biri bilôrho binja kwone. Cikoki Nnamahanga alaganyize oku abihikiriza hano hofi-hofi. Ebibliya ehugwîre gurhi anabihikirîze.

Ebibliya edesire binji kulusha ebyo. Eshibir’iderha gurhi rhwakabamwo n’obushagaluke bw’okunali kurhangira ene. Orhanye oku malagirire gawe ga mw’aka kasanzi. Ka ndwala mbi? Ka mazibu ga mulala? Ka bukenyi? Ka kufîrwa n’omuzigirwa wawe? Ebibliya yanakurhabala olwise ago malibûko, enahanyire amashuzo g’okukuha omurhima kw’aga madoso:

• Bulya gurhi rhulibûka?

• Gurhi rhwakalwisa amalibûko girhu?

• Gurhi omulala gwirhu gwakabamwo n’omwishingo?

• Gurhi biba erhi omuntu afâ?

• Ka rhwanacibone abantu rhwâli zigire bafîre?

• Bulya gurhi rhwakayemera n’obwalagale oku Nnamahanga ahikiriza byoshi alaganyize?

 Erhi wakasoma eci citabu, wanabonekana oku olonzize okumanya ebi Ebibliya eyigiriza. Eci citabu ca kurhabala. Ngasi cifungo cigwerhe amadoso gakurhabala ohugûkwe bwinja Ebibliya. Emiliyoni y’abantu ezigira okuganirira Ebibliya haguma n’Abahamirizi ba Yehova. Rhulangalire oku nawe ogo muhigo gwakushagalula bwenene. Nnamahanga agishe obushiru bwawe bw’okulonza okumanya ebi Ebibliya eyigiriza!