1. Bici wakaba okola ocidosa obo okola omanyire nyigirizo nyinji z’Ebibliya?

OMUKUCIYIGIRIZA eci citabu, wahugûsirwe okuli kurhangiriza kw’Ebibliya. Kwa lwiganyo, wamanyîre okuli okubiyerekire eciragane c’obuzîne bw’ensiku n’amango, abafîre, n’obulangalire bw’obufûke. (Omuhanûzi 9:5; Luka 23:43; Yowane 5:28, 29; Amafulûlo 21:3, 4) Nkaba okola oja omu ntimanano nguma na nguma z’Abahamirizi ba Yehova, onakola oba oyemire oku Abahamirizi ba Yehova bwo baharamya Nnamahanga omu njira y’okuli. (Yowane 13:35) Ciru nkaba warhangîre wajîra obwira haguma na Yehova onalonzize omukolere. Cikoki nkaba  ociri wacidosa, erhi: “Bici nakajira lyo nkolera Nnamahanga?”

2. Bulya gurhi mulamba muguma w’Etiyopiya alonzâgya abatizibwè?

² Mulamba muguma w’Etiyopiya wâl’ilamire omu mango ga Yezu acidôsa bici akajira ly’akolera Nnamahanga. Hisanzi hisungunu enyuma za Yezu okufûka, muganda wage muguma, Filipo, ayalagaziza oyo mulume emyanzi minja. Amuyereka n’obwalagale oku Yezu ye Masiya. Eyo myanzi minja yahûma oku murhima gw’oyo mulume, okubali omu njira, barhinda ah’amishi gali. Olya mulamba amubwira, erhi: “Amishi aga; bici bicimpanzize okubatizibwà?”​—Ebijiro by’Entumwa 8:26-36.

3. (a) Irhegeko lihi Yezu ahîre abaganda bage? (b) Gurhi rhukwanine okubatizibwà?

³ Ebibliya edesire n’obwalagale oku: erhi wakalonza okukolera Yehova, oshinganine obatizibwè. Yezu arhegêka abaganda bage erhi: “Mujire abanafunzi kurhenga omu bantu bamashanja goshi, munababatize.” (Mateyo 28:19, NWT) Yezu yene ayerekîne olwiganyo erhi abatizîbwà. Barhamurhonyezâgya kw’entonyi y’amishi ah’irhwe: ci bamuyûbiza yeshi yeshi omu mishi. (Mateyo 3:16, NWT) Erhi omukristu w’okuli abatizibwà, ashinganine ayûbizibwè yeshi yeshi omu mishi kuhika oluviri lwage luzinda lujome.

4. Bici omuntu ayereka abandi erhi abatizibwà?

⁴ Erhi omuntu abatizibwà, kuba kuyerekana oku alonzize abe mwira wa Nnamahanga n’oku akola amukolera yene. (Ennanga 40:7, 8) Byanahashikana obe oli wacidosa erhi: “Bici nakajira lyombatizibwà?”

5. (a) Embere obatizibwè, bici okwanine ojire? (b) Bulya gurhi entimanano z’ecikristu ziri za bulagirire?

⁵ Embere obatizibwè, okwanine obe n’obumanye lugenda  Yehova na Yezu. Warhondîre wajira ntyo omu kuyiga Ebibliya. (Osome Yowane 17:3) Okuba n’obumanye bwone kurhakakurhabala obatizibwè. Ebibliya edesire oku bihunyire “okuba n’obumanye b’okunali” bw’obulonza bwa Yehova. (Abakolosi 1:9, NWT) Entimanano z’Abahamirizi ba Yehova z’akurhabala ly’obwira bwawe haguma na Yehova buba buzibu. Kw’okurhumire kuli kwa bulagirire okuba n’obushiru bw’okukaja mw’ezo ntimanano ngasi mango.​—Abahabraniya 10:24, 25.

6. Nyigirizo zihi z’Ebibliya okwanine omanyirire embere obatizibwè?

⁶ Yehova arhakuhunyiri oku omanyirire Ebibliya yoshi mpu ly’obatizibwà. Arhahunâga olya mulamba w’Etiyopiya mpu amanyirire Ebibliya yoshi embere abatizibwè. (Ebijiro by’Entumwa 8:30, 31) Okuderha okuli, nta lusiku rhwanaleke okuciyigiriza ebintu bihyahya kuli Nnamahanga. (Omuhanûzi 3:11) Cikoki embere obatizibwè, okwanine omanye n’okuyemera enyigirizo ntangiriza z’Ebibliya.​—Abahabraniya 5:12.

7. Gurhi enyigirizo wayizîre omu Bibliya zakurhabîre?

⁷ Ebibliya edesire oku, buzira buyemere, birhakahashikana okusimisa Nnamahanga. (Abahabraniya 11:6) Okwanine obe n’obuyemere muli Nnamahanga embere obatizibwè. Erhi bâbà bamayumvirhîza enyigirizo Paolo abahâga, bantu baguma na baguma b’Ekorinti ‘bayemêra banabatizibwà.’ (Ebijiro by’Entumwa 18:8) Kwo n’oko, okuciyigiriza Ebibliya kwa kurhabîre obe n’obuyemere omu biragane bya Nnamahanga. Zacibir’ikurhabala waba n’obuyemere omu ngombôlo ya Yezu Kristu, yayish’irhukula omu caha n’omu lufû.​—Yozwe 23:14; Ebijiro by’Entumwa 4:12; 2 Timoteyo 3:16, 17.

8. Bici byakushumya obwire abandi kw’ebi oli waciyigiriza?

⁸ Erhi wakagendekera wayiga bintu binji omu Bibliya,  byagendekera byakurhabala omu kalamo kawe, na ntyo obuyemere bwawe bwagendekera bwaba buzibu. Wahikira aha okola oli wayumva irala ly’okubwira abandi okubiyerekire ebintu oli wayiga.​—Yeremiya 20:9; 2 Abakorinti 4:13.

9, 10. (a) Bandi wakarhangirirakwo wabwira kw’ebi oli wayiga? (b) Erhi wakalonza okurhangira wayalagaza emyanzi y’Obwami haguma n’ecigamba, gurhi wakajira?

⁹ Wanayumva ogwerhe irala ly’okuganirira abantu bw’omulala gwawe, abira bawe, abalungu n’abamukola mweshi kw’ebi oli waciyigiriza. Okwo kuli kwinja bwenene, cikoki ojire ntyo n’obukenge n’obutûdu. Erhi wakajira ntyo, wanabona oku kwanaba kulembu okurhangira wayalagaza ezo nyigirizo haguma n’ecigamba. Erhi omuntu alonza okurhangira ayalagaza emyanzi minja haguma n’Abahamirizi ba Yehova, anabwira omuyigiriza Ebibliya. Erhi naye akabona kobinali oku omukalamo kawe oli wakoles a ebi oli waciyigiriza omu Bibliya, anabwira abagula b’ecigamba. Bagula babirhi banabaganiza mwenaye.

¹⁰ Eyo ntimanano eba yakulonza okumanya bici? Abo bagula babirhi bakuganiza lyo bamanya erhi ohugûsirwe enyigirizo ntangiriza z’Ebibliya n’erhi oziyemire kurhenga oku murhima. Balonza okumanya erhi omu kalamo kawe ka ngasi lusiku oba okenzire ebi Ebibliya edesire n’erhi kobinali okola olonzize okuba Muhamirizi wa Yehova. Orhayobohâga okuganira n’abagula. Okengere oku: Abagula kuyabula bayabula obuso bwa Nnamahanga, kw’okuderha, boshi bali omu cigamba, ciru nanawe. (Ebijiro by’Entumwa 20:28; 1 Petro 5:2, 3) Omu kuyusa eyo ntimanano lyo banakubwira oku oshinganine erhi orhashinganini okuyalagaza emyanzi y’Obwami haguma n’Abahamirizi ba Yehova.

11. Bulya gurhi kuli kwabulagirire okujira empindûlo abagula bakuhunyire ojire embere orhondere okuyalagaza haguma n’ecigamba?

 ¹¹ Balya bagula babirhi bakuganizagya, bakabona oku hali empindûlo okwanine ojire, bakuhebamwo omurhima ozijire embere orhangire wajira omukolo gw’okuyalagaza emyanzi haguma n’ecigamba. Bulya gurhi kuli kwa bulagirire okujira ezo mpindûlo? Bulya, erhi omuntu arhangira abwir’abandi kuli Yehova, anabe arhumirwe naye, kwo kurhumire rhukwanine rhulame akalamo kamukengesize.​—1 Abakorinti 6:9, 10; Abagalasiya 5:19-21.

12. Bulya gurhi rhweshi rhukwanine rhuciyunjuze?

¹² Embere obatizibwè hali akandi kantu ohunyirwe ojire. Entumwa Petro yakayerekîne erhi eyandika ntya: “Lero muciyunjuzagye munahinduke, lyo ebyaha binyu bizazibwà lyo Yehova analerha amango g’omurhûla.” (Ebijiro by’Entumwa 3:19, NWT) “Okuciyunjuza” kw’okuderha gurhi? Kuli kugaya ngasi kantu kabi wajijîre. Kwa lwiganyo, erhi akaba wakâg’ijira ecaha c’eby’enshonyi/obugonyi, okwanine ociyunjuze. Na ciru akaba onacihangane okujira ebintu binja, oshinganine ociyunjuze omu kuhûna Nnamahanga obonjo, bulya rhweshi rhuba banyabyaha.​—Abaroma 3:23; 5:12.

13. “Okuhinduka” kw’okuderha gurhi?

¹³ Ka kuciyunjuza kwone wakajira nka wajijire ecaha? Nanga. Petro ashubir’iderha oku bihunyire “okuhinduka.” Kuli kuderha oku okwanine okugaya bwenene olugenzi lubi n’okurhangira wajira aminja. Rhurhole olwiganyo: Oje emunda orhasag’ija ciru n’olusiku luguma. Buzinda oyish’ikengera oku wahabusire. Gurhi wakajira? Wanaba nkawayimanga “wanahinduka,” kuli kuderha  wanagaluka enyuma, wanagera omu yindi njira. Kobinali ntyo, omu kuyiga Ebibliya, wanayish’ibona oku hali empindûlo bikuhunyire ojire omu kalamo kawe. Obe mubidu “okuhinduka,” kuli kuderha, kujira empindûlo zishinganine, onarhangire okujira aminja.

14. “Okucihâna emwa Yehova” kw’okuderha gurhi?

¹⁴ Embere z’okubatizibwà, hali akandi kantu kw’obulagirire bikuhunyire ojire: kucihâna emwa Yehova. Okucihâna emwa Nnamahanga, kuli kumulaganya omw’isala, oku eby’obulagirire omu kalamo kawe kuli kumukolera yene n’okujira obulonza bwage.​—Olushika 6:15.

15, 16. Bici bishumya omuntu acihâne emwa Yehova?

¹⁵ Okulaganya Yehova oku wamukolera yene, kuli nka kula wakalaganya omuzigirwa wawe oku walama naye akalamo kawe koshi. Rhurhole olwiganyo: Omulume n’omukazi basimane. Oku oyo mulume ali amanya amorhere g’oyo mukazi, kw’anagendekera amusima. Anahikira ah’ajira obuhya naye. Okujira obuhya guba muhigo muzibu, cikoki bulya oyo mulume amusimire bwenene, ayemera ngasi kantu koshi kahunyirwe omushamuka.

¹⁶ Oku wagendekera wamanya Yehova, kwo wanagendekera wamuzigira n’okujira okwawe koshi ly’omukolera. Okwo kwanakushumya omuhe eciragane omw’isala c’okumukolera. Ebibliya edesire oku olonzîze abe muganda wa Yezu ashinganine “acilahire.” (Marko 8:34) Kuli kuderha oku okurhumikira Nnamahanga kwo kantu kw’obulagirire omu kalamo kawe. Erhi wakarhangira wakolera Yehova, okwanine ensiku zoshi ebi osima, emihigo yawe yoshi ebe ya buzinda omu kalamo kawe.​—1 Petro 4:2.

17. Bulya gurhi bantu baguma na baguma barhacihâna emwa Yehova?

¹⁷ Bantu baguma na baguma barhacihâna emwa Yehova bulya bayobohire mpu barhakahikiriza eciragane cabo. Barhalonzizi okugomera Yehova. Ciru banarhanye mpu erhi akaba barhacihânyiri emwa Yehova, arhakayîsh’ibadosa ebi bajijîre.

18. Bici byakurhabala ohagalike oboba bw’okugomera Yehova?

¹⁸ Obuzigire bwawe kuli Yehova bwakurhabala ohime ezo ntanya z’okuyoboha okumugomera erhi wakacihâna emunda ali. Bulya omuzigîre, wajira okwawe koshi ly’ohikiriza eciragane cawe. (Omuhanûzi 5:4; Abakolosi 1:10) Erhi akaba ozigîre Yehova kobinali, wabona oku okujira obulonza bwage kurhali kuzibu. Entumwa Yowane yayandisîre ntya: “Bulya okuzigira Nyamuzinda kuba omu kushimba amarhegeko gage. N’amarhegeko gage garhaba mazirho.”​—1 Yowane 5:3.

19. Bulya gurhi orhashinganini okuyoboha okucihâna emwa Yehova?

¹⁹ Birhakuhunyiri obe mwimana ly’ocihâna emwa Yehova. Arhakarhuhûna rhujire ebi rhurhakahasha. (Ennanga 103:14) Akurhabala ojire aminja. (Izaya 41:10) Erhi wakamulangalira n’omurhima gwawe goshi, “ayumanyanya enjira zawe.”​—Emigani 3:5, 6, NWT. 

20. Enyuma z’okucihâna emwa Yehova, bici oshinganine ojire?

²⁰ Kw’ociyumvirhe nka wanacihânaga emwa Yehova? Enyuma z’okucihâna emwa Yehova, wanabatizibwà.

21, 22. Gurhi wakajira “obuhamirizi bw’akanwa” bw’obuyemere bwawe?

²¹ Nk’olonzize obatizibwè, wanabwira omulalisi w’embaraza y’abagula/muratibu w’ecigamba cawe oku  olonzize obatizibwè. Omulalisi w’embaraza naye anacishoga abagula baganire nawe okubiyerekire enyigirizo ntangiriza z’Ebibliya. Bakabona oku wanabatizibwà, banakubwira oku oshinganine obatizibwè oku ntimanano nkulu (y’Omuzunguko erhi ya Eneyo) y’Abahamirizi ba Yehova. Kw’eyo ntimanano, habà enyigirizo z’abantu boshi, owazigeza anahugûlire abantu okubatizibwà kw’okuderha gurhi. Kandi anadose  ababatizibwà madoso abirhi. Omukushuza kw’ago madoso, erhi wamahâna “obuhamirizi bw’akanwa” bw’obuyemere bwawe.​—Abaroma 10:10, NWT.

²² Enyuma z’aho, wanabatizibwà. Wayûbizibwà weshi omu mishi. Obubatizo bwawe bwayereka abantu boshi  oku wacihânyire emwa Yehova n’oku okola oli Muhamirizi wa Yehova.

23. Okubatizibwà “okw’Izino ly’Ishe n’Omugala n’iroho litagatifu” kw’okuderha gurhi?

²³ Yezu adesîre oku abaganda bage bâl’ikwanine babatizibwè “okw’Izino ly’Ishe, n’Omugala n’iroho litagatifu.” (Osome Mateyo 28:19, NWT) Okwo kuli kuderha oku bashinganine bayemere obukulu bwa Nnamahanga. Kandi bamanye omukolo gwa Yezu omu muhigo gwa Nnamahanga. Banayemere enjira Nnamahanga akolesamwo iroho lyage litagatifu ly’ahikiriza obulonza bwage.​—Ennanga 83:18; Mateyo 28:18; Abagalasiya 5:22, 23; 2 Petro 1:21.

24, 25. (a) Bici obubatizo bushushanyize? (b) Ecigabi cikulikire cashuza oku idoso lihi?

²⁴ Obubatizo buba bushushanyize akantu kw’obulagirire bwenene. Erhi bakuyûbiza omu mishi, kokunali nka kufâ haguma n’ebijiro byawe byoshi bibi bya mira. Oko kuyerekine oku obilesire. N’erhi bakuyubulula omu mishi, kw’okuderha oku orhondire akalamo kahyahya kw’okukolera Nnamahanga. Kurhondera mw’ako kasanzi wanarhondera wakolera Yehova. Okengere oku: orhahânyiri akalamo kawe emwa muntu mulebe, erhi cinyabuguma cilebe, erhi mukolo mulebe, cikoki ocihânyire emwa Yehova!

²⁵ Eciragane ohîre Yehova ca kurhabala ogendekere waba n’obwira buzibu haguma naye. (Ennanga 25:14) Oko kurhali kuderha oku rhwayish’icunguka mpu bulya kone rhuli babatize. Entumwa Paolo yayandisîre ntya: “Mushibirire obucire bwinyu erhi munayobohire munadwirhe mwageramwo omusisi.” (Abafilipi 2:12) Obubatizo guli murhondero gw’okukolera Yehova. Cikoki gurhi wakabera mwira wa Yehova? Ecigabi cizinda ca shuza kw’elyo idoso.