1. Isala lihi limanyikine rhwaganirira?

BANTU banji babà bamanyire isala lya Larha Wirhu. Yezu akolesîze elyo isala ly’ayigiriza abaganda bage gurhi bakashenga. Bintu bici aganirîre mw’elyo isala? Na bulya gurhi elyo isala liri lyabulagirire kulirhwê?

2. Bintu bisharhu bihi by’obulagirire Yezu ayigirizîze mpu rhukashenga?

² Yezu adêrha: “Alagi okumwakashenga: ‘Larha, oli omu mpingu, Izino lyawe likuzibwe, Obwami bwawe buyishe, Obulonza bwawe bube en’igulu nk’empingu.’” (Osome Mateyo 6:9-13) Bulya gurhi Yezu arhuyigirizîze oku rhukashega lugenda ebyo bintu bisharhu?​—Olole amahugûlo nomero 20 gali oku bukurasa bwa 216.

3. Bici rhushinganine okumanya okubiyerekire Obwami bwa Nnamahanga?

³ Rhwayizîre oku izino lya Nnamahanga ye Yehova. Kandi rhwayîga obulonza bwa Nnamahanga bo buhi okubiyerekire bene bantu n’okubiyerekire igulu. Cikoki erhi Yezu adêrha mpu: “Obwami bwawe buyishe,” bici alonzâgya okuderha? Mw’eci cigabi, rhwayiga Obwami bwa Nnamahanga byo bici, bici bwayish’ijira na gurhi bwanacese izino lya Nnamahanga.

4. Obwami bwa Nnamahanga byo bici, na ndi ye Mwami w’obo Bwami?

⁴ Yehova ashimisîre oburhegesi bwage empingu. Ebibliya edesire oku obo burhegesi bwo buhamagalwa,  Bwami bwa Nnamahanga. Yehova acishozîre Yezu oku abe Mwami w’obo Bwami. Yezu ye “Mwami w’abami na Nyakasane wa banyakasane.” (1 Timoteyo 6:15) Agwerhe obuhashe bw’okujira ebinja kulusha omukulu yeshi yeshi w’epolitike. Ciru abakulu boshi b’epolitike bakaciheba haguma, barhakamulusha misi.

5. (a) Ngahi Obwami bwa Nnamahanga bubà? (b) Bici oburhegesi bwa Nnamahanga bwayish’irhambula?

⁵ Yezu afûzirwe, n’enyuma lya nsiku 40, agalûka empingu. Enyuma z’aho, Yehova amujira Mwami w’Obwami bwage. (Ebijiro by’Entumwa 2:33) Ebibliya edesire oku Obwami bwa Nnamahanga buli “burhegesi bw’empingu.” (2 Timoteyo 4:18) Kw’okuderha oku empingu bubà. Bwayish’iba buli empingu erhi bunali bwarhegeka igulu.​—Amafulûlo 11:15.

6, 7. Bulya gurhi Yezu alushire abami boshi ba bene bantu?

⁶ Yezu alushire abami boshi b’igulu. Yene ye Ebibliya edesire oku “arhakacifâ.” (1 Timoteyo 6:16) Abakulu boshi b’epolitike kufâ bohe bafâ, cikoki Yezu yehe arhakacifâ ciru n’ehitya. Byoshi ayîsh’irhujirira byayish’ilama emyaka n’emyaka.

⁷ Bulebi buguma bw’Ebibliya budesire oku Yezu anâbè Mwami mushinganyanya oyunjwire buzigire: “Iroho lya Yehova lyamudekererakwo: iroho lya burhimanya n’obukengere, iroho l’ihano n’emisi, iroho lya bumanye n’okurhinya Yehova.” Arhakatwa olubanja omu kukulikira ebi amasu gadwirhe gabona, erhi kushimba ebi amarhwiri gadwirhe gayumva. “Akatwîra abazamba [banyinyi] olubanja okushinganine.” (Izaya 11:2-4, NWT) Kw’orhakasima orhambulwe n’omwami oyosire ntyo?

8. Gurhi rhumanyiremwo oku Yezu arhakarhâmbula yene?

⁸ Nnamahanga acishozîre abantu oku babe bami haguma na Yezu empingu. Entumwa Paolo yabwîra Timoteyo  ntya: “Rhukacikanyakanya, rhwayish’iyima rhwe naye.” (2 Timoteyo 2:12) Bantu banga bayîsh’irhambula haguma na Yezu?

9. (a) Bami banga banarhambûle haguma na Yezu? (b) Gurhenga mangaci Nnamahanga arhangîraga acishoga abo bami bâyish’irhambula haguma na Yezu?

⁹ Ecigabi ca 7 ceci citabu ciganirire ecibonekerezi Yowane âbonaga. Abona Yezu ayimanzire empingu haguma na balya bandi bami 144 000. Abo bami bo bandi? Yowane ahugwîre oku “bayandisirwe aha malanga izino lyage n’ery’ishe.” Ashub’iyushûla okuderha: “Bo bakulikira Omwana-buzi [Yezu] ngasi aha anajîre hoshi. Bo balya bashomôlwirwe omu karhî k’abandi bantu.” (Osome Amafulûlo 14:1, 4, NWT) Abo bakristu bishwekerezi 144 000, Nnamahanga acishozîrebwo lyo “barhegeka igulu” haguma na Yezu. Erhi bafâ, banafûkire empingu. (Amafulûlo 5:10) Yehova arhangirâga acishoga abo bami 144 000 kurhangira omu kasanzi k’entumwa.

10. Bici biyerekine oku Yehova arhuzigira erhi arhegânya oku Yezu n’abo 144 000 barhambule abantu?

¹⁰ Yehova arhuzigira bwenene kwo kwarhumaga arheganya oku bene bantu babe bami haguma na Yezu. Yezu ayish’iba murhambo mwinja. Anarhumanya bwinja bulya arhanzir’iba muntu naye ayumvirhe amalibûko gali nk’agirhu. Paolo ahugwîre oku Yezu anakarhuyumviz’obonjo. Adesîre oku Yezu amanyire obuzamba bwirhu “kulya kuba naye abuyumvirhe bwoshi akirhu” omu bintu byoshi. (Abahabraniya 4:15; 5:8) Abwo 144 000 nabo bamanyire bwinja amazibu girhu: barhanzîri lwisa obuzamba buli nk’obwirhu banarhanzîr’ilwala. Rhwanayemera n’obwalagale oku Yezu n’abo 144000 bayîsh’imanya bwinja gurhi rhuli rhwaciyumva haguma n’amalagirire girhu.

11. Bulya gurhi Yezu ayigirizâgya abaganda bage mpu bakashenga obulonza bwa Nnamahanga bujirikane empingu?

¹¹ Yezu ayigirizîze abaganda bage bakashenga obulonza bwa Nnamahanga bujirikane empingu. Bulya gurhi? Omu cigabi ca 3, rhwayizîre oku Shetani agomerâga Yehova. Enyuma z’obo bugoma, Yehova arhang’ileka Shetani n’abandi bamalahika bagoma (bazimu) babere empingu hisanzi hisungunu. Rhuyumvirhage oku, eyo munda empingu, arhali boshi bakâg’ijira obulonza bwa Nnamahanga. Omu cigabi ca 10, rhwanayige bintu binji okubiyerekire Shetani n’abazimu.

12. Bintu bihi bibirhi bya bulagirire Amafulûlo 12:10 gaganirire?

¹² Ebibliya edesire oku Yezu akabîre Mwami, hisanzi hisungunu enyuma z’okuba mwami, akalwisîze Shetani. (Osome Amafulûlo 12:7-10 *) Amafulûlo 12:10 gaganirire bintu bibirhi byabulagirire: (1) Obwami bwa Nnamahanga, bwarhangire bwa rhambula, bulongozibwe na Yezu. (2) Shetani bamuhyakwo/bamulibirhakwo empingu, ajugucirwa ah’igulu. Ebyo bintu bibirhi byahikirire. Rhwanacibiganirire kwa buliri.

13. Gurhi byabîre empingu erhi Shetani ajugucirwa ah’igulu?

¹³ Ebibliya ehugwîre oku, erhi bahyâkwo Shetani n’abazimu empingu, bamalahika bishwekerezi bashagaluka bwenene. Edesire: “Sîmagi, mw’empingu n’abayibâmwo!” (Amafulûlo 12:12) Kurhangira ago mango omu mpingu muli omurhula n’ecinyabuguma bulya abamuli boshi bali bajira obulonza bwa Nnamahanga.

14. Kurhenga Shetani alibisirwekwo empingu, bici biri byabà ah’igulu?

¹⁴ Okw’igulu ebintu biri lubero bwenene: mazibu manji gali gagwarha abantu. Bulya gurhi? “Bulya elya ndyalya  emwinyu yayandagalîre” erhi “enakunîre bwenene, kulya kuba emanyire oku ensiku zayo ziri nganje.” (Amafulûlo 12:12) Shetani agwerhwe n’oburhe. Alibisirwekwo empingu, anamanyire oku hano hofi-hofi asherezibwa. Ali ajira ngasi koshi akanahasha ly’alerhera abantu amalibûko n’amahanya ga ngasi lubero.

15. Obulonza bwa Nnamahanga okw’igulu bubà buhi?

¹⁵ Obulonza bwa Nnamahanga okubiyerekire igulu burhazagi shanja. Yehova alonzize oku abantu bimana balame ah’igulu emyaka n’emyaka. (Ennanga 37:29) Cikoki gurhi obo Bwami bwayish’ihikirizamwo obulonza bwa Nnamahanga?

16, 17. Bici obulebi bwa Daniyeli 2:44 burhuyigirizize okubiyerekire Obwami bwa Nnamahanga?

¹⁶ Olwandiko lwa Daniyeli 2:44, NWT ludesire: “N’omu mango g’abola bami, Nyamuzinda w’empingu, ayishiy’imanza obundi Bwami bulya burhakacishandwa ciru n’eriguma n’obwo burhegesi burhakacihâbwa oku lundi lubaga. Bwavunyungula bunashandaze agola gandi mami, nabo bône bwayorha ensiku n’amango.” Bici obo bulebi burhuyigirizize okubiyerekire Obwami bwa Nnamahanga?

¹⁷ (1) Obwami bwa Nnamahanga bwâl’ishinganine burhangire bwa rhambula “omu mango g’abola bami.” Okwo kuli kuderha oku amango Obwami bwa Nnamahanga bwakarhangire bwa rhegeka, agandi marhegesi ga bene bantu gakabîre gaciri garhambula. (2) Obwami bwa Nnamahanga bwarhegeka ensiku n’amango burhakanacihabwa obundi burhegesi. (3) Hanâbè ivita ekarhi kw’Obwami bwa Nnamahanga n’amarhegesi g’er’igulu. Obwami bwa Nnamahanga bo bwayish’ihima er’ivita. Oku buzinda igulu lyarhegekwa na burhegesi buguma bone: oburhegesi bwinja bwenene abantu bacifinja.

18. Gurhi ivita ekarhi kw’Obwami bwa Nnamahanga n’amarhegesi ga bene bantu lihamagalwa?

 ¹⁸ Ivita ekarhi kw’Obwami bwa Nnamahanga n’amarhegesi ga bene bantu liderhwa Armagedoni. (olole amahugûlo nomero 10 gali oku bukurasa bwa 210) Gurhi byayîsh’iba embere z’ivita lya Armagedoni? Abazimu barheba “abami boshi b’igulu, mpu babashûbuze bayish’ija okw’ivita ly’olusiku lukulu lwa Nnamahanga Ogala Byoshi.” (Amafulûlo 16:14, 16, NWT) Amarhegesi goshi ga bene bantu galwîsa Obwami bwa Nnamahanga.

19, 20. Bulya gurhi rhulagirire oku Bwami bwa Nnamahanga?

¹⁹ Bulya gurhi rhulagirire oku Bwami bwa Nnamahanga? Hali bintu bisharhu birhumire. (1) Rhulagirire oku Bwami bwa Nnamahanga bulya rhuli banyabyaha, kw’okurhuma rhukalwala n’okufâ. Cikoki Ebibliya edesire oku, hano Obwami bwa Nnamahanga burhangira bwa rhegeka igulu, rhwakalâma emyaka n’emyaka. Yowane 3:16 adesire: ‘Nnamahanga azigîre igulu, kuhika ahâna Omugala cusha, mpu ngasi yeshi wamuyemera alek’ihera, ci abone obuzîne bw’ensiku n’amango.’

²⁰ (2) Rhulagirire oku Bwami bwa Nnamahanga bulya rhulamire haguma na banyankola-maligo. Bantu banji bali banywesi n’abandi bishambo. Abandi banakajira eby’enshonyi. Rhurhakabahanza okujira ebyo bintu bibi. Cikoki oku ivita lya Armagedoni lyo bacîbona ba busha, balya boshi barhalonzizi oku gokola bayumviza oku magala gabo, basherezibwa. (Osome Ennanga 37:10) (3) Rhulagirire oku Bwami bwa Nnamahanga bulya marhegesi manji garhagwerhi buhashe bwa kurhambula, bulya barhegesi banji bali banizi erhi bakuzigira ebituliro. Barhahiramwo abantu omurhima okubakakenga Nnamahanga. Ebibliya edesire oku omuntu anakarhambula owabo ly’amulibuza.​—Omuhanûzi 8:9.

21. Gurhi obo Obwami bwayîsh’ihikirizamwo obulonza bwa Nnamahanga ah’igulu?

 ²¹ Hano ivita lya Armagedoni lihwa, obo Bwami bwahikirîza obulonza bwa Nnamahanga bujirikane ah’igulu. Kwa lwiganyo, bwa hererekeza Shetani n’abazimu. (Amafulûlo 20:1-3) Okubuzinda, nta muntu wanacilwale erhi afê. Kugerera engombôlo, abantu bishwekerezi kuli Nnamahanga bayish’ilama emyaka n’emyaka omu Paradizo. (Amafulûlo 22:1-3) (olole amahugûlo nomero 21 gali oku bukurasa bwa 216) Obwo Bwami bwacesa izino lya Nnamahanga. Okwo kuli kuderha oku, hano arhangira arhambula igulu, bene bantu boshi bayish’ikakenga izino lyage.

22. Gurhi rhumanyiremwo oku Yezu arharhangirâga arhambula ho n’aho erhi afûlwa?

²² Yezu ayigirizîze abaganda bage oku bakashênga ntya: “Obwami bwawe buyishage.” Enyuma z’aho, Obwami bwa Nnamahanga bwâkayishîre. Yehova akarhanziri shimika Obwami, buzinda ajire Yezu abe Mwami. K’erhi Yezu agaluka empingu, ka ho n’aho hwanabîre Mwami? Nanga. Arhang’ilindirira. Gurhi rhumanyiremwo  ntyo? Hisanzi hisungunu erhi Yezu afûka, Petro na Paolo badêrha oku obulebi buli omu Ennanga 110:1 bw’âl’iganirire Yezu. Mw’obo bulebi, Yehova alibwizîre Yezu oku “abwarhale ekulyo kwage” analinde “kuhika ayandagaze abashombanyi bage” aha magulu gage. (Ebijiro by’Entumwa 2:32-35; Abahabraniya 10:12, 13) Rhusanzi rhunganaci Yezu akalindirîre?

23. (a) Mangaci Yezu abîre Mwami w’Obwami bwa Nnamahanga? (b) Bici rhwayiga omu cigabi cikulikire?

²³ Myaka minji embere z’omwaka gwa 1914, ecigusho c’abakristu birhohye baciy’igirîza obulebi bw’Ebibliya, bahugûkwa oku omwaka gwa 1914 gwakabîre mwaka gwa bulagirire bwenene. (olole amahugûlo nomero 22 gali oku bukurasa bwa 217) Kurhangira omwaka gwa 1914, ebiri byajirikana omw’igulu biyerekine oku abo bakristu birhohye bâli desire okuli. Ogo mwaka gwo Yezu arhangiraga arhambula. (Ennanga 110:2) Hisanzi hisungunu, Shetani ajugucirwa ah’igulu. Amanyire oku “ensiku zage ziri nsungunu.” (Amafulûlo 12:12, NWT) Omu cigabi cikulikire, rhwabona ebyakarhuyemeza oku rhulamire mw’ezo “nsiku nsungunu.” Rhwabona oku hano hofi-hofi, kugerera obwo Bwami, obulonza bwa Nnamahanga bwajirikana ah’igulu.