1, 2. Idoso lihi okwanine okucidosa? Na bulya gurhi kuli kwa bulagirire?

ENYIGIRIZO z’Ebibliya zakuyigirizîze oku banji banakaderha mpu banaharhamye Nnamahanga, n’obo ebi bayigiriza n’ebi bajira birhasimisa Nnamahanga. (2 Abakorinti 6:17) Co cirhumire Yehova arhubwizire oku rhurhenge muli ‘Babiloni Mukulu.’ (Amafulûlo 18:2, 4, NWT) Gurhi wajira? Rhweshi rhukwanine okucishoga. Rhukwanine okucidosa ntya: “Ka nonzize okuharamya Nnamahanga nk’okunyorha muharamya erhi namuharamya nk’oku aba alonzize?”

² Erhi akaba warhenzîre omw’idîni ly’obunywesi, kuli kwinja. Cikoki, hali bintu biguma na biguma by’omw’idîni ly’obunywesi wâl’ikomîre okujira, nkaba onaba obishagalukire. Rhuganirirage biguma muli ebyo wâl’ikomîre okujîra. Omu kubihugûkwa, wabona obulagirire bw’okubibona nk’oku Yehova abibona.

3. (a) Bulya gurhi bantu baguma na baguma bayabirwa okuharamya Nnamahanga buzira nshushano? (b) Bici Ebibliya edesire okubiyerekire okukolesa enshushano omu nterekêro?

³ Bantu baguma na baguma babà bakomîre okukolesa enshushano, ensanamu, oluhêro mpu lyo baharamya Nnamahanga. Kantyo kwo nawe ojira? Erhi akaba ishuzo lyawe ali neci, wanabona nka birhakahashikana erhi kuli kubi okuharamya Nnamahanga buzira ebyo. Cikoki omanye ntya: Yehova yene ye wakakubwira enjira wamuharamyamwo. Ebibliya erhubwizire oku; arhalonzizi rhukolese  enshushano mpu lyo rhumuharamya.​—Osome Olubungo 20:4, 5; Ennanga 115:4-8; Izaya 42:8; 1 Yowane 5:21.

4. (a) Bulya gurhi kuli kubi okuha bashakuluza bafîre enterekêro? (b) Bulya gurhi Yehova ahanzagya abakozi bage oku barhahirâga ciru n’olusiku luguma baganiza abafîre?

⁴ Bantu baguma na baguma banahêze akasanzi, emisi n’ensaranga mpu lyo bashagalula bashakuluza bafîre. Ciru n’agandi mango, banabahe enterekêro. Cikoki rhwayizîre oku abafîre barhakacirhurhabala, ciru barhakanacirhujira kubi. Barhacilamiri ngahi. Kuli kubi bwenene okulonza okuganiza abafîre bulya emyanzi wakayumva kurhenga emw’abafîre, eba myanzi y’abazimu. Co carhumâga Yehova ahaniza bene Israheli oku barhahirâga ciru n’olusiku luguma bakaganiz’abafîre. Bâl’ishinganine baciyase na ngasi kantu kâl’igwêrhe olushangi n’obulaguzi.​—Olushika 18:10-12; olole amahugûlo nomero 26 na 31 gali oku bukurasa bwa 221 na 223.

5. Bici byakakurhabala oleke okukolesa enshushano n’okurherekêra bashakuluza bafîre ly’oharamya Nnamahanga?

⁵ Erhi akaba onakolese enshushano ly’oharamya Nnamahanga erhi onakarherekêra bashakuluza bafîre, bici byakakurhabala ly’oleka ezo nkomedu? Okwanine okasoma Ebibliya onarhanye kw’ebi oli wasoma, omanye gurhi Nnamahanga abona ezo nkomedu. Anakazibona: “bikabulirwa,” bishologorhwa. (Olushika 27:15) Okashênga Yehova ngasi lusiku akurhabale obone ezo nkomedu akage ly’omuharamya nk’oku analonzize. (Izaya 55:9) Oyemere n’obwalagale oku aguha emisi y’okuleka ngasi kantu kagwerhe olushangi n’idîni ly’obunywesi.

6. Bulya gurhi abakulu b’amadîni barhondezâgya okujira idinye ly’okuburhwa kwa Yezu omu nsiku 25 z’omwezi gwa 12?

⁶ Idinye lya Noweri liba limanyikine bwenene omw’igulu lyoshi. Bantu banji babà bamanyire oku Noweri, kw’okuburhwa kwa Yezu. Cikoki, Noweri liba  idinye ly’idîni ly’obunywesi. Citabu ciguma cihugûla byoshi/ansiklopediya, cihugwîre oku; Abapagani (abaharamya ba nnamahanga banji) b’Eroma bakâg’ijira idinye ly’okuburhwa kw’izuba omu nsiku 25 z’omwezi gwa 12. Lyo bahindula abapagani babe bakristu, abakulu b’amadîni barhondeza okukajira idinye ly’okuburhwa kwa Yezu, ciru akaba Yezu arhaburhagwa omu nsiku 25 z’omwezi gwa 12. (Luka 2:8-12) Nta lusiku ciru n’oluguma abaganda ba Yezu bajijîre idinye lya Noweri. Citabu ciguma c’abalenga cidesire oku, myaka 200 enyuma z’okuburhwa kwa Yezu, “ntaye wal’imanyire olusiku aburhagwa, na ntaye ciru wakâg’icihangayisa okumanya amango aburhagwa.” (Sacred Origins of Profound Things) Bibonekine oku Noweri arhondezibâgwa myaka minji enyuma z’okuburhwa kwa Yezu.

7. Bulya gurhi abakristu bw’okuli barhajira idinye lya Noweri?

⁷ Bantu banji babà bamanyire oku Noweri arhondezibâgwa n’abapagani, na ngasi byoshi bijirikana olo lusiku, nka okuhanana oluhembo erhi kushegulana. Omu mango g’embere bwenene, abantu be Angleteri n’ebihugo biguma na biguma by’âli omu bujà bwa amerika, ntaye wakajîre oku lukulu lwa Noweri, bulya bapagani balurhondezâgya. Ngasi yeshi wakabuzîre bukenga eryo irhegeko, akâg’ihanwa. Cikwone, erhi hagêra nsiku zirhali nyi, abo bantu barhangira bajira idinye lya Noweri. Bulya gurhi abakristu bw’okuli barhajira idinye lya Noweri? Bulya banakalonza okushagalula Nnamahanga.

8, 9. Bulya gurhi abakristu barhanzi barhâkag’ijira idinye ly’okukengera olusiku lw’okuburhwa?

⁸ Bantu banji bajira idinye ly’olusiku lwabo lw’okuburhwa. Bulya gurhi abakristu bw’okuli barhajira idinye ly’okukengera okuburhwa kwabo? Ebibliya eganirire bantu babirhi bajirâga amadinye gw’okukengera okuburhwa kwabo, cikoki, barhakâg’iharamya Yehova. (Omurhondêro 40:20;  Marko 6:21) Erhi abapagani bajira idinye ly’okukengera okuburhwa kw’omuntu, banakaba bali bakuza rhu nnamahanga rhw’obunywesi. Co carhumâga abakristu barhanzi bâl’imanyire oku “okujira idinye ly’okukengera okuburhwa kw’omuntu, bwâl’iborhere bwa bapagani.”​—The World Book Encyclopedia.

⁹ Abaroma n’Abagiriki bâl’iyemîre oku, aha kuburhwa kwa ngasi muntu, lunakaba lusiku lwa hi nnamahanga. Bakâg’irhanya oku hâli iroho ly’âli n’olushangi haguma na hi nnamahanga, hyakagiba hiri aha kuburhwa kw’omuntu. Co cinarhuma baderha oku bihunyire bajire idinye ly’okuburhwa ly’ehyo hi nnamahanga hilanga omuntu.

10. Bulya gurhi abakristu bw’okuli barhajira idinye ly’okukengera olusiku lw’okuburhwa?

¹⁰ Kw’orhanyize oku Yehova anashagalukira amadinye gagwerhe olushangi n’idîni ly’obunywesi? (Izaya 65:11, 12) Nanga. Co cirhuma abakristu bw’okuli barhajira idinye ly’okukengera olusiku lw’okuburhwa kw’omuntu na ngasi idinye ligwerhe olushangi n’idîni ly’obunywesi.

11. (a) Bulya gurhi bantu banji bakajîra amadinye g’ecipagani? (b) Bici bishinganine okuba byabulagirire kuli rhwe?

¹¹ Bantu banji bayishi oku Noweri n’agandi madinye gagwerhe olushangi n’idîni ly’obunywesi, garhondezibâgwa n’abapagani. Cikoki, banagendekere bagajira. Banakaderha oku ago madinye ganabarhabale babe haguma boshi omu mulala. Ka ntyo kwo nawe orhanyize? Kurhali kubi okugeza akasanzi omu mulala mweshi. Yehova ye warhondezâgya omulala, alonzize rhuyumvikane na ngasi muntu w’omu mulala gwirhu. (Abefezi 3:14, 15) Ci kurhakaba kwinja okubasimisa omukolonza okujira amadinye g’idîni ly’obunywesi. Akantu kw’obulagirire, kuli kulonza okuba n’obwira bwinja haguma na Yehova. Ciru, entumwa Paolo yayandisîre ntya: “Mulongereze ebisimisize Nyakasane.”​—Abefezi 5:10.

12. Bulya gurhi Yehova arhashagalukira madinye maguma na maguma?

 ¹² Bantu banji bacikebwa mpu okumanya ah’ago madinye garhangiriraga kurhali kwa bulagirire bwenene. Cikoki, arhali ntyo kwo Yehova yehe arhanya. Arhashagalukira amadinye garhangizibâgwa n’idîni ly’obunywesi erhi madinye gakuzize ecihugo erhi omuntu. Kwa lwiganyo, Abamisri bagwêrhe madinye manji bakâg’ijirira rhu nnamahanga rhwabo. Erhi bene Israheli barhênga Emisri, barhondêra bajira idinye lishushine n’ely’Abamisri, banaliyirîka mpu: “Ene luli lusiku lukulu lwa Yehova.” Cikoki Yehova abahana. (Olubungo 32:2-10, NWT) Omulebi Izaya âl’idesîre ntya: ‘Nta higalugalu muhumagekwo.’​—Osome Izaya 52:11.

13. Madoso maci wakacidosa amango wamahiga oku orhakacijira amadinye g’ecipagani?

¹³ Olusiku wahiga okuleka okujira amadinye g’ecipagani, nkaba wanacidôse madoso manji. Kwa lwiganyo: “Gurhi nakajira erhi abantu nkola nabo bakandosa bulya gurhi ntajira idinye lya Noweri haguma nabo? Gurhi nakajira erhi omuntu akampa oluhembo oku Noweri? Gurhi nakajira erhi omulume wani erhi mukazi wani akalonza mpu njire idinye ly’ecipagani? Gurhi nakarhabalamwo abana bani lyo barharhomoleraga amasu ago madinye g’ecipagani erhi lusiku lukulu lw’okukengera okuburhwa?”

14, 15. Gurhi wakajira erhi bakakubwira; idinye linja erhi bakuhè oluhembo oku lusiku lw’amadinye g’ecipagani?

¹⁴ Ly’obwira abandi entanya zawe okubiyerekire amadinye g’ecipagani, obe n’obwenge n’entimanya nyinja ly’orhabagayisâgya. Kwa lwiganyo, erhi omuntu akakubwira ntya; idinye linja, orhakwanini omushuze duba-duba mpu wehe orhajira ebyo. Wanamuvuga omunkwa kwone. Ci agandi mango, bantu baguma na baguma banakalonza okumanya binji kuli ebyo. Abo balonzize okumanya binji, wanabahugûlira  bulya gurhi orhajira ago madinye ga ntyo. Okukenga abandi n’okubazigira kwa kurhabala orhababwirâga eby’abavuna omurhima. Ebibliya edesire ntya: “Iderha linyu libe lya kusimisa ensiku zoshi, linunirire nka munyu, munamany’ishuza ngasi yeshi okukwanine.” (Abakolosi 4:6) Kwa lwiganyo wanabahugûlira oku nirhu rhunacishagalule haguma n’abandi n’okubaha oluhembo, ci arhali kw’ezo nsiku nkulu z’ecipagani.

¹⁵ Gurhi wakajira erhi omuntu akaguha oluhembo olusiku lw’amadinye g’ecipagani? Ebibliya erharhubwiziri gurhi rhwakajira omu kanga kantyo, cikoki erhubwizire okurhube n’entimanya zicire ensiku zoshi. (1 Timoteyo 1:18, 19) Hali omuntu wakakuhà oluhembo kw’olo lusiku lukulu, bulya arhamanyiri erhi orhajira elyo idinye. Ciru n’owundi ananakubwira ntya: “Manyire oku orhajira er’idinye, cikoki, nonzize nguhe olu luhembo.” Omuntu anayemera olo luhembo erhi alulahire. Cikoki, oluyemere erhi olu lahire, olo luhembo lurharhumaga wazinza entimanya zawe. Rhurhakalonza okujira akantu karhuhegêza obwira bwirhu haguma na Yehova.

16. Gurhi wakajira erhi omulala gwawe gwakalonza oku mube haguma nago omu kasanzi k’idinye ly’ecipagani?

¹⁶ Gurhi wakajira erhi omulala gwawe gwakalonza ojire idinye ly’ecipagani? Oyake akadali haguma nabo. Bagwerhe oluhuma lw’okujira ebi basimire. Obazigire onakenge entanya zabo, nk’oku nawe wakanasima bakenge entanya zawe. (Osome Mateyo 7:12) Cikwone, gurhi wakajira erhi omulala gwawe gwakalonza mpu mube haguma mw’ako kasanzi k’idinye ly’ecipagani? Wanarhang’ishenga Yehova akurhabale orhôle omuhigo mwinja. Na kandi, orhanye kuli ako kanga n’okukajirira obusagasi. Kengera oku: Ngasi kantu wakalonza okujira kakwanine kashagalule Yehova.

17. Gurhi wakarhabalamwo abana bawe lyo barhakag’iciyumva nka babulirwe na kantu kalebe hano babona abandi bali bajira idinye ly’ecipagani?

 ¹⁷ Gurhi wakarhabalamwo abana bawe lyo barhakag’iciyumva nka babulirwe na kantu kalebe oku lusiku lw’idinye ly’ecipagani? Ngasi mango, okalonza ebyakabashagalula. Wanakabalerhera ciru oluhembo. Cikwone oluhembo lukulu wakabahà, kuli kugeza akasanzi haguma nabo n’okubayereka oku oba obazîgire.

18. Bulya gurhi kuli kwa bulagirire okukaja omu ntimanano z’ecikristu?

¹⁸ Lyo rhushagalula Yehova, bihunyire okurhenga omu idîni ly’obunywesi n’okuyaka amadinye g’ecipagani haguma n’amorhere gago. Gurhi wakajiramwo ntyo? Kwa lwiganyo, wanakaja omu ntimanano z’ecikristu. (Osome Abahabraniya 10:24, 25) Ezo ntimanano ziri za bulagirire oku nterekêro y’okuli. (Ennanga 22:22; 122:1) Zinarhurhabale rhuhânane omurhima (Abaroma 1:12).

19. Bulya gurhi kuli kwa bulagirire okubwira abandi kw’ebi wayizîre omu Bibliya?

¹⁹ Okurhangira wabwira abandi ebi wayizîre omu Bibliya, naco ciri cigabi c’enterekêro y’okuli. Bantu banji bagayire bwenene erhi bac’ibona amagalugalu gayunjwire ah’igulu. Ciru nkaba omanyire baguma bamulibo. Obaganize okubiyerekire obulangalire bwawe bw’amango gayisha. Erhi wakakaja omu ntimanano z’ecikristu, n’okuganiza abandi oku nyigirizo z’okuli wayizîre omu Bibliya, orhakaciyumva oli wakengera erhi kulalikira ebir’ibyajirwa omw’idîni ly’obunywesi. Oyemere n’obwalagale, oku erhi wakacishoga okukolera Yehova omu njira nyinja, agisha obushiru bwawe na kandi wanabà n’obushagaluke.​—Malakiya 3:10.