“Nyamuzinda . . . ahôrhola ngasi mulenge gubali omu masu: olufû ntalwo lwacihabê; emishibo n’endûlù, n’amababale birhakacihabâ bundi; bulya okwâli burhanzi kwahwire.”​—Amafulûlo 21:3, 4.

Wayish’iba n’omukolo mwinja na kandi gwa kusimisa.​—Izaya 65:21-23.

Endwala zoshi n’amalibuko ga ngasi lubero gayish’ihwa.​—Izaya 25:8; 33:24.

Wayish’iba n’akalamo k’omwishingo haguma n’abantu b’omulala gwawe n’abira bawe emyaka n’emyaka.​—Ennanga 37:11, 29.

Neci, hali bintu bibirhi byakarhuma rhwalangalira eco ciragane c’Ebibliya:

• Nnamahanga agwerhe obuhashe bw’okuhikiriza eco ciragane cage. Omu Bibliya, Yehova yene ohamagirwe “Ogala byoshi,” bulya obuhashe bwage burhagwerhi lugero. (Amafulûlo 15:3, NWT) Agwerhe obuhashe boshi bw’okuhikiriza eco ciragane cage c’okuhindula akalamo kabe kinja hanw’igulu. Ebibliya edesire oku “emwa Nnamahanga byoshi byanahashikana.”​—Mateyo 19:26.

• Nnamahanga agwerhe irala ly’okuhikiriza eco ciragane cage. Kwa lwiganyo, Ebibliya edesire oku Yehova agwerhe irala ly’okufûla abafîre.​—Ayubu 14:14, 15.

  Kandi Ebibliya eyerekine oku Yezu Mwene Nnamahanga afûmize abalwala. Bici byarhumaga akafûmya abalwala? Bulya al’ilonzize. (Marko 1:40, 41) Yezu al’ishushire Ishe bwinja-bwinja omu borhere bw’okulonza okurhabala abantu bali omu malagirire.​—Yowane 14:9.

  Kobinali rhwanayemera n’obwalagale oku Yehova na Yezu balonzize okurhurhabala rhube n’akalamo kw’omwishingo omu mango gayisha!​—Ennanga 72:12-14; 145:16; 2 Petro 3:9.