Orhabale abumvirhiza bawe bacilabirize. Odose abumvirhiza bawe amadoso gakarhuma barhanya oku mwanzi oli waganirira n’okucishuza ly’obarhabala bacilabirize ekandalala.

Obashumye babe n’entanya nyinja. Orhabale abumvirhiza bawe babone bulya gurhi bajira ebijiro binja. Obarhabale balonze okujira ebintu binja kulusha; omu kuba n’obuzigire kuli Yehova, oku babo bantu, n’oku nyigirizo z’Ebibliya. Orhanye haguma n’abumvirhiza bawe, orhabasomeraga kone emyanzi. Ahali h’okubavuna omurhima erhi kurhuma baciyumva oku babonesibwe enshonyi, oku buzinda bw’ehotuba yawe obarhabale bayumve oku bahîrwe omurhima bakajira ebintu binja.

Obarhabale basegeze obwenge bwabo kuli Yehova. Oyekerekane n’obwalagale gurhi enyigirizo z’Ebibliya n’amahano g’Ebibliya gayerekanamwo amorhere ga Nnâmahanga n’obuzigire bwage kuli rhwe. Orhabale abumvirhiza bawe bakarhanya gurhi Yehova abona ebintu banabe n’irala ly’okumushagalusa.