Amaruba Garhenga oku Mbaraza Eri Yalongoza
‘Mwànkabîre bigiriza.’ (Hb. 5:12) Orhanye kuli oku: Yehova; Mwigiriza mwinja bwenene kulusha boshi, arhulalisire rhuyigirize abandi oku bimuyerekire! Ngasi mango erhi rhuhâbwa omukolo gw’okuyigiriza okuli lugenda Yehova omu mulala, omu cigamba erhi omu mukolo gw’amahubiri; olo luba lukengwa lwinja bwenene na mukolo gwago-gwago. Gurhi rhwakaguhikirizamwo bwinja?
Ishuzo liri omu nderho entumwa Paolo yayandikiraga Timoteyo: ‘Ociseze okukasoma, okukahanûla n’okukayigiriza.’ Paolo ayushûla ntya: “Okajira ntyo, waciciza wêne, onacize abakuyumvirhiza.” (1 Tm. 4:13, 16) Ogwerhe omwanzi gw’okuyokola obuzine gw’okuganirira abandi. Co cirhumire kuli kwa bulagirire bwenene okuciseza ly’okubûla enjira yawe y’okusoma n’okuyigiriza. Eyi broshire yarheganyizibwe ly’ekurhabala okuhikiriza ogo muhigo . Rhuganirire kwa bofofi gurhi epanzirwe.
Olwandiko luli oku ngasi bukurasa luyerekine akanuni k’Ebibliya kakolesibwe omw’isomo lilebe erhi lulimwo olwiganyo luyerekine gurhi isomo lilebe lyakakolesibwa
Yehova ye ‘Mwigiriza’ Mukulu (Iz. 30:20) Ciru akaba eyi broshire yakurhabala okubûle obulenga bwawe bw’okusoma n’okuyigiriza, orhahîra okayibagira oku Yehova ye nshôko y’omwanzi rhuyigiriza ye onakulula abantu emunda ali. (Yn. 6:44) Co cirhumire, ngasi mango okahûna Yehova iroho litagatifu. Ngasi mango okakolesa Akanwa ka Nnâmahanga. Osegeze obwenge bwawe kuli Yehova c’arhali kuli we wene. Ocihangane bwenene okurhabala abumvirhiza bawe bazigire Yehova bwenene.
Walalisirwe okuyigiriza omwanzi gw’obulagirire bwenene kulusha yoshi bene bantu bamakahâbwa. Rhulangalire oku omu kuyegemera ‘emisi Nnâmahanga akuhîre,’ wahash’ihikiriza ogo mukolo.—1 Pt. 4:11, Mashi Bible.
Abinyu balimu,
Embaraza Eri Yalongoza y’Abahamirizi ba Yehova
