1. Bici rhwakajira lyo rhuyemera n’obwalagale oku enterekêro yirhu esimisize Yehova, na bulya gurhi?

YEZU adesîre erhi: “Abaharamya okunali baharâmya Larha omu murhima gwabo n’okunali; bulya abo bo Larha alonza mpu bamuharâmye.” (Yowane 4:23; 6:44) Ngasi muguma wirhu “ahunyîrwe agendekere alongereza ebisimisa Nyakasane.” (Abefezi 5:10) Kurhaba Kulembu okujira ntyo ensiku zoshi. Shetani anakalonza okurhurheba mpu lyo rhujira ebintu birhasimisa Yehova.​—Amafulûlo 12:9.

2. Ohugûle bici byajirikanaga hofi n’Entondo y’e Sinai.

² Gurhi Shetani ajira ly’arhurheba? Anarhuhuse obwenge omu kuhiramo bintu binji, lyo rhurhacihikiraga aha rhwamanya ebinja n’ebibi. Okengere kulya kwahikiraga aba Israheli erhi babà bali hofi n’Entondo y’e Sinai. Musa ajâ oku ntondo n’aba Israheli bakag’imulinga oku agaluka omw’ikambi cikoki Musa alegerera bwenene. Musa alegerera, buzinda barhondêra babwira Haruni mpu abajirire hinnamahanga. Haruni abumba ensanamu y’enoro yal’ishushire akanina. Aba Israheli barhangîra bajira idinye. Barhangira basama embere z’ako kanina n’okukafukamira. Omu kuharamya ntyo, bakarhanya mpu bali baharamya Yehova. Cikoki arhali bulya bakag’iderha oku “luli lusiku lukulu lwa Yehova” kw’okuderha oku er’idinye lyâl’imusimisize. Kuli Yehova,  oko kwali kuharamya ensanamu. Kugerera eco cijiro aba Israheli banji bafâ. (Olubungo 32:1-6, 10, 28, NWT) Isomo lici rhwakaciyigiriza? Omanye wakarhebwa na Shetani. ‘Nta higalugalu ohumageko,’ kw’okuderha oku orhabaga n’olushangi loshi-loshi n’idîni ly’obunywesi. Oleke Yehova akuyigirize ebinja n’ebibi.​—Izaya 52:11; Ezekiyeli 44:23; Abagalasiya 5:9.

3, 4. Bulya gurhi kuli kwa bulagirire rhumanye ngahi madinye maguma na maguma garhondêraga?

³ Erhi Yezu aba ali hanw’igulu, akomerêza abaganda bage lyo nabo bayish’iyigiriza abandi gurhi bakajira lyo baha Nnamahanga enterekêro ecîre. Enyuma z’okufâ kwa Yezu, entumwa zagendekera zayigiriza abantu amakanuni ga Yehova. Cikone, enyuma z’olufû lw’entumwa, abalimu bw’obunywesi, barhondêza enyigirizo z’obunywesi, amadinye n’enkomêdu z’ecipagani omu cigamba. Na ntyo bajira okwabo koshi lyo bahamagala ago madinye n’ezo nk’omêdu oku ziri za Cikristu. (2 Abatesalonika 2:7, 10; 2 Yowane 6, 7) Madinye manji muli go gagendekire gajirwa kuhika ene. Ganagendekire gakuza obwemere bw’obunywesi n’eby’obukurungu. *​—Amafulûlo 18:2-4, 23.

⁴ Ene omw’igulu lyoshi ago madinye gaba gasimirwe n’abantu banji. Nk’oku ogendekire waciyigiriza gurhi Yehova abona ebintu bya ntyo, wayish’ihikirira aha wabona nkaba oku bikuhunyîre oleke madinye maguma na maguma. Rhumanyire oku kurhabe kulembu okujira ntyo, cikoki wanayemera n’obwalagale oku Yehova akurhabala. Rhuganirirage ngahi madinye maguma na maguma garhondêreraga lyo rhuhugûkwa entanya za Yehova ziri zihi kugayerekera.

5. Bici biyerekine oku Yezu arhaburhâgwa nsiku 25 z’omwezi gwa 12?

⁵ Omu nsiku 25 z’omwezi gwa 12, bihugo binji binakajira idinye lihamagalwa Noweri. Bantu banji barhanya mpu olo lusiku lwo Yezu aburhâgwa. Ebibliya erhayerekini olusiku Yezu aburhâgwa. Cikoki eganirire bintu biguma na biguma lugenda amango Yezu aburhâgwa, Yezu aburhâgwa e Betelehemu na Luka ayandisîre oku, ago mango Yezu aburhâgwa, mw’eco cihugo “abangere bakag’iba bâli balanga amaso gabo budufu n’omûshi.” (Luka 2:8-11, NWT) Omu mwezi gwa 12, omu cihugo c’e Betelehemu, muba mboho nyinji, nkuba nyinji n’olwikungu ludarhi bwenene lurhuma ngasi kantu kaba nka kula amabuye gw’olubula gayorha. Biyumvikine oku abangere barhakabezîre embuga budufu bali balalîra amaso gabo. Bici oko kurhuyigirizize? Kurhuyigirizize oku Yezu aburhâgwa omu mango minja garhali ga mboho erhi ga nkuba ndarhi, gurhakabire mwezi gwa 12. Ebibliya n’endibi, biyerekine oku Yezu aburhâgwa omu kasanzi kali nk’ak’omwezi gwa 9 erhi gwa 10.

6, 7. (a) Ngahi enkomêdu rhubona zijirwa oku lusiku lwa Noweri zarhangirirâga? (b) Cirhuma rhuha abandi oluhembo?

⁶ Kuhikira aha, rhwanacidosagya, ngahi idinye lya Noweri lyarhondêreraga? Elyo idinye lyarhangizibagwa n’abapagani, aka Satirnaliya, madinye g’Abaroma, bakag’ilonza okuha Satirna olukengwa, hinnamahanga hy’obuhinzi. Citabu ciguma (Encyclopedia Americana) cidesire ntya: “Satirnaliya ly’âli idinye Abaroma bakag’ijira omu kagarhi kw’omwezi gwa 12. Nkomêdu nyinji zakag’ijirwa oku lwa Satirnaliya, zinakajirwa oku lusiku lwa Noweri; kwa lwiganyo okuhânana oluhembo n’omushuma.” Na kandi nsiku 25 z’omwezi gwa 12 lwo lusiku lw’idinye ly’okukengera hinyamuzinda h’izuba hihamagalwa Mitra, hinyamuzinda hy’Epersi.

⁷ Oko koshi kurhuyeresire n’obwalagale oku bantu banji bajira idinye lya Noweri barhayishi oku lyarhangizibagwa  n’abapagani. Banakacisambira omu kuderha oku Noweri kaba kasanzi ka kugeza haguma n’abantu b’omu mulala, bashagaluke haguma, balye haguma n’okuhânana oluhembo. Kobinali ntaye orhazigira omulala gwage erhi abîra bage, Yehova naye alonzize abakozi bage bakashangira haguma n’abandi. Olwandiko lwa 2 Abakorinti 9:7 lurhubwizire ntya: “Ngasi muguma ahâne nk’oku omurhima gwage gumubwizire arhahanaga nk’oli burhe nisi erhi nk’osezibwe; bulya Nyamuzinda azigira ohâna anashagalusire.” Yehova arhalonzizi rhube bahanyi omu kasanzi kalebe kw’omu kalamo kone. Abakozi ba Yehova basima bwenene okuhânana oluhembo n’okubuganana haguma n’abîra babo erhi bantu  bw’omu mulala gwabo akasanzi koshi. Barhalinda mpu habe mango malebe gone mpu lyo bahânana oluhembo erhi kubuganana haguma n’abîra erhi bantu bw’omu mulala gwabo. Banahâne buzira kulangalira oku oyu bahâga naye ayish’ibaha. Banahe abandi bulya babazigire.​—Luka 14:12-⁠14.

8. K’abanyabwenge basharhu bayishigi ogw’enyenyezi bahâga Yezu oluhembo erhi aciri kabonjo? Hugûla.

⁸ Lyo banji basambira bulya gurhi bahânana oluhembo olusiku lwa Noweri, bantu banji baderha oku erhi Yezu aburhwa, abanyabwenge basharhu bayishigi ogw’enyenyezi bagend’imuha oluhembo anaciri kabonjo. Neci, kumanyikine oku ecigusho c’abalume câl’igendir’ilola n’okuhekera Yezu oluhembo. Omu kasanzi k’Ebibliya, yali nkomêdu okuhekera omuntu w’obulagirire oluhembo. (1 Abami 10:1, 2, 10, 13) Cikoki, kw’ohugûsirwe oku abo bantu bajag’ilola Yezu bali balya bantu bakalolereza eby’enyenyezi ly’obajira amaji; k’abo bantu bâli bakozi ba Yehova? Rhuyushule kandi oku abo bantu barhajag’ilola Yezu omu mango aciri kabonjo. Bajag’ilola Yezu erhi akola ali “mwana rhabana.”​—Mateyo 2:1, 2, 11.

9. Bandi Ebibliya edesire bajijire olusiku lw’okukengera okuburhwa?

⁹ Olusiku omwana aburhwa luba lusiku lwa bushagaluke bwenene. (Ennanga 127:3) Cikone arhali oko ko kwa karhuma rhwakakengera olusiku lw’okuburhwa. Bulya gurhi? Omu Bibliya muli nyiganyo z’abantu babirhi bajiraga idinye lyabo ly’olusiku lw’okuburhwa. Omurhanzi ali Mwami Faraoni w’Emisri, n’owakabirhi ali Mwami Herodi Antipasi. (Osome Omurhondêro 40:20-22; Marko 6:21-29) Nta muguma mulibo wâli mukozi wa Yehova. Okuderha okuli, ntaho Ebibliya edesire oku hali omukozi wa Yehova wajijire olusiku lukulu lw’okukengera okuburhwa kwage.

10. Gurhi Abakristu bw’omu mango g’entumwa bakag’ibona okukengera olusiku lw’okuburhwa?

 ¹⁰ Ecitabu (The World Book Encyclopedia) cihugwîre oku Abakristu bw’omu kasanzi k’entumwa bal’imanyire oku “okukengera olusiku lw’okuburhwa yâli nkomêdu ya cipagani.” Ezo nkomêdu zal’iyimangire oku bwemere bw’obunywesi. Kwa lwiganyo, Abagiriki bal’iyemire oku haba eciremwa c’ekiroho cilanga omuntu olusiku lw’okuburhwa kwage. Bakag’irhanya oku eco ciremwa ca gwerhe olushangi lwago-lwago haguma na hinnamahanga hyaburhagwa lusiku luguma n’oyo muntu. Okukengera olusiku lukulu lw’okuburhwa kujira olushangi n’obwemere bw’ecipagani, na kandi kujira olushangi n’okusingiriza enyenyezi n’obukurungu.

11. Ka kuli kwa bulagirire omu masu ga Yehova okuba bahanyi?

¹¹ Bantu banji bakarhanya oku okukengera olusiku lw’okuburhwa kuli kwa bulagirire, bulya oko kunarhume bamanya ndi obazigira na kandi erhi abantu babà bashagalukire ebi bajira. Cikone rhukwanine rhukayereka abantu bw’omu mulala gwirhu obuzigire ngasi mango, omu ntyo rhurhakalinda mpu lusiku lulebe lone lwo rhwajira ntyo. Yehova aba alonzize ensiku zoshi rhujirire abandi aminja na kandi aba alonzize rhube bahanyi. (Osome Ebijiro by’Entumwa 20:35) Arhuhîre oluhembo lw’obuzîne, na ntyo rhunakamuvuga omunkwa k’olo luhembo lwinja arhuhîre, arhali mpu olusiku lw’okukengera olusiku lwirhu lw’okuburhwa lone rhwakakajira ntyo.​— Ennanga 8:3, 4; 36:9.

12. Bulya gurhi olusiku lw’okufâ kw’omuntu lw’olukulu aha lusiku lw’okuburhwa?

¹² Olwandiko lwa Omuhanûzi 7:1 ludesire ntya: “Izino lyo likulu oku mavurha g’engulo ndârhi; n’olusiku lw’okufâ lw’olukulu aha lusiku lw’okuburhwa.” Bulya gurhi rhwakaderha oku olusiku lw’okufâ lw’olukulu aha lusiku lw’okuburhwa? Olusiku lw’okuburhwa kwirhu, rhunabe rhurhacijira  kantu koshi-koshi kabe kinja erhi kabi. Cikoki erhi rhukolesa akalamo kirhu omu kukolera Yehova n’okujirira abandi aminja, “rhunacijire izino linja,” na Yehova anakengere ebyo byoshi erhi rhufâ. (Ayubu 14:14, 15) Abakozi ba Yehova barhajira idinye lw’okukengera olusiku lw’okuburhwa kwabo, ciru barhanakengera olusiku lw’okuburhwa kwa Yezu. Idinye liguma lyone Yezu arhurhegesire mpu rhukajira, kuli Kukengera olufû lwage.​—Luka 22:17-20; Abahabraniya 1:3, 4.

13, 14. Idinye lya Pasaka ligwerhe olushangi na bici?

¹³ Erhi bantu banji bajira idinye lya Pasaka, banarhanye mpu bali bakengera okufûka kwa Yezu. Cikoki idinye lya Pasaka ligwerhe olushangi na Eostre, hinnamahanga hikazi hy’ecipagani hy’omu cihugo c’e Bungereza, hiba hinnamhanga hy’obuce n’okumeza emburho. Rhushib’ihugûkwa oku Pasaka ye hamagalwa Eostre omu lulimi lw’Ecingereza na Ostern omu lulimi lw’Ecialema. Citabu ciguma cihugûla binji (Dictionary of Mythology) cidesire oku Eostre hyâli hinnamahanga hikazi hy’okuyeza. Nkomêdu nguma na nguma zigwerhe olushangi na Pasaka ziyerekine ntyo. Kwa lwiganyo; ensiklopediya nguma (Encyclopædia Britannica) edesire oku “amaji gaba gashushanyize akalamo kahyahya n’obufûke.” N’omu nkomêdu z’ecipagani, ensungura zishushanyize okuyeza. Biyumvikine bwinja oku nta lushangi loshi-loshi obufûke bwa Yezu bugwerhe n’idinye lya Pasaka.

¹⁴ Ka Yehova anashagaluke erhi abona abantu bali bajira enkomêdu z’ecipagani buzinda bakaderha mpu bali bakengera obufûke bw’Omugala? Nanga ciru n’ehitya. (2 Abakorinti 6:17, 18) Okuderha okuli, nta lusiku ciru n’oluguma Yehova arhubwizire oku rhukakengera obufûke bwa Yezu Kristu.

15. Ngahi Halloween arhangirirâga?

¹⁵ Halloween liba idinye lijirwa oku malalîro gw’olusiku lw’okukengera abatagalifu. Er’idinye lijira olushangi n’eby’obulaguzi. Na kandi lijira olushangi n’enyigirizo z’obunywesi ziderha oku erhi omuntu afâ anabe muzimu erhi momoka. Arhali ene ly’elyo idinye lyarhonderaga. Ensiku z’okubaluka kw’omwezi gw’omu lusiku lurhanzi lw’omwezi gw’Ikumi na Muguma, Abaselti b’e Grande-Bretagne n’ab’e Irlande bakag’ijira idinye lya Samain. Bakag’irhanya mpu olusiku lw’elyo idinye amaroho g’abafîre gakag’igaluka ah’igulu. Bakag’ihira  ebiryo n’amamvu emuhanda gw’aha mwabo mpu lyo ago maroho “garhag’ibamyoga-myoga.” Enkomêdu zishushine n’ezo, zinabonekane olusiku lw’okufâ kw’omuntu. Kwa lwiganyo, okuyerekeza irhwe lyo owafîre ebuzikiro bw’izuba, okutwana omuliro erhi mishuma n’okulala aha ciriyo obudufu boshi.

16, 17. Bici Abakristu bali bacireheganya okujira obuhya bashinganine barhanyekwo?

¹⁶ Obuhya kaba kasanzi kabushagaluke. Amahya garhajirwa kuguma omw’igulu lyoshi. Bantu banji barhacidosa ngahi enkomêdu zijirwa olusiku lw’obuhya zarhangirirâga. Barhayishi oku nkomêdu nguma na nguma zarhangiriraga omu madîni g’ecipagani. Cikoki Abakristu bohe nka bali barheganya obuhya bwabo bakwanine bajire okwabo koshi lyo bashagalula Yehova. Erhi bakalonza okuhugûkwa binji lugenda aha ezo nkomêdu z’obuhya nguma na nguma zarhangiriraga banahikira aha barhôla emihigo minja.​—Marko 10:6-⁠9.

¹⁷ Nkomêdu nguma na nguma zijirwa olusiku lw’obuhya, ziba zakulonza ‘okuha abarholanaga iragi’ ly’akalamo kinja. (Izaya 65:11) Kwa lwiganyo, omu bihugo biguma na biguma, abantu banakwebe emicere n’ebindi oku barholanaga. Okujira ntyo, kuba kuderha oku abarholanaga bayish’iburha abana, bayish’iba n’obushagaluke, bayish’ilama nsiku nyinji n’okulangwa oku buhanya. Cikoki Abakristu bashinganine babe masu omu kuciyasa n’enkomêdu za ntyo zigwerhe olushangi n’idîni ly’obunywesi.​—Osome 2 Abakorinti 6:14-18.

18. Makanuni gahi g’Ebibliya rhukwanine rhukengere omu kasanzi rhukola rhwalonza okujira obuhya?

¹⁸ Abakristu bw’okuli babà balonzize olusiku lw’obuhya bwabo lube lwa bushagaluke kuli bo n’oku bantu boshi bali aho. Amango g’obuhya bw’Ecikristu, erhi abahamagale bakacihira  eluhya babe n’ec’okuderha, barhakwanini baderhe ebintu bibi, barhakwanini baderhe enderho z’eby’enshonyi erhi enderho zakarhuma abarholanaga erhi bandi bantu bayumva enshonyi. (Emigani 26:18, 19; Luka 6:31; 10:27) Erhi rhujira obuhya, rhunacihangane ‘okurhayerekana obuhirhi bwirhu.’ (1 Yowane 2:16) Kw’okuderha oku rhurhajira idinye lizibu-zibu liyerekine oku rhuli ba birhi bibishi lyo rhukakengera obwinja bw’olo lusiku.​—Olole Amahugûlo nomero 28.

19, 20. Ngahi okugonga amaveri erhi amacupa haguma kwarhangirirâga?

¹⁹ Okulongeza owundi amagala minja erhi kuhukuza amacupa erhi maveri haguma mpu lyo balongeza owundi aminja, eri nkomêdu eyenire hoshi ene. Oko kunajirwe amango gw’obuhya erhi omu kandi kasanzi. Gurhi oko kujirwa? Muntu muguma anabe ali ahâna eciragane n’abandi banabe bali balengeza amaveri gabo enyanya. Bici Abakristu bakwanine bamanye okubiyerekire eyo nkomêdu?

²⁰ Citabu ciguma (International Handbook on Alcohol and Culture) ciyerekine oku okulongezanya aminja kurhenzire omu nkomêdu zamîra z’ecipagani. Lugenda eyo nkomêdu, “amishi marherekêre gakazag’ihâbwa rhunnamahanga.” Ago mishi “gakazag’ihânwa bulya hali eciragane cihanyirwe, kuli kuderha oku hali isala lya nderho nyofi zidesire ‘kalamo kaliri!’ erhi ‘oku magala gawe!’” Omu mango gamîra abantu bal’igwerhe enkomêdu y’okuyinamula ecikombe ly’obahûna rhunnamahanga rhwabo rhubagishe. Cikoki arhali ntyo kwo Yehova ahâna emigisho.​—Yowane 14:6; 16:23.

21. Madinye ga gurhi Abakristu bashinganine baciyase nago?

²¹ Embere ohige erhi waja okw’idinye lilebe, orhanye bwinja omanye gurhi elyo idinye lyayish’iyorha na gurhi abantu  bayish’ilijakwo bayish’iba bayosire. Kwa lwiganyo, omu kasanzi k’ekorteje, abantu banakasama amasamo gakarhuma abantu barhondera babà n’enyifinjo z’okujira eby’enshonyi, n’abandi banabe bali banywa manvu manji, ciru banahikire aha bajira ebijiro by’enshonyi. Ago madinye ganashumya abantu okulola epornografi n’okuyerekana obuzigire bulushire olugero bw’ecihugo cabo. Ka rhwanayerekana oku rhushombire ebi Yehova ashomba erhi rhwakaja oku madinye ashomba?​—Ennanga 1:1, 2; 97:10; 119:37.

22. Bici byakarhabala Omukristu amanye erhi aja okw’idinye lilebe erhi arhalijekwo?

²² Abakristu bakwanine babe masu. Bakwanine balahire ngasi idinye libulira Nnamahanga obukenge. Entumwa Paolo yayandika ntya: “Kuziga kubîre kulya, kubîre kunywa, na ngasi hyoshi mwakajira, byoshi mubijire omu kukuza Nnamahanga.” (1 Abakorinti 10:31; olole Amahugûlo nomero 29) Arhali madinye goshi gajira olushangi n’idîni ly’obunywesi, n’okuzigira bwenene ecihugo, erhi n’olugenzi lubi lw’okujira eby’enshonyi. Erhi akaba idinye ohamagirwekwo libonekine oku lirhavuniri amakanuni g’Ebibliya, wene wanacishoga erhi walijakwo erhi orhalijekwo. Rhuyushûle oku, erhi wakahiga oku waja erhi orhaja kw’elyo idinye orhanye bwinja gurhi abandi bayish’ikabona omuhigo gwawe.

23, 24. Gurhi rhwakahugûlira abantu bw’omu mulala gwirhu barhali Bahamirizi ba Yehova bulya gurhi rhurhajira madinye maguma na maguma?

²³ Nkabaga walesire okuja oku madinye garhakengesa Yehova. Cikoki nkaba abantu bw’omu mulala gwawe barhali Bahamirizi ba Yehova bali barhanya oku nkaba orhacibazigira erhi nkaba orhacisima kugeza akasanzi haguma nabo. Kuli bo, amadinye kone kasanzi bakaba nako kw’okuba haguma omu mulala. Gurhi wakajira omu kanga ka ntyo? Hali  njira nyinji z’okubabwira oku ociba obazigire ona manyire oku bali babulagire kuli we. (Emigani 11:25; Omuhanûzi 3:12, 13) Kwa lwiganyo, wanababwira oku wakashagalukire mugeze akasanzi haguma nabo omu gandi mango kuleka ago mango g’amadinye.

²⁴ Erhi omulala gwawe gwakalonza gumanye bulya gurhi orhacijira madinye maguma na maguma, mw’ako kasanzi wanaba n’obulyo bwinja bw’okubaganiza, omu kusoma ebitabu by’ikubuliro lya Yehova erhi wanaja oku enterneti yirhu jw.org, omo wanabona amahano minja gakakurhabala obarhabale bwinja. Orhalonzagya okubabwira oku we yazize nka kulya oku lubanja mwali erhi olonze okubaseza barhondêre barhanya akawe. Obarhabale bahugûkwe bone oku warhanyîze bwenene kw’ago madinye, wahikira aha wabona oku orhakacigajira. Obe mwirhohye “n’iderha lyawe libe lya kusimisa ensiku zoshi, linunirire nka munyu.”​—Abakolosi 4:6.

25, 26. Gurhi ababusi bakarhabalamwo abana babo bahikire aha bazigira amakanuni ga Yehova?

²⁵ Kuli kwa bulagirire ngasi muntu amanye bulya gurhi arhozire omuhigo gw’okurhacija oku madinye maguma na maguma. (Abahabraniya 5:14) Okurhulonza kuba kushagalula Yehova embere za byoshi. Erhi rhwakaba rhugwerhe abana, rhukwanine rhucihe akasanzi kw’okubarhabala bahugûkwe n’okuzigira amakanuni g’Ebibliya. Nabo banahikira aha bashagalula Yehova erhi bakaba bamuyemire n’erhi bakaciyumva bamuyegerire.​—Izaya 48:17, 18; 1 Petro 3:15.

²⁶ Yehova anashagaluke erhi abona rhuli rhwajira okwirhu koshi lyo rhumuha enterekêro ecîre n’okuba bikubagirwa. (Yowane 4:23) Cikoki bantu banji barhanya oku birhakahashikana omuntu abe mwikubagirwa mw’er’igulu ligalu-galu. Ka kobinali? Ecigabi cikulikire carhurhabala rhuhugûkwe bwinja erhi byanahashikana okuba bikubagirwa erhi birhakahashikana.