1, 2. (a) Bici abahya boshi balug’ilangalira? (b) Madoso gahi rhwashuzako mw’eci cigabi?

ORHANYE gurhi omulume n’omukazi baciyumva olusiku l’okujira obuhya. Banabe bagwerhe omwishingo munene bulya bakola balama haguma bahikirizanye ebi balaganîne. Banabe bagwerhe obulangalire oku akalamo k’obuhya bwabo kaba ka mwishingo.

² Cikone eby’okugayisa kuli kubona mahya manji ene, garhalimo omwishingo. Ly’obuhya buba n’omwishingo bunalame nsiku nyinji, abarhôline bashinganine bayemere okulongozibwa na Nnamahanga. Rhulolage amashuzo g’Ebibliya kw’aga madoso: Bunguke buguma na buguma buhi buba omu buhya? Akaba orheganyize oku waja omu buhya, gurhi wakacishoga bwinja omulume erhi omukazi mwajira naye obuhya? Gurhi wakaba mulume mwinja erhi mukazi mwinja? Bici byakarhabala obuhya bulame nsiku nyinji?​—Osome Emigani 3:5, 6.

3. K’orhanyize oku omuntu arhakaba n’omwishingo nk’arhajaga omu buhya? Ohugûle.

³ Bantu banji banakarhanya mpu omuntu arhakaba n’omwishingo nka arhajaga omu buhya. Cikone, obo buli bunywesi. Yezu adesîre oku obulamba lwanaba luhembo  nk’omuntu abukolesize bwinja. (Mateyo 19:11, 12) N’entumwa Paolo yadêrha oku hali bunguke bunji erhi omuntu akabêra mulamba. (1 Abakorinti 7:32-38) Wene wakacishoga erhi waja omu buhya erhi nanga. Orhasezibagwa n’abîra bawe erhi bantu b’omu mulala gwawe erhi bulya ah’olamire ntyo kwo bayirukir’ijira.

4. Bunguke buhi na buhi rhwakaba nabo erhi rhwakajira obuhya?

⁴ Ebibliya edesire oku obuhya luba luhembo lurhenga emwa Nnamahanga n’oku omu buhya muba bunguke buguma na buguma. Yehova adêrha ntya lugenda Adamu: “Kurhali kwinja omuntu ayorhe yene. Namuha omurhabâzi omushinganine.” (Omurhondêro 2:18, NWT) Yehova alêma Eva oku abe muka Adamu, ntyo barhondêza obuhya burhanzi. Erhi abarhôline bakaba bagwerhe abana, n’erhi akaba bajijire obuhya, oko kwanarhabala abana babo balererwe omu murhula. Cikone okuburha abana arhali kone kwakarhuma omuntu aja omu buhya.​—Ennanga 127:3; Abefezi 6:1-4.

5, 6. Omu njira nci obuhya bwakaba nka “lukoba lwa migozi isharhu?”

⁵ Mwami Salomoni ayandîka, erhi: “Aha omuntu akaba kahûmba, bakabà babirhi, kulya kubà go mango omukolo gugwerhe obunguke. Erhi hankajira owakulûmba, owabo anamuzûsa. Cikone gurhi byakaba owakulûmba nk’ali yene arhanagwerhi càzûsa? . . . N’olukoba lwa migozi isharhu lurhatwika duba.”​—Omuhanûzi 4:9-12.

⁶ Obuhya bwinja guba mulungano gwa bantu babirhi bazigirine, bakuhânana omurhima na bakurhabalana. Obuzigire bwanajira obuhya bube buzibu, cikone obuhya bwanaba buzibu bwenene erhi akaba omulume n’omukazi bali baharamya Yehova. Omu ntyo obuhya bwabo bwanazibuha nka “lukoba lwa migozi isharhu.” Olukoba lwa migozi isharhu luba luzibu kulusha olukoba lwa  migozi ibirhi. Obuhya bwanaba buzibu nka Yehova ali ekarhi kabo.

7, 8. Ihano lihi Paolo ahanyîre lugenda obuhya?

⁷ Enyuma z’olusiku lw’obuhya omulume n’omukazi banaba bakola bagwerhe oluhûma lw’okujira ecijiro c’obuhya. (Emigani 5:18) Cikone erhi omuntu akaja omu buhya mpu lyo naye ajira ecijiro c’obuhya, oko kwanarhuma acishoga kubi omuntu bajira bonaye obuhya. Ebibliya edesire oku kwanaba kwinja okuja omu buhya erhi akaba omuntu “anayusize omwibalukwe gw’obusole,” kw’okuderha kuyusa akasanzi irala ly’okujira ecijiro c’obuhya liba linji. (1 Abakorinti 7:36, NWT) Kwanaba kwinja okurhang’ilinda er’irala lipunguke. Omu ntyo omuntu anacishoga bwinja oyu bajira naye obuhya.​—1 Abakorinti 7:9; Yakobo 1:15.

⁸ Akaba oli wacirheganya oku wajira obuhya oshinganine ocirheganye kuli byoshi oku bushagaluke n’oku mazibu. Entumwa Paolo yadesîre oku abaja omu buhya “bayumva amalibuko omu mubiri gwabo.” (1 Abakorinti 7:28) Ciru n’abarhôline, bala rhwakaderha oku bohe babà bayumvikine, nabo bajira amazibu. Co cirhumire amango wacishoga oyu wajira naye obuhya oshinganine ojire ntyo n’obwenge.

9, 10. Gurhi byakaba erhi wakarhôla erhi oheruke n’orhali Muhamirizi wa Yehova?

⁹ Embere ocishoge oyu wajira naye obuhya oshinganine okengere aka kanuni k’Ebibliya: ‘Mumanye mwakashangîra murhamba muguma n’abarhali bemezi.’ (2 Abakorinti 6:14) Oluderho “kushangîra murhamba muguma,” lurhukengezize gurhi omu mango ga mîra obuhinzi bwakag’ijirwa. Abahinzi bakag’ikolesa bapunda nka bahinga. Barhakashwekire bapunda babirhi haguma mpu bahinge  n’obo barhagwerhi buhashe buguma. Erhi bakajijîre ntyo kwakabîre kubi bwenene, bulya abo bapunda bakayagazinye. Ntyo, kobinali ene, erhi omuntu akacishomya mpu arhôla erhi kuheruka n’omuntu orhali Muhamirizi wa Yehova, arhakabula buyagalika ciru byakaba gurhi. Co cirhumire Ebibliya erhubwizire oku rhurhôle erhi rhuheruke “muli Nyakasane” mone.​—1 Abakorinti 7:39.

¹⁰ Hali amango Bakristu baguma na baguma baderha oku ahali h’okubêra ba kesheni, banacirhôlera erhi kuciherukira n’oyu banabwine, ciru akaba arhali Muhamirizi wa Yehova. Cikone, bakwanine bamanye oku Ebibliya edesire oku obuhya bwa ntyo burhabula mazibu; kavulindi, ngumi n’emihuku. N’omu kujira ntyo omuntu anaba muhanya. Rhuli Bahamirizi ba Yehova, okuharamya Yehova ko kaba kantu ka bulagirire omu kalamo kirhu. Gurhi wakakaciyumva erhi akaba orhagend’iharamya Yehova haguma n’omulume wawe erhi haguma na mukawe? Bene wirhu na bali birhu banji bahizîre oku ahali barhôle erhi baheruke n’omuntu orhamanyiri Yehova kw’okukulu babêre balamba.​—Osome Ennanga 32:8.

11. Gurhi wakajira ly’ocishoga bwinja oyu mwajira mweshi obuhya?

¹¹ Arhali okubona mpu omuntu ali Muhamirizi wa Yehova kw’okuderha oku anaba mulume mwinja erhi mukazi mwinja. Akaba ohizîre oku warhôla erhi waheruka, ocihangane olongereze olya muntu obwine oku omuzigire onabwine oku mwayish’ikayumvikana mwembi. Olongereze olya mugwerhe mwembi mihigo miguma na kandi olya ohira Yehova oku nafasi ntanzi omu kalamo kage. Ly’omanya gurhi wakabona omuntu wa ntyo, osome onarhanye oku mahano gali omu bitabu rhuhabwa na mushizi mwirhonzi na mwikubagirwa.​—Osome Ennanga 119:105.

12. Bici Ebibliya erhuyigirizize okubiyerekire okulongeza omurhabana erhi omunyere oyu barhôlana naye?

 ¹² Omu bihugo binji ababusi bo bashogera omwana wabo ndi waba iba erhi mukage. Okujira ntyo, banarhanye oku ababusi bo bamanyire binji lugenda okuba mulume mwinja erhi mukazi mwinja. Ntyo kwo abakozi ba Yehova ba mîra bakag’ijira. Erhi akaba enyiganyo ziri omu Bibliya z’omulala gwawe gukulikire, kwanaba kwinja. Omu ntyo byanahûna bakolese amahano gali omu Bibliya ly’ebalongoza bamanye borhere buci bakwanine balonze m’oyo muntu. Kwa lwiganyo, erhi Abrahamu aj’ilongeza omugala Izaki omukazi, arhalonzagya mpu ashebere omu nyumpa  emanyikine erhi omu mulala gw’abagale, cikoki aj’ilonza omunyere ozigire Yehova.​—Omurhondêro 24:3, 67; olole Amahugûlo nomero 25.

13-15. (a) Gurhi omulume akacirheganya lyo ayish’iba cirhwe cinja c’omulala? (b) Gurhi omukazi akacirheganya lyo ayish’iba muzire mwinja w’omulala?

¹³ Embere oderhe oku nani nanajaga omu buhya, bihunyîre orhang’idamala ocidose erhi ocirheganyize bwinja. Hali amango wakaderha, mpu neci kobinali nkola ncirheganyize. Cikone rhulolage okucirheganya bwinja kw’okuderha gurhi. Wabona oku hali amango ishuzo lyakakusomera.

¹⁴ Ebibliya edesire oku omulume n’omukazi bajira emikolo eri lubero. K’okuderha oku, okucirheganya bwinja kw’omulume arhali kw’okucirheganya bwinja kw’omukazi. Embere omulume aderhe oku akola acirheganyize bwinja ashinganine arhang’icidosa erhi ayishihash’ihikiriza ebi ecirhwe c’omulala cihunyîrwe. Yehova abwizire omulume oku ashinganine ahikirize amalagirire g’omubiri n’ag’obunyamûka g’omulala gwage. Akantu kw’obulagirire bwenene, omulume akwanine ayigirize omulala gwage lugenda Nnamahanga. Ebibliya edesire oku omulume orhashibirira mulala gwage ali “mubi kulusha omupagani.” (1 Timoteyo 5:8) Omu ntyo akaba oli mulume onal’iwarheganya okuja omu buhya, kuli kwinja orhanye bwenene kw’aka kanuni kali omu Bibliya: “Orheganyize omukolo gwawe embuga, oshubija aho ohînge ishwa lyawe, wabona oku watunga enyumpa yawe.” Ocidose wene erhi kobinali okaja omu buhya wayish’iba mulume oshinganine omu masu ga Yehova.​—Emigani 24:27.

¹⁵ Omunyere waheruka naye ashinganine arhang’icidosa erhi kobinali ayish’ihikiriza ebihunyîrwe oku muzire.  Ebibliya eyerekine bintu biguma na biguma omukazi akajira, lyo ayerekana oku ashibirire iba n’abana bage. (Emigani 31:10-31) Bantu banji embere baje omu buhya, banacidose ntya: Lero bici oyunarhôla ayish’ikanjirira we! Cikone ezo ntanya zirhali nyinja, bulya, Yehova aba alonzize rhukarhanya bici rhwayish’ikajirira oyo muntu rhwarhôlana naye.

16, 17. Bici okwanine orhangirhanyako embere oje omu buhya?

¹⁶ Embere omuntu aje omu buhya akwanine arhang’irhanya ebi Yehova ahunyîre omulume n’omukazi. Arhali okuderha mpu bulya omulume y’irhwe ly’omulala mpu akwaninage abe mukali nka ntale lugenda abantu b’omulala gwage. Omulume mwinja anayige olwiganyo lwa Yezu omu kushibirira n’okuzigira abantu b’omulala gwage. (Abefezi 5:23) Omukazi mwinja anakalunga iba okuboko omu mihigo yage. Omunyere walonza okuheruka ashinganine arhang’icidosa erhi kobinali ayish’ikalunga okuboko emihigo y’iba. (Abaroma 7:2) Acidose erhi kobinali ayish’ikayumva ashagalukire okukenga iba orhali mwimana. Erhi akaciyumva oku arhayish’ikarhegekwa, kwanaba kwinja arhaherukaga, acibêrere mulamba.

¹⁷ Omulume n’omukazi ngasi muguma akwanine ashokoze amalagirire g’owabo, barhabaga banacikaliza. (Osome Abafilipi 2:4) Entumwa Paolo yayandisîre erhi: “Co cirhumire, ngasi muguma winyu ashinganine azigire mukage nk’oku acizigira yene; omukazi naye ashinganine akenge iba bwenene.” (Abefezi 5:21-33, NWT) Omulume n’omukazi bashinganine bazigirane banakakengana. Akantu kashagalula omulume kuba kubona kunganaci mukage amukenzire. N’ebi shagalula omukazi, kuba kuciyumva oku bamurhonyize banamushibirire.

18. Bulya gurhi abarhôlana bashinganine babe masu omu kasanzi k’okushebana?

¹⁸ Akasanzi k’okushebana kakwanine kabe kasanzi ka  kulonza ngasi muntu amanye bici ali alonza omu wabo. Ako kasanzi kali kakubarhabala babone ebintu nk’oku binali, lyo babona erhi kobinali bayishihash’ilama haguma. Akasanzi k’okushebana kaba kakurhabala abarhôlana bamanye ngasi muguma wabo ayish’iba mulume wa gurhi erhi mukazi wa gurhi. Omu ntyo obuzigire bwabo bunagendekere bwayushûka. Co cirhumire akasanzi barhanacirhôlana bashinganine babe masu ly’obo buzigire burharhumaga bajira eby’enshonyi. Obuzigire b’okunali bwabarhabala babe n’ilehe ly’okucihasha mw’ako kasanzi. N’oko kwabarhabala bayake ngasi cijiro coshi cakashereza obwîra bwabo haguma na Yehova.​—1 Abatesalonika 4:6.

19, 20. Gurhi Abakristu b’okuli babona obuhya?

¹⁹ Filime nyinji na bitabu binji erhi biganirira olusiku lw’obuhya, okubuzinda bwazo onabone bayerekine oku olusiku lw’obuhya kuli kulya n’okucishinga bwenene. Cikone Ebibliya eyerekine oku olusiku lw’obuhya gucirh’imurhondêro gw’akalamo ka bantu babirhi. Yehova alonzize obuhya gube mulungano gwa kulama nsiku nyinji.​—Omurhondêro 2:24.

²⁰ Ene, bantu banji bakola babona oku obuhya karhaciba kantu ka bulagirire, kw’okuderha oku obuhya bwanahwa amango banalonzize. Banabone oku kuli kulembu okujira obuhya n’okubuzaza. Bantu banji banarhanye oku erhi amazibu gakaja omu buhya, byanahûna balekane. Cikone okengere olwiganyo lw’olukoba lwa migozi isharhu, lurhakatwika duba ciru lwakagwarhwa na mazibu gahi. Erhi rhwakayemera Yehova arhulongoze, obuhya bwirhu bwanalama nsiku nyinji. Yezu adesîre oku: “Arhali omuntu ye wahumanula eci Nyamuzinda ahumanyagya.”​—Mateyo 19:6.

21. Bici byakarhabala omulume n’omukazi bazigirane?

²¹ Ngasi muguma wirhu ajira oborhere bwinja n’obuzamba. Kuba kulembu okusegeza obuzamba bw’abandi, ci bwenene eyo ngeso eba omu barholîne. Cikone akaba ntyo kwo rhujira rhurhakaba n’obushagaluke ciru n’ehitya. Cikoki rhwanaba n’obushagaluke erhi rhwakakasegeza oborhere bwinja bw’owundi. Ka kuli kulembu okusegeza oborhere bwinja bw’owundi? Neci, kuli kulembu! Bulya Yehova arhasegeza obuzamba bwirhu, cikone anakalabiriza oborhere bwirhu bwinja. Orhanye nka Yehova akag’ijira nk’oku oyu mwandisi w’ennanga adesire: “Erhi wakakalabiriza ebyaha, mâshi Yawe; we kasinga Yehova,  ndi wakabêra?” (Ennanga 130:3, NWT) Omulume n’omukazi, ngasi muguma wabo ashinganine ayige olwiganyo lwa Yehova omu kukasegeza oborhere bwinja bw’owabo.​—Osome Abakolosi 3:13.

22, 23. Lwiganyo lwinja luhi Abrahamu alekire abarhôline?

²² Oku abarholîne bagendekire balama haguma, kwo n’obuhya bwabo bwagendekera bwazibuha. Abrahamu na Sara bal’igwerhe myaka minji barhôline, cikone, bagwêrhe  obushagaluke omu buhya bwabo. Erhi Yehova abwira Abrahamu oku arhenge omu lugo lw’e Uru, Sara al’ikola mugikulu wa myaka 60. Orhanye oku mazibu bakabwîne erhi bababwira oku barhenge omu nyumpa yabo nyinja, buzinda bababwire oku omu mabashe bakola baj’ilama. Cikone Sara arhalahiraga bulya ali mwîra wa Abrahamu, akag’ikenga iba, banakag’ikola omu cinyabuguma. Ayemera okulunga iba okuboko ly’ogo muhigo guhikirira.​—Omurhondêro 18:12; 1 Petro 3:6.

²³ Okuba n’omwishingo omu mulala, kurhali kuderha oku ensiku zoshi omulume n’omukazi bakayumvikana omu ngasi kantu. Okengere oku lusiku luguma Abrahamu arhayumvikanaga na mukage Sara lugenda kantu kaguma. Yehova abwîra Abrahamu ntya: “Ngasi oku Sara akanakuhûna onakuyemere bulyalya Izaki lyo iburha lyahêka izîno lyawe ensiku zoshi.” (Omurhondêro 21:9-13) Erhi mwakaba murhayumvikana na mukawe erhi balo oku bintu biguma na biguma, orhavunikaga omurhima. Akantu kw’obulagirire kuli kugendekera mwazigirana n’okukengana ciru akaba murhayumvikini omu bintu biguma na biguma.

24. Gurhi obuhya bwirhu bwakalerhera Yehova olukengwa?

²⁴ Omu bigamba by’Abakozi ba Yehova, wanabonamwo ebihumbi by’abarhôline bagwerhe obushagaluke. Erhi wakalonza oje omu buhya, okengere oku okucishoga ndi waba mukawe erhi balo, guli muguma gw’omu mihigo y’obulagirire bwenene wakarhôla omu kalamo kawe. Rhuyumvirhage kuhikira aho, oku kuli kwa bulagirire olongereze obulongozi bwa Yehova. Na ntyo, wanahikira aha wacirhegenya oku buhya bwinja. Wanahikira aha waba n’obwîra buzibu haguma n’omulume wawe erhi mukawe, n’oko kwanalerhera Yehova olukengwa.