1, 2. Bulya gurhi ozigira Yehova?

K’OBA ozigire Nnamahanga? Oba omuzigire bwenene bulya kwo kwarhumâga wacihâna emwage. Nnamahanga ye Mwîra wawe murhanzi. Yehova ye warhangag’ikuzigira embere omuzigire. Ebibliya edesire ntya: “Rhwehe rhuzigirane, kulya kuba ye warhangag’irhuzigira.”​—1 Yowane 4:19.

² Yehova arhuyeresîre obuzigire bwage omu njira nyinji. Arhuhîre igulu n’ebintu binja bibamwo birhuma rhushagalukira akalamo. (Mateyo 5:43-48; Amafulûlo 4:11) Alonzize rhube n’obwîra bwinja haguma naye, arhuhîre obulyo bw’okulonza okumumanya. Rhunayumvirhize Yehova omu kusoma Ebibliya. Naye anayumvirhize amasala girhu erhi rhumushenga. (Ennanga 65:2) Anarhulongoze n’okurhuha emisi kugerera iroho lyage litagatifu. (Luka 11:13) Ciru arhumîre Omugala hanw’igulu ly’arhukûla omu caha n’omu lufû.​—⁠Osome Yowane 3:16; Abaroma 5:8.

3. Gurhi rhwakabamwo n’obwîra bwa hofi-hofi haguma na Yehova?

³ Rhanya hisungunu lugenda mwîra wawe muguma ozigira bwenene. Anashangire obushagaluke bwawe  n’amazibu gawe. Ly’obêra mwîra wa lebe, biba bihunyîre bushiru bunji. Ntyo kobinali okubiyerekire obwîra bwirhu haguma na Yehova. Ye Mwîra w’okunali rhwakaba naye, rhwanaba bîra bage ensiku zoshi. Co cirhumire Ebibliya erhubwizire erhi: ‘Musêre omu buzigire bwa Nnamahanga.’ (Yuda 21) Gurhi rhwakasêra omu buzigire bwa Nnamahanga? Ebibliya eshuzize ntya: “Bulya okuzigira Nyamuzinda kuba omu kushimba amarhegeko gage. N’amarhegeko gage garhaba mazirho.”​—1 Yowane 5:3, NWT.

4, 5. (a) “Okuzigira Nnamahanga” kw’okuderha gurhi? (b) Mangaci obuzigire bwawe kuli Yehova bwarhondêraga bwazibuha?

⁴ Bici Ebibliya elonza okuganirira erhi ederha “obuzigire kuli Nnamahanga?” Oko kurhahugwîri obuzigire Nnamahanga arhujirako, ci kuhugwîre obuzigire rhumujirako. K’ocikengire amango warhondêraga wazigira Yehova?

⁵ Kengera gurhi waciyumvîrhe erhi omanya oku Yehova alonzize olame ensiku n’amango omw’igulu lihyahya. Waciyigirizîze byoshi Yehova ajijîre lyo ayish’ihikiriza ogo muhigo gwage. Wahugûkwa oku arhuhîre oluhembo lwago-lwago erhi arhûma Omugala hanw’igulu. (Mateyo 20:28; Yowane 8:29; Abaroma 5:12, 18) Wayûmva oshagalusire bwenene okubona Yehova akuzigire, ho n’aho nawe, warhondêra wamuzigira.​—Osome 1 Yowane 4:9, 10.

6. Bici okuzigira lebe kurhushumya rhujire? Bici obuzigire bwawe kuli Yehova bwakushumîze ojire?

⁶ Cikoki obo buzigire wayumvâgya ogwerheko Nnamahanga gwâcir’imurhondêro kone. Kwa lwiganyo erhi omuntu azigira muntu mulebe, arhali okuderha  kone erhi “nkuzigire” kw’okuyerekana oku kobinali omuzigire. Obo buzigire bunarhushumye rhube n’irala ly’okujira ebintu byakamushagalula. Ko n’oko, obuzigire bwawe kuli Yehova bwakuhîre irala ly’okulama nk’oku alonzize. N’oku obuzigire bwawe bwagendekîre bwazibuha, wahikîra aha wacihâna emwa Yehova n’okubatizibwa. Erhi ocihâna emwage, wamulagânya oku wamukolera ensiku zoshi. (Osome Abaroma 14:7, 8) Gurhi wakahikirizamwo eco ciragane cawe?

7. Bici rhwakajira erhi akaba rhuzigira Yehova? Marhegeko gahi maguma na maguma ga Yehova oyishi?

⁷ Bulya rhuzigira Yehova, “rhunakenge amarhegeko gage.” Gurhi rhwakajiramwo ntyo? Omu kumurhumikira. Ebibliya erhuyigirizize rhumanye gurhi Yehova alonzize rhulame. Kwa lwiganyo, Nnamahanga adesire oku kuli kubi okuharamya akantu erhi wundi muntu orhali ye, bwenene ashomba endalwe, obushambo, obunywesi n’okujira eby’enshonyi haguma na mukabene erhi iba wabene.​—1 Abakorinti 5:11; 6:18; 10:14; Abefezi 4:28; Abakolosi 3:9.

8, 9. Gurhi rhwakamanya ebi Yehova alonzize rhujire amango nt’irhegeko ly’Ebibliya limanyikine bwinja? Hâna olwiganyo.

⁸ Lyo rhushagalula Yehova, rhushinganine rhujire bintu binji kulusha okukenga amarhegeko gage. Arharhuhâga entondekanye y’amarhegeko rhushinganine rhukolese omu ngasi kanga k’akalamo kirhu. Akandi kasanzi harhaba irhegeko lilebe lirhuyeresire ebi rhushinganine rhujire omu ngasi kanga. Omu kanga ka ntyo, bici byakarhurhabala rhurhôle emihigo minja? (Abefezi 5:17) Omu Bibliya muba amakanuni. Amakanuni g’Ebibliya, kw’okuli kw’Ebibliya kulya kurhakahindûlwa, kunarhuyigirize entanya za Yehova ziri zihi omu kanga kalebe.  Omu kusoma Ebibliya rhunahikire aha rhwamanya Yehova bwinja. Rhwanamanya entanya zage, ebi azigira n’ebi ashomba.​—Osome Ennanga 97:10; Emigani 6:16-19; olole Amahugûlo nomero 1.

⁹ Kwa lwiganyo, gurhi rhwakahiga bintu bihi rhwalola oku Televiziyo erhi oku Enterneti? Yehova arharhubwiziri ngasi kantu rhushinganine rhujire omu kanga kalebe. Cikoki amakanuni arhuhire ganarhurhabala rhurhôle emihigo minja. Ene bintu binji by’okucishagalula biyunjwiremo ebintu by’obushumusi n’eby’enshonyi. Yehova arhubwizire oku anakashologorhwa n’ebijiro “by’abazigira obuminya” n’oku “ayish’itwira olubanja abahushi n’abagonyi.” (Ennanga 11:5, NWT; Abahabraniya 13:4, NWT) Gurhi ago makanuni gakarhurhabala rhurhôle emihigo minja? Erhi rhuhugûkwa oku Yehova anagaye kantu kalebe, ho n’aho nirhu rhunakagaye rhunanakaleke.

10, 11. Bulya gurhi rhurhumikira Yehova?

¹⁰ Bulya gurhi rhurhumikira Yehova? Rhurhamurhumikira mpu bulya rhuyobohire oku arhuhana akaba rhurhamurhumikiri. (Abagalasiya 6:⁠7) Buzigire bwirhu kuli Yehova burhuma rhwamurhumikira. Kwo kunali nka kula omwana mwinja azigira okushagalula omurhima gw’ishe, nirhu rhunalonze rhushagalule Larha wirhu w’omu mpingu. Nta kandi kantu kakarhusimisa, nk’okumanya oku Yehova aba arhushagalukire!​—Ennanga 5:12; Emigani 12:2; olole Amahugûlo nomero 2.

¹¹ Rhunakarhumikira Yehova omu kasanzi kinja n’omu kasanzi k’amazibu, rhurhamurhumikira mpu bulya nta kundi rhugwerhe rhwacijira. Rhurhanacishoga mpu marhegeko malebe go rhwarhumikira na malebe rhurhagarhumikire. (Olushika 12:32) Rhunarhumikire  Yehova omu ngasi kanga, nk’oku omwandisi w’ennanga ayandikâga: “Nnunirwe n’amarhegeko gawe, nie ngazigira nka bici.” (Ennanga 119:47; Abaroma 6:17) Nirhu rhulonzize rhuyige olwiganyo lwa Nuhu. Ayerekîne oku azigire Yehova bwenene omu kujira ngasi kantu koshi âl’imubwizire oku ajire. Ebibliya edesire oku Nuhu ajîra “kwoshi” Nnamahanga âl’imurhegesire. (Omurhondêro 6:22) Ka nawe orhakashagaluka Yehova aderhe ntyo kuli we?

12. Gurhi rhwakashagalulamwo Yehova?

¹² Gurhi Yehova aciyumva erhi rhumurhumikira? Erhi rhumurhumikira “rhunakaba rhuli rhwashagalula omurhima gwage.” (Emigani 11:20; 27:11) Orhanye gurhi byakayorha omukushagalula omurhima gwa Lulema w’empingu n’igulu omu kumurhumikira! Cikoki arharhuseza mpu rhumurhumikire. Kengera oku arhuhîre oluhûma lw’okucishoga. Oko k’okuderha oku rhugwerhe oluhûma lw’ocishoga ebinja erhi ebibi. Yehova alonzize rhukolese obuzigire bwirhu kuli ye lyo rhurhôla emihigo yakarhulerhera akalamo kinja.​—Olushika 30:15, 16, 19, 20; olole Amahugûlo nomero 3.

13, 14. Gurhi rhumanyiremwo oku okurhumikira Nnamahanga kurhaba kuzibu? Hâna olwiganyo.

¹³ Nkaba rhunarhanye mpu kuli kuzibu okurhumikira amarhegeko ga Yehova, mpu ciru n’okugarhumikira kwanarhuyima oluhûma. Cikoki, Ebibliya edesire n’obwalagale ntya: “Bulya okuzigira Nnamahanga kuhugwîre ntya, rhukenge amarhegeko gage; n’amarhegeko gage garhaba mazirho.” (1 Yowane 5:3, NWT) Oluderho lw’ecigiriki “mazirho” kw’okuderha “mazibu okubarhula.” Omu gandi mandiko olo luderho lunakolesibwe omu kulonza  okuganirira amarhegeko garhakagalwa, ag’abantu bali nka “biryanyi” bahiriraho abandi omukulonza okubajira kubi erhi kulonza okubarhambula. (Mateyo 23:4; Ebijiro by’Entumwa 20:29, 30) Ebibliya ederhwa Nouvelle Bible Second ehindwîre 1 Yowane 5:3 ntya: “Amarhegeko gage gurhaba muzigo.” Amarhegeko ga Yehova garhali “mazibu okubarhula.” Garhali mazirho okurhumikira. Ngasi byoshi Yehova arhuhunyîre rhujire, rhwanabihasha, birhali bizirho.

¹⁴ Kwa lwiganyo, obe oli warhabala omwîra wawe okuhama. Ashane ebirugu byage byoshi omu masaki. Masaki maguma gali malembu ci agandi gohe gali mazirho bwenene nk’ibuye, lyo gahika bihunyîre bantu babirhi bagabarhule. Kw’orhanyize oku oyo mwîra wawe anakubwira oku we wabarhula er’isaki lizirho ntyo? Nanga! Bulya gurhi? Bulya arhalonzizi ovunike, amanyire oku orhakaligala. Nk’oyo mwîra, nta lusiku Yehova akarhubwira mpu rhujire ebintu rhurhakahasha. (Olushika 30:11-14) Yehova arhuhugusîrwe bwenene, “ayishi bwinja bici rhwabumbagamwo, ayishi oku rhuba bidaka.”​—Ennanga 103:14, NWT.

15. Bulya gurhi rhwakayemera n’obwalagale oku amarhegeko ga Yehova gaba gakurhulerhera obunguke?

¹⁵ Musa abwîra aba Israheli oku amarhegeko ga Yehova gâli oku bunguke bwabo n’oku erhi “bakayumvirhize Nnamahanga” bakagendekîre “balama omu murhula.” (Olushika 5:28-33; 6:24) Ko binayosire ntyo ene. Byoshi Yehova arhuhunyîre rhujire bibà bya kukubûla akalamo kirhu. (Osome Izaya 48:17) Larha wirhu Yehova, ensiku zoshi aba amanyire ebirhulagirireko. (Abaroma 11:33) Ebibliya edesire ntya: “Nnamahanga aba buzigire.” (1 Yowane 4:8) Kw’okuderha oku ebi Yehova ajira erhi ebi aderha byoshi anabijire n’obuzigire.

16. Gurhi rhumanyiremwo oku ciru akaba rhurhali bimana rhunalamire omw’igulu lirhegesirwe na Shetani, rhwanahash’irhumikira Nnamahanga?

 ¹⁶ Ensiku zoshi kurhaba kulembu okurhumikira Nnamahanga. Rhulamire omw’igulu lirhegesirwe na Shetani. Ali ajira okwage koshi ly’ashumya abantu bajire ebibi. (1 Yowane 5:19) Kandi rhukwanine okulwisa okurhaba kwirhu bimina. Entanya zirhu n’okurhuciyumva kwanarhuma rhwabula burhumikira Nnamahanga. (Abaroma 7:21-25) Cikone obuzigire rhujira kuli Yehova bunarhuhe emisi y’okujira aminja. Yehova anabone kunganaci rhuli rhwaciseza lyo rhumurhumikira, co cirhuma arhuha emisi kugerera iroho lyage litagatifu. (1 Samweli 15:22, 23; Ebijiro by’Entumwa 5:32) Iroho litagatifu linarhurhabale rhube n’amorhere garhurhabala rhugendekere rhwarhumikira Nnamahanga.​—Abagalasiya 5:22, 23.

17, 18. (a) Bici rhwaciyigiriza mw’eci citabu? (b) Bici ecigabi cikulikire caganirira?

¹⁷ Mw’eci citabu, rhwaciyigiriza gurhi rhwakalama akalamo kashagalula Yehova. Rhwabona gurhi rhwakakakolesa amakanuni n’amahano gage gw’olugenzi lwinja omu kalamo kirhu. Okengere oku nta muntu Yehova aseza oku amurhumikire. Erhi rhucishoga okumurhumikira, akalamo kirhu kanabe kinja na ntyo rhwanaba n’obulangalire bwinja bw’amango gayisha. Ci bwenene, erhi rhwakarhumikira Nnamahanga, oko kunamuyereke oku rhumuzigire.​—Olole Amahugûlo nomero 4.

¹⁸ Lyo Yehova arhurhabala, rhumanye ebinja n’ebibi, arhuhîre ezamiri. Erhi rhwakayigiriza ezamiri zirhu, zanarhurhabala “rhurhumikire amarhegeko ga Yehova.” Cikoki, ezamiri byo bici? Na gurhi rhwakakomereza ezamiri zirhu. Rhwashuza kw’ago madoso omu cigabi cikulikire.