1-3. (a) Bici olwandiko lwa Emigani 13:20 lurhuyigirizize? (b) Bulya gurhi rhushinganine rhucishoge abîra birhu n’obwenge?

K’OKOLA obwine gurhi omwana w’ecirhaba alola ababusi bage? Embere amanye okubaderha, anabîke omu bwenge bwage ngasi kantu ababusi bage bali bajira n’ebi bali baderha. Erhi agendekera akula, anarhondêra ayiga ababusi bage, buzira kulonza okubijira. Rhurhakasomerwa n’oko bulya ciru n’abantu bakulu banayige olugenzi n’enderho z’abantu bakômerana nabo.

² Olwandiko lwa Emigani 13:20, NWT lurhuyigirizize ntya: “Okômera abenge naye anabe mwenge.” Mw’olu lwandiko, oluderho “kukômera” kuli kuderha “kuhiga okugeza akasanzi kanji haguma na.” Okukômera omuntu kurhali kuba haguma naye kone. Mulenga muguma w’Ebibliya adêrha oku okukômera lebe, kuli kumuzigira n’okuciyumva oli hofi naye. Abantu barhushumya babà balya rhugeza kasanzi kanji haguma nabo, ci bwenene balya rhuciyumva rhuyegerire bwenene.

³ Abîra birhu banarhushumya omu njira nyinja erhi mbi. Emigani 13:20, NWT eyushwire ntya: “Okômera abahwinja arhabula mazibu.” Omu Cihabaraniya, oluderho “kukômera” kuba kulonza okuganirira “okugeza  akasanzi haguma na” erhi “kuba mwîra wa.” (Emigani 22:24) Erhi akaba abîra birhu banazigire Nnamahanga, banarhushumya rhubêre bishwekerezi kuli Nnamahanga. Erhi rhwakamanya bîra bahi Yehova acishôga, oko kwanarhurhabala rhumanye nirhu bîra bagwerhe lugenzi luhi rhukwanine rhucishoge.

4. Bulya gurhi luli lukengwa lunene okuba mwîra wa Yehova? Bulya gurhi Yehova ahamagîre Abrahamu “mwîra wani?”

⁴ Luli lukengwa lunji okubona Omulemi w’empingu n’igulu arhuhîre obulyo bw’okuba bîra bage. Yehova arhacishoga abîra ntya-ntya. Anacishoge abîra bagwerhe obuyemere muli ye. Rhanya kuli Abrahamu. Âli mubidu okujira ngasi kantu Yehova âli lonzize mpu ajîre. Omu kalamo kage koshi âli mwishwekerezi kuli Nnamahanga ananakag’imurhumikira. Ahikîra ciru n’aha ahâna omwana wage Izaki mpu abe nterekêro. Abrahamu âl’iyemire n’obwalagale oku “Nnamahanga akafûzîre Izaki.” (Abahabraniya 11:17-19; Omurhondêro 22:1, 2, 9-13) Bulya Abrahamu âli mwishwekerezi na wakurhumikira, Yehova ahikira ah’amuhamagâla “mwîra wani.”​—Izaya 41:8; Yakobo 2:21-23.

5. Gurhi Yehova abona abantu bishwekerezi kuli ye?

⁵ Abîra ba Yehova babà ba bulagirire bwenene omu masu gage. Akantu kw’obulagirire kulibo, kuli kubêra bishwekerezi kuli Nnamahanga. (Osome 2 Samweli 22:26) Buzigire bwabo bubashumya barhumikire Nnamahanga. Ebibliya edesire oku Nnamahanga aba “mwîra w’okuli w’abantu birhohye,” balya bagendekera bamurhumikira. (Emigani 3:32) Yehova abwizire abîra bage oku bali bigolo byago-byago, abayegerezize omu “cirâlo” cage. Ahire abîra bage omurhima oku bakamuharamya  n’okukamushenga omu kasanzi koshi.​—Ennanga 15:1-5.

6. Gurhi rhwakayerekana oku rhuzigire Yezu?

⁶ Yezu adêrha erhi: “Omuntu onzigire, anabikirire akanwa kani, naye Larha anamuzigira, rhwanaja omu mwage , rhunagwikemwo entebe yirhu.” (Yowane 14:23) Rhuyumvirhe oku lyo rhuba bîra ba Yehova, rhushinganine rhuzigire Yezu n’okujira ebi arhuhunyîre. Kwa lwiganyo, rhunarhumikire irhegeko Yezu ahanâga ly’okuyalagaza omwanzi mwinja gw’Obwami n’okujira abanafunzi. (Mateyo 28:19, 20; Yowane 14:15, 21) Bulya rhuzigire Yezu, rhushinganine “rhushimbe enshando zage.” (1 Petro 2:21) Yehova anashagaluke erhi abona gurhi rhuli rhwajira okwirhu koshi lyo rhuyiga Yezu omu iderha n’omu bijiro.

7. Bulya gurhi abîra birhu bashinganine babe bîra ba Yehova?

⁷ Abîra ba Yehova bajira obuyemere muli ye, babà bishwekerezi kuli ye banabà bazigire Omugala. Kw’orhabwini oku kuli kwinja okuyiga Yehova nka rhukola rhwacishoga abîra? Erhi akaba abîra bawe banacihangane okuyiga Yezu omu kuyalagaza omwanzi mwinja gw’Obwami n’obushiru, kw’okuderha oku banakurhabala okubûle akalamo kawe onabêre mwishwekerezi kuli Yehova.

8. Bici bikushagalwire omu bwîra bwâli ekarhi ka Rutu na Naomi?

⁸ Ebibliya eganirire nyiganyo nyinji z’abantu bacishozîre abîra, zakarhurhabala nirhu rhumanye gurhi rhwakacishoga abîra. Kwa lwiganyo, obwîra bwa Rutu haguma na nazala Naomi. Abo bakazi bombi barhâli ba cihugo ciguma, barhânali b’ishanja liguma. Naomi âli mukulu kulusha Rutu. Cikone babà bîra bwenene bulya  bombi bal’izîgire Yehova. Erhi Naomi alonza okurhenga omu cihugo c’e Moabu mpu agaluke e Israheli, “Rutu amubwîra oku arhamulekega.” Abwîra Naomi ntya: “Olubaga lwawe, lwaba lubaga lwani na Nyamuzinda wawe, aba Nyamuzinda wani.” (Ruti 1:14, 16) Rutu al’izigire Naomi bwenene. Erhi bahîka e Israheli, Rutu akakola bwenene ly’ahikiriza amalagirire gw’omwîra wage. Naomi al’izigire Rutu bwenene anakag’imuhanûla bwinja. Rutu akag’iyumvirhiza amahano ga Naomi, na boshi haguma bahikîra aha bagishwa bwenene.​—Ruti 3:6.

9. Bici bikusimisize ekarhi kw’obwîra bwa Daudi na Yonatani?

⁹ Daudi na Yonatani nabo luli lwiganyo lwinja lw’okucishoga abîra. Bombi bâli bishwekerezi kuli Yehova. Yonatani âl’ilushire Daudi myaka 30. Yonatani ye wâl’ishinganine okuba mwami omu Israheli, bulya ye wâli nfula ya mwami Sauli. (1 Samweli 17:33; 31:2; 2 Samweli 5:4) Cikoki erhi ayûmva oku Yehova anacishozire Daudi mpu ye waba mwami, arhayumvâgya obumvu. Lubero n’oko, abwîra Daudi enderho nyinji za kumuha omurhima. Kwa lwiganyo erhi Daudi âba ali omu mazibu (murhego) Yonatani amurhâbala agendekere “alangalira Yehova kulusha.” Ciru ahikîra aha ahira akalamo kage omu mazibu ly’arhabala Daudi. (1 Samweli 23:16, 17) Daudi naye âli mwîra mwishwekerezi. Alagânya Yonatani oku ashibirira omulala gwage, anahikirîza eco ciragane ciru n’enyuma z’olufû lw’omwîra wage Yonatani.​—1 Samweli 18:1; 20:15-17, 30-34; 2 Samweli 9:1-7.

10. Bici olwiganyo lw’eyo misole isharhu Mihabaraniya lukuyigirize lugenda obwîra?

¹⁰ Shadraki, Meshaki na Abednego nabo bâli bîra. Boshi oku bali basharhu bâli Bahabraniya bahekagwa bujà Ebabiloni banaciri bana. Bulya bal’ilamire  kuli n’ababusi babo, bakag’ihahânana omurhima babêre bishwekerezi kuli Yehova. Erhi bakula, obuyemere bwabo bwahîrwa omu marhangulo. Gurhi bwahizirwemwo omu marhangulo? Mwami Nebukandneza abumba ensanamu y’enoro anahîra hw’irhegeko oku ngasi muntu w’omu cihugo cage akay’iharamya. Shadraki, Meshake na Abednego balahîra okuharamya eyo nsanamu. Babwîra mwami ntya: ‘Rhurharhumikire oyola nyamuzinda wawe, rhurhanaharamye eyola nsanamu yawe y’enoro oyimanzize.’ Omu ntyo, obuyemere bwabo bwahîrwa omu marhangulo, cikone boshi oku banali basharhu bahîga okubêra bishwekerezi kuli Yehova.​—Daniyeli 1:1-17; 3:12, 16-28.

11. Gurhi rhumanyiremwo oku Paolo na Timoteyo bâli bîra binja?

¹¹ Erhi entumwa Paolo ebugana omusole gwakag’ihamagalwa okw’izino lya Timoteyo yabôna oku ogo musole gwâl’izigire Yehova bwenene n’oku gwâl’ishibirire bene wabo na bali babo. Okwo kwashûmya Paolo amukomereze ly’ashibirira ebigamba. (Ebijiro by’Entumwa 16:1-8; 17:10-14) Timoteyo ajîra bintu binji omu bigamba n’oko kwarhûma Paolo adêrha erhi: ‘Akozire nani omukolo gw’okulumiza omwanzi mwinja gw’Obwami.’ Paolo al’imanyire oku Timoteyo “akag’ishibirira” obunguke bwa bene wabo na bali babo. Paolo na Timoteyo bahikîre aha babà bîra bulya boshi bakag’ikolera Yehova n’obushiru.​—Abafilipi 2:20-22; 1 Abakorinti 4:17.

12, 13. (a) Bulya gurhi ciru n’omu cigamba rhukwanine rhube masu omu kucishoga abîra? (b) Bulya gurhi entumwa Paolo ehanyîre oburhônde buli omu 1 Abakorinti 15:33?

¹² Omu cigamba, rhwanaciyigiriza binji kuli bene wirhu na bali birhu n’okuhikira aha rhwarhabalana lyo  rhuzibuha omu buyemere. (Osome Abaroma 1:11, 12) Ciru akaba rhushinganine okucishoga abîra omu cigamba, rhukwanine rhucishoge bwo n’obwenge. Omu cigamba c’ecikristu muba bene wirhu na bali birhu banji na rhweshi rhurhalereragwa haguma. Baguma na baguma bagwerhe nsiku nyinji bali bakozi ba Yehova n’abandi bacir’ibahyahya. Nka kula ilehe liba lihunyîre nsiku nyinji lyo likula, ntyo ko binaba bihunyîre akasanzi lyo rhuzibuhya obwîra bwirhu haguma na Yehova. Co cirhumire rhushinganine rhuzigirane, rhulemberane n’okucishoga abîra birhu n’obwenge.​—Abaroma 14:1; 15:1; Abahabraniya 5:12–6:3.

 ¹³ Hali agandi mango omu cigamba mujà ehy’akavulindi. Omu kanga ka ntyo, rhushinganine rhube masu. Kwa lwiganyo; mwene wirhu erhi mwali wirhu ajire akantu kalahîrwe omu Bibliya erhi arhondêre agayaguza enyigirizo z’ecikristu n’oko kulerhe akavulindi omu cigamba, ebyo birhakarhusomera. Bulya ciru n’omu mango g’entumwa, ebintu bya ntyo byakag’iba omu bigamba. Kushimbana n’oko, entumwa Paolo yarhônda abakristu b’e Korinti ntya: ‘Mumanye murharhebagwa. Okukômera ababi kunasherêze engeso nyinja.’ (1 Abakorinti 15:12, 33) Paolo abwîra Timoteyo oku ashinganine abe masu omu kucishoga abîra. Nirhu rhushinganine rhube masu nka rhwacishoga abîra.​—Osome 2 Timoteyo 2:20-22.

14. Gurhi okucishoga abîra kwakashumya obwîra bwirhu haguma na Yehova?

¹⁴ Rhushinganine rhulange obwîra bwirhu haguma na Yehova, bulya bone bwîra bwinja rhwakaba nabo. Co cirhumire rhurhakalonza rhube n’omwîra wakalonza okuhîra obuyemere bwirhu omu mazibu erhi kuhîra obwîra bwirhu haguma na Yehova omu mazibu. Erhi wakarhogeza eshifo omu mishi gazinzire, erhakayisha n’amishi gacîre. Kobinali ntyo okubiyerekire obwîra. Erhi rhwakaba n’abîra bagwerhe olugenzi lubi, rhurhakalangalira oku kwanaba kulembu rhube n’olugenzi lwinja. Rhuyumvirhage oku rhushinganine rhube masu lugenda okucishoga abîra.​—1 Abakorinti 5:6; 2 Abatesalonika 3:6, 7, 14.

15. Gurhi wakajira ly’oba n’abîra binja omu cigamba?

¹⁵ Omu cigamba, wanabona abîra bazigira Yehova bwenene. Mwanajira obwîra haguma nabo. (Ennanga 133:1) Omanye wakacishoga balya bîra bagwerhe  myaka miguma n’eyawe erhi aba murhenga haguma bone. Okengere oku Yonatani al’ilushire Daudi myaka 30 na Naomi âli mugikulu kulusha Rutu. Rhushinganine okukulikira er’ihano ly’Ebibliya lidesire ntya: “Ninyu muyigule omurhima gwinyu goshi-goshi.” (2 Abakorinti 6:13; osome 1 Petro 2:17) Okagendekera wayiga olwiganyo lwa Yehova, oko kwa kurhabala ohikire aha waba n’amorhere minja gakashumya abandi balonze okuba bîra bawe.

16, 17. Bici rhurhakwanini rhujire erhi muntu mulebe omu cigamba akarhuvuna omurhima?

¹⁶ Abantu banaburhwe omu mulala muguma, barhanagweri ngeso nguma, barhabe na ntanya nguma barhanakanajire ebintu kuguma. Ntyo ko binayorha omu cigamba. Olo lubero lunarhabale akalamo kabe kinja bulya rhwanaciyigiriza binji kugerera abandi. Cikoki, agandi mango olo lubero lunarhume amazibu gabonekana omu cigamba. Rhwanahikira aha rhwashomba mwene wirhu erhi mwali wirhu. Byanahikira ciru aha rhwaba n’entanya mbi erhi rhugaye. (Emigani 12:18) K’okwo kurhayumvikana kwanarhuma rhwarhenga omu cigamba erhi rhuvunike omurhima?

¹⁷ Nanga. Ciru omuntu akarhugokeza, rhurhakwanini rhurhenge omu cigamba. Arhali Yehova ye warhugokize. Arhuhîre akalamo na ngasi kantu. Rhushinganine rhumuzigire rhunacishwekere kuli ye bulya ashinganine ntyo. (Amafulûlo 4:11) Ecigamba luba luhembo Yehova arhuhîre lyo rhulanga n’okuzibuhya obuyemere bwirhu. (Abahabraniya 13:17) Rhurhakalahira olo luhembo mpu bulya muntu mulebe anarhuvunire omurhima.​—Osome Ennanga 119:165.

18. (a) Bici byarhurhabala lyo rhukayumvikana na bene wirhu na bali birhu? (b) Bulya gurhi rhushinganine rhubabalire abandi?

 ¹⁸ Rhuba rhuzigire bene wirhu na bali birhu, rhunaba rhulonzize rhuyumvikane nabo. Yehova arharhulongezako obwimana na nirhu rhurhashinganini rhubulongeze kw’abandi. (Emigani 17:9; 1 Petro 4:8) Rhweshi rhunajire amagosa, cikoki obuzigire bunarhurhabale rhugendekere “rhwababalira n’okulembera abandi.” (Abakolosi 3:13) Obuzigire bwarhurhabala rhurhajiraga okurhayumvikana kusungunu kuhinduke kadali. Kobinali erhi omuntu akarhujirira ebibi, kurhaba kulembu okuleka okubirhanyako. Kuba kulembu okugaya n’okubîka obukunizi, cikoki oko kwanarhuma rhwabula obushagaluke kunarhume rhwaciyumva kubi. Lubero n’oko, erhi rhwakababalira omuntu warhujiraga kubi, rhwanaba n’omurhula gw’ekandalala, ecigamba canaba n’ecinyabuguma, ci bwenene rhwanabêra bîra ba Yehova.​—Mateyo 6:14, 15; Luka 17:3, 4; Abaroma 14:19.

19. Mangaci rhwakaleka okukômera muntu mulebe w’omu cigamba?

¹⁹ Orhanye lugenda omulala guyumvikine gunalamire omu buzigire, ngasi muguma wago ali ajira okwage koshi ly’omulala gwabo guba n’obushagaluke. Cikoki lusiku luguma, muntu muguma wa mw’ogo mulala agome. Baguma na baguma bali bacihangana okumurhabala, cikoki ahîge okurhenga aha mwabo erhi ecirhwe c’omulala cimubwire oku agende. Ebiyosire ntyo binahikire omu cigamba. Erhi omuntu akagendekera ajira ebijiro birhasimisa Yehova, byakarhuma ecigamba cabonwa kubi, ahikire ciru ah’alahira ngasi burhabale bwa karhuma aleka ezo njira zage mbi, aho  erhi ayerekine kugerera ebijiro oku arhacilonzizi okuba muguma w’omu cigamba. Anahiga nkaba ciru okurhenga omu cigamba erhi ciru nkaba anatengwa. Ebibliya erhuhanîzize n’obwalagale oku rhumanye “rhwakakômera” omuntu wantyo. (Osome 1 Abakorinti 5:11-13; 2 Yowane 9-11) Agandi mango oko kwanaba kuzibu erhi akaba omuntu watengagwa ali muntu w’omu mulala gwirhu erhi mwîra wirhu. Cikone rhukwanine rhubêre bishwekerezi kuli Yehova kulusha owundi muntu yeshi-yeshi.​—Olole Amahugûlo nomero 8.

20, 21. (a) Bulya gurhi omuhigo gw’okutenga omuntu, guli muhigo gwa buzigire? (b) Bulya gurhi kuli kwa bulagirire rhube masu omu kucishoga abîra?

²⁰ Omuhigo gw’okutenga omuntu, guba gwa buzigire kurhenga emwa Yehova. Ogo muhigo gunalange ecigamba kwa balya barhalonza okulama nk’oku amakanuni ga Nnamahanga gadesire. (1 Abakorinti 5:7; Abahabraniya 12:15, 16) Ogo muhigo guba gurhuhîre obulyo bw’okuyerekana obuzigire bwirhu okw’izino litagatifu lya Yehova, oku makanuni gage na kuli Yehova yene. (1 Petro 1:15, 16) Kandi ciri cijiro ca buzigire kuli olya orhaciri muguma w’omu cigamba. Bulya ogo muhigo gwanamurhabala ahugûkwe oku oko ajirâga kurhâli kwinja kandi oko kwanamurhabala ahindûle olugenzi lwage. Banji ba balya batengâgwa bahikîre aha bagalukira Yehova, n’erhi bagaluka ecigamba cinabayankirire n’okubayegereza n’obushagaluke bunji.​—Abahabraniya 12:11.

²¹ Abîra birhu banarhuma rhwaba n’olugenzi lwinja erhi lubi. Rhuyumvirhage oku rhushinganine rhucishogebo n’obwenge. Erhi rhwakacishoga abîra bwinja, rhwanaba n’abîra bakarhurhabala rhubêre bishwekerezi kuli Yehova ensiku zoshi.