1, 2. Gurhi Yehova aciyumva erhi abona rhuli rhwajira okwirhu koshi lyo rhubêra bikubagirwa?

MWANA muguma erhi arhenga emasomo, abona omukandara guyunjwire nsaranga agurhôlogola. Gurhi agujijire? K’ashinganine agufulike? Nanga. Erhi akagufulika anaba erhi ajijire kubi, anagugalulira nago. Erhi nnina akayumva oku omwana wage anajijire akantu kinja ntyo anaciyumva ashagalusire bwenene.

² Ensiku zoshi ababusi banayumve bashagalusire bwenene erhi bakayumva oku abana babo bali bikubagirwa. Larha wirhu w’empingu, Yehova aba “Nnamahanga w’okuli,” anakaciyumva ashagalusire erhi abona gurhi rhuli rhwacihangana okubêra “bikubagirwa omu ngasi kantu.” (Ennanga 31:5, NWT) Rhunacihangane okubêra bikubagirwa bulya “rhulonzize rhucigendese bwinja omu ngasi kantu.” (Abahabraniya 13:18, NWT) Rhuganirirage njira nguma na nguma ezi abantu barhalug’ibamo bikubagirwa. Enyuma z’aho rhwaganirira obunguke rhwakaba nabo erhi rhwakagendekera rhwajira okwirhu koshi lyo rhubêra bikubagirwa ciru akaba kurhali kulembu.

3-5. (a) Gurhi rhwakabula bwaba bikubagirwa kuli rhwe rhwene? (b) Bici byakarhurhabala lyo rhuba bikubagirwa kuli rhwe rhwene?

³ Lyo rhuba bikubagirwa oku bandi, rhushinganine  rhube rhwene bikubagirwa. Rhumanyire oku kurhali kulembu. Omu mango g’entumwa, ecigamba c’e Laodikiya cakag’icirheba mpu ciri casimisa Nnamahanga. N’obo nanga. (Amafulûlo 3:17) Nirhu rhwanahikira aha rhwacirheba rhwene okubiyerekire okucimanya rhuli bandi.

⁴ Entumwa Yakobo ehugwîre ntya: “Erhi omuntu akarhanya oku ali aha Nnamahanga enterekêro, cikoki arhayish’ishuba olulimi lwage, na ntyo acirhebe yene, enterekêro y’oyo muntu eri ya busha.” (Yakobo 1:26, NWT) Rhwanahikira aha rhwarhanya mpu erhi rhwakagendekera rhwajira ebijiro binja, mpu Nnamahanga arhakarhudosa cici, ciru akaba rhuli bakuderha kubi, bakali erhi banywesi. Cikoki, oko kuli kucirheba rhwene. Bici byakarhurhabala rhurhakag’icirheba rhwene?

⁵ Erhi rhucilolera omu ciyo, rhunabone gurhi iranga lirhu liyosire. Erhi rhwakasoma Ebibliya rhwanabona bwinja gurhi rhuyosire ekandalala. Ebibliya yanarhurhabala rhumanye aha rhuhashire n’aha rhuyabirirwe. Erhuyigirizize empindûlo rhushinganine rhujire omu ntanya zirhu n’omu nderho zirhu. (Osome Yakobo 1:23-25) Cikoki erhi rhwakacibwira oku rhurhagwerhi bubi boshi-boshi, rhwanabula bujira empindûlo zishinganine. Rhukwanine rhukolese Ebibliya lyo erhurhabala rhumanye erhi rhuli bikubagirwa. (Endûlû 3:40; Hageyo 1:5) Isala lyanarhurhabala rhucimanye bwinja. Rhwanashenga Yehova arhulabirize bwinja n’okurhurhabala rhubone amagosa girhu lyo rhugaleka. (Ennanga 139:23, 24) Rhukengere oku: “Abahalanjisi Yehova arhababâkwo, cikone aba mwîra w’okuli w’abantu birhohye.”​—Emigani 3:32, NWT.

6. Bulya gurhi omulume na mukage bashinganine babe bikubagirwa ekarhi kabo bone na nnene?

⁶ Kuli kwa bulagirire rhube bikubagirwa oku bantu bw’omu  mulala gwirhu. Erhi omulume na mukage bakaba bikubagirwa ngasi muguma oku wabo, n’okurhafulikana oku ngasi muguma ayosire, banayumve bali omu murhula, ciru banakaba balangalirine bwenene. Omuntu anabula kwaba mwikubagirwa kuli iba erhi mukage omu njira ziri lubero. Kwa lwiganyo, omuntu wajire omu buhya, warhondêra alehya, alole epornografi erhi arhangire ayumva enyifinjo z’okusima owundi mulume erhi wundi mukazi, aho erhi arhal’imwikubagirwa. Lolaga ebi Daudi adesire: “Ntakomêra abantu banywesi, na ncihangane nyake abantu bafulika oku bayosire.” (Ennanga 26:4, NWT) Erhi wakabula bwaba mwikubagirwa kuli mukawe erhi balo, ciru n’omu ntanya zawe, obuhya bwinyu bwanalibûka bwenene.

7, 8. Gurhi wakakolesa Ebibliya ly’oyigiriza abana bawe obulagirire bw’okuba bikubagirwa?

 ⁷ Abana nabo balagirire okuciyigiriza bulya gurhi kuli kwinja okuba bikubagirwa. Ababusi banakolesa Ebibliya lyo babayigiriza gurhi bakabamwo bikubagirwa. Omu Bibliya, muli enyiganyo mbi z’abantu babuzire kubêra bikubagirwa, kwa lwiganyo; Akani ahinduka cishambo, Gehazi anywerha ly’ahabwa ensaranga na Yuda akag’izimba ensaranga zakag’ibikwa omu nshoho aguza Yezu nsaranga 30.​—Yozwe 6:17-19; 7:11-​25; 2 Abami 5:14-16, 20-27; Mateyo 26:14, 15; Yowane 12:6.

⁸ Omu Bibliya muli ezindi nyiganyo z’abantu bal’ibikugagirwa, kwa lwiganyo; Yakobo, abwira abagala bagalule ensaranga babuganaga omu nshoho zabo, Yifta n’omwali bahikiriza eciragane bâl’ibamaha Nnamahanga na Yezu abêra mwikubagirwa omu mazibu. (Omurhondêro 43:12; Abaciranuzi 11:30-40; Yowane 18:3-11) Ezi nyiganyo n’ezindi zanarhabala abana bahugûkwe obulagirire bw’okuba bikubagirwa.

9. Gurhi okuba bikubagirwa kw’ababusi kwakarhabala abana nabo babe bikubagirwa?

⁹ Ababusi banaciyigiriza binji kugerera aka kanuni k’obulagirire: “Ka we oyigiriza abandi, k’orhakaciyigiriza wêne? Ka we oyalagaziza abandi oku: “Barhakag’izimba,” k’onazimbe?” (Abaroma 2:21, NWT) Ako kanuni karhuyigirizize oku erhi ababusi bakakaderha ebintu barhajira, erhi ebi barhalama, abana nabo banabe bali babona. Erhi rhwakabwira abana birhu babe bikubagirwa n’obo rhwene rhurhali bo, oko kwanaba kubarheba bwenene. Erhi abana bakabona oku rhuli bikubagirwa ciru n’omu bintu bisungunu-ngunu, nabo banarhuyiga. (Osome Luka 16:10) Okubundi erhi abana bakabona oku ababusi babo bali bikubagirwa, oko kwanabarhabala nabo amango babà babusi babe lwiganyo lwinja oku bana babo.​—Emigani 22:6; Abefezi 6:4.

10. Gurhi rhwakabamwo bikubagirwa omu kasanzi rhuli rhwaganira na bene wirhu erhi bali birhu?

¹⁰ Rhukwanine rhube bikubagirwa kuli bene wirhu na bali birhu Bakristu. Enganîro za ntya-ntya kwone zanahinduka aha zarhujira rhube bacamwanze, erhi kunywerhera abandi. Erhi rhwakakagalukira enderho rhwayumvirhe buzira kumanya bwinja erhi ziri z’okuli, rhwanaba rhuli rhwayalagaza obunywesi. Co cirhumire Ebibliya edesire n’obwalagale oku kuba kwinja omuntu ‘alânge akanwa kage.’ (Emigani 10:19) Okuba mwikubagirwa kurhali kuderha ngasi kantu kali omu ntanya zirhu, ngasi kantu rhumanyire erhi ngasi kantu rhwayumvirhe. Ciru akaba akantu rhwalonza okuganirira kali kw’okuli, byanahashikana kube kurhali kwinja okukaderha, erhi ciru kabe karharhuyerekiri. (1 Abatesalonika 4:11) Abantu bw’obucibone banaderhe ntya: “Niehe mba ndaha erhabisha bubere.” Cikoki bulya rhuli bakozi ba Yehova, rhukwanine rhuderhe enderho nyinja omu bwirhohye boshi.​—Osome Abakolosi 4:6.

11, 12. (a) Ohugûle gurhi omuntu wajiraga ecaha akahikira ah’ajira akanga kage kabe kazibu bwenene erhi akabula bwaba mwikubagirwa lugenda ecaha cage? (b) Madoso gahi rhwakacidosa erhi omwîra wirhu akajira ecaha cizibu? (c) Gurhi rhwakabamwo bikubagirwa omw’ikubuliro lya Yehova?

¹¹ Yehova ahîre abagula omukolo gw’okurhabala bene wirhu na bali birhu bw’omu cigamba. Kuba kulembu abagula barhurhabale erhi akaba rhuli bikubagirwa omu masu gabo. Bulya gurhi? Erhi wakalwala, onagend’ibona munganga. Ka wanarhondêra wafulika munganga oku oli waciyumva? Erhi wakamufulika oku oli waciyumva, k’anahash’ikubuka? Ntyo kobinayorha erhi rhwakajira ecaha cizibu, rhurhakwanini rhufulike abagula bintu biguma na biguma erhi rhunywerhe, rhukwanine rhubabwire  okuli lugenda ecaha rhwajijire buzira kufulika ciru n’akantu kaguma. (Ennanga 12:2; Ebijiro by’Entumwa 5:1-11) Orhanye kw’aka kanga: Gurhi wakajira erhi wakamanya oku omwira wawe anajijire ecaha cizibu? (Bene-Levi 5:1) Ka wanacibwira erhi: “Mba mwîra wage bwenene, nta derha eci caha cage?” Erhi wanakengera oku abagula bali aho lyo bamuha oburhabale ashinganine ly’agalukira obwîra bwage haguma na Yehova?​—Abahabraniya 13:17; Yakobo 5:14, 15.

¹² Kandi rhushinganine rhube bikubagirwa amango rhwahâna eripoti omw’ikubuliro lya Yehova, kwa lwiganyo, amango rhwahâna eripoti y’amahubiri. Rhukwanine rhube bikubagirwa amango rhwalonza okurhangira omukolo gw’akasanzi koshi gw’omw’ikubuliro ly’Abahamirizi ba Yehova, rhurhakwanini rhuyandike obunywesi oku fomu.​—Osome Emigani 6:16-19.

13. Gurhi rhwakayerekana obwikubagirwa bwirhu amango rhuli rhwajira omukolo gw’okulipwa erhi kulipa mwene wirhu erhi mwali wirhu ensaranga?

¹³ Abakristu bakwanine babe masu ly’oburhunzi burhajaga haguma n’enterekêro ya Nnamahanga. Kwa lwiganyo, rhurhakwanini rhuganirire eby’oburhunzi aha Nyumpa y’Entimanano erhi omu mahubiri. Rhurhakwanini rhulolerekwo bene wirhu na bali birhu obunguke rhwakagendekezamwo oburhunzi bwirhu. Erhi akaba Omuhamirizi wa Yehova ali akukolera, omulipe omushahara gwage oku kasanzi, omuhe omushahara gwage nk’oku mwanayumvikanaga na ngasi bunguke irhegeko lya Leta lihirireho abanyakasi. Kwa lwiganyo, okubukisibwa, n’okugendekera akamarha ciru akaba ali oku mahumûko. (1 Timoteyo 5:18; Yakobo 5:1-4) Erhi akaba bose wawe ali Muhamirizi wa Yehova, orhagwasagya omu bwenge bwawe oku bulya ali winyu Muhamirizi wa Yehova akakujirira oku arhajirira abandi. (Abefezi 6:5-8) Okole akasanzi mwanapatine naye  onakole emikolo wahabirwe eri yarhuma walipwa.​—2 Abatesalonika 3:10.

14. Bici Omukristu ashinganine ajire embere aje omu biyerekire oburhunzi haguma na mwene wirhu erhi mwali wirhu?

¹⁴ Gurhi byakaba erhi mwakaba muli mwajira omukolo gw’oburhunzi haguma n’owinyu Muhamirizi? Nkabaga wamuhozize ensaranga ly’ajira omukolo gwage bwinja. Mw’ako kanga, okengere aka kanuni kw’obulagirire: Erhi Yeremiya agûla ishwa, ayandika ecimanyiso c’okugula, bayandika maruba abirhi. Ago maruba gombi gâlikwo akashè. Abahamirizi bâli aho basinya oku karadasi kaguma mw’orho rhubirhi lyo kayish’irhabala erhi hakarhengera akadali. (Yeremiya 32:9-12; olole eyindi myanzi omu Omurhondêro 23:16-20) Bantu baguma na baguma barhanya mpu okuyandikirana akaradasi k’amapatano kuba kuyerekana oku barhalangalirini. Cikoki, okuyandikirana kwanarhurhabala rhuyake akadali, okuvunika omurhima erhi akavulindi. Okubiyerekire olushangi lw’oburhunzi okengere oku omurhula gw’ecigamba guli gwa bulagirire kulusha oburhunzi.​—1 Abakorinti 6:1-8; olole Amahugûlo nomero 30.

15. Gurhi Yehova arhanya lugenda okurhaba mwikubagirwa omu by’oburhunzi?

¹⁵ Rhukwanine rhube bikubagirwa oku bantu boshi, ciru na kuyerekera abantu barhamanyiri Yehova. Yehova anashagaluke bwenene erhi abona rhuli bikubagirwa. Adesire ntya: “Yehova aba ashombire omunzâni g’obunywesi, cikone omunzâni guyumanine gwo gurhona emunda ali.” (Emigani 11:1; 20:10, 23) Omu mango ga mîra, bakag’ikolesa omunzâni omu kuguza n’omu kugula bintu bilebe. Cikone bantu banji bal’ikomerire okushurha funga erhi kuhûna nsaranga nyinji. Ene nalyo, omu by’oburhunzi abantu  barhaciba bikubagirwa. Rhuhugûkwe oku entanya za Yehova zirhasag’ishanja. Al’ishombire anaciba ashombire okurhaba mwikubagirwa.

16, 17. Omu bici na bici rhurhashinganini okubula kuba bikubagirwa?

¹⁶ Hali amango rhucirhigana rhuli omu kanga kakarhuma kwaba kuzibu okubêra bikubagirwa. Kwa lwiganyo; nka rhukola rhwahûna akazi, nka rhukola rhwaderha okubiyerekire ebi rhwasomîre, erhi nka rhuli rhwajira amashindano emasomo. Bantu banji barhanya oku kurhali kubi okunywerha erhi kuhira omunyu lugenda ebi rhumanyire. Oko kurhakarhusomera bulya, Ebibliya yali erhi yalebîre oku abantu b’ensiku za buzinda “bayish’ikacilongeza bonene, bayish’ihira omurhima gwabo omu birugu, . . . buzira buzigire bw’aminja.”​—2 Timoteyo 3:1-5.

¹⁷ Hali amango rhurhanya oku abantu barhali bikubagirwa bo babà bayololosire. (Ennanga 73:1-8) Hali amango bafukuza erhi kubonerera mwene wirhu erhi mwali wirhu omu kazi mpu bulya ali mwikubagirwa. Okuba mwikubagirwa kuba kuhunyîre omuntu acihangane bwenene. Bulya gurhi rhwakaderha ntyo?

18. Bulya gurhi kuba kwa bulagirire okuba n’olugenzi lwinja?

¹⁸ Omw’igulu ly’ene, kurhali kulembu okubona abantu bali bikubagirwa, n’obo okuba mwikubagirwa kuli kwa bulagirire bwenene. Cikoki, rhweshi rhujira obulyo bw’okuba bikugagirwa. (Mikeyo 7:2) Bantu banji banakushekera, bakubone nka cihwinja, bulya oli mwikubagirwa. Cikone abandi banakushagalukira n’okukulangalira bulya oli mwikubagirwa. Omw’igulu lyoshi, Abahamirizi ba Yehova babà bamanyikine oku babà bikubagirwa. Ba bose banji bazigira okukolesa Abahamirizi ba Yehova bulya babà bikubagirwa. Omu kanga kanji banyakasi banji banafukuzibwe omu kazi  bulya barhali bikubagirwa, cikone Omuhamirizi wa Yehova anabêre omu kazi bulya yehe ali mwikubagirwa.

19. Gurhi obwikubagirwa bwawe bwakahuma oku bwîra bwawe haguma na Yehova?

¹⁹ Erhi wakaba mwikubagirwa omu ngasi kantu, okwo kwanakurhabala obe n’obwenge n’ezamiri erhuzize. Rhwanaba aka Paolo wayandikaga erhi: “Rhumanyire oku rhugwerhe ezamiri nyinja.” (Abahabraniya 13:18, NWT) Cikoki akantu kw’obulagirire bwenene, kuli kubona oku Larha wirhu w’omu mpingu Yehova ali abona gurhi rhuli rhwacihangana lyo rhubêra bikubagirwa bikubagirwa omu ngasi kantu.​—Osome Ennanga 15:1, 2; Emigani 22:1.