1, 2. Gurhi Balamu ajijîre ly’aheherera abakozi ba Yehova?

OMUDUBI ayishi aha akarhegera ly’ayirha ensamaki alonzize. Analongereze bwinja ecambo ezo nsamaki aduba zizigira, buzinda anahira eco cambo oku ndowani, buzinda anayikweba omu mishi. Analindirira kuhika ensamaki ekomole oku cambo, erhi omudubi ayumva oku ensamaki yahizire bwinja-bwinja endowani omu kanwa, anabulule bunyi-bunyi eyo nsamaki kuhika eje ebulambo.

² Abantu nabo banarhegwa. Kwa lwinganyo, erhi aba Israheli babà bakola bali hofi n’Ecihugo c’Amalaganyo, omu rhubanda rhw’e Mowabu. Mwami w’e Mowabu alagânya mulume muguma wakag’ihamagalwa Balamu oku amuha ensaranga erhi akaheherera aba Israheli. Buzinda, Balamu abôna enjira nyinja yakarhuma aba Israheli bone baciheherera. Acishôga bwinja ecambo akolesa. Akolesa abanyere b’e Mowabu, abarhuma omw’ikambi ly’aba Israheli mpu lyo balehya abalume.​—Emibalè 22:1-7; 31:15, 16; Amafulûlo 2:14.

3. Gurhi aba Israheli bagwasîrwemwo omu murhego gwa Balamu?

³ K’omurhego gwa Balamu gwagwasîre? Neci la. Ebihumbi by’abalume ba Israheli bajîra obugonyi haguma  n’abo banyere b’e Mowabu. Enyuma z’okujira obugonyi n’abo banyere, barhangira baharamya rhunnamahanga rhw’obunywesi, kwa lwiganyo Bali we Peori, nnamahanga w’ecirumbu c’okuburha. Buzinda ba Israheli 24 000 bafâ n’obo balikola bali oku kambekwe-mbekwe k’Ecihugo c’Amalaganyo.​—Emibalè 25:1-9.

4. Carhumâga ebihumbi by’aba Israheli byajîra obugonyi?

⁴ Bulya gurhi ba Israheli banji bagwasîrwe omu murhego gwa Balamu? Bulya barhondêra bacirhanyiza bone, omu kubona amarala gabo gone, bayibagira ebi Yehova ali amabajirira. N’obo aba Israheli bal’igwerhe bintu binji bya karhumire babêra bishwekerezi kuli Nnamahanga. Ye wabakulaga omu bujà bw’Emisri, abaha eby’okulya omw’irungu anabalongoza bwinja buzira kadundo kuhika oku mupaka gw’Ecihugo c’Amalaganyo. (Abahabraniya 3:12) Barhacikengeraga ebyo byoshi, barhogera omu murhego, bajira obugonyi. Paolo ayandîka ntya: “Rhumanye rhwakajira eby’eshonyi aka baguma mulibwo.”​—1 Abakorinti 10:8.

5, 6. Bici rhwakaciyigiriza lugenda ebyajirikanaga omu Rhubanda rhw’e Mowabu?

⁵ Igulu lihyahya liri hofi. Ko rhunali nk’aba Israheli bali hofi n’Ecihugo c’Amalaganyo. (1 Abakorinti 10:11) Ene, igulu liyunjwiremwo enyifinjo z’obugonyi kulusha ciru aba Mowabu. Ezo nyifinjo zanahikira aha zashumya abakozi ba Yehova. Omu mirhego yoshi ya Shetani, ogu akolesa bwenene, buba bugonyi.​—Emibalè 25:6, 14; 2 Abakorinti 2:11; Yuda 4.

⁶ Ocidose ntya: “Ka nonzize nshagalukire ecijiro cakanderhera obushagaluke hisanzi hisungunu hyone, erhi nonzize okulama emyaka n’emyaka omu paradizo?” Akaba olonzize oyish’ija omu paradizo, ocisezagye olame nk’oku ezi nderho zidesire: “Kaz’imuyâke ngasi lugenzi lw’eby’enshonyi!” ​—1 Abakorinti 6:18, NWT.

7, 8. Ebijiro by’enshonyi byo bici? Bulya gurhi rhwakaderha oku okujira eby’enshonyi kuli kubi bwenene?

⁷ Ene, bantu banji bali bagomera amarhegeko ga Nnamahanga lugenda ecirumbu c’okuburha, omu kurhacikenga n’omu kucikolesa kubi. Omu Bibliya oluderho “olugenzi lw’okujira eby’enshonyi” kw’okuderha kukolesa ebirumbu by’obuhya by’omuntu orhali mukawe erhi balo, kuhiziremwo okukolesa ebirumbu by’okuburha ekarhi k’omulume n’omulume erhi mukazi n’owabo mukazi, erhi kukolesa ebirumbu by’okuburha haguma n’ensimba. Oluderho “okujira eby’enshonyi” kuhiziremwo ecijiro c’obuhya ekarhi k’abantu barharhôlini, kujirira ecijiro c’obuhya omu kanwa erhi omu nio, kuhuma-huma oku birumbu by’obuhya by’owundi ly’oyusa irala lyawe lugenda ecijiro c’obuhya.​—Olole Amahugûlo nomero 23.

⁸ Ebibliya edesire n’obwalagale oku erhi omuntu akagendekera ajira ebijiro by’enshonyi arhakabêra muguma w’omu cigamba c’Ecikristu. (1 Abakorinti 6:9; Amafulûlo 22:15) Ojira eby’enshonyi anacihegeze obukenge n’okurhacilangalirwa. Olugenzi lubi lw’okujira eby’enshonyi lunakalerhera omuntu nyamanja. Akasanzi koshi ezamiri yage yanakaba ezinzire. Ciru olo lugenzi lwage lubi lwanalerha owundi nyamanja; ifunze, akavulindi omu mulala, endwala ciru n’olufû. (Osome Abagalasiya 6:7, 8) Erhi omuntu akaciha akasanzi kw’okurhanya lugenda nyamanja wakamuhikira erhi akajira eby’enshonyi, nta lusiku ciru akahîra ajira eby’enshonyi. Kanji-kanji erhi omuntu alonza okuhikiriza enyifinjo zage, kunarhume ajira ecaha. Ecijiro cirhanzi cirhuma omuntu ajira eby’enshonyi, eba pornografi.

9. Bulya gurhi okulola epornografi kuli kubi bwenene?

⁹ Epornografi enazusemw’omuntu enyifinjo z’okujira ecijiro c’obuhya. Ene, ebijiro by’okulola epornografi biyunjwire hoshi; omu bitabu, omu miziki, oku televiziyo n’oku Enterneti. Bantu banji banaderhe oku okulola epornografi kurhagwerhi mazibu. Cikoki, okulola epornografi kugwerhe mazibu manji, gunali murhego mudarhi bwenene. Okulola epornografi kwanarhuma omuntu aba mujà w’ebirumbu by’okuburha, aba n’enyifinjo nyinji z’okujira eby’enshonyi. Oko kwanarhuma omuntu arhondêra acigologorha (kucihuma-huma oku birumbu by’okuburha) ly’ayusa enyifinjo zage z’okulonza okujira ecijiro c’obuhya. Okujira ntyo, kwanalerha nyamanja omu buhya ciru kwanarhuma abarhôline bazaza obuhya.​—Abaroma 1:24-27; Abefezi 4:19; olole Amahugûlo nomero 24.

10. Gurhi akanuni kali omu lwandiko lwa Yakobo 1:14, 15 kakarhurhabala rhuyake olugenzi ly’okujira eby’enshonyi?

¹⁰ Kuli kwa bulagirire rhuhugûkwe oku enyifinjo z’okujira eby’enshonyi zanarhondêra zaja omu murhima gwirhu bunyi-bunyi. Olwandiko lwa Yakobo 1:14, 15 luyerekine n’obwalagale ntya: ‘Ci ngasi muguma ashumikwa n’enyifinjo mbi, zo zimukulula zinamugwase n’erhi omuntu aba amayemera ezo nyifinjo mbi, lyo ziburha ecaha, naco ecaha nka camayus’ijirwa, canaburha olufû.’ Rhuyumvirhage oku erhi entanya mbi zakarhangira zakugera-gera omw’irhwe, onaziyake ho n’aho. Buzira kulonza erhi wakarhogera oku nfoto z’epornografi, erhi filme y’epornografi, onaciseze orhacilabaga aho. Ozimye e ordinatere yawe, erhi akaba oku televiziyo wakag’ilaba, wanashanja aha wakag’ilolera.  Orhayemeraga enyifinjo mbi zaja omu murhima gwawe. Erhi wakayemera zamuja, zanaba nzibu bwenene, kuhika okuzikulamwo kukuyabire.​—Osome Mateyo 5:29, 30.

11. Gurhi Yehova akarhurhabala amango rhugwerhe entanya mbi?

¹¹ Yehova aba arhumanyire kulusha oku rhuba rhucimanyire rhwene. Amanyire oku rhurhali bimana. Cikoki amanyire oku rhwanahagalika enyifinjo mbi. Arhubwizire ntya: ‘Kuziga munige ebirumbu by’omubiri gwinyu: Obugonyi, eby’eshonyi, enyifinjo z’okujira eby’enshonyi, enyifinjo mbi, n’amagene g’eby’en’igulu, kwo kuli nka kuharamya ensanamu.’ (Abakolosi 3:5) Kurhali kulembu, cikone Yehova anarhurhabala. (Ennanga 68:19) Rhulole olwiganyo lw’omusole Mukristu gwakag’ilola epornografi n’okucigologorha. Oku masomo, abîra bage bakag’ibona oku okujira ebya ntyo mw’eyo myaka yabo, kwali kwinja. Ogo musole gwaderha ntya: “Okulola  eby’epornografi n’okucigologorha kwarhuma ezamiri yani yazinga, narhangira nalâma akalamo k’okujira eby’enshonyi.” Erhi akaba ogwerhe entanya mbi, Yehova anakurhabala erhi wakamuhûna oburhabale, “anakuha obuhashe bunene” ly’oba n’entanya zicîre.​—2 Abakorinti 4:7; 1 Abakorinti 9:27.

12. Omurhima gwirhu byo bici na bulya gurhi rhushinganine rhugulange?

¹² Salomoni ayandisîre ntya: “Olange omurhima gwawe kulusha ebindi byoshi bulya gwo gubamo enshôko y’obuzîne.” (Emigani 4:23, NWT) “Omurhima” gwirhu kw’okuderha omuntu wirhu w’ekandalala, oyo muntu w’ekandalala ye Yehova abona. Ebi rhulola byanarhulerhera nyamanja. Omukozi mwishwekerezi wa Yehova Ayubu adêrha erhi: ‘Nali erhi nalaganyize oku amasu gani, nta mango ganacilole oku mwana-nyere.’ (Ayubu 31:1) Aka Ayubu, rhukwanine rhube masu lugenda ebi rhulola n’okulabiriza bintu bici biri omu ntanya zirhu. Rhunashenge Nnamahanga nk’oku mwandisi muguma w’Ennanga aderhaga: “Amasu gani ogahabule garhag’ihenekera ebya busha.”​—Ennanga 119:37.

13. Bîra ba gurhi Dina acishozire?

¹³ Abîra birhu banarhuma rhwaba n’olugenzi lubi erhi lwinja. Erhi rhwakacishoga abîra bakulikira amarhegeko ga Nnamahanga, banarhurhabala nirhu rhugakenge. (Emigani 13:20; osome 1 Abakorinti 15:33) Ebyahikirâga Dina, biyerekine bwinja obulagirire bw’okucishoga abîra n’obwenge. Dina âli mwali wa Yakobo. Biyumvikine oku Dina akulirâga omu mulala gwakag’iharamya Yehova. Arhal’igwerhe lugenzi lubi, cikoki acishoga abîra barhakag’iharamya Yehova. Abantu b’e Kanani,  bâl’igwerhe entanya zâli lubero n’ez’abakozi ba Yehova lugenda obugonyi erhi eby’enshonyi. (Bene-Levi 18:6-25) Lusiku luguma erhi Dina aba âli n’abîra bage, abugana omusole gwakag’ihamagâlwa Shekemu. Ogo musole, gwabôna oku Dina ali masoro. Shekemu “âli mukengwa bwenene omu mulala gwabo goshi.” Cikoki ogo musole gurhâl’izigire Yehova ciru n’ehitya.​—Omurhondêro 34:18, 19.

14. Bici byahikîre Dina?

¹⁴ Shekemu ajîra ecijiro al’imanyire oku ciri cinja cinayemerirwe kuli ye, bulya al’ibwîne oku Dina ali masoro, “amuhima misi, alâla boshi naye.” (Osome Omurhondêro 34:1-4) Eco cijiro ca Shekemu, calêrhera Dina n’omulala gwage nyamanja, baciyumva kubi bwenene.​—Omurhondêro 34:7, 25-31; Abagalasiya 6:7, 8.

15, 16. Bici rhwakajira lyo rhuba benge?

¹⁵ Rhurhalagiriri okujira ecijiro ciri aka eca Dina lyo rhuhikira aha rhwahugûkwa oku okukenga amarhegeko ga Yehova kuli kwa bulagirire kuli rhwe. Ebibliya edesire n’obwalagale ntya: “Okômera abenge naye anabe mwenge, ci okômera abahwinja arhabula mazibu.” (Emigani 13:20, NWT) Ojire okwawe koshi ‘ly’ohugûkwa enjira nyinja eri ehi.’ Erhi wakajira ntyo, wanahikira aha waciyasa nyamanja wayish’ikubuza omurhula.​—Emigani 2:6-9; Ennanga 1:1-⁠3.

¹⁶ Rhwanaba benge omu kuciyigiriza Ebibliya, omu kusalira Yehova n’okulonza amahano ga mushizi mwirhonzi na mwikubagirwa. (Mateyo 24:45; Yakobo 1:5) Rhumanyire bwinja oku rhweshi rhuba bazamba rhurhanaba bimana. (Yeremiya 17:9) Gurhi wakajira erhi omuntu akakubwira oku hali amango wakajira eby’enshonyi? Ka wanagaya? Ka wanayemera n’obwirhohye bakurhabale?​—2 Abami 22:18, 19.

17. Hâna olwiganyo luyerekine gurhi amahano rhuhâbwa n’abirhu bakristu gakarhurhabala.

 ¹⁷ Kwa lwiganyo, orhanye kwaka kanga. Mwali wirhu muguma abone mulume muguma bakola naye haguma arhondêre amukômera, mwali wirhu naye amushagalukire. Oyo mulume amubwire oku asimire baje hantu haguma bombi. Oyo muntu arhali mukozi wa Yehova, cikoki, abonekine oku agwerhe bijiro biguma na biguma binja. Wundi mwali wirhu muguma ababone bali haguma n’oyo mulume. Oyo mwali wirhu wababonaga, anagend’ihanûla oyo mwali wirhu okômerine n’oyo mulume, amubwîre oku akaba arhalabiri bwinja acilerhera nyamanja. Gurhi oyu mwali wirhu okômerine n’oyo mulume ashinganine abone ago mahano? K’anarhondêra acisambira? K’ashinganine ahugûkwe oku ago mahano gali minja? Oyu mwali wirhu azigire Yehova bwenene. Cikone, erhi akagendekera akômera oyo mulume k’anaderha oku ayasire “ngasi lugenzi lw’eby’enshonyi?”  Erhi anayerekana oku “murhima gwage gw’acikubagire?”​—Emigani 22:3; 28:26; Mateyo 6:13; 26:41.

18, 19. Hugûla gurhi Yozefu ayakagamwo ngasi cijiro c’okujira eby’enshonyi.

¹⁸ Erhi Yozefu aba aciri musole, ajirwa mujà e Misri. Ngasi lusiku, muka nnawabo akamubwira mpu alâle naye. Cikoki Yozefu abôna oku eco cijiro cirhali cinja bulya al’izigire Yehova anal’ilonzize amushagalule ensiku zoshi. Ngasi mango muka nnawabo erhi akalonzize mpu amuhebe mw’ezo nyifinjo, akalibirha. Bulya Yozefu ali mujà, arhakarhenzire aha mwannawabo ntya-ntya. Lusiku luguma muka nnawabo alonza amugwarhe n’emisi mpu lyo alâla naye. Yozefu, ‘agajira ikumi n’abirhi.’ ​—Osome Omurhondêro 39:7-12.

¹⁹ Ebintu byakaharibisire erhi Yozefu akalekerire entanya mbi zimuje omu murhima erhi kulehya oyo mukazi. Cikoki obwîra bwage haguma na Yehova bo bwâli bwa bulagirire kuli ye. Abwîra muka nnawabo erhi: “Ntaco nnawirhu . . . ampanzizekwo aha nyuma zawe bulya oli mukâge. Gurhi nakajiraga obubi bungana aho n’okuhemukira Nnamahanga?”​—Omurhondêro 39:8, 9.

20. Gurhi rhumanyiremwo oku obwishwekerezi bwa Yozefu bwashagalwire Yehova?

²⁰ Ciru akaba Yozefu âli kuli n’emwabo n’omulala gwage, agendekire abêra mwishwekerezi kuli Nnamahanga. Na Yehova amugisha. (Omurhondêro 41:39-49) Yehova ashagaluka bwenene erhi abona obwishwekerezi bwa Yozefu. (Emigani 27:11) Kwanaba kuzibu okuhagalika omurhego gw’okujira eby’enshonyi. Cikoki, okakengera ezi nderho: “Mwe muzigira Yehova, mugaye amabi. Analange obuzîne bw’abishwekerezi bage; anabayokole omu maboko g’ababisha.”​—Ennanga 97:10, NWT.

21. Gurhi musole muguma Mukristu gwahikiremwo okuyiga Yozefu?

 ²¹ Abakozi ba Yehova bagendekire babà barhwali omu “kushomba amabi” lyo “basima aminja” lusiku oku lundi. (Amosi 5:15) Obe mukulu erhi mwana, wanaba mwishwekerezi kuli Yehova. Rhurhôle olwiganyo lw’omusole Mukristu obuyemere bwago bwajaga omu marhangulo emasomo. Munyere muguma amubwira oku alâla naye erhi akamurhabala okujira amashindano g’ensabu. Gurhi mwene wirhu ajijîre? Mwene wirhu ajîra aka Yozefu. Ahugwîre ntya: “Ho n’aho namubwira oku nta lonza. Omu kubêra kwani mwishekerezi, olukengwa lwani lwaba luzibu bwenene.” Nk’omuntu acijira eby’eshonyi anayumve asimire bwenene, ci amasima g’ecaha gaba ga kasanzi kasungunu, enyuma ly’aho, anarhangira aciyumva kubi erhi abe n’oburhe bunji. (Abahabraniya 11:25) Okurhumikira Yehova kunalerhe obushagaluke bw’ensiku n’amango.​—Emigani 10:22.

22, 23. Erhi rhwakajira ecaha cizibu, gurhi Yehova akarhurhabala?

²² Shetani agendekire akolesa ebijiro eby’enshonyi ly’arhugwarha mpirha. Byanahashikana kube kuzibu kuli rhwe okuhagalika omurhego gw’okujira eby’enshonyi. Agandi mango rhweshi rhujira entanya mbi. (Abaroma 7:21-25) Yehova ‘ayishi bwinja bici rhwabumbagamwo, ayishi oku rhuba bidaka.’ (Ennanga 103:14) Ka bibonekinage oku erhi Omukristu akajira ecaha c’obugonyi anabêra mw’obo bugonyi ensiku zoshi kuhika afê? Nanga. Erhi akaciyunjuza bwinja bwinja, Yehova anamurhabala. Nnamahanga aba “mubidu okubabalira.”​—Ennanga 86:5, NWT; Yakobo 5:16; osome Emigani 28:13.

²³ Yehova arhuhîre “oluhembo lw’abalume,” abagula bw’obuzigire lyo barhushibirira. (Abefezi 4:8, 12, NWT; Yakobo 5:14, 15) Abagula babà ho mpu barhurhabale  rhugalukire obwîra bwirhu haguma na Yehova.​—Emigani 15:32.

24, 25. Gurhi “entanya nyinja” zakarhurhabala rhurhajiraga obugonyi?

²⁴ Lyo rhukarhôla emihigo bwinja, bihunyîre rhurhang’ihugûkwa oku amarhegeko ga Yehova gaba ho oku bunguke bwirhu. Rhurhakalonza rhube nk’omusole muhwinja guli muganirire omu Emigani 7:6-23. Arhagwêrhe “entanya nyinja,” acihira omu murhego: Ajira eby’enshonyi. Okuba n’entanya nyinja kurhali kuba n’obwenge kone. Ogwerhe entanya nyinja anacihangane okumanya entanya za Yehova n’obulonza bwage. Okengere ezi nderho z’obwenge: “Omuntu olonza abe n’entanya nyinja anacizigire yene. N’omuntu ocishwekerera oku burhimanya anayunguke.”​—Emigani 19:8, NWT.

²⁵ Kw’oba oyemire n’obwalagale oku amakanuni ga Yehova gaba minja? Kw’oba oyemire n’obwalagale oku erhi wakarhumikira ago makanuni wanaba n’obushagaluke? (Ennanga 19:7-10; Izaya 48:17, 18) Erhi akaba ogwerhe akarhinda, okengere ebintu binja Yehova akujirire. “Labula obone oku Yehova aba mwinja.” (Ennanga 34:8, NWT) Oku wagendekera walabula obwinja bwa Yehova, wahikira aha wamuzigira, ozigire ebi azigira n’okushomba ebi ashomba. Oyunjuze obwenge bwawe entanya nyinja, nshinganyanya, zicîre, zishinganine okuzigirwa. (Abafilipi 4:8, 9) Rhwanayiga olwiganyo lwa Yozefu, wayemerâga alongozibwa n’obwenge bwa Yehova.​—Izaya 64:8.

26. Bici ebigabi bibirhi bikulikire byaganirira?

²⁶ Obe mulamba erhi mushamuka, Yehova alonzize oshagalukire akalamo onabe n’omwishingo. Ebigabi bibirhi bikulikire byakuha amahano gakakurhabala obe n’obuhya bwinja.