ISOMO LYA 8
Bulya gurhi Nnamahanga alekerire amabi n’amalibuko?
1. Gurhi amabi garhangiraga?
Nnamahanga alesire bene bantu barhegeke kasanzi kanene lyo bibonekana n’obwalagale oku barhakamala amazibu ga bantu
Amabi garhangiraga amango Shetani aderhaga obunywesi burhangiriza. Embere z’aho, Shetani ali malahika mushinganyanya; cikwone arhagendereraga ‘okuderha okuli.’ (Yowane 8:44) Ajamo irala ly’okulonza abantu bamuharamye n’obwo Nnamahanga yene rhukwanine okuharamya. Shetani arheba Eva, olya mukazi murhanzi, na Eva amuyumvirhiza ahali h’okuyumvirhiza Nnamahanga. Adamu naye akulikira mukage Eva omu kurhakenga Nnamahanga. Obwo bugoma bwabo bwarhulerhera amalibuko n’olufu.—Osome Omurhondêro 3:1-6, 19.
Erhi Shetani arheba Eva, arhangiza obugoma oku burhegesi bwa Nnamahanga. Bantu banji bàkulikire Shetani omu bugoma bwage, barhalonza Nnamahanga abarhegeke. Kurhenga ago mango, Shetani arhangira okuba murhegesi w’er’igulu.—Osome Yowane 14:30; 1 Yowane 5:19.
2. Omu biremwa byoshi Nnamahanga alemaga, ka mwali eciremwa cirhali cimana?
Nanga, bulya emikolo ya Nnamahanga yoshi eba mishinganyanya. Bamalahika n’abantu boshi bàli lemirwe n’obuhashe bw’okukenga Nnamahanga. (Olushika 32:4, 5) Nnamahanga arhulemire n’oluhya lw’okucishoga okujira aminja n’amabi. Co cirhumire rhwanacishoga okusima Nnamahanga.—Osome Yakobo 1:13-15; 1 Yowane 5:3.
3. Bici birhumire Nnamahanga alekerire amalibuko kuhika ene?
Akasanzi Yehova alekerire bamalahika babi n’abantu bagomere oburhegesi bwage kagwerhe obuzinda. Bulya gurhi abalekerire ako kasanzi? Lyo babona oku nta burhegesi boshi boshi bwankabalerhera obunguke. (Omuhanûzi 7:29; 8:9) Eyi myaka 6 000 yamahwa, eyerekine oku mira bayabiragwa. Oburhegesi bwa bene bantu bwayabirwe okumala entambala (ivita), obunizi, obulyalya, n’endwala.—Osome Yeremiya 10:23; Abaroma 9:17.
Cikwone abayemera okurhegekwa na Nnamahanga banayunguke bwenene. (Izaya 48:17, 18) Yehova ali hofi amalirize oburhegesi boshi bwa bene bantu. Abantu bacishozire okurhegekwa na Nnamahanga bone bayima igulu.—Izaya 11:9.—Osome Daniyeli 2:44.
Oyerekane evideyo edesire Bulya Gurhi Nnamahanga Alekerire Amalibuko?
4. Gurhi rhwankayunguka n’aka kasanzi Nnamahanga acilekerire bene bantu barhegeke?
Shetani ànywesire oku arhali kusima Nnamahanga kurhuma rhwamukolera cikwone ebi arhuha byo birhuma. Ka walonza oyerekane oku Shetani ali munywesi? Neci, wanayerekana ntyo! Kano kasanzi Nnamahanga acilekerire bene bantu bacirhegeke, kanakurhabala oyerekane erhi oli oluhande lwa Yehova erhi lwa bene bantu. Ebijiro birhu bya ngasi lusiku binayerekane ndi rhushizire.—Osome Ayubu 1:8-12; Emigani 27:11.
5. Gurhi rhwankacishoga Nnamahanga nka Murhegesi wirhu?
Emihigo yirhu omu kalamo enayerekane erhi rhulonzize Oburhegesi bwa Nnamahanga erhi nanga
Rhwanacishoga Nnamahanga nka Murhegesi wirhu omu kulonza n’okubera omw’idini ly’okuli liyigiriza Akanwa ka Nnamahanga, Bibliya. (Yowane 4:23) Rhwanakaga Shetani erhi rhwankacilanga n’epolitike, entambala, omu kushimba olwiganyo lwa Yesu.—Osome Yowane 17:14.
Shetani ali akolesa obuhashe bwage bwoshi lyo aboha abantu omu bijiro by’enshonyi n’ebyankayagaza abandi. Erhi rhwankayaka ebyo bijiro, hali amango bene wirhu ciru n’abira birhu bankarhushekera bwenene, n’okurhugayaguza. (1 Petro 4:3, 4) Co cirhumire ngasi muguma agwasirwe acishoge erhi acishwekera oku bantu basima Nnamahanga n’okushimbulira amarhegeko gage n’okugalamamo. Erhi wankajira ntyo, wanayerekana oku Shetani ànywèsire erhi àderha mpu omu marhangulo nta muntu wankagenderera okukenga Nnamahanga.—Osome 1 Abakorinti 6:9, 10; 15:33.
Obuzigire Nnamahanga ajira kuli bene bantu buyerekine oku amala amabi n’amalibuko goshi. Abagenderire okuyemera Oburhegesi bwa Nnamahanga babona obuzine bw’ensiku n’amango han’igulu.—Osome Yowane 3:16.
