ISOMO LYA 2
Nnamahanga ye ndi?
1. Bulya gurhi rhugwasirwe rhuharamye Nnamahanga?
Nnamahanga w’okuli ye Lulema wa byoshi. Arhagwerhi murhondero na buzinda. (Ennanga 90:2) Ye iriba ly’omwanzi mwinja guli omu Bibliya. (1 Timoteyo 1:11) Yene rhugwasirwe rhuharamye bulya ye warhuhaga obuzine.—Osome Amafulûlo 4:11.
2. Borhere buhi Nnamahanga ajira?
Nta muntu osigi bona Nnamahanga, bulya ajira omubiri gw’obunyamuka, kuli kuderha oku omubiri gwage gurhashushini n’ogw’ebiremwa bya han’igulu. (Yowane 1:18; 4:24) Cikwone, rhwanabonera oborhere bwage oku biremwa byage. Alaga olwiganyo; erhi rhubona amalehe n’amaua (bwaso), ebyo binarhuyigirize oku Nnamahanga ali wa buzigire n’obwenge bunji. Obunene bw’igulu bunarhuyigirize oku Nnamahanga agwerhe obuhashe bunene bwenene.—Osome Abaroma 1:20.
Na kandi, omu kusoma Ebibliya rhwanamanya binji oku biyerekire oborhere bwa Nnamahanga. Rhurhole olwiganyo, Ebibliya enarhuyereke ebi Nnamahanga asima n’ebi agaya, gurhi ajirira abantu, n’oku ajira omu kanga kalebe.—Osome Ennanga 103:7-10.
3. Ka Nnamahanga ajira izino?
Yezu arhubwizire mpu rhukasalira ntya: “Larha, oli omu mpingu, Izino lyawe likuzibwe.” (Mateyo 6:9) Ciru ankaba Nnamahanga ajira mazino manji g’obukulu erhi ga bukenge, ajira izino lyage liguma ly’okuli. Er’izino lirhaderhwa kuguma omu ndimi zoshi. Omu Mashi, linaderhwe “Yehova.” Abandi banaderhe mpu “Yawe.”—Osome Ennanga 83:18, NWT.
Omu Bibliya nyinji abandisi bajire bakula er’izino, n’okulikaba n’amazino g’obukulu nka Nyakasane erhi Nyamubâho. Cikwone amango Ebibliya ntanzi yayandikagwa, izino Yehova lyamuli kali 7 000. Amango Yezu akazigiyigiriza abantu han’igulu, abamanyisize izino lya Nnamahanga.—Osome Yowane 17:26.
Oyerekane evideyo edesire Ka Nnamahanga Ajira Izino?
4. Ka Yehova anarhushibirire?
Nkoyu mubusi w’obuzigire, ebi Nnamahanga arhujirira biri bya kurhulerhera obunguke bw’ensiku n’amango
Obu hali amalibuko manji, ka kwo kuderha oku Yehova arharhushibirira? Gurhi ocikebirwe? Bantu baguma banaderhe mpu Nnamahanga anarhulibuze lyo arhurhangula, ci kwone birhankaba ntyo.—Osome Yakobo 1:13.
Nnamahanga aba arhulekire oluhya lw’okucishoga ebi rhwajira. Ka kurhali kwinja obwo Nnamahanga arhulesire mpu rhukacishoga okumukolera? (Yozwe 24:15) Bigayisize bwenene okubona bantu banji banacishoge okujirira abandi amabi, co cirhumire amalibuko gali gayushuka omw’igulu. Yehova anagaye bwenene okubona bantu banji bali balibuka.—Osome Omurhondêro 6:5, 6.
Yehova anarhushibirire bwenene. Alonzize rhube n’omwishingo omu kalamo. Co cirhumire ali hofi akule aga malibuko n’abagalerha boshi. Ankaba arhanzirigaleka gabeho kuhika ene, amanyire ebirhumire. Omw’isomo lya 8, rhwayishi yiga bici birhumire.—Osome 2 Petro 2:9; 3:7, 13.
5. Bici rhwankajira lyo rhuyegera Nnamahanga?
Yehova arhuhunyire mpu rhukamuganiza omw’isala lyo rhumuyegera. Yehova anashibirire ngasi muntu. (Ennanga 65:3; 145:18) Aba mwangu (mulembu) omu kubabalira. Ciru ankaba hali amango rhujira ebibi, Yehova anabone gurhi rhucihangana lyo rhumusimisa. Co cirhumire, ciru ankaba rhurhali bimana, rhwanajira obwira bw’okuli naye.—Osome Ennanga 103:12-14; Yakobo 4:8.
Bulya Yehova ye warhuhaga obuzine, Ye rhukwanine rhusime kulusha abandi boshi. (Marko 12:30) Okayerekana oku ozigire Yehova omu kuyiga binji kuli ye n’okulama nkoku akuhunyire. Okajira ntyo, wanamuyegera bwenene.—Osome 1 Timoteyo 2:4; 1 Yowane 5:3.
