Obwami bwa Nnamahanga buli burhegesi bw’empingu. Bwayishikula amami goshi g’igulu n’okuhikiriza obulonza bwa Nnamahanga omu mpingu n’omu igulu. Ogwo guli mwanzi mwinja. Abantu balagirire oku burhegesi bwinja, n’omu mango gayiruka, Obwami bwa Nnamahanga bwarhuha obwo burhegesi rhucifinja. Bwayishilerha obumvikane omu bantu boshi han’igulu.​—Osome Daniyeli 2:44; Mateyo 6:9, 10; 24:14.

 Ngasi bwami bugwasirwe bube n’omwami. Na ntyola, Yehova acishozire Omugala, Yezu Kristu, abe Mwami w’Obwami bwage.​—Osome Amafulûlo 11:15.

 Oyerekane evideyo edesire Obwami bwa Nnamahanga byo Bici?

 Yezu ye Mwami okwanine bulya ali mwinja, na kandi asima bwenene obushinganyanya. (Mateyo 11:28-30) Na kandi, agwerhe obuhashe bw’okurhabala abantu bulya ayishirhegeka igulu kurhenga empingu. Enyuma ly’okufulwa kwage, Yezu ashubir’empingu, atamala ebwa kulyo kwa Yehova, alinda oku ayimikwa. (Abahabraniya 10:12, 13) Buzinda, Nnamahanga amuha obuhashe, honaho anarhangira okurhegeka.​—Osome Daniyeli 7:13, 14.

 Ecigamba c’abantu baderhwa “batagatifu” erhi bimana bayishirhegeka haguma naye. (Daniyeli 7:27) Entumwa za Yezu bo bali batagatifu barhanzi Yezu acishogaga. Enyuma ly’aho Yehova agenderire okucishoga abalume n’abakazi  batagatifu kuhik’ene. Abo batagatifu banafuke n’omubiri gw’obunyamuka aka Yezu.​—Osome Yowane 14:1-3; 1 Abakorinti 15:42-44.

 Bantu banga bashigana Yesu empingu? Yezu adesire oku bali “buso busungunu.” (Luka 12:32) Boshi haguma bayishiba 144 000. Bayishirhegeka igulu haguma na Yesu.​—Osome Amafulûlo 14:1.

 Obwami bwa Nnamahanga bwarhangiraga okurhegeka omu mwaka gwa 1914. a Enyuma ly’okuyimikwa, Yezu ajugucira Shetani n’amashetani gage han’igulu. Akarhinda n’oburhe byarhuma Shetani ayushula enjira zage z’okulibuza abantu. (Amafulûlo 12:7-10, 12) Kurhenga ago mango, amalibuko g’abantu garhankaciganjwa. Entambala, ecizombo (ishali), n’endwala z’okuyahukirana za ngasi lubero, n’emisisi y’obudaka, ebyo byoshi biri muli cirya cimanyiso Yezu aderhaga c’okuyereka abantu oku Obwami bwa Nnamahanga buli hofi burhangire okurhegeka igulu.​—Osome Luka 21:7, 10, 11, 31.

 Kugerera oku mukolo gw’okuyalagaza omw’igulu lyoshi, Obwami bwa Nnamahanga buli bwaheba haguma abantu b’omu mashanja goshi. Emilioni y’abantu birhohye bali baba bambali ba Yezu. Obwami bwa Nnamahanga bwabalanga hano ababisha boshi bahererekezibwa. Ngasi yeshi olonzize okuyunguka n’ebinja Obwami bwa Nnamahanga bwayishijirira abantu, agwasirwe acikomereze okuba mwambali mwirhohye wa Yezu.​—Osome Amafulûlo 7:9, 14, 16, 17.

 Omu cigabi c’emyaka 1 000, Obwami bwa Nnamahanga bwahikiriza gulya muhigo Nnamahanga aligwerhe kuli bene bantu kurhenga aha murhondero. Igulu lyoshi lyahinduka libe paradizo. Hano eyo myaka cihumbi ehwa, Yezu agalulira Ishe Obwami. (1 Abakorinti 15:24-26) Ndi wankasimire orhangi bwira kw’eyi myanzi y’Obwami bwa Nnamahanga?​—Osome Ennanga 37:10, 11, 29.