Yezu arhali nk’abandi bantu, bulya ayorhaga alama empingu embere aburhwe han’igulu. (Yowane 8:23) Yezu ye ciremwa cirhanzi rhanzi ca Nnamahanga, ayishirhabala ishe omu kulema ebindi bintu byoshi. Yezu ye ciremwa ciguma Nnamahanga àlemîre n’amaboko gage yene. Co cirhuma ahamagalwa “Mugala cusha” wa Nnamahanga. (Yowane 1:14) Kandi Yezu ye “Luderho” bulya ye wali Mudesi wa Nnamahanga oku bindi biremwa.​—Osome Emigani 8:22, 23, 30; Abakolosi 1:15, 16.

 Lyo Yesu ahika han’igulu, Nnamahanga ajijire ecisomerine. Ahamikiza obuzîne bwa Yezu omu nda y’omunyere w’omubikira Muyahudi ohamagirwe Mariya. Muli ntoyo, Yezu arhaligwerhe ishe wa mwene muntu. (Luka 1:30-35) Lolaga ebyarhumire ayisha han’igulu (1) kurhuyigiriza okuli kuli Nnamahanga, (2) kurhuyereka gurhi rhwankasimisa Nnamahanga ciru ankaba rhuli omu malibuko, (3) n’okuhana obuzîne bwage bwimana lyo ‘arhucungula.’​—Osome Mateyo 20:28.

 Okucungula omuntu, kuli kulyula kantu kalebe lyo omulikuza arhagifa. (Olubungo 21:29, 30) Erhi Nnamahanga alema abantu, arharheganyagya oku bànashosihale erhi kufa. Bici birhuyeresire ntyo? Nnamahanga alirhonzire Adamu oku olusiku ankajijire ecaha ànkafîre. Ebyo biyerekine oku Adamu arhacijirag’ecaha, arhankafîre. (Omurhondêro 2:16, 17; 5:5)  Ebibliya edesire oku Adamu ye ‘wayahukize’ abantu boshi olufu n’ecaha. Muli ntyo, rhweshi rhwayima omu caha n’omu lufu. Byo birhumire rhulagirire oku mucunguzi w’okurhukula omu lufu Adamu arhusigire.​—Osome Abaroma 5:12; 6:23.

 Ndi walikwanine okuba oyo mucunguzi? Nta muntu han’igulu wankafa lyo acungula abandi, bulya nta muntu mwimana. Co cirhumire ngasi muntu erhi afa analyule emyenda (amadeni) y’ebyaha byage.​—Osome Ennanga 49:8-10.

 Yezu arhali munyabyaha akirhu, ali mushinganyanya. Ntyola arhagwerhi byaha byankarhumire afa, bulya nta lusiku ajijire ecaha. Oko kuyerekine oku byaha bya bandi bantu àfirire. Lyo Nnamahanga arhuyereka oku arhusima bwenene, arhuma Omugala mpu ayishe arhufire. Yezu naye ayerekana oku arhusima erhi ayumva Ishe n’erhi ahana obuzîne bwage kuli rhwe.​—Osome Yowane 3:16; Abaroma 5:18, 19.

 Oyerekane evideyo edesire Bici Byarhumâga Yezu Afâ?

 Amango Yezu ali han’igulu, afumîze abalwala, afûla abafîre, n’okurhuliriza abâli omu malibuko. Omu kujira ntyo, ayerekine ebi ajirira abantu birhonzi omu nsiku ziyishire. (Mateyo 15:30, 31; Yowane 5:28) Enyuma ly’olufu lwage, Ishe amufula omu mubiri gw’obunyamûka. (1 Petro 3:18) Yezu abêra ebwa kulyo kw’Ishe Yehova, analinda kuhika amango Yehova amuhaga obuhashe bw’okurhegeka nka Mwami w’igulu lyoshi. (Abahabraniya 10:12, 13) Ene ali Mwami omu mpingu, n’abashimbulizi bage bali bayalagaza ogo mwanzi mwinja omw’igulu lyoshi.​—Osome Daniyeli 7:13, 14; Mateyo 24:14.

 Omu nsiku ziyishire, Yezu akolesa obuhashe bwage nka Mwami lyo amala amalibuko goshi n’okuhererekeza abagalerha. Abamuyemîre n’okumuyumva balama omu paradizo han’igulu ensiku n’amango.​—Osome Ennanga 37:9-11.