Nnamahanga àjijire iburha lya Abrahamu libe ishanja liguma, abaha n’amarhegeko. Er’ishanja aliha iziro lya Israheli, analiha omukolo gw’okumuharamya omu njira y’okuli n’okulanga akanwa kage. (Ennanga 147:19, 20) Nantyo abantu b’agandi mashanja goshi bankagishirwe kugerera okw’ishanja lya Israheli.​—Osome Omurhondêro 22:18.

 Nnamahanga acishoga Abaisraheli babe bahamirizi bage. Emyanzi y’akalamo kàbo eyerekine oku okukenga amarhegeko ga Nnamahanga kunalerhere abantu emigisho. (Olushika 4:6) Ntyola, kugerera okw’ishanja lya Israheli abandi bantu bankamanyire Nnamahanga w’okuli.​—Osome Izaya 43:10, 12.

 Erhi hagera nsiku, Abaisraheli bagayisa Nnamahanga, naye abalahira, na ntyo, acishoga erindi ishanja, eri ishanja co cinyabuguma c’Abakristu b’okuli. (Mateyo 21:43; 23:37, 38) Ene, Abahamirizi ba Yehova bo Bakristu b’okuli, ci arhaciri balya Baisraheli.​—Osome Ebijiro 15:14, 17.

 Yesu ahêbire abashimbulizi bage omu cinyabuguma lyo bayalagaza omwanzi gw’Obwami, n’okujira abandi bashimbulizi erhi banafunzi. (Mateyo 10:7, 11; 24:14; 28:19, 20) Ogo mukolo gukola guli hofi guhwe bulya rhukola rhuli omu nsiku nzinda. Kurhenga abantu baba han’igulu, ene bwo burhanzi Yehova aheba emilioni y’abantu b’amashanja goshi omu cinyabuguma lyo bamuharamya omu njira y’okuli. (Amafulûlo 7:9, 10) Ecinyabuguma c’Abakristu b’okuli ciba ca kuherana omurhima omunda n’okurhabalana. Omw’igulu lyoshi, banahabwe nyigirizo nguma omu ntimanano zabo.​—Osome Abahabraniya 10:24, 25.

 Ecinyabuguma c’Abahamirizi ba Yehova ba zino nsiku carhangiraga omu miaka egarhi ka 1871 na 1880. Ago mango bàli cigamba cisungunu, bakagiderhwa Banafunzi b’Ebibliya. Barhangira okulonza omu Bibliya emyanzi agandi madini gàli gàfulisire. Bashànga oku Yezu alihebire Abanafunzi bage omu cinyabuguma lyo bayalangaza omwazi gw’Obwami, nantyo abo Banafunzi b’Ebibliya barhondera omukolo munene bwenene g’okuyigiriza Obwami omw’igulu lyoshi. Omu mwaka gwa 1931 bàrhola izino ly’Abahamirizi ba Yehova.​—Osome Ebijiro 1:8; 2:1, 4; 5:42.

 Amango g’Entumwa, hali ecigamba c’abalume b’obumanye balya bakagilongola Abakristu omw’igulu lyoshi. N’abo balume baliyemire oku Yezu ye Nnawabo. (Ebijiro 16:4, 5) Ene nalyo, Abahamirizi ba Yehova omw’igulu lyoshi bayemire okulongolwa n’ecigamba ca bagula b’obumanye ciderhwa Akagombe k’Obulongozi. Eco cigamba ciyimangire ebiro by’Abahamirizi omu bihugo byoshi. Ebyo biro bijira omukolo gw’okuhindula (kutafsiri) ebitabu, okubicapa n’okubirhumira ebigamba by’Abahamirizi omu ndimi kulusha 600. Muli ntyo, ebigamba kulusha 100 000 by’Abahamirizi ba Yehova omw’igulu lyoshi, binalongolwe n’okulisibwa n’ako Kagombe k’Obulongozi. Omu ngasi cigamba, muli abalume bakwanine baderhwa bagula erhi balungere. Abo balume banakayabula obuso bwa Nnamahanga n’obuzigire.​—Osome 1 Petro 5:2, 3.

 Omukolo gw’ecingabuguma c’Abahamirizi ba Yehova guba gwa kuyalagaza omwanzi gw’Obwami n’okujira abanafunzi. Rhunaje rhwayigiriza nyumba oku yindi nkoku entumwa zakagijira. (Ebijiro 20:20) Kandi, rhukashanga abantu basimire okuli, rhunabayigirize Ebibliya. Cikwone, ecinyabuguma c’Abahamirizi ba Yehova cirhaba cinyabuguma kone. Rhuli mulala muguma, rhunajira Larha muguma w’obuzigire, omw’igulu lyoshi rhugwerhe bene wirhu na bali birhu na kandi rhweshi rhunashibirirane bwenene. (2 Abatesalonika 1:3) Bulya omuhigo gw’ecinyabuguma c’Abahamirizi ba Yehova guli gwa kusimisa Nnamahanga n’okurhabalana, omulala gwirhu gugwerhe omwishingo kulusha eyindi milala yoshi omw’igulu.​—Osome Ennanga 33:12; Ebijiro 20:35.