ISOMO LYA 6
Ka hali obulangalire lugenda àbafîre?
1. Mwanzi mwinja muci rhugwerhe lugenda àbafîre?
Erhi Yezu ahika Ebetania, hofi n’Eyeruzalemu, hali hamagera nsiku 4 omwira wage Lazaro afîre. Yezu, Marta na Maria baja honaho aha nshinda ya nnagufa. Ehitu hya bantu hyayisha hibakulikire. Gerereza omwishingo Marta na Mariya bayumvirhe erhi Yezu afula Lazaro.—Osome Yowane 11:21-24, 38-44.
Marta alikol’amanyire omwanzi mwinja guyerekire àbafîre. Alimanyire oku Yehova acifula àbafîre lyo bashubilama han’igulu.—Osome Ayubu 14:14, 15.
2. Gurhi owamafa ayorha?
Nnamahanga abwira Adamu erhi: “Oli budaka n’omu budaka washubira.”—OMURHONDÊRO 3:19.
Omu budaka abantu barhengaga. (Omurhondêro 2:7; 3:19) Nk’omuntu amafa, nta muka gurhafa gumurhengamo mpu gugenderere okulama. Rhuba biremwa bya mubiri, erhi omuntu afa, nta kantu kamurhengamo mpu kugendi lama handi handi. Erhi omuntu afa, obongo bwage nabwo bunafe, n’enkengero zage, byoshi binazime. Kwo binali ntyo, bulyala erhi Lazaro afuka, ntaho adesire alijire na ntabyo adesire oku anabwine. Ko kuderha oku, erhi omuntu afa, yeshi anafe, arhakacimanya kantu koshi koshi.—Osome Ennanga 146:4; Omuhanûzi 9:5, 6, 10.
Ka Nnamahanga analibuze abantu omu ngulumira y’omuliro erhi bafa? Ebibliya eyigirizize oku erhi omuntu afa, arhankacimanya kantu koshi koshi. Co cirhumire abayigiriza mpu haba ecihenama, kunywerha banywerhera Nnamahanga. Ciru ezo ngererezo zone z’okuyoca abantu zinagayise Nnamahanga bwenene.—Osome Yeremiya 7:31.
Oyerekane evideyo edesire Gurhi Owamafâ Ayorha?
3. K’abafîre banashambala n’abazîne?
Abafîre barhankaderha, barhankayumva. (Ennanga 115:17) Cikwone haba bamalahika babi, banashambaza abantu, n’okubarheba bamanye mpu bali bashambala na bena wabo bafîre. (2 Petro 2:4) Yehova arhuhanzize oku irhondo rhurhahiraga rhwaganiza àbafîre.—Osome Olushika 18:10, 11.
4. Bandi banafulwe?
Emilioni y’abantu bali omu nshinda bayishifulwa balame omw’igulu lihyahya. Ciru n’abarhamanyaga Nnamahanga n’oko kwarhuma bagenderera okujira amabi nabo banafulwe.—Osome Luka 23:43; Ebijiro by’Entumwa 24:15.
Abayishifulwa, bayishiyigirizibwa okuli kuli Nnamahanga, bayishiyemera Yezu omu kumukenga. (Amafulûlo 20:11-13) Abayishijira aminja mw’ago mango, bayishihabwa obuzîne bw’ensiku n’amango han’igulu.—Osome Yowane 5:28, 29.
5. Bici obufuke burhuyigirizize kuli Yehova?
Okubona Yehova àrhumîre Omugala mpu ayishirhufira, kurhuhire obulangalire oku obufuke bw’abafîre bwahaba. Obufuke bw’abafîre buyerekine oku Yehova anarhuzigire n’oku ali mwinja. Amango abafîre bafuke, ndi osimire bwenene okubona?—Osome Yowane 3:16; Abaroma 6:23.
