ISOMO LYA 10
Gurhi wankamanya idîni ly’okuli?
1. Ka haba idîni liguma ly’okuli?
“Mumanye abalebi b’obunywesi.”—MATEYO 7:15.
Yezu ayigirizize abanafunzi bage idîni ligumu lyone, lyo idîni ly’okuli. Alishushanya n’enjira y’okuja ebwa buzine bw’ensiku n’amango. Yesu adesire oku ‘banyi babona’ eyo njira. (Mateyo 7:14) Idîni liyigiriza ebiri omu Bibliya lyone Nnamahanga ayemire. Abaharamya Nnamahanga omu kuli boshi bajira buyemera buguma.—Osome Yowane 4:23, 24; 14:6; Abefezi 4:4, 5.
Oyerekane evideyo edesire Ka Nnamahanga Aba Ayemîre Amadîni Goshi?
2. Bici Yezu adesire lugenda Abakristu b’obunywesi?
“Banakaderha mpu bayishi Nnamahanga, ci erhi banadwirhe bamuhakana omubijiro bwabo.”—TITO 1:16.
Yesu arhubwizire mpu rhucilange bulya Abakristu b’obunywesi bankazinzize idîni ly’okuli. Banakaciyerekana nka Bakristu b’okuli. Amakanisa gabo ganakaciderha mpu gali ga Cikristu. Cikwone erhi wankabalolereza bwinja, wanabona oku bali balebi b’obunywesi. Omanye bakurheba. Idini ly’okuli lyone libamo Abakristu b’okuli. Banamanyirwe oku bijiro byabo n’oborhere bwabo.—Osome Mateyo 7:13-23.
3. Gurhi wankamanya Abakristu b’okuli?
Hali bimanyiso 5 byankakurhabala ly’omanya Abakristu b’okuli:
-
Abakristu b’okuli bayemire oku Ebibliya kali Kanwa ka Nnamahanga, na bwenene bayikenga. Banacihangane okulama oku marhegeko g’Ebibliya. Mweyo njira, idîni ly’okuli lirhashushiri agandi madîni gayigiriza enyigirizo n’amarhegeko g’abantu. (Mateyo 15:7-9) Abakristu b’okuli zirhaba ndyalya, oku bayigiriza kwo banalama.—Osome Yowane 17:17; 2 Timoteyo 3:16, 17.
-
Abashimbulizi b’okuli ba Yezu bwenene bakenga izino lya Nnamahanga, Yehova. Yezu ayerekine obukenge okw’izino ly’Ishe omu kulimanyisa abantu. Arhabazize abantu okumanya Nnamahanga, anabayigiriza mpu bakashenga izino lyage likuzibwe. (Mateyo 6:9) Ah’olama, idîni lihi liri lyamanyisa abantu izino lya Nnamahanga?—Osome Yowane 17:26; Abaroma 10:13, 14.
-
Abakristu b’okuli banaje bayalagaza Obwami bwa Nnamahanga. Nnamahanga arhumire Yezu han’igulu mpu ayishiyigiriza omwanzi mwinja g’Obwami. Obwo Bwami bone bulangalire bw’okuli busigalire bene bantu. Yezu agenderire okuyigiriza abantu kuhika olusiku lwage luzinda. (Luka 4:43; 8:1; 23:42, 43) Asizire abwizire abashimbulizi bage mpu bagenderere okubumanyisa abantu. Erhi omuntu ankakuyimanza, arhangire akuganiza oku biyerekire Obwami bwa Nnamahanga, wanaderha oku ali w’idîni lihi?—Osome Mateyo 24:14.
-
Abakristu b’okuli barhali ber’igulu. Wanabamanyira omu kurhaja omu by’epolitike erhi omu ntambala z’erigulu. (Yowane 17:16; 18:36) Kandi, barhayiganya ebijiro bibi, barhanakulikira oborhere bw’abantu bagalugalu b’er’igulu.—Osome Yakobo 4:4.
-
Abakristu b’okuli banazigirane bwenene kulush’abandi bantu boshi. Akanwa ka Nnamahanga kabahunyire bakenge abantu ba ngasi lubero. Ciru ankaba amadîni g’obunywesi ganakarhabala abali omu ntambala, Abakristu b’okuli barhankajira ntyo ciru n’olusiku luguma. (Mikeyo 4:1-3) Abakristu b’okuli bohe banakolese akasanzi kabo n’obuhirhi bwabo omu kuyigiriza abandi bantu n’okubaha obulangalire.—Osome Yowane 13:34, 35; 1 Yowane 4:20.
4. Ka wanaderhaga idîni ly’okuli lyo lihi?
Idîni lihi liyigiriza ebiri omu Bibliya byone, likenga izîno lya Nnamahanga, idîni lihi liyigiriza abantu oku obwami bwa Nnamahanga bwone bulangalire rhusigaline? Bantu b’idîni lihi bazigirana bwenene, barhanaciheba omu ntambala z’er’igulu? Wanaderha oku idîni lihi liyenezize ebyo byoshi?—Osome 1 Yowane 3:10-12.
