ISOMO LYA 05
Ebibliya Guba Mwanzi gwa Nnâmahanga Arhurhumire
Yehova arhuhire oluhembo lwinja bwenene, olo luhembo ciba citabu cibamwo bitabu bisungunu-ngunu 66, cihamagalwa Bibliya. Cikone wanacidosagya ntya: ‘Ngahi Ebibliya yarhengaga? Ndi wayiyandikisagya?’ Lyo rhushuza kw’ago madoso, rhwarhang’iganirira gurhi ogo mwanzi gwa Nnâmahanga guba omu Bibliya gwarhuhikagako.
1. Erhi akaba bene bantu bo bayandikaga Ebibliya, gurhi rhwakaderhamo oku Nnâmahanga ye wayiyandikisagya?
Ebibliya yayandikwa na bantu hofi 40, yajijire hofi myaka 1 600 eri yayandikwa, yarhonderaga yayandikwa omu mwaka gwa 1513 Embere za Kano Kasanzi Kirhu (E.K.K.K.) kuhika hofi omu mwaka gwa 98 muli Kano Kasanzi Kirhu (K.K.K.). Abayiyandika barhalilamire haguma boshi. Ciru akaba ntyo, ebi bayandikaga byoshi biba bipatine. Gurhi oko kwahashikinemwo? Bulya Nnâmahanga ye wayandikisagya Ebibliya. (Osome 1 Abatesalonika 2:13.) Abayiyandikaga barhagwasagyamo entanya zabo. Lubero n’oko, “kugerera iroho ligatifu bakaderha ebyarhenga emwa Nnâmahanga.” a (2 Petro 1:21, NWT) Nnâmahanga akolesize iroho lyage litagatifu ly’alongoza, erhi kushumya bene bantu bayandike entanya zage.—2 Timoteyo 3:16.
2. Ndi Wakayunguka n’Ebibliya?
“Ngasi mulala, na ngasi bûko, na ngasi lulimi, na ngasi ishanja” banayunguka n’omwanzi mwinja guba omu Bibliya. (Osome Amafulûlo 14:6.) Nnâmahanga ajijire okwage koshi ly’Ebibliya eba omu ndimi nyinji kulusha ebindi bitabu byayandikagwa n’abantu. Hofi ngasi muntu anaba n’obulyo bw’okusoma Ebibliya. N’oko kunahashikane ciru bantu balebe bakaba balamire omu cihugo cilebe erhi ciru akaba banaganire lulimi lulebe.
3. Mazibu maci Ebibliya yabuganyire na gurhi Yehova ayilanzire?
Ebibliya yayandikiragwa oku bikolanwa birhalugijira nsiku nyinji, nk’oluhu lw’ensimba n’enfinjo (papyrus). Cikone abantu baliyizigire bajira okwabo koshi lyo bakayiyandika n’amaboko ly’erhagihererekera. Ciru akaba abantu bagwerhe obuhashe bakagilonza okuhererekeza Ebibliya, haligi n’abandi bantu bali babidu okuheza obuzine bwabo lyo bayilanga. Yehova arhayemeraga omuntu erhi kantu koshi-koshi karhume arharhuganiza. Ebibliya edesire ntya: “Akanwa ka Nyamuzinda wirhu kayorha kahâba ensiku n’amango.”—Izaya 40:8.
HUMBIRIRA LY’OHUGÛKWA
Oyige binji lugenda oku Nnâmahanga alongozagya abayandikaga Ebibliya, oku ayilangangamwo n’oku ayihisagyako bene bantu.
4. Ebibliya efulwire Owayiyandikisagya
Olole EVIDEO. Buzinda, osome 2 Timoteyo 3:16, onaganirire amadoso gakulire.
-
Erhi akaba bene bantu bo bayandikaga Ebibliya, bulya gurhi ehamagalwa Kanwa ka Nnâmahanga?
-
K’orhanyize oku byanayumvikana okuyemera oku Nnâmahanga akarhumîre bene bantu entanya zage oku baziyandike?
Omwandisi anayandika amaruba, cikone omwanzi ayandika gurhenzire emw’omuntu wakagimubwira ebi ayandika. Ko n’oko ko bene bantu bayandikaga Ebibliya, cikone omwanzi gumuba gwarhenga emwa Nnâmahanga
5. Ebibliya yafulumusire okuhererekera
Okubona Ebibliya yarhengaga emwa Nnâmahanga, oku ayilangangamo kurhakarhusomeza. Kurhenga mira, abantu bagwerhe obuhashe bakagilonza okuhererekeza Ebibliya. Abakulu b’amadîni balonza okuyifulika. Hali abantu bahagalisirwe banalonza okubaniga, cikone ciru akaba ntyo bayemera okuhira obuzine bwabo omu mazibu lyo balanga Ebibliya. Ly’omanya binji lugenda abo balume, olole EVIDEO, na buzinda oganirire amadoso gakulikire.
-
K’okumanya oku bintu binji byajijirwe ly’Ebibliya elangwa, ka kwanakuha enyorha y’okuyisoma? Bulya gurhi?
Osome Ennanga 119:97, na buzinda oganirire er’idoso:
-
Bici byashumagya bantu banji okuhira obuzine bwabo omu mazibu lyo bahindula Ebibliya omu zindi ndimi n’okuyigabira abandi?
6. Ciba citabu c’abantu boshi
Ebibliya co citabu camakahindulwa omu zindi ndimi nyinji bwenene n’okugabirwa abantu kulusha ebindi bitabu byoshi. Osome Ebijiro by’Entumwa 10:34, 35, na buzinda oganirire aga madoso:
-
Bulya gurhi Nnâmahanga alonzagya oku Akanwa kage kahindulwe omu ndimi nyinji n’okugabirwa abantu?
-
Bici bikusimisize okubiyerekire Ebibliya?
Hofi bantu
100%
b’omw’igulu lyoshi
banaba n’Ebibliya omu lulimi bayumva
Eri omu ndimi kulusha
3 000
yoshi ngumanà
erhi nusu
Omubalè gw’Ebibliya zajijirwe
5 000 000 000
nta cindi citabu cikola cihisize ogo mubalè
HALI ABANTU BADERHA NTYA: “Ebibliya ciba citabu ca mîra cayandikagwa n’abantu.”
-
Gurhi nawe orhanyize?
-
Bici byakarhuyemeza oku Ebibliya kaba Kanwa ka Nnâmahanga?
KWA BOFOFI
Ebibliya kaba Kanwa ka Nnâmahanga, ananajijire okwage koshi lyo bene bantu babà nayo.
Okucikengeza
-
Okuderha oku Nnâmahanga alongozize bene bantu kugerera iroho lyage lyo bayandika Ebibliya, kw’okuderha gurhi?
-
Bici bikushagalwire lugenda oku Ebibliya yafulumukagamo okuhererekezibwa, okuhindulwa kwayo omu zindi ndimi, n’oku egabirwa abantu?
-
Gurhi ociyumvire okumanya oku Nnâmahanga ajijire okwage koshi ly’akarhuganiza?
OCIYIGIRIZE KWA BULÎRI
Osome emyanzi lugenda olulibi lw’Ebibliya kurhangirira oku mandishi marhangiriza kuhika oku mpindulo za muli gano mango girhu.
Olole gurhi Ebibliya yafulumusire bintu bisharhu binene byalonzagya okuyihererekeza.
“Biblia Iliokoka Namna Gani” (Ilabiro ly’Akalalizi, No. 4 2016)
Olole gurhi abantu bahizire akalamo kabo omu mazibu lyo bahindula Ebibliya omu zindi ndimi.
Ebibliya yayandisirwe yanahindulwa omu ndimi nyinji. Bici byakakuyemeza n’obwalagale oku omwanzi gwayo gurhajagamw’amagosa?
“K’Ebibliya Yayushwirwe Erhi Yahindulwa Kundi-Kundi?” (Mwanzi guli oku jw.org)
a Nk’oku byayishihugûlwa omu Isomo lya 7, iroho litagatifu yo misi ya Nnâmahanga.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
