ISOMO LYA 07
Gurhi Yehova Ayorha?
Gurhi orhanya Yehova aba ayosire? K’aba wakusomeza cikone aba kuli nka kula enyenyezi z’egalagsi ziba kuli bwenene? Erhi k’onakabona nk’aba wa misi minji cikone arhajira bumuntu nka kula omulazo guyorha? Gurhigi Yehova ayorha? Kugerera Akanwa kage Bibliya, Yehova aba afulwire morhere gage maguma na maguma na kunganaci akushibirira.
1. Bulya gurhi rhurhakabona Nnâmahanga?
“Nnâmahanga aba Iroho.” (Yowane 4:24, NWT) Yehova arhajira omubiri gw’obunya-muntu nk’ogu gwirhu. Aba Muntu wa kiroho olama omu mpingu, hantu rhurhakabona n’amasu girhu.
2. Amorhere ga Yehova go gahi?
Ciru akaba Yehova arhabonekana, aba Muntu w’okunali ojira amorhere minja garhuma balya bamuyishi bamuzigira. Ebibliya edesire ntya: “Yehova anarhonye obushinganyanya, arhakanalekêrera abacishwekera kuli ye.” (Ennanga 37:28, NWT) Na kandi aba “wa lukogo na wa bwonjo bunji,” bwenene kuyerekera abantu bali balibuka. (Yakobo 5:11) “Yehova aba hofi n’emirhima egayire; anacungule abavunisire omurhima.” (Ennanga 34:18, NWT, mahugulo g’idako) Na kandi, kw’oba omanyire oku ebijiro birhu byanagayisa Yehova erhi bimushagaluse? Omuntu ocishoga okujira ebintu bibi anarhume ayumva oburhe n’okumugayisa. (Ennanga 78:40, 41) Cikoki omuntu ojira ebintu binja anamushagalule bwenene.—Osome Emigani 27:11.
3. Gurhi Yehova arhuyereka oku aba arhuzigire?
Obuzigire bo borhere bukulu bwenene omu morhere ga Yehova. Neci, “Nyamuzinda aba buzigire.” (1 Yowane 4:8) Arhali kugerera Ebibliya yone Yehova ayerekana obuzigire bwage, ci na kandi kugerera ebintu alemire. (Osome Ebijiro by’Entumwa 14:17.) Rhurhôle olwiganyo lw’oku arhulemaga. Arhuha obulyo bw’okubona amarangi minja, okuyumva emiziki minja n’okununirwa n’ebiryo binja bya ngasi lubero. Aba alonzize rhushagalukire akalamo.
HUMBIRIRA LY’OHUGÛKWA
Oyige ebi Yehova akolesa ly’ahikiriza ebintu by’okurhangaza. Buzinda olole gurhi afulûla n’okuyerekana amorhere gage minja.
4. Iroho litagatifu yo misi ya Nnâmahanga
Nka kula rhunakolesa enfune zirhu lyo rhujira omukolo, Yehova naye anakolese iroho lyage litagatifu ly’ajira emikolo yage. Ebibliya eyerekine oku iroho litagatifu arhaba muntu, ci eba misi Nnâmahanga akolesa ly’akola bintu bilebe. Osome Luka 11:13 n’Ebijiro by’Entumwa 2:17, na buzinda oganirire amadoso gakulikire:
-
Nnâmahanga adesire oku “alumîza” iroho lyage litagatifu oku bamuhûnyire lyo. Omu ntyo, kw’orhanyizagye okw’iroho litagatifu aba muntu erhi eba misi ya Nnâmahanga? Bulya gurhi odesire ntyo?
Yehova anakolese iroho lyage litagatifu ly’ahikiriza ebintu by’okurhangaza. Osome Ennanga 33:6 na 2 Petro 1:20, 21, na buzinda oganirire er’idoso:
-
Njira nguma-nguma zihi Yehova akolesizemwo iroho lyage litagatifu?
5. Yehova ajira amorhere minja bwenene
Musa ali mukozi mwishwekerezi wa Nnâmahanga, cikoki alonza amanyirire Omulemi wage bwinja. Musa anacimubwira erhi: “Ommanyisagye nâni amajira gawe [erhi enjira zawe], lyo nani nkumanya.” (Olubungo 33:13) Yehova ashuza Musa omu kumumanyisa morhere Gage maguma na maguma. Osome Olubungo 34:4-6, na buzinda oganirire aga madoso:
-
Morhere gahi na gahi Yehova yene afulûlire Musa?
-
Morhere gahi egarhi k’amorhere ga Yehova gakusimisize bwenene?
6. Yehova aba ashibirire abantu
Olubaga lwa Nnâmahanga lwa Abahabraniya lwahêkwa bujà e Misri. Gurhi Yehova aciyumvirhe enyanya z’amalumwa gabo? Oyumvirhize e AUDIO erhi osome Olubungo 3:1-10. Buzinda oganirire amadoso gakulikire.
-
Bici ogu mwanzi gukubwizire lugenda oku Yehova aciyumva erhi abona abantu bali balibuka?—Olole omulongo gwa 7 na 8.
-
K’orhanyize oku kobinali Yehova analonze okurhabala bene bantu n’oku agwerhe obuhashe bw’okujira ntyo? Bulya gurhi odesire neci, erhi bulya gurhi olahire?
7. Ebi Yehova alemire binayerekane bwinja amorhere gage
Yehova anayerekane amorhere gage kugerera ebi alemire. Olole EVIDEO. Buzinda osome Abaroma 1:20, n’okuganirira er’idoso.
-
Morhere gahi ga Yehova obona kugerera ebintu alemire?
HALI ABANTU BADERHA NTYA: “Nnâmahanga arhaba muntu, cikoki, eba misi eba hoshi-hoshi.”
-
Gurhi nawe orhanya?
-
Bulya gurhi orhanyize ntyo?
KWA BOFOFI
Yehova aba Iroho lirhabonekana n’amasu ananajira morhere manji minja, bwenene obuzigire.
Okucikengeza
-
Bulya gurhi rhurhakabona Yehova?
-
Iroho litagatifu byo bici?
-
Ka wanaganirira morhere maguma na maguma ga Yehova?
OCIYIGIRIZE KWA BULÎRI
Oyushûle obumanye bwawe okubiyerekire Yehova omu kuciyigiriza morhere gage ani makulu.
“Mungu Ni Mutu wa Namna Gani?” (Ilabiro ly’Akalalizi, No. 1 2019)
Olole ebiyerekine oku Yehova arhaba hoshi-hoshi.
Obone bulya gurhi Ebibliya eshushanyize iroho litagatifu n’enfune za Nnâmahanga.
Kwali kuzibu kuli mulume muguma walihusire amasu ayemere n’obwalagale oku Nnâmahanga anamushibirire. Olole bici byamurhabire ashanje entanya zage.
“Sasa Ninajisikia Kuwa Ninaweza Kusaidia Wengine” (Ilabiro ly’Akalalizi, ly’omu lusiku 1/10/2015)
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
