ISOMO LYA 09
Oyegere Nnâmahanga Kugerera Isala
Ka hali amango okola ociyumvirhe oku olagirire oku bulongozi omu kalamo? Ka hali amadoso g’obulagirire wakalonza obe n’amashuzo gago? K’olagirire oku kuhâbwa omurhima erhi oku kurhulirizibwa? K’olonzize ociyumve hofi-hofi na Yehova? Isala lyanakurhabala muli ebyo bintu byoshi. Cikoki, enjira nyinja y’okusalira eri ehi? Ka Nnâmahanga anayumvirhize amasala goshi? Bici okwanine okujira ly’ayumvirhize amasala gawe? Oleke rhubibone.
1. Ndi rhushinganine rhukashenga, n’enyanya za bici rhushinganine rhushenge?
Yezu ayigirizize oku rhushinganine rhukashenga Larha wiru w’omu mpingu yene. Yezu naye akagishenga Yehova. Aderha ntya: “Alagi oku mwakashenga: ‘Larha, oli omu mpingu . . .’” (Mateyo 6:9) Erhi rhushenga Yehova, rhunabe erhi rhuli rhwazibuhya obwîra bwirhu haguma naye.
Rhwanashenga Yehova okubiyerekire ngasi kantu. Cikone, lyo Yehova ashuza oku masala girhu, gashinganine gapatane n’obulonza bwage. “Erhi rhwankamushenga akantu nk’oku alonzize, anarhuyumvirhize.” (1 Yowane 5:14) Yezu ahânyire enyiganyo z’ebintu rhwakakashenga Nnâmahanga. (Osome Mateyo 6:9-13.) Ahanyuma n’okushenga lugenda amalagirire girhu rhwenene, rhurhakwanini rhuyibagire okuvuga Nnâmahanga omunkwa okubiyerekire ebintu anarhujirire n’okumuhûna arhabale abandi.
2. Gurhi rhushinganine okusalira?
Ebibliya erhuhire omurhima omu kuderha ntya: “Mumuhire kw’omurhima [gwinyu].” (Ennanga 62:8, Mashi Bible) Co cirhumire amasala girhu gashinganine gabe ga kurhenga oku murhima. Rhwanasalira n’izu erhi omu murhima omu njira yoshi-yoshi eyerekine oku rhukenzire Yehova. Rhwanashenga ngasi mango na kandi rhwanajira ntyo ngasi hoshi rhwakaba rhuli.
3. Gurhi Nnâmahanga ashuza oku masala girhu?
Anajire ntyo omu njira nyinji. Yehova arhuhire Akanwa kage, Bibliya, omo mwo rhwakabona amashuzo g’amadoso girhu. Okusoma Akanwa ka Nnâmahanga “kwanayengehya embula-bwenge ebe n’obumanye.” (Ennanga 19:7, Mashi Bible; osome Yakobo 1:5.) Nnâmahanga anarhuha omurhula gw’ekandalala amango rhuli rhwalwisa amazibu. Na kandi, anakolesa abakozi bage bayishe barhuhe oburhabale amango rhubulagirireko.
HUMBIRIRA LY’OHUGÛKWA
Olole gurhi wakashenga Nnâmahanga amasala asima garhenzire oku murhima na kandi omanye gurhi isala lyakakulerhera obunguke.
4. Ebyakarhuma Nnâmahanga ayemera isala
Bici byakarhuma Nnâmahanga ayemera isala lirhu erhi alilahire? Olole EVIDEO.
Yehova alonzize rhukamushenga. Osome Ennanga 65:2, NWT na buzinda oganirire aga madoso:
-
K’orhanyize oku “Omumvirhiza w’isala” alonzize okamushenga? Bulya gurhi odesire ntyo, erhi bulya gurhi olahire?
Rhukwanine rhucihangane okulama nk’oku amakanuni ga Nnâmahanga ganadesire erhi akaba rhulonzize akayumva amasala girhu. Osome Mikeyo 3:4 na 1 Petro 3:12, na buzinda oganirire er’idoso:
-
Bici rhwakajira lyo Nnâmahanga ayumvirhiza amasala girhu?
Omu kasanzi k’ivita, mirhwe ibirhi y’abasoda enakashenga mpu Nnâmahanga abarhabale bahime. Ka rhwanarhanya oku Nnâmahanga anashuza kw’ago masala?
5. Amasala girhu gakwanine garhenge oku murhima
Bantu baguma na baguma bayizire amasala g’okugalukira-galukira bananagabisire omu bwenge bwabo. Cikoki, ka ntyo ko Nnâmahanga aba alonzize rhukamushenga? Osome Mateyo 6:7, NWT, na buzinda oganirire er’idoso:
-
Gurhi wakayaka okugalukira “birya binwa byo nabirya” omu masala gawe?
Ngasi lusiku, wanakarhanya oku mugisho Yehova anakuhîre na ntyo wanamuvuga omunkwa enyanya z’ogo mugisho. Erhi wakakajira ntyo ngasi lusiku, enyuma z’omugobe wanaba erhi washenzire Yehova okubiyerekire bintu nda biri lubero.
Omubusi mwinja asima omwana wage amubwire ebirhenzire oku murhima. Ko n’oko, Yehova naye alonzize rhukamushenga ebyarhenga omu murhima gwirhu
6. Isala luba luhembo lurhenga emwa Nnâmahanga
Gurhi isala lyakarhuhamw’emisi, omu mango g’amazibu n’omu mango rhuli omu murhula? Olole EVIDEO.
Ebibliya elaganyize oku isala lyanarhurhabala okuba n’omurhula gw’ekandalala. Osome Abafilipi 4:6, 7, na buzinda oganirire amadoso gakulikire:
-
Ciru akaba isala lirhakayusa amazibu girhu loshi-loshi, cikone gurhi lirhurhabalamwo?
-
Bintu bihi na bihi wakasima oshenge enyanya zabyo?
K’omanyire?
Oluderho “amen” kuli kuderha “kobinali” erhi “bibe ntyo.” Kurhenga mîra abantu bakagiderha, “amen” oku buzinda bw’isala.—1 Enganîro 16:36.
7. Olonze akasanzi k’okukasalira
Agandi mango emikolo yirhu yanarhuma rhwayibagira okusalira. Kunganaci Yezu akagibona oku isala liri lya bulagirire omu kalamo kage? Osome Mateyo 14:23 na Marko 1:35, na buzinda oganirire aga madoso:
-
Bici Yezu ajijire ly’aba n’akasanzi k’okusalira?
-
Mangaci obona akasanzi k’okusalira?
HALI ABANTU BADERHA NTYA: “Isala ciba nka cikoma c’omu bwenge omuntu agwarhirizako kone.”
-
Gurhi nawe wakaderha?
KWA BOFOFI
Amasala garhenga oku murhima ganarhurhabale rhuyegere Nnâmahanga, ganarhuhe omurhula gw’ekandalala n’okurhuha emisi rhulagirireko lyo rhusimisa Yehova.
Okucikengeza
-
Ndi rhukwanine okusalira?
-
Gurhi rhukwanine okusalira?
-
Obunguke bw’isala buli buhi?
OCIYIGIRIZE KWA BULÎRI
Obone amashuzo oku madoso galugidosibwa okubiyerekire isala.
“Mambo 7 Yenye Unapaswa Kujua Juu ya Sala” (Ilabiro ly’Akalalizi, ly’omu lusiku 1/10/2010)
Oyige lugenda ebirhuma rhwasalira na gurhi rhwakakubûlamwo amasala girhu.
“Bulya Gurhi Rhushinganine Okusalira?” (Mwanzi guli oku jw.org)
Olole ebi Ebibliya erhuyigirizize lugenda oyu rhushinganine rhukashenga.
Mw’eyi video y’omuziki, obone oku rhwanasalira ngasi mango na ngasi hoshi.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
