ISOMO LYA 11
Gurhi Wakayungukamwo Bwenene n’Obusomi Bwawe bw’Ebibliya
K’okola olonzize okurhondeza mupango (projet) mulebe munenene cikone ociyumve oku guli muzibu okuhikiriza? Lyo gurhacibaga muzibu, nkaba wagugabamwo mikolo misungunu-misungunu. Ko n’oko ko binahûna okubiyerekire okusoma Ebibliya. Wanacidosa ntya: “Ngahi narhonderera?” Mw’er’isomo, rhwaganirira bintu biguma bisungunu-bisungunu wakajira ly’oshagalukira okusoma n’okuyiga Ebibliya.
1. Bulya gurhi rhukwanine okusoma Ebibliya ngasi mango?
Omuntu osoma ngasi mango Ebibliya erhi “amarhegeko ga Nyamuzinda,” anabe n’omwishingo n’okuyunguka omu kalamo kage. (Osome Ennanga 1:1-3.) Ly’orhondera okujira ntyo, wanahiga okukasoma miniti misungunu yone ngasi lusiku. Okuwagendekera wamanyirira ebiri omu Kanwa ka Nnâmahanga, ko wakanagendekera washagalukira obusomi bwawe bw’Ebibliya.
2. Bici byakakurhabala oyunguke n’obusomi bw’Ebibliya?
Lyo rhuyunguka n’obusomi bwirhu bw’Ebibliya, omu mango rhuli rhwasoma rhukwanine rhukarhangihumûka hitya n’okurhanya oku bintu rhuli rhwasoma. Rhushinganine rhusome n’‘okubigerereza kwo’ erhi kubirhanya kwo. (Yozwe 1:8) Omu mango oli wasoma, wanakacidosa wenene ntya: ‘Bici ebi binyigirizize kuli Yehova? Gurhi nakabikolesa omu kalamo kani? Gurhi nakakolesa oga mandiko lyo ntabala abandi?’
3. Mangaci wakabona akasanzi k’okusoma Ebibliya?
Kw’ojira amazibu gw’okubona akasanzi kw’okusoma Ebibliya? Banji muli rhwe bagwerhe ago mazibu. Ebibliya edesire erhi: “Mukolese bwinja amango muhirwe.” (Abefezi 5:16) Wanajira ntyo omu kucihiriraho kasanzi kalebe kw’okusoma Ebibliya ngasi lusiku. Baguma baguma banajire ntyo sezi-sezi. Abandi banajire ntyo omu mulegerege, nkaba amango bakola bayikula. Ciru n’abandi banajire ntyo bijingo embere bagwishire. Kasanzi kahi kakaba kinja kuli we?
HUMBIRIRA LY’OHUGÛKWA
Oyige gurhi wakajira ly’oshagalukira obusomi bwawe bw’Ebibliya. Olole gurhi wakacirheganya bwinja ly’oyunguka n’er’ifunzo lyawe ly’Ebibliya.
Nka kula rhucikomereza okulya ebiryo mberuluka, ko rhwakanacikomereza okushagalukira obusomi bw’Ebibliya
4. Oyige oku wakakashagalukira okusoma Ebibliya
Nkaba kurhakaba kulembu okurhonderaga wakasoma Ebibliya. Cikone, rhwanahikira aha rhwarhondera ‘okukâcîfînja buzira kuhusa’ okusoma Ebibliya, nka kula omuntu acîfînja okulya oku biryo arhalizigiryako. Osome 1 Petro 2:2, Mashi Bible, na buzinda oshuze kw’er’idoso:
-
K’orharhanyize oku erhi wakakasoma Ebibliya ngasi lusiku, oko kwanakurhabala okashagalukira okujira ntyo na buzinda obe n’irala ly’okusoma binji?
Olole EVIDEO ly’obona gurhi bantu baguma baguma bahikîre aha bashagalukira obusomi bwabo bw’Ebibliya. Buzinda oganirire aga madoso gakulikire.
-
Mw’eyi video, mazibu gahi eyi misole yabuganine nago?
-
Bici byabarhabire bagendekere n’omuhigo gwabo gw’okusoma Ebibliya?
-
Gurhi bajijire lyo bashagalukira bwenene obusomi bwabo?
Amahano gakakurhabala orhondere:
-
Ocishoge empindûlo erhagwerhi magosa enakolesize enderho za buno. Opime okusoma Ebibliya Tafsiri ya Ulimwengu Mupya nkaba eri omu lulimi lwawe.
-
Burhangiriza osome ebigabi bikusimize bwenene. Lugenda ezo ntanya, olole omucoro “Orhondere Okusoma Ebibliya.”
-
Okengere ebi oli wasoma. Okolese omucoro guli mw’eci citabu gudesire “Ebigabi byʼEbibliya Namakasoma.”
-
Okolese JW Library® Kugerera JW Library, wanasoma n’okuyumvirhiza Ebibliya kugerera etelefone ahantu hoshi-hoshi erhi cindi combo ca mwen’eco.
-
Okolese e Nyongeza ziri omu Biblia—Tafsiri ya Ulimwengu Mupya. Omo muli amakarte, emicoro, n’amahugûlo g’ebinwa byakarhabala obusomi bwawe bube bwakusimisa.
5. Orheganye ifunzo lyawe ly’Ebibliya
Osome Ennanga 119:34, na buzinda oganirire er’idoso:
-
Bulya gurhi kuli kwinja okusalira embere osome Ebibliya erhi kurheganya ifunzo lyawe ly’Ebibliya?
Gurhi wakayungukamo na ngasi cigabi c’ifunzo? Amango oli warheganya isomo lilebe lya mw’eci citabu, wanakolesa obu bulenga:
-
Osome ebifungo birhanzi b’isomo.
-
Olonze amandiko n’okugasoma anacihangane okuhugûkwa gurhi galunzire okuboko emyanzi oli wasoma.
-
Ogwase omustari oku binwa bikulu erhi misemwa eshuzize oku ngasi idoso; oko kwanakurhabala okuyishiganirira bwinja isomo haguma na mwalimu wawe.
K’omanyire?
Abahamirizi ba Yehova bakolesize mpindûlo nyinji z’Ebibliya. Cikoki, rhunashagalukire bwenene Ebibliya Tafsiri ya Ulimwengu Mupya bulya erhabamwo magosa, eba mpugûle n’obwalagale enanaba ekolesize izino lya Nnâmahanga.—Olole Omwanzi guli oku jw.org “K’Abahamirizi ba Yehova Bajira Eyabo-yabo Bibliya?”
HALI ABANTU BADERHA NTYA: “Okusoma Ebibliya guba mukolo munji bwenene. Ntakabona akasanzi n’emisi naheza kw’ebyo.”
-
Gurhi nawe orhanyize?
KWA BOFOFI
Ly’omuntu oyunguka bwenene n’obusomi bw’Ebibliya, bihûnyire okucihiriraho akasanzi k’okuyisoma, okusalira ly’ahugûkwa ebi ali wasoma, n’okurheganya ebigabi b’ifunzo ly’Ebibliya.
Okucikengeza
-
Bici byakakurhabala ly’oyunguka bwenene n’obusomi bwawe bw’Ebibliya?
-
Mangaci wakacihiriraho akasanzi k’okusoma n’okuciyigiriza Ebibliya?
-
Bulya gurhi kuli kwa bulagirire okurheganya ebigabi b’ifunzo lyawe ly’Ebibliya?
OCIYIGIRIZE KWA BULÎRI
Ogalukire ntanya nguma nguma zakakurhabala oyunguke bwenene n’ifunzo lyawe ly’Ebibliya.
“Namna ya Kupata Faida Wakati Unasoma Biblia” (Ilabiro ly’Akalalizi, No. 1 2017)
Oyige njira isharhu z’okusoma Ebibliya.
“Gurhi Ebibliya Yakantabala?—Cigabi ca 1: Olonze Okumanya Ebibliya Yawe” (Mwanzi guli oku jw.org)
Obone gurhi wakaba n’omwishingo omu kusoma Ebibliya.
Olole mahano maguma maguma lugenda obusomi bw’Ebibliya bantu banji bakola bagwerhe myaka minji bali bayisoma bahânyire.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
