ISOMO LYA 12
Bici Byakakurhabala ly’Ogendekera Wayiga Ebibliya?
Okuyiga Ebibliya guba nka mubalamo mwinja bwenene. Cikoki, haligi n’amango ogo mubalamo gurhaba mulembu. Nkaba hali amango wakacidosa erhi wahasha okugendekera wayiga Ebibliya. Bulya gurhi kuli kwabulagirire ocihangane ogendekere wayiga Ebibliya? Bici byakakurhabala ogendekere wayiga ciru hakaba hali amazibu?
1. Bulya gurhi okuyiga Ebibliya kuba kwabulagirire?
“Oluderho lwa Nyamuzinda lubâ luzine lunajira obuhashe.” (Abahabraniya 4:12, NWT) Ebibliya eba ya bulagirire bulya enafulûle entanya za Nnâmahanga n’oku aciyumva kukuyerekera. Arhali bumanye bone yakakurhabala okuba nabo, ci kandi yanakuhà obwenge n’obulangalire b’okunali. N’akantu k’obulagirire bwenene, yanakurhabala obe mwîra wa Yehova. Amango oli wayiga Ebibliya, onabe oli waha obuhashe bwayo enjira y’okukola omu kalamo kawe.
2. Ka kuli kwinja okuyemera okuli kw’Ebibliya?
Okuli kw’Ebibliya ko kunaba nka buhirhi bwa ngulo ndârhi. Co cirhumire Ebibliya erhubwizire ntya, “oyankirire okuli orhakuguzagya.” (Emigani 23:23, Mashi Bible) Erhi rhwakakakengera oku okuli kuba kwa bulagirire, rhwanacihangana bwenene lyo rhugendekera rhwayiga, ciru akaba rhuli rhwabuganana n’amazibu omu kujira ntyo.—Osome Emigani 2:4, 5.
3. Gurhi Yehova akakurhabala ogendekere wayiga Ebibliya?
Bulya ye Lulema na Mwîra wirhu w’obuhashe boshi, Yehova alonzize akurhabale oyige binji kuli ye. ‘Anakuhà irala n’obuhashe bw’okujira.’ (Osome Abafilipi 2:13, NWT.) Na ntyo, anakurhabala erhi akaba olagirire oku kandi kantu kakakushumya ly’ogendekera wayiga erhi kukolesa ebi oli wayiga. Erhi akaba olagirire oku misi ly’olwisa mazibu malebe erhi kuhagalikwa n’abandi bulya oli wayiga Ebibliya, anakuhà yo. Okashenga Yehova kugerera isala akurhabale ly’ogendekera wayiga Ebibliya.—1 Abatesalonika 5:17.
HUMBIRIRA LY’OHUGÛKWA
Oyige gurhi wakagendekera wayiga Ebibliya ciru akaba orhagwerhi kasanzi kanji erhi nkaba okuhagalikwa kurhakuyemeriri okujira ntyo. Na buzinda, olole gurhi Yehova akakurhabala ogendekere wayiga.
4. Ohire ifunzo lyawe ly’Ebibliya oku nafasi ntanzi omu kalamo kawe
Hali amango rhuba na bintu binji bwenene bya kujira omu kalamo, kuhika rhubone rhurhagwerhe kasanzi kanji k’okuyiga Ebibliya. Bici byakakurhabala? Osome Abafilipi 1:10, NWT, na buzinda oganirire aga madoso:
-
Bintu bihi orhanyize biba “by’obulagirire bwenene” omu kalamo?
-
Gurhi wakahira ifunzo lyawe ly’Ebibliya oku nafasi ntanzi omu kalamo kawe?
-
Erhi wakarhôla embegeti oyihiremw’omucanga buzinda ogwasemo amabuye, wanabona oku ago mabuye garhakaciyeneramwo
-
Cikone erhi wakarhangamw’amabuye, omucanga gohe gwanayeramwo buzira mazibu. Ko n’oko, erhi wakagwasa “ebintu by’obulagirire bwenene” oku nafasi ntanzi omu kalamo kaawe, wanaba n’obulyo b’okubihikiriza na ntyo wabona akasanzi kw’okujira ebindi bintu
Okuyiga Ebibliya kwanarhurhabala rhuhikirize amalagirire girhu g’ekiroho, irala lirhu ly’okulonza okumanya n’okuharamya Nnâmahanga. Osome Mateyo 5:3, na buzinda oganirire er’idoso:
-
Bunguke buci rhwakabona erhi rhwakahira ifunzo lirhu ly’Ebibliya oku nafasi ntanzi omu kalamo?
5. Ogendekere walembera okuhagalikwa
Hali amango abantu bakalonza okukuvuna omurhima mpu orhacigendekeraga wayiga Ebibliya. Olole olwiganyo lwa Francesco. Olole EVIDEO, na buzinda oganirire amadoso gakulikire.
-
Mw’eyi video, gurhi abîra n’abantu b’omu mulala gwa Francesco bajijire erhi ababwira kw’ebi akagiyiga omu Bibliya?
-
Gurhi ahembirwe enyanya z’okulembera?
Osome 2 Timoteyo 2:24, 25, na buzinda oganirire aga madoso:
-
Bici abîra bawe n’abantu b’omulala gwawe barhanya okubiyerekire ebi oli wayiga?
-
Lugenda eyo milongo y’Ebibliya, gurhi wakajira erhi muntu mulebe akaba arhashagalukiri okubona oli wayiga Ebibliya? Bulya gurhi wakajira ntyo?
6. Olangalire oku Yehova anakurhabala
Oku rhuli rhwayegerera Yehova, ko n’irala lirhu ly’okumusimisa likayushuka. Cikone, hali amango kuba kuzibu okujira empindûlo omu kalamo kirhu lyo rhulama kushimbana n’amarhegeko gage. Erhi akaba ntyo k’ociyumva, orhatwikaga enjingo. Yehova anakurhabala. Olole EVIDEO, na buzinda oganirire aga madoso gakulikire.
-
Mw’eyi video, mpindûlo zihi Jim ajijire ly’asimisa Yehova?
-
Bici bikusimisize muli olo lwiganyo lwage?
Osome Abahabraniya 11:6, na buzinda oganirire aga madoso:
-
Bici Yehova ayishijirira “abamulonza,” kw’okuderha balya bajira okwabo koshi lyo bamumanya n’okumusimisa?
-
Bici oko kukuyigirizize lugenda oku Yehova aciyumva erhi obona obushiru bwawe bw’okuyiga Ebibliya?
OMUNTU ANADOSA NTYA: “Bulya gurhi oli wayiga Ebibliya?”
-
Gurhi wakashuza?
KWA BOFOFI
Ciru akaba okuyiga Ebibliya kurhaba kulembu ensiku zoshi, okujira ntyo kwanakurhabala oshagalukire akalamo ensiku n’amango. Ogendekere walangalira Yehova, na ntyo anàkuhembe.
Okucikengeza
-
Bulya gurhi okuli kw’Ebibliya kuba kwa ngulo ndârhi kuli we?
-
Gurhi wakamanyamwo “ebintu by’obulagirire bwenene”?
-
Bulya gurhi okwanine okashenga Yehova akurhabale ogendekere wayiga Ebibliya?
OCIYIGIRIZE KWA BULÎRI
Olole njira ini zarhabire bantu banji bahikire aha bakolesa akasanzi kabo bwinja.
“Namna ya Kutumia Wakati Wako kwa Hekima” (Amuka!, y’omu Mwezi gwa 2, 2014)
Olole gurhi Yehova arhabire mukazi muguma walilamire n’omulume wabulaga kuhugûkwa obushiru bwage bw’okulonza okusimisa Nnâmahanga.
Yehova Anakarhuha Emisi lyo Rhuhashibarhula Omuzigo Gwirhu (5:05)
Olole gurhi mulume muguma ayungukagamwo n’okulembera kwa mukage.
Banaderhere Abahamirizi ba Yehova obunywesi mpu banakashâba emilala. Cikoki, k’oko baderha kuba k’okuli?
“K’Abahamirizi ba Yehova Banakashâba Emilala erhi Banayiyubake?” (Mwanzi guli oku jw.org)
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
