ISOMO LYA 15
Yezu Ye Ndi?
Yezu aba muguma w’omu bantu baba bamanyikine bwenene omw’igulu lyoshi. Bantu banji bayishi izino lya Yezu, cikone barhamuyishi bwinja. N’erhi wakadosa abantu Yezu ye ndi, onayumve ishuzo lya ngasi muguma liri lubero n’ely’owundi. Bici Ebibliya eyigirizize lugenda Yezu?
1. Yezu ye ndi?
Yezu aba malahika wa misi, aba alamire empingu. Yehova Nnâmahanga ye wamulemaga embere aleme ebindi bintu byoshi. Co cirhuma Ebibliya emuhamagala “Nfula omu biremwa byoshi.” (Abakolosi 1:15) Na kandi Ebibliya ecibiri muhamagala ‘Mugala cusha’ bulya yene ye Yehova alemaga buzira wundi muntu w’okumurhabala. (Yowane 3:16) Yezu akozire haguma n’Ishe, Yehova, ly’amurhabala okulema ebindi bintu byoshi. (Osome Emigani 8:30.) Yezu acigendekire akola haguma na Yehova. Yeba “Luderho” erhi wakuderha aha Nnâmahanga. Nnâmahanga anamurhume oku ajibwira ebindi biremwa myanzi milebe erhi ebintu alonzize bajire.—Yowane 1:14.
2. Bici byarhumaga Yezu ayisha hanw’igulu?
Hamagera hofi myaka 2000 kurhenga Yehova ajijire ecisomerine kugerera iroho lyage litagatifu, ahamisa obuzine bwa Yezu abuhira omu nda ya munyere muguma wali mubikira wakag’ihamagalwa Mariya. Omukujira ntyo, Yezu aburhwa nka mwene-omuntu. (Osome Luka 1:34, 35.) Yezu ye Masiya erhi Kristu Nnâmahanga arhumaga hanw’igulu ly’acungula abantu. a Ahikirizize ebiragane byoshi Ebibliya yal’ilebire okubiyerekire Masiya, n’oko kwarhabala abantu bahugûkwa oku Yezu ye “Kristu Mwene-Nyamuzinda Ozine.”—Mateyo 16:16.
3. Ngahi Yezu ali ene?
Enyuma za Yezu okufâ, Nnâmahanga amufûla, acibiba malahika, na buzinda acibigaluka empingu. Erhi aja empingu, “Nnâmahanga amukuza amuhira omu ceyo c’enyanya bwenene.” (Abafilipi 2:9, NWT) Kuhika buno, Yezu akola aba malahika wa misi bwenene, ahanyuma na Yehova nta wundi ogwerhe emisi eri ak’eya Yezu.
HUMBIRIRA LY’OHUGÛKWA
Ociyigirize kwa bulîri ly’ohugûkwa kobinali Yezu ye ndi, na bulya gurhi kuli kwa bulagirire rhuciyigirize binji okubimuyerekire.
4. Yezu arhaba Nnâmahanga Ogala-Byoshi
Yezu ciba ciremwa ca misi bwenene, cikone anakarhumikira Nnâmahanga Yehova. Bulya gurhi rhudesire ntyo? Olole EVIDEO ly’obona bulya gurhi Ebibliya eyigirizize oku Yezu arhaba ayumanine na Nnâmahanga ogala-byoshi.
Amandiko gakulikire garhurhabire rhuhugûkwe oku Yezu arhaba ayumanine na Nnâmahanga. Osome ngasi lwandiko, buzinda oganirire aga madoso gakulikire.
Osome Luka 1:30-32.
-
Gurhi malahika adesire kuyerekine oku Yezu arhaba ayumanine na Yehova, Nnâmahanga “Ow’enyanya” bwenene?
Osome Mateyo 3:16, 17.
-
Bici izu lyarhengaga omu mpingu lyadesire erhi Yezu abatizibwa?
-
Orhanyize er’izu lyali lya ndi?
Osome Yowane 14:28.
-
Ndi oba okulire owabo na ndi ojira obuhashe bunji kulusha owabo? K’ishe w’omwana erhi omugala?
-
Bici Yezu alonzagya okuhugûla erhi ahamagala Yehova oku y’Ishe?
Osome Yowane 12:49.
-
Ka Yezu anarhanye oku ye n’Ishe baba muntu muguma? Gurhi nawe orhanyize?
5. Ebyayerekine n’obwalagale oku Yezu ye Masiya
Omu Bibliya muli bulebi bunji buganirire Masiya Nnâmahanga acishogaga oku arhucungule. Obo bulebi bwarhabire abantu bamanye Masiya. Olole EVIDEO ly’obona bulebi buguma na buguma Yezu ahikirizize amango ayishaga hanw’igulu.
Osome obu bulebi bw’Ebibliya, buzinda oganirire aga madoso gakulikire:
Osome Mikeyo 5:2 ly’ohugûkwa aha Masiya akaburhîrwe. b
-
K’obu bulebi bwahikirire erhi Yezu aburhwa?—Mateyo 2:1.
Osome Ennanga 34:20 na Zakariya 12:10 ly’obona ebyal’ilebirwe okubiyerekire olufû lwa Masiya.
-
K’obo bulebi bwahikirire?—Yowane 19:33-37.
-
K’orhanyize oku Yezu ajijire amageza ly’obo bulebi buhikirira nk’oku bwanal’ilebirwe?
-
Bici oko kukuyigirizize kuli Yezu?
6. Bunguke buci wakaba nabo erhi wakayiga lugenda Yezu
Ebibliya eyerekine oku kuli kwa bulagirire bwenene okuyiga lugenda Yezu n’okubiyerekire omukolo Yehova amuhîre. Osome Yowane 14:6 na 17:3, na buzinda oganirire er’idoso:
-
Bulya gurhi kuli kwa bulagirire bwenene okuciyigiriza binji okubiyerekire Yezu?
Yezu arhuyigulîre enjira y’okuba bîra ba Nnâmahanga. Ayigirizize okuli okubiyerekire Yehova, na kugerera ye, rhwayishiba n’obuzine bw’ensiku n’amango
HALI ABANTU BADERHA NTYA: “Abahamirizi ba Yehova barhaba bayemire Yezu.”
-
Gurhi wakashuza omuntu ogwerhe entanya za ntyo?
KWA BOFOFI
Yezu aba malahika wa misi. Aba Mwene Nnâmahanga, kandi ye Masiya.
Okucikengeza
-
Bulya gurhi Yezu ahamagalwa “Nfula omu biremwa byoshi”?
-
Bici Yezu ajijire embere ayishe hanw’igulu?
-
Bici biyerekine oku Yezu ye Masiya?
OCIYIGIRIZE KWA BULÎRI
Olole ebiyerekine oku Yezu ye Masiya.
“K’Obulebi Buganirire Masiya Buyerekine Kobinali oku Yezu ye Wali Masiya?” (Mwanzi guli oku jw.org)
Ociyigirize kwa bulîri ly’omanya erhi kobinali Ebibliya eyigirizize oku nka kula omuntu aburha abana ko na Nnâmahanga aburhuga Yezu.
“Bulya Gurhi Yezu Ahamagalwa Mwene Nyamuzinda?” (Mwanzi guli oku jw.org)
Olole bulya gurhi enyigirizo z’Obusharhu zirhaba zipatine n’Ebibliya.
“Yesu Ni Mungu?” (Ilabiro ly’Akalalizi, lyʼomu lusiku 1/4/2009)
Osome gurhi akalamo ka mukazi muguma kashanjire erhi ayus’iciyigiriza ebi Ebibliya edesire okubiyerekire Yezu.
a Isomo lya 26 n’elya 27 lyayish’iganirira bulya gurhi bene bantu bal’ilagirire oku ngombôlo na gurhi Yezu arhucungwiremwo.
b Olole Amahugûlo ga 2 gaganirire obulebi buyerekine mangaci Masiya akabonekine erhi kumanyikana.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
