ISOMO LYA 16
Bici Yezu Ajijire Erhi Ali hanw’Igulu?
Bantu banji banakabona Yezu nk’aciba kabonjo kaciburhwa, erhi nka mulebi wali mwenge, erhi kandi nka muntu walibukaga bwenene embere afê. Cikone, k’orhanyize oku okuciyigiriza binji lugenda akalamo ka Yezu ka hanw’igulu kwanakurhabala omumanye bwinja? Mw’er’isomo, rhwabona ebintu by’obulagirire Yezu ajijire hanw’igulu na gurhi byakarhurhabala.
1. Omukolo gwa Yezu gw’obulagirire gwali guhi?
Omukolo gwa Yezu kwali ‘kuyigiriza omwanzi mwinja g’Obwami bwa Nyamuzinda.’ (Osome Luka 4:43.) Akagiyigiriza omwanzi mwinja gwakagiyerekana oku Nnâmahanga ashimika Obwami bwage erhi guvernema yayishiyusa amazibu goshi ga bene bantu. a Yezu ajijire myaka isharhu n’enusu ali ayigiriza ogo mwanzi n’obushiru boshi.—Mateyo 9:35.
2. Bulya gurhi Yezu akagijira ebisomerine?
Ebibliya eganirire “ebisomerine n’ebirhangazo n’ebimanyiso” Nyamuzinda ajiraga kugerera Yezu. (Ebijiro by’Entumwa 2:22) Nnâmahanga aha Yezu obuhashe bw’okurhuliriza omulaba, okulisa ehitû hy’abantu, okufumya abalwala, ciru n’okufûla abafîre. (Mateyo 8:23-27; 14:15-21; Marko 6:56; Luka 7:11-17) Ebisomerine Yezu akagijira, byayerekine n’obwalagale oku Nnâmahanga wamurhumaga. Na kandi byayerekine oku Yehova agwerhe obuhashe bw’okurhuyukiza amazibu girhu goshi.
3. Bici akalamo ka Yezu kakarhuyigiriza?
Yezu arhumikire Yehova omu ngasi kanga k’akalamo kage. Ajira ngasi kantu koshi Ishe al’imubwizire oku ajire. (Osome Yowane 8:29.) Ajijire ntyo n’obwishwekerezi kuhika okufâ ciru akaba bantu banji bakagimuhagalika. Akalamo kage kayerekine n’obwalagale oku mwene muntu anahashikolera Nnâmahanga ciru akaba ali omu mazibu madârhi. Yezu arhulekire ‘olwiganyo mpu rhushimbe enshando zage.’—1 Petro 2:21.
HUMBIRIRA LY’OHUGÛKWA
Olole gurhi Yezu akagiyigiriza abantu omwanzi mwinja n’oku akagijira ebisomerine.
4. Yezu ayigirizize abantu omwanzi mwinja
Yezu akagilambagira ebilometre n’ebilometre omu mabarabara galimo akatulo ly’ajiyigiriza bantu banji omwanzi mwinja. Osome Luka 8:1, na buzinda oganirire aga madoso:
-
K’abantu bakagiyish’iyumvirhiza Yezu bone akagiyigiriza?
-
Bici Yezu akagijira ly’abona abantu ayigiriza?
Nnâmahanga ali amaleba oku Masiya anayigirize abantu omwanzi mwinja. Osome Izaya 61:1, 2, na buzinda oganirire aga madoso:
-
Gurhi Yezu ahikirizize obo bulebi?
-
K’orhanyize oku ene nalyo abantu bacigwerhe obulagirire bw’okuyumva omwanzi mwinja?
5. Yezu ayigirizize ebintu by’obulagirire
Ahanyuma n’okuyigiriza omwanzi mwinja g’Obwami, Yezu akagiyigiriza abantu ebintu by’obulagirire byakabarhabala. Rhulole bintu biguma na biguma ayigirizagya abantu omu mahubiri ajirâga oku ntôndo. Osome Mateyo 6:14, 34 na 7:12, na buzinda oganirire aga madoso:
-
Mahano gahi Yezu ahânyire gali mw’ago mandiko?
-
K’orhanyize oku ago mahano gaciri ga bulagirire kuhika ene?
6. Yezu ajijire ebisomerine
Yehova ahîre Yezu obuhashe bw’okujira bisomerine binji. Ly’obona lwiganyo luguma lw’ebisomerine ajijire, osome Marko 5:25-34 erhi olole EVIDEO. Buzinda oganirire amadoso gakulikire.
-
Nk’oku obwine mw’eyo video, bici oyo mukazi aliyemire n’obwalagale?
-
Bici oshagalukire bwenene mw’eco cisomerine?
Osome Yowane 5:36, na buzinda oganirire er’idoso:
-
Bici ebisomerine Yezu akagijira ‘byahamirizize’ n’obwalagale kuli ye?
K’omanyire?
Emyanzi minji eyerekire akalamo ka Yezu eri omu bitabu bini by’Ebibliya bihamagalwa Injili, kw’okuderha Mateyo, Marko, Luka, na Yowane. Ngasi owayandikaga e Injili ayandisire myanzi milebe, owundi wayiyandikaga arhaganiriraga. N’oko kunarhume erhi rhusoma e Injili zoshi rhunahugûkwe bwinja-bwinja akalamo ka Yezu.
-
MATEYO
yewarhangig’iyandika e Injili yage. Esegize enyigirizo za Yezu, ci bwenene ebi Yezu ayigirizize okubiyerekire Obwami bwa Nnâmahanga.
-
MARKO
ayandisire e Injili nyofi bwenene kulusha ababo. Cikone ebamo myanzi minji y’okuhuma oku murhima.
-
LUKA
asegize bwenene isala, n’oku Yezu akag’ijirira abakazi.
-
YOWANE
aganirire emyanzi Yezu akagiganira haguma n’abîra bage ba hofi-hofi n’abandi bantu. N’oko kurhurhabire okuhugûkwa Yezu ali muntu wa gurhi.
HALI ABANTU BADERHA NTYA: “Yezu âli muntu mwinja kone nta kundi kulusha oko.”
-
Gurhi nawe orhanya?
KWA BOFOFI
Yezu ayigirizize Obwami bwa Nnâmahanga, ajira ebisomerine, anarhumikira Yehova omu ngasi kantu.
Okucikengeza
-
Omukolo gw’obulagirire Yezu akagijira amango ali hanw’igulu gwali guhi?
-
Bici ebisomerine Yezu ajirâga biyerekine?
-
Bintu bihi bya bulagirire Yezu ayigirizize?
OCIYIGIRIZE KWA BULÎRI
Mwanzi guhi Yezu akag’iganirira kanji-kanji?
Olole bulya gurhi rhwakayemera oku kobinali Yezu anajijire ebisomerine.
“Miujiza ya Yesu Inaweza Kukufundisha Nini?” (Ilabiro ly’Akalalizi, ly’omu nsiku 15/7/2004)
Olole gurhi akalamo ka mulume muguma kashanjire amango ayigaga kunganaci Yezu akagishibirira abandi.
“Nilikuwa Mwenye Kujifikiria Sana Katika Maisha” (Ilabiro ly’Akalalizi, ly’omu lusiku 1/10/2014)
Olole gurhi emikolo Yezu ajijire ekulikirine nk’oku yanajiragwa.
“Matukio Makubwa ya Maisha ya Yesu Katika Dunia” (Biblia—Tafsiri ya Ulimwengu Mupya, Nyongeza A7)
a Omw’isomo lya 31-33 rhwayishiganirira kwa bulîri myanzi minji lugenda Obwami bwa Nnâmahanga.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
