ISOMO LYA 20
Gurhi Ecigamba Ciba Cipanzirwe
Yehova arhaba Nnâmahanga wa kavulindi. (1 Abakorinti 14:33) Co cirhumire abantu bage bashinganine bapangwe bwinja-bwinja. Gurhi ecigamba c’Ecikristu ciba cipange? Gurhi nirhu rhwakajira ly’omu cigamba murhabaga akavulindi?
1. Ndi oba cirhwe c’ecigamba?
“Kristu ye cirhwe c’ecigamba.” (Abefezi 5:23, NWT) Yezu ali empingu cikone ye oli walongoza omukolo gw’abantu ba Nnâmahanga omw’igulu lyoshi. Yezu ahizireho “mushizi mwirhonzi na mwikubagirwa” k’okuderha cigusho cisungunu c’abagula bakuzire kiroho cihamagalwa Mbaraza Eri Yalongoza. (Osome Mateyo 24:45-47, NWT.) Omu myaka igana mirhanzi entumwa n’abagula b’e Yeruzalemu bo bakagiha ebigamba obulongozi, ko n’oko Embaraza Eri Yalongoza enahe ebigamba by’omw’igulu lyoshi obulongozi. (Ebijiro by’Entumwa 15:2) Cikone, abagula b’omu Mbaraza Eri Yalongoza arhali bo baba birongozi b’ikubuliro lirhu. Banalonze obulongozi bwa Yehova n’Akanwa kage lyo bamanya ebi alonzize bajire banaba babidu okukulikira obulongozi bwa Yezu.
2. Abagula bo bandi na mukolo muci bajira?
Abagula baba balume Bakristu bakuzire kiroho bayigiriza abantu ba Yehova omu kukolesa Amandiko n’okubayabula omu kubarhabala n’okubaha omurhima. Barhahâbwa mushahara kw’ogo mukolo bahikiriza. Banagujire “nk’oku Nyamuzinda alonzize, arhali omu kulonza obunguke bubi, ci n’omurhima nkana.” (1 Petro 5:1, 2) Abarhabazi b’abagula banarhabale abagula kuli mikolo milebe, n’erhi hagera nsiku banahikirize ebihûnyirwe na buzinda nabo banaba bagula.
Embaraza Eri Yalongoza enacishoge bagula baguma na baguma lyo baba bangalizi b’omuzunguko. Banalambagirire ebigamba lyo baha bene wirhu na bali birhu obulongozi n’okubaha omurhima. Banahireho abagula n’abarhabazi b’abagula bahikirizize ebi Amandiko gabahûnyire.—1 Timoteyo 3:1-10, 12; Tito 1:5-9.
3. Bici ngasi Muhamirizi wa Yehova akajira?
Bene wirhu na bali birhu b’omu cigamba boshi ‘banakuze izino lya Nyamuzinda [Yehova, NWT]’ omu kuhâna amashuzo, okujira ebipindi, ehotuba, eonyesho, n’okuyimba omu mango g’entimanano y’ecigamba. Na kandi banakuze izino lya Yehova omu kuhubiri nk’oku bakanahasha.—Osome Ennanga 148:12, 13.
HUMBIRIRA LY’OHUGÛKWA
Ociyigirize ly’ohugûkwa Yezu ali cirongozi wa gurhi, gurhi abagula bacihangana okuyiga olwiganyo lwage, na gurhi rhwakarhumikira Yezu n’abagula.
4. Yezu aba cirogonzi mwinja
Yezu arhuhîre omulali gushagalwire bwenene. Osome Mateyo 11:28-30, na buzinda oganirire er’idoso:
-
Yezu aba cirongozi wa gurhi na gurhi aba alonzize rhukaciyumva okubiyerekire obulongozi bwage?
Gurhi abagula bayigamwo olwiganyo lwa Yezu? Olole EVIDEO..
Ebibliya eyerekine gurhi abagula bashinganine bahikirize omukolo gwabo.
Osome Izaya 32:2 na 1 Petro 5:1-3, na buzinda oganirire aga madoso:
-
Gurhi ociyumvirhe okumanya oku abagula banayige olwiganyo lwa Yezu l’okurhabala abandi baciyumve bwinja?
-
Omu zindi njira zihi nguma na nguma abagula bayigamwo olwiganyo lwa Yezu?
5. Abagula banayigirize kugerera olwiganyo lwabo
Gurhi Yezu aba alonzize abagula bakabona omukolo gwabo? Olole EVIDEO.
Yezu anahirireho abagula olwiganyo. Osome Mateyo 23:8-12, na buzinda oganirire er’idoso:
-
Bici bikusimisize okubiyerekire olubero luhali egarhi k’amakanuni gali omu Bibliya gayerekire abagula n’ebi wabwine egarhi k’abakulu b’amadîni?
-
Abagula banacihangane okuba n’ehali nyinja y’ekiroho haguma na Yehova bananarhabale omulala gwabo nago gujire ntyo
-
Abagula banashibirire ngasi muntu w’omu cigamba
-
Abagula banaje omu mahubiri ngasi mugobe
-
Abagula banayigirize omu cigamba. Na kandi banarhabale oku mikolo y’okucesa Enyumpa y’Entimanano n’eyindi mikolo
6. Kuba kwinja okurhumikira abagula
Ebibliya erhuyeresire ecirhuma rhurhumikira abagula. Osome Abahabraniya 13:17, na buzinda oganirire aga madoso:
-
Bulya gurhi Ebibliya edesire oku rhushinganine rhube babidu okurhumikira abali barhulongoza? Bulya gurhi neci erhi bulya gurhi nanga?
Osome Luka 16:10, na buzinda oganirire er’idoso:
-
Bulya gurhi kuli kwa bulagirire okurhumikira abagula ciru n’omu bintu bibonekine nka birhali bya bulagirire bwenene?
HALI ABANTU BADERHA NTYA: “Kurhali kwa bulagirire okuba omw’ikubuliro lilebe l’idîni.”
-
Bunguke buhi orhanyize wakaba nabo erhi wakakaharamiza Nnâmahanga omu cigamba?
KWA BOFOFI
Yezu ye cirhwe c’ecigamba. Rhunashagalukire okurhumikira abagula bulya banakarhuha omurhima bananarhuyigirize kugerera olwiganyo lwabo.
Okucikengeza
-
Ndi oba cirhwe c’ecigamba?
-
Gurhi abagula barhabalamwo ecigamba?
-
Bici ngasi Muhamirizi wa Yehova ashinganine ajire?
OCIYIGIRIZE KWA BULÎRI
Olole ebintu biyerekine n’obwalagale oku ene, Embaraza Eri Yalongoza n’abandi bagula banashibirire ababo Bakristu.
Okuha Bene Wirhu Omurhima omu Mango Omukolo Gwirhu Guhanzibwe (4:22)
Ociyigirize binji okubiyerekire omukolo gw’abangalizi b’omuzunguko.
Akalamo k’Omwangalizi w’Omuzunguko omu Maeneo Gaba Kuli n’Evile (4:51)
Olole emikolo y’obulagirire abakazi bajira omu cigamba.
Olole gurhi abagula bajira okwabo koshi lyo baha ababo Bakristu omurhima.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
