ISOMO LYA 21
Gurhi Omwanzi Mwinja Guli Gwayalizibwamwo?
Hano hofi-hofi Yehova akolesa Obwami bwage ly’ayusa amazibu girhu goshi. Ogo guli mwanzi mwinja bwenene, rhurhakaguberana rhwene. Yezu al’ilonzize entumwa zage zibwire abantu boshi ogo mwanzi! (Mateyo 28:19, 20) Gurhi Abahamirizi ba Yehova bajira lyo barhumikira er’irhegeko Yezu ahânaga?
1. Gurhi olwandiko lwa Mateyo 24:14 luli lwahikiriramwo ene?
Yezu ali erhi alebire ntya: “Ogu mwanzi mwinja gw’Obwami gwayalizibwa omw’igulu lyoshi.” (Mateyo 24:14, NWT) Abahamirizi ba Yehova banashagalukire bwenene okujira k’ogo mukolo gw’obulagirire. Rhuli rhwayaliza omwanzi mwinja omw’igulu lyoshi, omu ndimi 1000 na kulusha! Biba bihunyîre bushiru bunji na mipango minji ly’ogo mukolo guhashijirwa. Na buzira burhabale bwa Yehova rhurhakahash’igujira.
2. Gurhi rhujira lyo rhuhash’ihubiri abantu boshi?
Rhunahubiri omwanzi mwinja ngasi hantu abantu bakabonekana. Ak’Abakristu b’omu myaka igana mirhanzi, nirhu rhunayalize ogo mwanzi “nyumpa” oku yindi. (Ebijiro by’Entumwa 5:42) Okujira ntyo kunarhurhabale rhuhubiri bantu banji ngasi mwaka. Na kandi bulya abantu barhalugibonekana aha mwababwe, rhunajibahubiri aha bakabonekana nk’ebwa cambu, omw’ibarabara n’oku parkingi. Ngasi mango rhunacihangane okulonza obulyo rhwakabwiramwo abandi okubiyerekire Yehova n’emihigo yage.
3. Ndi oshinganine ajire omukolo gw’okuyaliza omwanzi mwinja?
Abakristu boshi b’okuli bagwerhe omukolo g’okubwira abandi omwanzi mwinja. Rhunarhôle kwa buzibu-zibu ogo mukolo gwirhu. Rhunacihangane okuhubiri nk’oku rhwakanahasha kushimbana n’akanga rhulimo, bulya rhumanyire oku ogo mwanzi gwanaciza obuzine bw’abantu. (Osome 1 Timoteyo 4:16.) Rhurhahâbwa mushahara mpu lyo rhujira ogo mukolo bulya Ebibliya eba edesire ntya: “Mwahâbirwe busha, ninyu muhâne busha.” (Mateyo 10:7, 8) Arhali ngasi muntu oyemera ogo mwanzi. Cikone, rhunagendekere rhwahubiri bulya okuhubiri ciba cigabi c’enterekêro yirhu rhuha Nnâmahanga, na kandi okujira ntyo kunamushagaluse.
HUMBIRIRA LY’OHUGÛKWA
Ociyigirize binji okubiyerekire obushiru Abahamirizi ba Yehova bajira lyo bayaliza omwanzi mwinja omw’igulu lyoshi, na kandi olole gurhi Yehova ali arhurhabala.
Rhuli rhwahubiri omw’igulu lyoshi: (A) Costa Rica, (B) États-Unis, (C) Bénin, (D) Thaïlande, (E) Yap, (F) Suède
4. Rhunacihangane okuhubiri abantu boshi
Abahamirizi ba Yehova banajire okwabo koshi lyo bahubiri abantu boshi omwanzi mwinja ngasi hantu. Olole EVIDEO, na buzinda oganirire idoso likulikire.
-
Bici bikusomezize okubiyerekire obushiru bw’Abahamirizi ba Yehova b’okuyaliza omwanzi mwinja?
Osome Mateyo 22:39 n’Abaroma 10:13-15, na buzinda oganirire aga madoso:
-
Gurhi omukolo gwirhu gw’amahubiri guyerekanamwo oku rhuba rhuzigire abalungu birhu?
-
Gurhi Yehova abona bala bakahubiri omwanzi mwinja?—Olole omulongo gwa 15.
5. Rhunakakola haguma na Nnâmahanga
Bintu binji rhwacibwinire biyerekine oku Yehova analongoze omukolo gwirhu gw’amahubiri. Kwa lwiganyo, omu cihugo c’e Nouvelle-Zélande, mwene wirhu muguma ohamagalwa Paul, arhimanana na mukazi muguma omu mahubiri ga nyumpa oku yindi enyuma z’emidi. Sezi oyo mukazi ali amashenga Nnâmahanga omu kukolesa izino lya Yehova, amuhûna oku amurhabale muntu muguma amulambagirire. Paul adesire ntya: “Erhi hagerha nsa isharhu, nahika aha mw’oyo mukazi.”
Osome 1 Abakorinti 3:9, na buzinda oganirire er’idoso:
-
Gurhi ebyo byabwinwe omu Nouvelle-Zélande biyerekinemwo oku Yehova ali alongoza omukolo gw’amahubiri?
Osome Ebijiro by’Entumwa 1:8, na buzinda oganirire er’idoso:
-
Bulya gurhi rhulagirire oku burhabale bwa Yehova lyo rhuhikiriza omukolo gwirhu gw’amahubiri?
K’omanyire?
Oku ntimanano yirhu y’omu garhi k’omugobe, rhunakakomerezibwa oku rhwakahubiri. Akaba okola ojire kw’eyo ntimanano, gurhi wabwine enyigirizo rhwahâbagwa?
6. Rhunarhumikire irhegeko lya Nnâmahanga ly’okuyaliza
Omu myaka igana mirhanzi hali bantu baguma na baguma bakagihanza entumwa za Yezu okuhubiri. Cikone, abanafunzi bajira okwabo koshi lyo bahalira ehaki yabo y’okuhubiri omwanzi mwinja omu ‘kujira guyemerwe n’irhegeko.’ (Abafilipi 1:7, NWT) N’ene nalyo ntyo kw’Abahamirizi ba Yehova bajira. a
Osome Ebijiro by’Entumwa 5:27-42, na buzinda oganirire er’idoso:
-
Bulya gurhi rhurhaleke okuhubiri?—Olole omulongo gwa 29, 38, n’ogwa 39.
HALI OMUNTU WAKADOSA NTYA: “Bulya gurhi Abahamirizi ba Yehova bahubiri nyumpa oku yindi?”
-
Gurhi wakamushuza?
KWA BOFOFI
Yezu abwizire abanafunzi bage oku bahubiri omwanzi mwinja omu mashanja goshi. Yehova anakarhabala abantu bage lyo bahashijira ogo mukolo.
Okucikengeza
-
Gurhi omwanzi mwinja guli gwayalizibwa omw’igulu lyoshi ene?
-
Gurhi omukolo gwirhu gw’amahubiri guyerekanamwo oku rhuba rhuzigire abalungu birhu?
-
K’orhanyize oku omukolo g’okuhubiri gwanakulerhera obushagaluke? Bulya gurhi oshuzize ntyo?
OCIYIGIRIZE KWA BULÎRI
Olole gurhi Abahamirizi ba Yehova bahubiri abantu omu vile nnenene.
Okuhubiri aha Nafasi y’Abantu Banji omu Vile Nnenene y’e Paris (5:11)
Gurhi Abahamirizi ba Yehova bajijire lyo bahubiri ababunga?
Ociyumvize nawe wene gurhi muntu mulebe ahugûla gurhi okukolesa akalamo kage koshi omu mukolo gw’amahubiri kwamudwirhire obunguke
Olole manja nguma na nguma rhwamakahimira oku rhugombe rhukulu rhw’okutwa emanja, zamakarhabala omukolo gw’okuhubiri gugendekere.
“Wahubiri wa Ufalme Wanajitetea Kwenye Tribinali” (Ufalme wa Mungu Unatawala!, sura ya 13)
a Nnâmahanga ye orhubwizire oku rhuhubiri omwanzi mwinja. Co cirhumire rhuli Bahamirizi ba Yehova rhurhalagiriri okuhâbwa oluhusa n’abakulu b’ecihugo mpu lyo rhuhubiri.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
