ISOMO LYA 24
Bici Ebibliya Edesire Lugenda Bamalahika?
Yehova alonzize rhumanye omulala gwage gw’empingu. Ogo mulala guhiziremo bamalahika, bo bahamagalwa “bene Nyamuzinda.” (Ayubu 38:7) Bici Ebibliya edesire lugenda bamalahika? Bici bamalahika bajirira bene bantu? Ka bamalahika boshi baba omu mulala gwa Nnâmahanga?
1. Bamalahika bo bandi?
Yehova alemaga bamalahika embere aleme igulu. Bamalahika biba biremwa birhabonekana bilama omu mpingu, bajira omubiri gw’ekiroho nk’ogwa Nnâmahanga. (Abahabraniya 1:14) Bamalahika baba miliyoni minji, na ngasi muguma aba lubero n’owundi. (Amafulûlo 5:11) Bamalahika “banakarhumikira akanwa [ka Yehova] omu kuyumva izu lyage.” (Ennanga 103:20, NWT) Omu mango ga mîra Yehova akagirhuma bamalahika lyo babwira abantu mwanzi mulebe, erhi lyo barhabala n’okucungula abantu bage. Ene bamalahika bali balongoza Abakristu lyo babona abantu balonzize okuyiga okubiyerekire Nnâmahanga.
2. Shetani n’abazimu bage bo bandi?
Hali bamalahika bagomeraga Yehova. Malahika murhanzi wagomaga ye “Shetani, olyala ohabula rubanda [igulu].” (Amafulûlo 12:9) Shetani al’ilonzize arhambule abandi, n’oko kwarhuma ashumya ababusi birhu barhanzi n’abandi bamalahika bacilunga mw’obo bugoma bwage. Abo bamalahika bagoma bo bahamagalwa bazimu. Yehova abalibirhako abakula empingu abajugucira hanw’igulu, na hano hofi-hofi basherezibwa.—Osome Amafulûlo 12:9, 12.
3. Gurhi Shetani n’abazimu balonza okurhurhebamwo?
Shetani n’abazimu banakolese obukurungu lyo barheba abantu, banashumye abantu bakaganira nabo. Kwa lwiganyo, bantu baguma na baguma banasingirize enyenyezi, okudosa emyanzi emw’abalaguzi, okujira eby’amaji, n’okuja oku bashonga (bafumu). Abandi banalonze amafumu g’okubabuka galimw’eby’obukurungu. Na kandi, Shetani n’abazimu banalonze okuyemeza abantu oku byanahashikana okuganira n’abafîre. Cikone, Yehova arhuhanizize ntya: “Murhahîra mukagend’idôsa ihano emwa abarherekêra abazimu, nisi erhi emw’abashonga. Mumanye mwankanagend’ibadôsa ihano.” (Bene-Levi 19:31) Arhuhanizize ntyo ly’arhulanga kuli Shetani n’abazimu bage. Baba bashombanyi ba Nnâmahanga, bananalonze okurhujira kubi.
HUMBIRIRA LY’OHUGÛKWA
Oyige binji okubiyerekire ebintu binja bamalahika bajira, omurhego gw’okuganira n’abazimu n’ebi rhushinganine rhujire lyo Shetani n’abazimu bage barhagirhurheba.
4. Bamalahika banarhabale abantu bayige binji kuli Yehova
Bamalahika barhalambagirira abantu mpu lyo bagend’ibahubiri. Cikone, banarhabale abakozi ba Nnâmahanga babone abantu balonzize okuyiga enyanya za Nnâmahanga. Osome Amafulûlo 14:6, 7, na buzinda oganirire aga madoso:
-
Bulya gurhi rhulagirire oku burhabale bwa bamalahika omu mukolo gwirhu gw’amahubiri?
-
K’ohîrwe omurhima okuyumva oku bamalahika banakulongoza ly’obona abantu balagirire okuyumva omwanzi gw’Ebibliya? Bulya gurhi?
5. Oyake eby’obukurungu
Shetani n’abazimu baba bashombanyi ba Yehova. Banaba bashombanyi birhu. Osome Luka 9:38-42, na buzinda oganirire er’idoso:
-
Gurhi abazimu bajirira bene bantu?
Rhurhalonza okuyegereza abazimu omu kalamo kirhu. Osome Olushika 18:10-12, na buzinda oganirire aga madoso:
-
Omu njira zihi abazimu balonza okurhuganiza n’okurhurheba? Nkomêdu zihi z’okuganiza abazimu abantu balugijira ah’olama?
-
Ka nawe obwine oku kuli kwinja okubona Yehova arhuhanzize okujira eby’obukurungu? Bulya gurhi?
Olole EVIDEO, na buzinda oganirire aga madoso gakulire.
-
K’orhanyize oku akantu Palesa akagiyambisa omwana wage kagwerhe obubi boshi-boshi? Bulya gurhi orhanyize ntyo?
-
Bici Palesa alishinganine ajire ly’abazimu barhacikag’imuyegera?
Ngasi mango Abakristu b’okuli bahagalika abazimu. Osome Ebijiro by’Entumwa 19:19 na 1 Abakorinti 10:21, na buzinda oganirire er’idoso:
-
Bulya gurhi kuli kwa bulagirire bwenene oshereze ngasi kantu ogwerhe kagwerhe olushangi n’eby’abazimu?
6. Wanahima Shetani n’abazimu bage
Abazimu baba barhegesirwe na Shetani. Cikone bamalahika bishwekerezi banalongozibwe na malahika mukulu ohamagalwa Mikayeli, k’okuderha Yezu. Misi minganaci Mikayeli ajira? Osome Amafulûlo 12:7-9, na buzinda oganirire aga madoso:
-
Ndi ojira emisi minji, ka Mikayeli na bamalahika bage erhi Shetani n’abazimu bage?
-
K’orhanyize oku abanafunzi ba Yezu bashinganine bayobohe Shetani n’abazimu bage?
Wanahima Shetani n’abazimu bage. Osome Yakobo 4:7, na buzinda oganirire er’idoso:
-
Gurhi wakajira ly’ocilanga kuli Shetani n’abazimu bage?
HALI ABANTU BADERHA NTYA: “Nta bubi boshi-boshi buhali erhi omuntu akasharha emicezo erhi kulola efilime zihiziremo eby’obukurungu. Okujira ntyo kuli kucishagalula kone.”
-
Bulya gurhi entanya za ntyo ziri mbi bwenene?
KWA BOFOFI
Bamalahika bishwekerezi banarhurhabale. Shetani n’abazimu baba bashombanyi ba Yehova, bananakolese eby’obukurungu lyo barheba abantu.
Okucikengeza
-
Gurhi bamalahika ba Yehova barhabala abantu lyo bayiga lugenda Yehova?
-
Shetani n’abazimu bage bo bandi?
-
Bulya gurhi olonzize okuciyasa eby’obukurungu?
OCIYIGIRIZE KWA BULÎRI
Olole ebintu biyerekine n’obwalagale oku Yezu ye malahika mukulu, Mikayeli.
Olole ebiyerekine oku Ibilisi karhaba kanuni kone erhi borhere bubi buba omu mirhima yirhu.
Olole ebi mukazi muguma ajiraga ly’aleka okuba n’olushangi haguma n’abazimu.
“Alipata Kusudi mu Maisha” (Ilabiro ly’Akalalizi, ly’omu lusiku 1/7/1993)
Olole gurhi Shetani akolesamwo eby’obukurungu ly’arheba abantu.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
