ISOMO LYA 30
Abazigirwa Bawe Bafîre Banacilame!
Olufû lunakagayisa bwenene. Co cirhumire Ebibliya ehamagire olufû mushombanyi. (1 Abakorinti 15:26) Omw’isomo lya 27, wayizire oku Nnâmahanga ayishiyusa olufû. Cikone, gurhi byanabe lugenda abantu bafîre? Mw’er’isomo wayiga akandi kantu kinja Yehova alaganyize: Ayishifûla emiliyoni y’abantu bafîre lyo balama ensiku n’amango. Ka kobinali byanabe ntyo? Ka banafûke balame empingu erhi balame hanw’igulu?
1. Bici Yehova alonzize okujirira abazigirwa birhu bafîre?
Yehova agwerhe irala ly’okufûla abafîre. Mulume muguma waligwerhe obuyemere ohamagalwa Ayubu aderha oku Nnâmahanga arhakamuyibagira amango afâ. Abwira Nnâmahanga ntya: “Wanahamagaza [erhi nandi omu Nshinda] nâni nanashuza.”—Osome Ayubu 14:13-15.
2. Gurhi rhumanyiremwo oku abafîre banacifûka?
Amango Yezu ali hanw’igulu, Nnâmahanga amuha obuhashe bw’okufûla abafîre. Afûla mwana-nyere muguma wa myaka 12 na mugala w’omukana. (Marko 5:41, 42; Luka 7:12-15) Enyuma z’aho omwîra wage Lazaro afâ, cikone Yezu amufûla ciru ankaba alikola agwerhe nsiku ini afîre. Yezu ashenga Nnâmahanga, buzinda aja aha nshinda ayakuza ntya: “Lazaro huluka, ja eno mbuga!” N’oyo “nyakufa ahuluka” erhi anakola azine! (Yowane 11:43, 44) Orhanye kunganaci abantu b’omulala n’abîra ba Lazaro bacishinzire!
3. Bulangalire buci rhugwerhe lugenda abazigirwa birhu bafîre?
Ebibliya elaganyize ntya: “Abafîre bafûke.” (Ebijiro by’Entumwa 24:15) Balya bakagifûlwa na Yezu mango mîra barhajaga empingu. (Yowane 3:13) Bakagishagaluka okubona Yezu amabafûla bacibilama hanw’igulu. Ko n’oko Yezu anafûle emiliyoni y’abantu lyo balama omw’igulu paradizo. Adesire oku “abali omu nshinda [y’okukengerwa] boshi” banafûke. Ciru na bala nkaba barhacikengerwa banafûke erhi akaba Nnâmahanga abakengire.—Yowane 5:28, 29.
HUMBIRIRA LY’OHUGÛKWA
Olole ebyakakuyemeza biri omu Bibliya biyerekine oku abafîre banacifûka n’oku kobinali banafûke. Oyige gurhi obufûke bwakakuha oburhulirize n’obulangalire.
4. Yezu ayerekine oku anahash’ifûla abafîre
Oyige binji lugenda oku Yezu ajiriraga omwîra wage Lazaro. Osome Yowane 11:14, 38-44, na buzinda oganirire aga madoso:
-
Bici biyerekine oku kobinali Lazaro ali amafâ?—Olole omulongo gwa 39.
-
Erhi akaba Lazaro ali amaja empingu, k’orhanyize oku Yezu akamufûlire hanw’igulu?
5. Bantu banji banafûke!
Osome Ennanga 37:29, na buzinda oganirire er’idoso:
-
Ngahi emiliyare y’abantu banafûke banalame?
Yezu anafûle n’abantu banji barhakoleraga Yehova. Osome Ebijiro by’Entumwa 24:15, na buzinda oganirire er’idoso:
-
Ndi wakasima okubona amango gw’obufûke?
Orhanye kuli oku: Yezu anafûla muntu mulebe ofîre nka kula ishe w’omwana akamutula omw’îro
6. Obufûke bwanakurhuliriza n’okukuha obulangalire
Omwanzi guganirire obufûke bwa mwali wa Yayiro gwarhulirizize bantu banji bafîrirwe. Osome ogo mwanzi g’okuli omu Luka 8:40-42, 49-56.
Embere Yezu afûle mwali wa Yayiro, abwira ishe w’oyo munyere ntya: ‘Orhayobohaga; oyemere kwonene.’ (Olole omulongo gwa 50.) Gurhi obulangalire bw’obufûke bwakakurhuliriza . . .
-
amango wamafîrwa?
-
amango oli omu mazibu g’okufâ?
Olole EVIDEO, na buzinda oganirire er’idoso likulikire.
-
Gurhi obulangalire bw’obufûke bwarhulirizize n’okuha omurhima ababusi ba Phelicity?
HALI ABANTU BADERHA NTYA: “Okuyemera oku abafîre banafûke biri bilorho.”
-
Gurhi nawe orhanyize?
-
Lwandiko luhi wakakolesa ly’oyereka muntu mulebe oku hanabe obufûke?
KWA BOFOFI
Ebibliya elaganyize oku emiliyare y’abantu bafîre banafûke. Yehova alonzize bacib’ilama, ahîre Yezu obuhashe bw’okuyishibafûla.
Okucikengeza
-
Gurhi Yehova na Yezu baciyumva okubiyerekire okufûla abafîre?
-
Emiliyare y’abantu bayishifûka, ngahi banalame, k’empingu nisi hanw’igulu? Bulya gurhi odesire ntyo?
-
Bici bikuyemezize oku abantu b’omulala n’abîra bawe bafîre banacibilama?
OCIYIGIRIZE KWA BULÎRI
Olole bintu biguma biguma byakakurhabala amango wamafîrwa.
“Musaada kwa Wale Wenye Wamefiwa na Mupendwa Wao” (Amuka!, No. 3 2018)
Ka kobinali amakanuni g’Ebibliya ganarhabala omuntu ogayire bwenene enyanya z’okufîrwa?
Gurhi abana bakalwisa okufîrwa n’omuntu w’omulala gwabo erhi mwîra wabo?
Ka hali abantu bayishifûlwa lyo bajilama empingu? Bandi barhakafûka?
“Obufûke byo Bici?” (Mwanzi guli oku jw.org)
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
