ISOMO LYA 50
Gurhi Omulala Gwawe Gwakabamwo Guba n’Omwishingo?—Cigabi ca 2
Abana eba ngalo kurhenga emwa Yehova. Na Yehova aba alonzize ababusi babashibirire bwinja. Yehova ahîre ababusi amahano gakabarhabala lyo bajira ntyo. Kandi amahano Yehova ahânyire ganarhabala abana nabo balerhe obushagaluke omu mulala.
1. Mahano gahi Yehova ahîre ababusi?
Yehova alonzize ababusi bazigire abana babo banaciseze okukageza akasanzi kanji haguma nabo. Na kandi alonzize ababusi balange abana babo bakanakolesa amakanuni g’Ebibliya lyo babayigiriza. (Emigani 1:8) Abwizire b’ishe w’omulala ntya: “Mugendekere mwabalera [abana binyu] omu . . . burhonde bwa Yehova.” (Osome Abefezi 6:4, NWT.) Yehova anashagaluke bwenene erhi ababusi bashimba obulongozi bwage lyo balera abana babo n’erhi balahira okuha muntu mulebe omukolo gw’okubalerera abana babo.
2. Mahano gahi Yehova ahîre abana?
Yehova ahanwire abana ntya: “Mukayumva [mukarhumikira] ababusi binyu.” (Osome Abakolosi 3:20.) Erhi abana bayumva n’okukenga ababusi babo, Yehova anashagaluke n’ababusi babo nabo banashagaluke. (Emigani 23:22-25) Amango Yezu aciri mwana ayerekana olwiganyo lwinja. Ciru ankaba ali mwimana akagiyumva n’okurhumikira ababusi bage. N’olo luli lwiganyo lwinja alekire abana.—Luka 2:51, 52.
3. Gurhi mwakajira ly’omulala gwinyu guba n’obwîra bwa hofi-hofi haguma na Yehova?
Akaba oli mubusi, buzira karhinda wanasima omwana wawe azigire Yehova bwenene nk’oku nawe oba omuzigire. Gurhi wakajira ly’omwana wawe ahikira aho? Omu kujira nk’okula Ebibliya edesire: “[Ebinwa bya Yehova] obibwirize bagala bawe, obaganîrirebyo nk’otamire omu mwawe erhi amango odwirhe walambagira omu njira.” (Olushika 6:7) “Okubwiriza,” k’okuderha kuyigiriza kantu kalebe omu kukagalukira-galukira. Nkaba omanyire oku kanji-kanji binahûne okugalukira-galukira kantu kalebe ly’omwana wawe akakengera. Olo lwandiko luyerekine oku oshinganine akaganirira omwana wawe lugenda Yehova ngasi mango. Kuli kwa bulagirire ocihirireho akasanzi k’okuharamya Yehova omu mulala ngasi mugobe. Akaba murhagwerhi bana, mwanayunguka n’omupango gw’okukasoma Ebibliya haguma ngasi mugobe.
HUMBIRIRA LY’OHUGÛKWA
Olole amahano gakarhabala abantu boshi omu mulala lyo ngasi muntu aba n’obushagaluke n’omurhula.
4. Oyigirize abana bawe omu njira y’obuzigire
Okuyigiriza abana kwanaba nka kuzibu. Gurhi Ebibliya yakakurhabala? Osome Yakobo 1:19, 20, na buzinda oganirire aga madoso:
-
Gurhi ababusi bakayerekanamw’obuzigire amango bali baganira n’abana babo?
-
Bulya gurhi omubusi arhashinganini ahe omwana obuhane amango agayire bwenene? a
5. Olange abana bawe
Ly’olanga abana bawe, kuli kwa bulagirire bwenene okabaganirira okubiyerekire ecijiro c’obuhya. Nkaba wanabona nka kuli kuzibu okujira ntyo. Olole EVIDEO, na buzinda muganirire aga madoso gakulikire.
-
Bulya gurhi babusi baguma baguma bajira amazibu g’okuganirira abana babo okubiyerekire ecijiro c’obuhya?
-
Njira ehi babusi baguma baguma bakolesa lyo bahugûlira abana babo ebiyerekire ecijiro c’obuhya?
Nk’oku Ebibliya yanalebaga, igulu lya Shetani lyagendekera lyaba ligalugalu lusiku oku lundi. Osome 2 Timoteyo 3:1, 13, na buzinda oganirire er’idoso:
-
Bantu baguma baguma baganirirwe omu mulongo gwa 13 banakabaka abana. Muli oko, bulya gurhi kuli kwa bulagirire ababusi bayigirize abana babo ebiyerekire ecijiro c’obuhya n’okubahugûlira gurhi bakacilanga kuli abo bantu?
K’omanyire?
Abahamirizi ba Yehova bacapisize bikolanwa binji byakarhabala ababusi bayigirize abana babo lugenda ecijiro c’obuhya n’okubalanga barhababakaga. Kwa lwiganyo, olole:
-
Uwalinde Watoto Wako (video)
-
“Ufundishe Mutoto Wako Kuhusu Ngono” (Amuka!, No. 5 2016)
6. Okakenga ababusi bawe
Oku abana n’emisole baganiza ababusi babo ko kwakayerekana erhi babakenzire erhi nanga. Olole EVIDEO, na buzinda oganirire aga madoso gakulikire.
-
Bulya gurhi kuli kwa bulagirire omusole gukaganira n’ababusi bago n’obukenge?
-
Gurhi omusole gwakaganira n’ababusi bago n’obukenge?
Osome Emigani 1:8, na buzinda oganirire er’idoso:
-
Gurhi omusole gwakajira erhi ababusi bage bakamuha bulongozi bulebe?
7. Mukaharamya Yehova haguma omu mulala
Emilala y’Abahamirizi ba Yehova enapange akasanzi bakaharamya Yehova boshi haguma omu mulala gwabo ngasi mugobe. Bici mwakakajira omu nterekêro y’omulala? Olole EVIDEO, na buzinda oganirire aga madoso gakulikire.
-
Gurhi omulala gwakajira ly’Enterekêro y’Omulala ekajirwa ngasi mugobe?
-
Gurhi omubusi akajira ly’enterekêro y’omulala erhabala abantu bamo boshi na ngasi muguma ayishagalukire?—Olole enfoto eri oku murhondero gw’er’isomo.
-
Bici byakarhuma waba n’amazibu gw’okuyiga mweshi haguma omu mulala?
Omu mango g’aba Israheli ba mîra, Yehova alibwizire emilala yoshi oku ekaba n’enkomêdu y’okuganirira Amandiko. Osome Olushika 6:6, 7, na buzinda oganirire er’idoso:
-
Gurhi wakakolesa ako kanuni?
Bintu biguma na biguma byakajirwa omu nterekêro y’omulala:
-
Kurheganya entimanano.
-
Kusoma n’okuganirira myanzi milebe omulala gwawe gwakashagalukira.
-
Akaba ogwerhe abana barho, orhôle erhi ocapise mukolo mulebe gw’abana guli oku jw.org.
-
Akaba ogwerhe abana banakola bali misole, oganirire mwanzi mulebe guyerekire emisole y’omushuko guli oku jw.org.
-
Kusharha mwanzi mulebe gw’Ebibliya haguma n’abana bawe.
-
Kulola n’okuganirira video ndebe eri oku jw.org.
BANTU BANJI BANAKADERHA NTYA: “Abana barhakahugûkwa Ebibliya.”
-
Gurhi nawe orhanya?
KWA BOFOFI
Yehova aba alonzize ababusi bazigire abana babo, babayigirize, banabalange. Na kandi aba alonzize abana bakenge n’okurhumikira ababusi babo, anaba alonzize emilala ekajira Enterekêro y’Omulala haguma.
Okucikengeza
-
Gurhi ababusi bakayigiriza n’okulanga abana babo?
-
Gurhi abana bakayerekanamwo oku bakenzire ababusi babo?
-
Okucihiriraho akasanzi k’okukajira enterekêro y’omulala ngasi mugobe kugwerhe bunguke buhi?
OCIYIGIRIZE KWA BULÎRI
Masomo gahi gakarhabala omwana wawe abe muntu mwinja amango akula?
“Somo Sita Zenye Watoto Wanapaswa Kujifunza” (Amuka!, No. 2 2019)
Olole amahano gakarhabala bala bali bashibirira ababusi babo bakola bashosi.
“Bici Ebibliya Edesire Lugenda Okushibirira Ababusi Bakola Bashosi?” (Mwanzi guli oku jw.org)
Olole gurhi mulume muguma orhal’imanyire gurhi akalera omwana wage ahikire aha aba mubusi mwinja.
Olole ebi b’ishe w’omulala bakajira lyo baba n’obwîra bwinja haguma na bagala babo.
a Omu Bibliya, oluderho “buhane” luhugwîre okuyigiriza, okuhâna obulongozi, n’okurhabala omuntu ashanje entanya erhi ngeso zage. Olo luderho lurhahugwîri okuhâna obuhane n’obuminya erhi buzira bwonjo.—Emigani 4:1.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
