Yezu ye Cirhwe erhi Nnawabo w’ecigamba c’Ecikristu. (Abefezi 5:23) Ene, Yezu ali empingu cikone ali akolesa “mushizi mwirhonzi na mwikubagirwa” ly’alongoza abanafunzi bage ba hanw’igulu. (Osome Mateyo 24:45, NWT.) Yezu ye wahîragaho oyo “mushizi” anamuhîre obukulu bw’okurhôla mihigo milebe, ciru akaba ntyo, mushizi mwirhonzi ashinganine agendekere arhumikira Yezu n’okukolera bene wabo Kristu. Oyo mushizi ye ndi? Na gurhi mushizi mwirhonzi arhushibiriramwo?

1. “Mushizi mwirhonzi na mwikubagirwa” ye ndi?

Kurhenga mîra, Yehova anakolese mulume muguma erhi cigusho cisungunu c’abalume ly’alongonza olubaga lwage. (Malakiya 2:7; Abahabraniya 1:1) Enyuma za Yezu okufâ, entumwa n’abandi bagula bali e Yeruzalemu bo bakagilongoza. (Ebijiro by’Entumwa 15:2) Ko n’oko, ene nalyo ecigusho cisungunu c’abagula bo bali balongoza. Eco cikundi yo Mbaraza Eri Yalongoza y’Abahamirizi ba Yehova. Eco cikundi co cirhurheganyiza ebiryo by’ekiroho n’okulongoza omukolo gw’amahubiri. Eco cikundi ye “mushizi mwirhonzi na mwikubagirwa [Yezu] ahîragaho.” (Mateyo 24:45a, NWT) Bene wirhu boshi baba omu Mbaraza Eri Yalongoza baba Bakristu bashîge amavurha, bajira obulangalire bw’okuyishirhambula haguma na Yezu omu mpingu enyuma z’akalamo kabo ka hanw’igulu.

2. Biryo by’ekiroho bihi mushizi mwirhonzi na mwikubagirwa arhurheganyiza?

Yezu adesire oku mushizi mwirhonzi na mwikubagirwa ashinganine ‘agabire [ababo Bakristu] ebiryo omu mango gakwanine.’ (Mateyo 24:45b, NWT) Nka kula ebiryo rhulya binarhurhabale lyo rhuba n’amagala minja, ebiryo by’ekiroho nabyo, k’okuderha enyigirizo rhukula omu Kanwa ka Nnâmahanga, binakarhuha emisi rhulagirireko lyo rhugendekera rhwabêra bishwekerezi kuli Yehova n’okuhikiriza bwinja omukolo Yezu arhuhîre. (1 Timoteyo 4:6) Rhunahâbwe ebyo biryo by’ekiroho kugerera ebitabu, amavideo, entimanano z’ecigamba, ez’omuzunguko, n’ez’eneo. Ebyo byoshi binarhurhabale rhuhugûkwe bwinja obulonza bwa Nnâmahanga n’okuba n’obwîra bwa hofi-hofi haguma naye.

 HUMBIRIRA LY’OHUGÛKWA

3. Abantu ba Yehova bashinganine babe bapange bwinja

Idako ly’obulongozi bwa Yezu, Embaraza Eri Yalongoza eri yapanga omukolo gw’Abahamirizi ba Yehova. Ciru na mango mîra, ntyo ko Yezu akolesagya embaraza eri yalongoza ly’elongoza Abakristu b’omu myaka igana mirhanzi. Olole EVIDEO.

Osome 1 Abakorinti 14:33, 40, na buzinda oganirire er’idoso:

• Gurhi olo lwandiko luyerekinemwo oku Yehova aba alonzize abantu bage babe bapange?

4. Mushizi mwirhonzi na mwikubagirwa anapange omukolo gw’amahubiri

Okuhubiri omwanzi mwinja go mukolo gw’obulagirire Abakristu b’omu myaka igana mirhanzi bakagijira. Osome Ebijiro by’Entumwa 8:14, 25, na buzinda oganirire aga madoso:

• Omu myaka igana mirhanzi bandi bakagilongoza omukolo gw’amahubiri?

• Gurhi Petro na Yowane bajijire erhi bahâbwa obulongozi bwarhengaga emw’ezindi ntumwa?

Okuhubiri gw’omukolo gw’obulagirire gupangwa n’Embaraza Eri Yalongoza. Olole EVIDEO.

 Yezu ayerekine n’obwalagale kunganaci omukolo gw’amahubiri guli gwa bulagirire bwenene. Osome Marko 13:10, na buzinda oganirire aga madoso:

• Bulya gurhi Embaraza Eri Yalongoza ebona oku omukolo gw’amahubiri guli gwa bulagirire bwenene?

• Bulya gurhi rhulagirire kuli “mushizi mwirhonzi na mwikubagirwa” ly’omukolo gw’amahubiri gupangwa bwinja omw’igulu lyoshi?

5. Mushizi mwirhonzi na mwikubagirwa anakarhuha obulongozi

Embaraza Eri Yalongoza enahe Abakristu b’omw’igulu lyoshi obulongozi. Gurhi ehigamwo obulongozi bushinganine yahâna? Olole gurhi embaraza eri yalongoza y’omu myaka igana mirhanzi yakag’ikamanyamwo obulongozi yahâna. Osome Ebijiro by’Entumwa 15:1, 2, na buzinda oganirire aga madoso:

• Kantu kahi kalerhaga akavulindi egarhi k’Abakristu baguma baguma b’omu myaka igana mirhanzi?

• Indi Paolo, Barnaba, n’ezindi ntumwa bahûnyire obulongozi lyobayusa ako kavulindi?

Osome Ebijiro by’Entumwa 15:12-18, 23-29, na buzinda oganirire er’idoso:

• Embere z’okurhôla omuhigo, bici embaraza eri yalongoza y’omu myaka igana mirhanzi yajijire ly’emanya entanya za Nnâmahanga okubiyerekire ako kanga?​—Olole omulongo gwa 12, 15, n’ogwa 28.

Osome Ebijiro by’Entumwa 15:30, 31 na 16:4, 5, na buzinda oganirire aga madoso:

• Gurhi Abakristu b’omu myaka igana mirhanzi bajijire erhi bahâbwa obulongozi bwarhenga oku mbaraza eri yalongoza?

• Gurhi Yehova agishiremwo okurhumikira kwabo?

Osome 2 Timoteyo 3:16 na Yakobo 1:5, na buzinda oganirire er’idoso:

• Ngahi Embaraza Eri Yalongoza y’ene ekula obulongozi embere erhôle mihigo milebe?

 KWA BOFOFI

Embaraza Eri Yalongoza ye “mushizi mwirhonzi na mwikubagirwa” wahiragwaho na Kristu. Enalongoze Abakristu b’omw’igulu lyoshi, n’okubaha ebiryo by’ekiroho.

Okucikengeza

• Indi wahiragaho “mushizi mwirhonzi na mwikubagirwa”?

• Gurhi Embaraza Eri Yalongoza erhushibiriramwo?

• K’oyemire oku Embaraza Eri Yalongoza ye “mushizi mwirhonzi na mwikubagirwa”?