Amango rhuli egarhi k’abirhu bimezi, rhunaciyumve nk’oku Mwami Daudi aciyumvagya, aderha ntya: “Ala nka kwayinjiha, ala nka kwanuna okubêra haguma [omu] cinyabuguma nk’abalondana!” (Ennanga 133:1) Ecinyabuguma cirhu cirhayisha ntya-ntya kone. Ngasi muguma wirhu anarhabaze okugendekeza eco cinyabuguma.

1. Kantu kahi kakushagalusa kabonekana egarhi k’abantu ba Nnâmahanga?

Erhi wakaja oku ntimanano y’ecigamba omu cindi-cindi cihugo, nkaba lulimi lw’eyo lone orhankayumva, cikone omu njira nyinji wanaciyumva nk’emwinyu onali. Bulya gurhi? Bulya omw’igulu lyoshi rhunayige Ebibliya omu kukolesa ebitabu bishushine. Na kandi rhunacihangane okuyerekana obuzigire. Ciru akaba rhuba rhulamire ngahi, rhweshi ‘rhunahamagale izino lya Yehova n’okumuharamya omu cinyabuguma.’​—Sofoniya 3:9, NWT, amahugûlo g’idako.

2. Bici wakajira ly’ogendekeza ecinyabuguma omu cigamba?

“Muzigirane bwenene n’omurhima goshi.” (1 Petro 1:22) Gurhi wakakolesa er’ihano? Ahali h’okukasegeza obwenge bwawe oku buzamba bw’abandi, okasegeza obwenge bwawe oku morhere gabo minja. Ahali hw’okukakômerana na bala basima ebi osima bone, wanalonza okumanya abandi bene wirhu na bali birhu b’omu bindi bihugo. Na kandi rhwanajira okwirhu koshi lyo rhukûla ehy’akabôlo hyakaba hirhuli omu murhima.​—Osome 1 Petro 2:17. a

3. Bici oshinganine ojire amango hali okurhayumvikana egarhi kawe n’owinyu Mukristu?

Rhunalame omu cinyabuguma, cikone rhurhaba bimana. Hali amango rhuhikira aha rhwavunana omurhima erhi kusarhazanya. Co cirhumire Akanwa ka Nnâmahanga karhubwizire erhi; “mugendekere . . . mwababalirana,” kacibir’iyushula ntya: “Nk’oku Yehova ajiraga ntyo n’obulonza, ninyu mushinganine mujire ntyo.” (Osome Abakolosi 3:13, NWT.) Rhunakagokeza Yehova bucâ buyira, cikone anarhubabalire. Co cirhumire arhuhûnyire nirhu oku rhukababalira bene wirhu. Erhi wakahugûkwa oku wasarhazize muntu mulebe, wanarhôla omuhigo g’okugend’iyusa ago mazibu.​—Osome Mateyo 5:23, 24. b

 HUMBIRIRA LY’OHUGÛKWA

4. Oyake akabôlo

Rhuba rhulonzize rhuzigire bene wirhu boshi. Cikone hali amango rhuyabirwa okuyumvikana n’omuntu obonekine nk’ali lubero na nirhu. Bici byakakurhabala okuyaka eyo ngeso? Osome Ebijiro by’Entumwa 10:34, 35, na buzinda oganirire aga madoso:

• Yehova anayemere abantu ba ngasi lubero babe Bahamirizi bage. Gurhi oko kwakakushumya oku obona abantu murhakuliraga haguma nabo?

• Kabôlo kahi wakasima oyake kalug’ibonekana emunda oba olamire?

Osome 2 Abakorinti 6:11-13, na buzinda oganirire er’idoso:

• Gurhi orhanyize wakayegeramwo bene wirhu na bali birhu barhakuliraga haguma na nawe?

5. Okababalira abandi n’obulonza onabe wakujira omurhula

Yehova anakarhubabalira n’obulonza, n’obu ciru nta lusiku anarhugokeze mpu lyo nirhu rhumubabalira. Osome Ennanga 86:5, na buzinda oganirire aga madoso:

• Kunganaci Yehova arhubabalira?

• Bulya gurhi wakashagalukira okuyumva oku Yehova anarhubabalire n’obulonza?

• Bici byakarhuma rhwayabirwa okuyumvikana n’abandi?

Gurhi rhwakayiga olwiganyo lwa Yehova n’okugendekeza ecinyabuguma egarhi kirhu na bene wirhu na bali birhu? Osome Emigani 19:11, na buzinda oganirire er’idoso?

• Erhi muntu mulebe akakugokeza erhi akugayise, bici oshinganine ojire ly’okubûla ebintu?

 Hali amango rhugokeza abandi. Amango oko kwamarhuhikira, bici rhushinganine rhujire? Olole EVIDEO, na buzinda oganirire idoso likulikire.

• Nk’oku obwine mw’eyo video, bici oyo mwali wirhu anajijire ly’ajira omurhula?

 KWA BOFOFI

Wanarhuma ecinyabuguma cagendekera omu cigamba erhi wakakacihangana okubabalira bene wirhu na bali birhu n’okubazigira boshi.

Okucikengeza

• Gurhi wakajira ly’oyaka okuba n’akabôlo?

• Gurhi wakajira erhi hakaba okurhayumvikana egarhi kawe n’owinyu Mukristu?

• Bulya gurhi olonzize okuyiga olwiganyo lwa Yehova lw’okubabalira abandi?