ISOMO LYA 59
Wanahash’ilembera Okulibuzibwa
Abakristu boshi baba bamanyire oku ene erhi irhondo banahagalikwa, erhi kulibuzibwa. K’oko kushinganine kurhuyobohye?
1. Bulya gurhi rhushinganine rhumanye oku rhwanalibuzibwa?
Ebibliya edesire ntya n’obwalagale: “Balya balonza okulama akalamo k’obwishwekerezi kuli Nnâmahanga omu cinyabuguma na Kristu Yezu, nabo balibuzibwa.” (2 Timoteyo 3:12, NWT) Yezu alibuzibagwa bulya arhâli cigabi c’er’igulu lya Shetani. Nirhu rhurhaba cigabi c’er’igulu, co cirhuma rhurhasomerwa erhi rhulibuzibwa n’amaguvernema ga bene bantu n’amakubuliro g’amadîni g’er’igulu.—Yowane 15:18, 19.
2. Gurhi rhwakacirheganyamwo oku malibuko gali embere zirhu?
Rhushinganine rhuzibuhye obulangalire bwirhu muli Yehova kurhondera ene. Okacihiriraho akasanzi k’okusalira n’okusoma Ebibliya ngasi lusiku. Okaja oku ntimanano z’ecigamba ngasi mango. Erhi wakakajira ebyo bintu, wanaba n’emisi n’oburhwali bw’okugendekera wakolera Yehova ciru ankaba abantu bali bakulibuza bali b’omu mulala gwawe. Entumwa Paolo nayo yalibuzibwe, cikone ayandika ntya: “Nyakasane [Yehova, NWT] ye murhabazi wani; ntaco nankayoboha.”—Abahabraniya 13:6.
Na kandi rhwanaba n’oburhwali erhi rhwakakahubiri ngasi mango. Okuhubiri kunarhuyigirize okulangalira Yehova n’okurhayoboha bene bantu. (Emigani 29:25) Erhi wakaba n’oburhwali bw’okuhubiri kurhondera ene, wanacirheganya bwinja ly’oyishigendekera wahubiri erhi abakulu b’ecihugo bakahanza omukolo gwirhu.—1 Abatesalonika 2:2.
3. Bunguke buhi rhuba nabo erhi rhulembera okulibuzibwa?
Kobinali, rhurhashagalukira okulibuzibwa, cikone erhi rhulembera amalibuko n’okugahima, obuyemere bwirhu bunasêre bwenene. Rhunayegerere Yehova bwenene bulya rhwamabona kunganaci arhurhabire omu mango rhwakagiciyumva nka rhurhacigwerhi emisi y’okugendekera kwalembera. (Osome Yakobo 1:2-4.) Yehova anakaciyumva kubi erhi abona rhuli rhwalibuka, cikone anashagaluke erhi abona rhuli rhwalembera ago malibuko. Ebibliya edesire ntya: “Erhi nkaba murhegesirwe mpu mulibuzibwe kwenge mwajijire aminja mukanalembera okwo kulibuka, erhi bwinja mujijire emalanga ga Nnâmahanga.” (1 Petro 2:20, Mashi Bible) Erhi rhwakabêra bishwekerezi kuli Nnâmahanga, anayishirhuha oluhembo lw’obuzine bw’ensiku n’amango omw’igulu lihyahya. Omw’igulu lihyahya, abantu boshi bayishikakolera Yehova na ntaye wanacibahagalike erhi kubalibuza.—Mateyo 24:13.
HUMBIRIRA LY’OHUGÛKWA
Olole bulya gurhi byanahashikana okubêra bishwekerezi kuli Yehova ciru akaba abantu bali barhulibuza, na gurhi Yehova anarhuhembe.
4.Wanalembera ciru akaba oli wahagalikwa n’abantu b’omu mulala
Yezu adesire oku hali amango abantu b’omu mulala gwirhu bakarhuhagalika bulya rhwamahiga okukolera Yehova. Osome Mateyo 10:34-36, na buzinda oganirire er’idoso:
-
Gurhi byakaba erhi muntu muguma w’omu mulala akahiga oku akola akolera Yehova?
Ly’obona olwiganyo, olole EVIDEO, na buzinda oganirire idoso likulikire.
-
Bici oshinganine ojire erhi abantu b’omu mulala gwawe erhi abîra bawe bakakuhanza oku orhakoleraga Yehova?
Osome Ennanga 27:10 na Marko 10:29, 30. Enyuma z’okusoma ngasi lwandiko, oganirire er’idoso:
-
Gurhi eco ciragane cakakurhabala amango abîra erhi bantu b’omu mulala gwawe bakakuhagalika?
5. Ogendekere waharamya Yehova ciru akaba oli walibuzibwa
Binahûne okuba n’oburhwali lyo rhugendekera rhwakolera Yehova amango abandi bali bajira okwabo koshi lyo barhuhanza okumukolera. Olole EVIDEO, na buzinda oganirire idoso likulikire.
-
Bici bikuzibuhize mw’ezo nyiganyo obwine mw’eyo video?
Osome Ebijiro by’Entumwa 5:27-29 n’Abahabraniya 10:24, 25. Enyuma z’okusoma ngasi lwandiko, oganirire er’idoso:
-
Bulya gurhi rhushinganine rhugendekere rhwaharamya Yehova ciru ankaba omukolo gwirhu gw’amahubiri erhi entimanano zirhu bihanzibwe?
6. Yehova akurhabala olembere
Abahamirizi ba Yehova balushine emyaka na ba bûko buli lubero bagendekire bakolera Yehova n’obwishwekerezi ciru akaba abandi bali babahagalika. Ly’obona ebyabarhabire, olole EVIDEO. Buzinda oganirire idoso likulikire.
-
Nk’oku obwine mw’eyo video, bici byarhabire abo Bahamirizi balembere?
Osome Abaroma 8:35, 37-39 n’Abafilipi 4:13. Enyuma z’okusoma ngasi lwandiko, oganirire er’idoso:
-
Gurhi olo lwandiko lukuyemezize n’obwalagale oku nawe wanahash’ilembera ngasi mazibu?
Osome Mateyo 5:10-12, na buzinda oganirire er’idoso:
-
Bulya gurhi wakaba n’omwishingo ciru akaba oli walibuzibwa?
Bakozi banji ba Yehova balembire okuhagalikwa. Nawe wanahash’ilembera!
HALI ABANTU BADERHA NTYA: “Ntakahash’ilembera amalibuko.”
-
Mandiko gahi wakabaha ly’obarhabala bayemere n’obwalagale oku banahash’ilembera okulibuzibwa?
KWA BOFOFI
Yehova anashagaluke bwenene erhi abona rhuli rhwaciseza okumukolera ciru ankaba rhuli rhwalibuzibwa. Kugerera oburhabale bwage, rhwanahash’ilembera!
Okucikengeza
-
Bulya gurhi Abakristu bashinganine bacirheganye oku kulibuzibwa?
-
Bici wakajira ene ly’ocirheganya oku malibuko?
-
Bici byakakurhabala okuyemera n’obwalagale oku wanagendekera wakolera Yehova ciru wakahikirwa na malibuko gahi?
OCIYIGIRIZE KWA BULÎRI
Olole gurhi mwene wirhu muguma ociri musole ahugwîre gurhi Yehova amurhabalaga alembere erhi ashwekwa enyanya z’okulahira okulunga okuboko oluhande loshi-loshi.
Olole bici byarhabire mulume muguma na mukage bagendekere bakolera Yehova n’obwishwekerezi kasanzi ka myaka minji ciru akaba bakagihagalikwa.
Olole gurhi wakagendekera walwisa amalibuko n’oburhwali.
“Ujitayarishe Leo kwa Ajili ya Mateso” (Ilabiro ly’Akalalizi, y’Omwezi gwa 7, 2019)
Olole ntanya zihi oshinganine okuba nazo amango abantu b’omu mulala gwawe bali bakuhagalika, na gurhi wakajira ly’olama nabo omu murhula n’okurhaleka okuba mwishwekerezi kuli Yehova.
“Kweli Hailete, ‘Amani, Bali Upanga’” (Ilabiro ly’Akalalizi, ly’Omwezi gwa 10, 2017)
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
