OKUJIRA ABANAFUNZI
ISOMO LYA 11
Oyigirize omu Njira Nembu
Akanuni k’Ebibliya: Okolese “ebinwa bihumanusire [bilembu okuhugûkwa].”—1 Kr. 14:9.
Ebi Yezu Ajijire
1. Olole EVIDEO, erhi osome Mateyo 6:25-27. Enyuma z’aho, orhanye kw’aga madoso gakulikire:
Bici Olwiganyo lwa Yezu Lurhuyigirizize?
2. Erhi rhwakayigiriza omu njira nembu, abantu banakakengera ebi rhwabayigirizize, rhwananahuma oku mirhima yabo.
Oyige Olwiganyo lwa Yezu
3. Orhakag’iderha binji. Ahali h’okuganirira ebi omanyire byoshi lugenda mwanzi mulebe, osegeze obwenge bwawe oku myanzi eri omu cicapo c’ifunzo. Enyuma z’okudosa idoso, olinde oku omwanafunzi wawe ashuza. Erhi akaba arhamanyiri ishuzo, erhi ahâne entanya zirhapatini n’enyigirizo z’Ebibliya, okolese agandi madoso ly’omurhabala arhanye k’ogo mwanzi. Erhi omwanafunzi wawe akayus’ihugûkwa entanya z’obulagirire mwalonzagya okuyiga, wanagenderera.
4. Orhabale omwanafunzi ahugûkwe ebintu bihyahya omu kukolesa ebi akola amanyire. Kwa lwiganyo, embere murhondere isomo liganirire obufûke, nkaba mwanagalukira kwa bofofi ebi omwanafunzi wawe ayizire lugenda ehali y’abafîre.
5. Okolese bwinja enyiganyo. Embere okolese olwiganyo, ocidose ntya:
-
‘Ka lwarhabala omwanafunzi wani okukengera entanya z’obulagirire rhwayigaga, ahali h’okukengera olwiganyo lone?’