MUBE MASU!
Abajira Eby’epolitike Bali Barhonda Abantu Lugenda Ivita lya Armagedoni—Bici Ebibliya Edesire Lugenda Oko?
Lwakasi sezi, nsiku 10/10/2022, ecihugo c’e Russie cashurha emisile omu vile z’e Ukraine lyo bacihôla enyanya z’ebi ecihugo c’e Ukraine casherezagya nsiku ibirhi embere z’aho omu eneo y’e Crimée n’ey’e Russie. Ebyo byajirikanaga kasanzi kasungunu enyuma z’abantu b’epolitike okuderha oku Armagedoni ali hofi.
“Kurhenga amango rhwahikiragwa n’amazibu galerhagwa n’e Missile de Cuba na Kennedy, rhurhalisag’irhanya oku ivita lya Armagedoni liyegerire [John F. Prezida w’e États-Unis]. . . . Ntarhanyizi erhi byanahashikana okukolesa e arme nucléaire buzira kurhondeza ivita lya Armagedoni.”—Joe Biden Prezida w’e États-Unis, Nsiku 6/10/2022.
“Ntanyize oku Armagedoni ali hofi ahikire igulu lyoshi.” Ntyo ko Prezida w’e Ukraine Volodymyr Zelensky aderhaga omu nsiku 8/10/2022 oku BBC News, erhi bamudosa amazibu gakahikira omukukolesa e armes nucléaires.
Ka byanahashikana okukolesa e armes nucléaires kuyish’irhondeza ivita lya Armagedoni? Bici Ebibliya edesire lugenda oko?
K’okukolesa e armes nucléaires ko kwayish’irhondeza ivita lya Armagedoni?
Nanga. Liguma lyone oluderho “Armagedoni” lukolesibwe omu Bibliya. Olo luderho luba omu lwandiko lw’Amafulûlo 16:16. Olo luderho lurhaganiriri ivita egarhi k’amashanja, cikone luganirire ivita egarhi ka Nnâmahanga na “ngasi mwami w’en’igulu lyoshi.” (Amafulûlo 16:14) Nnâmahanga ayish’ikolesa ivita lya Armagedoni ly’ayusa oburhegesi bwa bene bantu.—Daniyeli 2:44.
Ly’omanya binji lugenda ivita lya Armagedoni, osome omwanzi gudesire Ivita lya Armagedoni Byo Bici?
K’okukolesa e armes nucléaires kwayish’ishereza igulu n’abalilamireko?
Nanga. Ciru akaba byanahashikana abarhegesi b’igulu bayish’ikolesa e armes nucléaires omu mango gayisha, Nnâmahanga arhayish’iyemere igulu lyasherezibwa. Ebibliya edesire ntya:
‘Igulu . . . lyayorha lihaba.’—Omuhanûzi 1:4, Mashi Bible.
“Abashinganyanya bo balya igulu, bo banalibêrakwo ensiku n’amango.”—Ennanga 37:29.
Cikone, obulebi bw’Ebibliya n’ebintu biri byajirikana ene, biyerekine n’obwalagale oku hano hofi-hofi, haba empindulo omu kalamo ka bene bantu. (Mateyo 24:3-7; 2 Timoteyo 3:1-5) Olole ebi Ebibliya edesire lugenda amango gayisha omukuyiga Ebibliya omukuganira buzira kuhâna kantu.
Olole n'Ebi Bikulikire
ENYIGIRIZO Z'OMUSINGI Z'EBIBLIYA
Bici Byarhumâga Nnamahanga Alema Igulu?
Igulu lirhu liba linja bwenene. Nnamahanga alihizire kuli n’izuba, alilemire lyo liyunama, na kandi alilemeri likazunguluka okushinganine, bulya gurhi Nnamahanga alemire ebyo byoshi?
AMASHUZO G’EBIBLIYA
Ecimanyiso c’‘Ensiku Nzinda’ Erhi “Buzinda” co Cihi?
Ebibliya yali erhi yalebire bintu binji byakayerekine ensiku nzinda.
MUBE MASU!
Ecihugo c’e Russie okurhera ec’e Ukraine—K’obulebi bw’Ebibliya buli bwahikirira?
Oyige ebi oko kwajirikana kuhugwîre.
OKUBIRHUYEREKIRE
Obwire Abahamirizi ba Yehova Bakuyigirize Ebibliya
Obwire Abahamirizi ba Yehova bakulambagirire lyo muyiga emyanzi y’Ebibliya haguma, erhi okolese njira isharhu z’okuciyigiriza Ebibliya.
