Emyanzi eri yahânwa eyunjwire raporo z’abantu bali baderha enderho z’enshombo, erhi bali bajira ebintu enyanya z’okurhanyiza abandi kubi, emyanzi y’abantu bali barhêra abandi enyanya z’okuba kone bali b’omu ishanja liri lubero n’elyabo, n’emyanzi y’ivita.

•   “Mwa gano mango hali nderho nyinji za nshombo oku byombo by’okuhâna emyanzi kulusha agandi mango goshi enyanya z’ivita egarhi k’e Israël n’e Gaza n’enyanya z’abantu bagendekeza obuminya n’enshombo.”​—The New York Times, Nsiku 15/11/2023.

•   “Kurhondera omu Nsiku 7, Mwezi gwa 10, habire buzira kulaliza nderho nyinji bwenene z’enshombo n’ezo buminya enyanya z’abantu okurhanyiza abandi kubi kulusha oku byali embere.”​—Dennis Francis, prezida w’e Assemblée générale des Nations unies, Nsiku 3/11/2023.

 Enderho z’enshombo, obuminya, n’ivita birhali bihyahya. Okuderha okuli, Ebibliya eganirire abantu b’omu mango ga mîra ‘[bakag’imeshera] ebinwa bibi nka kula balasha emyampi’ banakag’igendekeza ivita n’obuminya. (Ennanga 64:3, Mashi Bible; 120:7; 140:1) Ciru akaba ntyo, Ebibliya ehugwîre oku enshombo rhuli rhwabona omw’igulu ene egwerhe eci ehugwîre.

 Ebibliya eyerekine bintu bibirhi birhumire enshombo eri nyinji.

1.  1. Yali yalebire lugenda amango “obuzigire bwa banji bwanyihe.” (Mateyo 24:12) Ahali h’obuzigire, bantu banji bakakazir’iyerekana amorhere gakarhumire abantu bakashombana.​—2 Timoteyo 3:1-5.

2.  2. Enshombo nyinji eri omu igulu ene gali malehe g’obulyalya n’obubi bwa Shetani Ibilisi. Ebibliya edesire oku “igulu lyoshi liri omu buhashe bw’Omubi.”​—1 Yowane 5:19; Amafulûlo 12:9, 12.

 Cikone, Ebibliya eyerekine kandi oku hano hofi-hofi Nnâmahanga akûlaho enshôko y’enshombo n’oku ayish’ifumya amalumwa enshombo yadwirhe. Ebibliya elaganyize ntya:

•   Nnâmahanga “ahôrhola ngasi mulenge gubali omu masu: olufû ntalwo lwacihabê; emishîbo n’endûlù n’amababale birhakacihabâ bundi; bulya okwâli burhanzi kwahwire.”​—Amafulûlo 21:4.