Omu nsiku 19/5/2022, bakulu 75 bamanyisa e Conseil de Sécurité des Nations Unies oku “ebiryo byanyihire omw’igulu lyoshi erhi bulwala bw’okuyahukira bw’e Korona burhuma, n’ebintu bigendekire okubiha bwenene omw’igulu lyoshi bulya ivita liri e Ukraine n’ishali lyaluga omu maeneo manji.” Kasanzi kasungunu enyuma z’aho, e gazeti ehamagalwa The Economist yaderha oku “ciru akaba igulu liyosire lirimo mazibu manji, bantu banji bwenene bahikirwa n’amazibu g’ishali enyanya z’ivita.” Ebibliya yali yalebire oku ebiryo byakanyihire bwenene muli gano mango girhu, cikone kandi ehânyire amahano gakarhurhabala lyo rhulwisa bwinja ago mazibu ene.

•    Yezu alebire ntya: “Ecihugo cayimukire ecindi, n’obwami obundi bwami. Ecizombo[ erhi ishali] n’omusisi byayish’iba hanji.”​—Mateyo 24:7.

•    Ecitabu c’Ebibliya c’Amafulûlo ciganirire balume bani b’olwiganyo bashonyire oku nfarasi. Muguma muli abo balume bashonyire oku nfarasi ashushanyize ivita. Akulikirwe n’owundi oshushanyizize ishali, kuli kuderha amango kwakabire kuzibu okupata ebiryo n’abantu bone bapandise ibeyi ly’ebiryo bwenene.Cidesire ntya: “Nalola, nabona enfarasi y’ecibogo. Owayiri kwo âli afumbasire omulengo. Nayumva eliri nk’izu . . . lyaderha mpu: ‘ciro ciguma ca ngano cife omulegerege gw’omunyakasi, n’ebiro bisharhu by’iporoji bife omulegerege gw’omunyakasi.’”​—Amafulûlo 6:5, 6, Mashi Bible.

 Obo bulebi bw’Ebibliya lugenda okunyiha kw’ebiryo boshi buli bwahikirira muli gano mango girhu, Ebibliya egahamagire “nsiku nzinda.” (2 Timoteyo 3:1) Ly’omanya binji lugenda “ensiku nzinda” n’okugendekera kw’abo balume bani bashonyire oku nfarasi, olole evideo edesire Igulu Lyashanjire Kurhondera omu Mwaka gwa 1914 osome n’ecigabi cidesire “Balya Bantu Bani Bashonyire oku Nfarasi bo Bandi?”

•    Ebibliya egwerhe amahano minja gakakurhabala ly’olwisa ngasi kanga kazibu, kahiziremo okuyushuka bwenene kw’ibeyi ly’ebiryo n’okunyiha kw’ebiryo omu igulu. Olabe ezindi nyiganyo omu cigabi cidesire “Gurhi Rhwakalama na Bintu Bisungunu.”

•    Kandi Ebibliya erhuhire obulangalire oku ebintu byanabe binja omu mango gayisha. Elaganyize oku hali amango “Idaho lyàyêra engano” na ngasi muntu ayish’iba na biryo binji bwenene. (Enna 72:16) Ly’omanya binji oku biyerekire ebiragane by’Ebibliya lugenda amango gayisha na bulya gurhi wakalangalira ebi edesire, osome ecigabi cidesire “Tumaini Bora la Wakati Ujao” omu ciswahiri.