MUBE MASU!
Ecihugo c’e Russie okurhera ec’e Ukraine
Omu nsiku 24/2/2022, sezi-sezi, ciru akaba abakulu b’ecihugo bajijire okwabo koshi lyo bahanza abasoda b’e Russie barhag’ija omu cihugo c’e Ukraine, abo basoda bahikira aha baja mw’eco cihugo. Mazibu gahi oko kwalerha omw’igulu lyoshi? Hakola hali nsiku nsungunu omwandisi mukulu w’Ecinyabuguma c’Amashanja, ohamagalwa António Guterres adesire ntya: “Rhurhakahash’irhanya mazibu manganaci na bintu binganaci byasherera enyanya z’oko omu bihugo by’e Bulaya n’eby’omw’igulu lyoshi.”
Bici Ebibliya eganirire lugenda ebi biri byajirikana?
Yezu ali erhi alebire amango “ecihugo cayimukire ecindi, n’obwami obundi bwami.” (Mateyo 24:7) Ly’omanya gurhi Ebibliya eyerekinemwo oku amavita gali gajirikana ene gali gahikiriza obulebi bwa Yezu, olole omwanzi gudesire “Ecimanyiso c’ ‘Ensiku Nzinda’ co Cihi?”
Ecitabu c’Amafulûlo ciganirire amavita omukugashushanya n’omuntu oshonyire oku “nfarasi y’irangi lishushire omuliro” anahâbwa oluhûma lw’“okukûla omurhûla okw’igulu.” (Amafulûlo 6:4) Ly’omanya gurhi amavita gali gahikiriza obu bulebi ene, olole omwanzi gudesire, “Balya Bantu Bani Bashonyire oku Nfarasi bo bandi?”
Ecitabu ca Daniyeli cali erhi calebire okusunsunikana kw’“omwami w’emwené [nord]” n’“omwami w’emukondwe [sud].” (Daniyeli 11:25-45) Ly’omanya bulya gurhi ecihugo c’e Russie n’abacilunzire okuboko bayerekinemwo oku ye mwami w’emwené olole evideo desire; Obulebi Bwahikirire Bw’Omu Citabu ca Daniyeli Cigabi ca 11. a
Kandi ecitabu c’Amafulûlo ciganirire lugenda ‘[ivita] ly’olusiku lukulu lwa Nyamuzinda Nn’amahanga goshi.’ (Amafulûlo 16:14, 16) Lirhali ivita egarhi k’amashanja nk’eri liri lyajirikana e Ukraine. Ly’omanya binji lugenda er’ivita lyajirikana hano hofi-hofi, olole omwanzi gudesire “Ivita lya Armagedoni byo Bici?”
Bulya gurhi wakaba n’obulangalire lugenda amango gayisha?
Ebibliya edesire oku Nnâmahanga ‘ayusa embaka [mavita] z’omw’igulu lyoshi.’ (Ennanga 46:9, Mashi Bible) Ly’omanya binji lugenda ebiragane bya Nnâmahanga by’amango gayisha, olole omwanzi gudesire “Obulangalire bw’Okunali bw’Amango Gayisha.”
Yezu ayigirizize abanafunzi bage bakashenga Obwami bwa Nnâmahanga buyishe. (Mateyo 6:9, 10) Obo bwami buba burhegesi erhi guvernema eba empingu yayish’ikiriza obulonza bwa Nnâmahanga hanw’igulu. Ago mango Nnâmahanga ayish’ijira igulu lyoshi libem’omurhûla. Ly’omanya gurhi wakayunguka n’obo Bwami, olole evideo edesire Obwami bwa Nnâmahanga Byo Bici?
Ecihugo c’e Ukraine cibamo Bahamirizi ba Yehova balushire 129 000. Ak’abandi Bahamirizi b’omu bindi bihugo, banakulikire olwinyo lwa Yezu omukurhalunga okuboko oluhande loshi-loshi omu by’epolitike, barhanaja okw’ivita. (Yowane 18:36) Omw’igulu lyoshi, Abahamirizi ba Yehova bagendekire bayaliza ‘omwanzi mwinja gw’Obwami,’ n’okurhabala abantu bahugûkwe oku bone bwayuse amazibu goshi ga bene bantu, gahiziremo n’amavita. (Mateyo 24:14) Rhukuhûnyire oganire n’Abahamirizi ba Yehova ly’oyiga binji lugenda omwanzi gw’obulangalire guli omu Bibliya.
a Ly’omanya binji lugenda obu bulebi, olole ecigabi cidesire “‘Mufalme wa Kaskazini” Katika Wakati wa Mwisho” n’ecidesire “Ni Nani “Mufalme wa Kaskazini” Leo?”
Olole n'Ebi Bikulikire
MUBE MASU!
Amazibu g’Ababunga b’e Ukraine—Ebi Ebibliya Edesire
Ebibliya ehugwîre ecirhuma abantu bahikirwa n’amazibu g’okubunga, na gurhi gayish’ihwamwo loshi-loshi.
ENYIGIRIZO Z'OMUSINGI Z'EBIBLIYA
Obwami bwa Nnâmahanga Byo Bici?
Erhi Yezu aba ali omu mukolo gwage gw’amahubiri hanw’igulu, aganirîre Obwami bwa nnâmahanga kulusha eyindi myanzi. Hakola hali myaka minji abantu basalira ly’Obwami bwa Nnâmahanga buyisha.
EYINDI MYANZI
K’Obuzinda bw’Igulu Buli Hofi? Apokalipse byo Bici?
Ciru akaba Ebibliya edesire oku igulu, erhi idaho, lyabêraho ensiku n’amango, hali igulu lyay’ishihwa.
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.
