Sean Gladwell/Moment via Getty Images
MUBE MASU!
Ensaranga Ziri Zakolesibwa omu Igulu Lyoshi Lugenda eby’Ecisoda Zirhalusire Triliyoni Ibirhi z’Edolare—Bici Ebibliya Edesire?
Omu mwaka gwa 2022, ensaranga zakolesibwe omu igulu lyoshi lugenda eby’ecisoda ziri dolare triliyoni 2,24. Bo burhanzi ensaranga ziri nk’ezo zakolesibwa omu by’ecisoda, zakolesibwe ntyo enyanya z’ecihugo c’e Russie okurhera ec’e Ukraine. Kushimbana n’eraporo yahânagwa omu Mwezi gwa 4, 2023 y’e Institut international de recherche sur la paix de Stockholm (SIPRI), omu mwaka gwa 2022:
Ensaranga zakolesibwe Ebulaya omu by’ecisoda “zayushusire kali ikumi na kasharhu oku igana (13%) mw’ogo mwaka. Bo burhanzi ensaranga ziri nk’ezo zakolesibwa Ebulaya okubiyerekire eby’ecisoda kurhenga amango ivita lizinda lyabaga omu mwaka gwa 1991.”
“Bibonekine oku ecihugo c’e Russie . . . cayushwire ensaranga cikolesa kali 9,2 oku igana (9,2%), n’oko kwarhumire caba cihugo ca kasharhu okukolesa nsaranga nyinji omu igulu, ci cirhacili ca karhanu.”
Ecihugo c’e États-Unis co ciciri cirhanzi okukolesa nsaranga nyinji omu by’ecisoda, “mubale gwa nsaranga makumi asharhu na mwenda oku igana (39%) zikolesibwa omu igulu lyoshi omu by’ecisoda, zinakarhenga e États-Unis.”
Dr. Nan Tian warhabalaga okuyandika eraporo y’e SIPRI adesire ntya: “Okubona omu myaka egezire, amarhegesi gagendekire gayushûla omubale gw’ensaranga zikolesibwa omu by’ecisoda, kuyerekine oku rhulamire omw’igulu lirhalimwo obulanzi.”
Ebibliya yali erhi yalebire oku amarhegesi makulu g’igulu gahali ene garhakakazir’ikayumvikana, enaganirire kantu kaguma kone rhwakalangalira kakalerha omurhûla gw’okunali.
Ebibliya yali erhi yalebire oku okurhayumvikana kw’abasoda kwakayushusire
Ebibliya ehamagire gano mango rhulamiremwo “mango ga buzinda.”—Daniyeli 8:19, NWT.
Ecitabu ca Daniyeli cali erhi calebire oku amarhegesi makulu gakakazir’ikalwa. Ago marhegesi makulu g’igulu ‘gakasunsunikine,’ erhi kulwira obukulu. Mw’oko kusunsunikana gakakolesize “buhirhi” bunji, erhi nsaranga.—Daniyeli 11:40, 42, 43, NWT.
Ly’omanya binji lugenda obo bulebi bw’Ebibliya bw’okusomeza, olole evideo edesire Obulebi Bwahikirire Bw’Omu Citabu ca Daniyeli Cigabi ca 11.
Oku omurhûla gw’okunali gwanahikirizibwemwo
Ebibliya edesire oku Nnâmahanga ayish’irhenzaho amarhegesi ga bene bantu. “Ayishiyimanza obundi bwami bulya burhankacishandwa ciru n’eriguma na oburhegesi bwabo burhakacihâbwa oku lundi lubaga. Bwavunyungula bunashandaze agola gandi mami, nabo bône bwayorha ensiku n’amango.”—Daniyeli 2:44.
Hano hofi-hofi Yehova a Nnâmahanga ayish’ijira ebi bene bantu barhakahash’ijira, ko kuderha oku ayish’ilerha omurhûla gw’okunali na gw’ensiku n’amango. Gurhi ayish’ijiramwo ntyo? Oburhegesi bw’Obwami bwage bw’empingu bwayish’iyusa ebikolanwa by’ivita byoshi n’okuyusa obuminya boshi.—Ennanga 46:8, 9.
Ly’oyiga binji lugenda ebi Obwami bwa Nnâmahanga bwayish’ihikiriza, osome omwanzi gudesire “Chini ya Ufalme wa Mungu ‘Amani Itakuwa Nyingi.’”
a Yehova ly’izino lya Nnâmahanga.—Ennanga 83:18.