Ivita liri e Ukraine, haguma n’amazibu g’okushanja kw’e climat, bigendekire byarhuma haba okunyiha kw’ebiryo omu igulu lyoshi. Ntyo ko biyosire, ci bwenene omu bihugo bikenyi, mw’ebyo bihugo kuli kwaba kuzibu kuli bantu banji okupata ebiryo.

•   “Ivita, okushanja kw’e climat, okuyushuka kw’ibeyi ly’ebintu nka egaze n’e carburant kwarhumire ebiryo byanyiha kunali kwaba kuzibu okubipata.”​—António Guterres, mwandisi mukulu w’Ecinyabuguma c’Amashanja, Nsiku 17/7/2023.

•   “Abalenga bali baderha oku okuba ecihugo c’e Russie cacirhenzize omu ipatano bagwerhe ly’okuguza emogo-mogo, oko kwarhuma kwaba kuzibu bwenene okupata ebiryo n’okurhuma ibeyi ly’ebiryo lyayushuka bwenene omu bihugo bikenyi, ci bwenene omu Afrique du Nord n’omu bihugo by’Ekagarhi k’Ebushoshokero bw’izuba.”​—Atalayar.com, Nsiku 23/7/2023.

 Olole ebi Ebibliya edesire lugenda okunyiha kw’ebiryo n’amango gayisha.

•   Yezu alebire ntya: “Ecihugo cayimukire ecindi, n’obwami obundi bwami. Ecizombo . . . cayish’iba hanji.”​—Mateyo 24:7.

•   Ecitabu c’Amafulûlo ciganirire balume bani b’olwiganyo bashonyire oku nfarasi. Muguma wa muli abo balume bashonyire oku nfarasi ashushanyize ivita. Akulikirwe n’owundi oshushanyize ecizombo, amango ebiryo byakanyihire n’okuguzibwa oku ibeyi likali bwenene. “Nabona enfarasi y’ecibogo. Owayiriko âli afumbasire omulengo. Nayumva eliri nk’izu . . . , lyaderha mpu: ‘Ciro ciguma ca ngano cife omulegerege gw’omunyakasi, n’ebiro bisharhu by’iporoji bife omulegerege gw’omunyakasi.’”​—Amafulûlo 6:5, 6, Mashi Bible.

 Obo bulebi bw’Ebibliya lugenda okunyiha kw’ebiryo buli bwahikirira mwa gano mango Ebibliya ehamagire “nsiku nzinda.” (2 Timoteyo 3:1) Ly’oyiga binji lugenda ‘ensiku nzinda’ n’abalume bani bashonyire oku nfarasi baganirirwe omu citabu c’Amafulûlo, olole evideo edesire Igulu lyashanjire kurhondera omu mwaka gwa 1914 na kandi osome omwanzi gudesire “Wale Wapanda-Farasi Ine​—Ni Nani?”

•   Ebibliya erimwo amahano minja gakarhurhabala okulwisa akanga kazibu, kuhiramwo okuyushuka bwenene kw’ibeyi ly’ebiryo erhi ciru okunyiha kw’ebiryo. Olole nyiganyo nguma na nguma omu mwanzi gudesire “Gurhi Rhwakalama na Bintu Bisungunu.”

•   Kandi Ebibliya erhuhîre obulangalire oku ebintu byayish’iba binja bwenene. Erhulaganyize amango “idaho lyàyêra engano [mogo-mogo]” na ngasi muntu ayish’iba na biryo binji bwenene by’okulya. (Ennanga 72:16) Ly’oyiga binji lugenda obo bulangalire bw’amango gayisha n’ebyakarhuma wacikubagira bo, osome omwanzi gudesire “Tumaini Bora la Wakati Ujao.”