Lwiyinga nsiku 20/11/2022, e Conférence des Nations Unies sur les Changements Climatiques, COP27 yahwa. Ciru akaba abali mw’eyo conférence bahizire okurhabala ebihugo bikenyi n’ensaranga lyo bilwisa obuhanya bulerhwa n’okushanja kw’e climat, banji bayemire n’obwalagale oku oko kurhayuse ago mazibu.

•   Omu nsiku 19/11/2022, António Guterres, mwandisi mukulu w’Ecinyabuguma c’Amashanja aderha ntya: “nshagalusire okubona rhwahizire okukabika ensaranga z’okurhabala abali balibuzibwa n’okushanja kw’e climat, cikone rhumanyire oku zirhayuse ago mazibu . . . Igulu lirhu liri omu hali mbi bwenene.”

•   “Hano hofi-hofi hali amango igulu lyakahikirwa n’amazibu madarhi bwenene galerhwa n’okushanja bwenene kw’e climat.”​—Mary Robinson, prezida wa mîra w’e Irlande na Haut-Commissaire des Nations Unies aux droits de l’homme wa mîra, nsiku 20/11/2022.

 Emisole eyobohire bwenene lugenda amango gayisha g’igulu lirhu. Cikone, k’amashanja ganakola haguma n’okuhikiriza eciragane cago c’okuyusa amazibu g’okushanja kw’e climat? Bici Ebibliya edesire lugenda oko?

 Ebibliya eyerekine oku ciru akaba amashanja gali gajira okwago goshi lyo gayusa amazibu g’okusherera kw’e climat, garhagwerhe obuhashe bw’okugayusa loshi-loshi. Rhuganinire birhumire bibirhi:

•   “Bulya kwo kunali ebyakubire birhacikubûka.”​—Omuhanûzi 1:15; Mashi Bible.

   Ebi oko kuhugwîre: Amaguvernema garhagwerhe buhashe bw’okujira ngasi kantu galonzize bulya bene bantu barhalemagwa n’obuhashe bw’okucilongoza. (Yeremiya 10:23) Ciru amashanja gakacilunga haguma, garhakaba n’obuhashe bw’okuyusa amazibu g’igulu, ciru gakajira okwago koshi.

•   “Bulya abantu bacîsîma bone, basîme n’enfaranga, . . . bantafabwonjo [barhalonza obumvikane, NWT].”​—2 Timoteyo 3:2, 3, Mashi Bible.

   Ebi oko kuhugwîre: Ebibliya yali erhi yalebire oku bantu banji b’omu mango girhu bakabire ba kucikaliza barhakanakazir’ikola haguma lyo bajira aminja.

 Arhali ebiragane by’amaguvernema ga bene bantu byo byakarhuma igulu lirhu lyaba linja omu mango gayisha. Nnâmahanga ahizireho Omurhegesi w’igulu ogwerhe obuhashe, Yezu Kristu. Ebibliya edesire ntya okubimuyerekire:

•   “Obwami [burhegesi] bumuli aha nfune, akaziderhwa: Muhanûzi-Mukulu, Nnâmahanga w’obuhashe, Larha w’ensiku n’amango, Mwami [Muluzi] w’omurhûla.”​—Izaya 9:6, Mashi Bible

 Yezu ye Mwami w’Obwami bwa Nnâmahanga erhi burhegesi buli empingu. (Mateyo 6:10) Agwerhe emisi, obwenge n’irala ly’okushibirira igulu na bene bantu. (Ennanga 72:12, 16) Hano aba ali arhambula, obo burhegezi bw’empingu bwayish’ishereza “balya bashereza igulu” n’okuyusa amazibu gali okw’igulu.​—Amafulûlo 11:18, Izaya 35:1, 7.

 Ly’oyiga binji lugenda okuhwa loshi kw’amazibu galerhwa n’okushanja kw’e climat, osome omwanzi gudesire “Bici Ebibliya Edesire Lugenda Okushanja kw’e Climat n’Akasanzi Kirhu Kayisha?”