MUBE MASU!
Okuyushûka kw’Ibeyi ly’Ebintu omw’Igulu Lyoshi—Bici Ebibliya Edesire?
Omu raporo y’Omwezi gwa Ndarhu, Mwaka gwa 2022, prezida w’e Groupe de la Banque Mondiale arhonda abantu omukuderha ntya: “Obuhirhi bw’igulu buli omu mazibu. Ibeyi ly’ebintu liri lyayushuka bwenene, cikone obuhirhi bw’igulu bohe burhali bwayushuka.”
E Fonds Monétaire International edesire ntya: “Ibeyi ly’akarbira n’ebiryo, lyayushusire duba-duba, n’oko kwahumire bwenene oku bantu balamire omu bihugo bikenyi.”
Ebibliya erhurhabire rhuhugûkwe bulya gurhi rhuli rhwarhimanana n’ago mazibu g’obuhirhi, gurhi rhwakagalwisamwo na bulangalire buhi buhali bw’okuyusa ago mazibu loshi.
Okuyushûka kw’ibeyi ly’Ebintu omu “nsiku nzinda”
Ebibliya ehamagire gano mango rhulamiremo, “nsiku nzinda.”—2 Timoteyo 3:1.
Yezu adesire oku hakabire “eby’okuyobohya” mwagano mango. (Luka 21:11) Okuyushûka bwenene kw’ibeyi ly’ebintu kuli kwayobohya abantu. Abantu bali bayoboha lugenda amango gabo gayisha na lugenda okuhikiriza amalagirire g’emilala yabo.
Ecitabu c’Amafulûlo cali erhi calebire lugenda okuyushûka kw’ibeyi ly’ebiryo mwa gano mango. Cidesire ntya: “Nayumva eliri nk’izu. . . . Lyaderha mpu: ‘Ciro ciguma ca ngano cife omulegerege gw’omunyakasi, n’ebiro bisharhu by’iporoji bife omulegerege gw’omunyakasi.’”—Amafulûlo 6:6, Mashi Bible.
Ly’omanya binji lugenda “ensiku nzinda” n’obulebi buli omu citabu c’Amafulûlo, olole evideo edesire Igulu Lyashanjire Kurhondera omu Mwaka gwa 1914 n’omwanzi gudesire “Balya Bantu Bani Bashonyire oku Nfarasi bo Bandi?”
Oku amazibu g’okunyiha kw’obuhirhi ganahwemwo
“Bakaz’iyûbaka enyumpa banazibêremwo, bakaz’irhwera olukoma lw’emizabibu banalye amalehe gayo. Barhakayûbaka enyumpa mpu owundi muntu abe ye oyihandamwo, barhakarhwera mpu owundi muntu abe ye obirya.”—Izaya 65:21, 22.
“Idaho lyàyêra engano; emburho yage yasogorokera oku busongerwe bw’entondo.”—Ennanga 72:16.
“Bulya abagaraganda balenganyire n’abakenyi balaka, lero Nyamuzinda aderha erhi: ‘ka nyimukage, ngend’irhabala oyu bali bavumanga.’”—Ennanga 12:5. a
Hono hof-hofi, Nnâmahanga ayusa amazibu g’okunyiha kw’obuhirhi kuli kwayobohya bantu. Arhanajire ntyo omu cihugo ciguma cone, cikone omw’igulu lyoshi. Ly’obona gurhi ayish’ijiramwo ntyo, osome omwanzi gudesire “Ka Rhwanalangalira oku Enjira z’Okukolesa Obuhirhi bw’Ecihugo (Système Économique) Zirhalimo Obubule bw’Obushinganyanya Zanacibeho?”
Cikone ciru n’ene, Ebibliya yanakurhabala olwise oko kuyushûka kw’ibeyi ly’ebintu. Gurhi yakakurhabalamwo? Erimo amahano gakakurhabala okakolesa ensaranga n’obwenge. (Emigani 23:4, 5; Omuhanûzi 7:12) Ly’omanya binji, Osome omwanzi gudesire “Ulinde Mali Yako” n’ogudesire; “Gurhi Rhwakalama na Bintu Bisungunu.”
a Yehova ly’izino lya Nnâmahanga.—Ennanga 83:18, NWT.
Olole n'Ebi Bikulikire
AMASHUZO G’EBIBLIYA
Ecimanyiso c’‘Ensiku Nzinda’ Erhi “Buzinda” co Cihi?
Ebibliya yali erhi yalebire bintu binji byakayerekine ensiku nzinda.
AMAHUGÛLO G’EMILONGO Y’EBIBLIYA
Amahugûlo g’Olwandiko lw’Abafilipi 4:6, 7—“Murharhanyagya Cici”
Masala gahi mberuluka gakabarhabala abakozi ba Nnâmahanga bamulangalire n’okuba n’omurhûla gw’ekandalala?
OKUBIRHUYEREKIRE
Bulya gurhi oyige Ebibliya?
Ebibliya eri yarhabala bantu banji babone amashuzo oku madoso g’obulagirire bwenene rhucidosa omu kalamo. Ka nawe olonzize omanye amashuzo?
OKUBIRHUYEREKIRE
Obwire Abahamirizi ba Yehova Bakuyigirize Ebibliya
Obwire Abahamirizi ba Yehova bakulambagirire lyo muyiga emyanzi y’Ebibliya haguma, erhi okolese njira isharhu z’okuciyigiriza Ebibliya.
