K’oli muguma w’omu miliyoni y’abantu bahikirwe n’amazibu gw’okusherera kw’e climat? E climat mbi n’amazibu gayo binayishe omu njira nyinji. Empusi ndarhi, e typhons, n’enkuba nyinji bwenene kanji-kanji binarhume emilaba yaluga bwenene n’amishi gayunjule bwenene n’okushereze bintu binji. Enkuba nyinji bwenene yanarhuma obudaka bwarherera n’empusi y’akalemera yanalerha emilazo yakarhuma emizirhu yahya. Okubulikana kw’enkuba, idurhu lidarhi n’empusi eriw’emboho nyiinji nabyo byanalerha obushereze bunji.

 Omu maeneo manji g’igulu, amazibu galerhwa n’e climat mbi gagendekire gayushuka bwenene. Eraporo z’e La Fédération internationale des Sociétés de la Croix-Rouge et du Croissant-Rouge ziyerekine oku “omubalè gw’abantu bahikirwe n’obuhanya nago gugendekire okuyushuka. Okuyunjulira kw’amishi, empusi ndarhi, okubulikana kw’enkuba, ebyo byoshi bigendekire okulerha obushereze n’okujira bantu banji bafê n’abandi bahame aha mwababwe ngasi mwaka.”

 Erhi ebintu bya ntyo biba, abantu banalibuke omu hali y’omubiri n’omu kandalala. Banalibuzibwe n’entanya enyanya z’okuheza ebirugu byabo, enyumpa yabo, erhi ciru enyanya z’ okufîrwa n’omuzigirwa wabo.

 Erhi akaba wahikirwe n’amazibu galerhwa n’okusherera kw’e climat, Ebibliya yanakurhabala okugalwisa. Ehânyire oburhulirize, obulangalire, n’amahano minja; ebyo byoshi byarhabire bantu banji bwenene bahikirwe n’obuhanya bulerhwa n’okusherera kw’e climat. (Abaroma 15:4) Kandi eshuzize amadoso g’obulagirire bantu banji bacidosa: Bulya gurhi Nnâmahanga aleka ebi birhuhikire​—ka buli buhane ampire?

 Ebibliya eyigirizize oku arhali Nnâmahanga ye lerhera abantu amazibu gabahikira. Erhuyemezize n’obwalagale oku “Nnâmahanga arharhangulwa n’amabi naye yene arharhangula ndi.” (Yakobo 1:13, NWT) K’okuderha oku arhali Nnâmahanga ye lerhera abantu amazibu g’okusherera kw’e climat.

 Ebibliya eganirire mango malebe Nnâmahanga akolesagya emisi y’obulemi ly’ahana abantu babi. Cikone ezo hali ziri lubero n’amazibu gali galerhwa n’okusherera kw’e climat ene, bulya gohe ganahike buzira kulaliza gananahikire abantu babi n’abinja. Lubero n’oko, emyanzi eri omu Bibliya eyerekine oku ensiku zoshi Nnâmahanga alanzire abantu barhagwerhe magosa, abahîre oburhonde embere z’akasanzi, anabahugûlira ecarhuma ahâna buhane bulebe. Kwa lwiganyo, omu mango ga Nuhu Nnâmahanga ahugûlire abantu bulya gurhi alerha Enkuba y’Ecihonzi, abahâ oburhonde embere z’okujira ntyo, analanga Nuhu n’omulala gwage.​—Omurhondêro 6:13; 2 Petro 2:5.

 Ly’omanya binji lugenda gurhi rhumanyiremwo oku obuhanya buli bwahikira abantu ene burhali buhane burhenga emwa Nnâmahanga, olole ecigabi cidesire “Biblia Inasema Nini Juu ya Misiba ya Asili?”

 Ebibliya eyerekine oku Yehova a Nnâmahanga anashibirire abantu anaba wa bwonjo. Olole aga mandiko g’okurhuliriza.

•   Izaya 63:9: “Omu malibuko gabo goshi [Nnâmahanga] ababala bwenene.”

   Kuli kuderha oku: Yehova anaciyumve kubi bwenene erhi abona abantu bali balibuka.

•   1 Petro 5:7: “Kushibirira ayorha ammushibirira.”

   Kuli kuderha oku: Yehova aba alonzize obe n’akalamo kinja.

 Obuzigire bwa Yehova n’obwonjo bwage bunamushumye ajire kantu kalebe. Anarhuhe oburhulirize kugerera amahano g’okulangalirwa gali omu Bibliya n’obulangalire bwinja ehânyire lugenda amango gayisha garhakacibamwo amahanya galerhwa n’okusherera kw’e climat.​—2 Abakorinti 1:3, 4.

 Ebibliya eyerekine eciragane ca Yehova cidesire oku ‘arhuha obulangalire bw’ensiku zay’isha.’ (Yeremiya 29:11, Mashi Bible) Aba alonzize abantu bashagalukire akalamo omu paradizo hanw’igulu, ci arhali kulama omu boba enyanya z’okusherera kw’e climat.​—Omurhondêro 1:28; 2:15; Izaya 32:18.

 Nnâmahanga alerha ago mango minja kugerera oku Bwami bwage, k’okuderha burhegesi b’omu mpingu bwayish’irhambulwa na Yezu. (Mateyo 6:10) Yezu agwerhe obwenge n’obuhashe buhûnyirwe ly’acika amahanya galerhwa n’okusherera kw’e climat. Amango Yezu ali hanw’igulu, ayerekine oku agwerhe obuhashe bw’okucika okusherera kw’e climat. (Marko 4:37-41) Ayish’irhegeka n’obwenge n’obumanye, ayigiriza abantu gurhi bakashibiriramwo aha balamire buzira kushereza obulemi. (Izaya 11:2) Omu burhegesi bwa Yezu, abantu barhakacilibuzibwa n’obuhanya bulerhwa n’okusherera kw’e climat.

 Wanacidosa ntya: ‘Mangaci Yezu akolesa obuhashe bwage ly’ayusa amazibu galerhwa n’okusherera kw’e climat?’ Ly’obona ishuzo ly’er’idoso, olole ecigabi cidesire, “Ufalme wa Mungu Utatawala Dunia Wakati Gani?”

 Amahano g’Ebibliya ganakurhabala embere obuhanya bulerhwa n’okusherera kw’e climat buhike, omu mango g’obuhanya, n’enyuma z’obuhanya

•   Embere obuhanya buhike: Okayorha ocirheganyize ly’oyish’ijira duba-duba.

   Ebi Ebibliya edesire: “Omwenge akabona obuhanya anabuyâke, abahwinja bohe mpu barharhaluka, bayandûle.”​—Emigani 22:3.

   Kuli kuderha oku: Omanye bwinja amahanya gakahika omu eneo yinyu ly’oyish’ijira duba-duba n’okulanga omulala gwawe.

   Ebyabwinwe: “Olusiku rhwayakaga omuliro gwarhengaga omu muzirhu, rhwal’iyosire rhucirheganyize. Rhwal’iyosire rhugwerhe enshoho zirhu z’okulibirhana zalimwo amafumu n’emishangi. Abantu bal’irhuzungulusire boshi bal’iyobohire bwenene, barhanacikag’irhanya bwinja. Cikone rhwehe rhwagwerhe ebintu byoshi rhwal’ilagirireko, namvuzire omunkwa bwenene kuli oko!”​—Tamara, w’e Californie, Étas-Unis.

•   Omu mango g’obuhanya: Osegeze obwenge oku bintu by’obulagirire bwenene.

   Ebi Ebibliya edesire: “Omuntu obuzine bwage burhaba omu bunji bw’ebirugu byage.”​—Luka 12:15.

   Kuli kuderha oku: Obuzine buba bwa bulagirire bwenene kulusha obuhirhi.

   Ebyabwinwe: “Erhi e Typhon ehamagalwa Lawin b eshereza enyumpa yirhu, ntahashaga okurhanya bwinja lugenda ebi nal’ishinganine okujira. Cikone akantu kaguma kone nahashire okujira kwali kushenga Yehova Nnâmahanga kurhenga oku murhima. Nahugûkwa oku bintu by’omubiri byone rhwahezize cikone arhali buzine bwirhu.”​—Leslie, w’omu Philippines.

•   Enyuma z’obuhanya: Orhacilibuzagya enyanya z’eby’irhondo.

   Ebi Ebibliya edesire: “Murhakag’iciyirha oku b’irhondo; olusiku lw’irhondo lwacilongeza lwône.”​—Mateyo 6:34.

   Kuli kuderha oku: Orhakag’ihangayika bwenene lugenda amazibu g’amango gayisha.

   Ebyabwinwe: “Erhi empusi ehamagalwa Irma eyus’izikisa enyumpa yani omu mishi, nal’ishinganine ntôle mihigo minji kulusha agandi mango goshi nanahanyika bwenene omu murhima. Nacihangana lyo nkulikira ihano ly’Ebibliya lidesire oku rhurhacilibuzagya enyanya z’ebirhondo. Nahugûkwa oku kugerera oburhabale bwa Yehova, nakahash’ir’ilwisa bwinja ago mazibu kulusha oku nal’irhanyize.”​—Sally, w’omu Floride, États-Unis.

 Ly’obona agandi mahano gakakurhabala, olole ecigabi cidesire, “Wakati Musiba Unatokea​—Hatua Zenye Zinaweza Kuokoa Uzima.”